|
| |||||||
| قصص قصيرة قصص قصيرة,قصه واقعيه قصيره,قصص رومانسية قصيرة. |
 |
| | LinkBack | أدوات الموضوع | انواع عرض الموضوع |
|
#16
04-23-2010, 12:19 AM
| ||
| | ||
| وصلنا السوبرماركت وشفت سيارة خالد واقفة بالمواقف بشكل عادي ,,, وقف ابراهيم سيارته بجنب سيارة خالد ,,, ونزلت بسرعة ,,, فتحت باب خالد ,,, وكان جالس وانفاسه ثقيله ويئن وماله قوة حتى يرفع يده ,,, ناظرت وجهه ,,, وين ماشوف جروح ماشوف دم انا توقعت اني ابلقاه مكفخ ,,, تفحصت صدره وبطنه بيدي يمكن طاعنه بدر او شي لكن مافيه اثر جروح و ماعليه أي دم انا = خالد وجهه شاحب ويصب عرق ويئن ابراهيم = خالد وش فيك .؟ ,,, عسى ماشر .؟ انا = خالد صارلك شي .؟ ابراهيم = وش فيه مايرد انا = خالد رد علينا ,,, راسك يعورك .؟ حرك خالد راسه بايه تحريك خفيف التفت لي ابراهيم ابراهيم = يمكن حس بدوار ولا قدر يسوق ( والتفت لخالد ) نوديك المستشفى .؟ حرك خالد راسه بلا تحريك خفيف ورفع يده خالد = ال ... بي ... ابراهيم = خلنا نشيله ونحطه بسيارتي بسرعة ركضت لسيارة ابراهيم وسدحت مرتبة الراكب ورجعت لبراهيم وشلنا خالد وحطيناه بمكان الراكب وركبت انا ورا ,,, وانطلق ابراهيم بالسيارة بعد ماقفل سيارة خالد مدري وش اسوي ,,, فكيت ازارير ثوبه انا = خالد اكلت علاجك اليوم .؟ خالد رد علي يئن واضح من ملامح وجهه انه يتألم من شي انا = خالد رد علي اكلت علاجك .؟ ابراهيم رح للمستشفى بسرعة هنا حرك خالد يده بلا ابراهيم بعصبية = مايبينا نوديه المستشفى الخبل انا = خلنا نوديك المستشفى ( والتفتت لبراهيم ) رح رح الطوارئ ماعليك منه رفع خالد يده مرة ثانية خالد = ال .. بي ... ت ... الب ... البيت ابراهيم = وش يقول .؟ انا = عيا مايبي المستشفى ,,, يبي البيت ابراهيم = وين نوديه الحين يمكن مانلقى خاله ابو عبد الله .؟ انا = لا لا ,,, اخاف مانلقى ابو عبد الله ويكسرنا صويلح تعرفه عاد انت مايداني خالد يصير بالبيت وابو عبد الله مو موجود ابراهيم = اجل بنروح المستشفى انا = بيتي انا الحين فاضي ,,, بنخلي خالد يرتاح فيه ,,, واحسن بعد يصير تحت نظرنا ( والتفتت لخالد ) خالد وش تحس فيه الحين يئن وانفاسه بدت تهدأ اكثر كأنه يبي ينام وصلنا ونزلت بسرعة افتح بيبان بيتي لبراهيم اللي قدر يشيل خالد بنفسه فتحت المجلس ونزل ابراهيم خالد بالارض انا = ماهو ثقيل عليك .؟ ابراهيم وانفاسه سريعة = لا ,,, نحيف وقعد بالارض بجنب خالد ابراهيم = خالد تسمعني .؟ انا = ابروح اجيبله ماء وركضت للمطبخ ورجعت للمجلس ومعي كوب ماء ابراهيم مرتبك = خالد الحق خالد مايرد علي ( والتفت لخالد ) خالد خالد جلست بالارض مرتبك ,,, رفعت راسه وقربت الكوب من فمه احاول اشربه الماء انا مرتبك = خالد اشرب ,,, خالد جبتلك ماء ابراهيم مرتبك = خالد قم قسم بالله لعطيك كف يصحيك ,,, قمممم انا مرتبك = خ ,,, خالد اشرب راسه يتمايل مع تحريك يدي اللي ماسكته نزلت راسه ببطئ ,,, اول مرة اشوف احد يغمى عليه قدامي ,,, أنينه وقف وانفاسه هادية جدا كنه نايم انا بحزن = بس ابراهيم ,,, شكله اغمى عليه ابراهيم بخوف = اخاف مات حط ابراهيم اذنه على صدر خالد ابراهيم = اسمع قلبه حطيت اذني على صدر خالد وسمعت نبضات قلبه وبعد شوي رفعت راسي ,,, جلسنا 3 دقايق وانا و ابراهيم نتأمل خالد وحنا ساكتين ماندري وش نسوي انا = خلك عنده ابروح اجيب لحاف ومخدة رحت وجبت لحافي ومخدتي ورجعت ولقيت ابراهيم الى الحين على وضعه انا = قم خله يرتاح ولحفته وحطيت المخدة تحت راسه ,,, وجلسنا انا وابراهيم آخر المجلس بعيد عن خالد ابراهيم = مرة قالي صالح انه عنده مرض براسه بسبب حادث صارله ابتسمت بسخرية صالح ,,, يعني يدري ومع ذالك هذي افعاله مع خالد وش النذالة اللي فيه انا بسخرية = وماسألته ليه مايخليه بحاله يكفي خالد اللي فيه ,,, يجي يزيد عليه بحركاته اللي زي وجهه ابراهيم = يقالك ماتعرف صالح انا = المهم شافك احد من اهلك .؟ ابراهيم = لا ,,, رحت غرفتي ومحد شافني كلهم نايمين أذن الظهر وخالد الى الحين ماصحى ,,, قام ابراهيم وجلس بجنبه وجلس يكلمه كنه يسمعه ابراهيم = يله خالد آذن الظهر قم صل ,,, ( وتغير صوته ) قم صل خالد استغربت تصرفه توني ادري ان ابراهيم حساس بهالمواقف ابتسمت ,,, ياحليلك يابراهيم ,,, قمت وجلست بجنب ابراهيم انا = بيقوم ان شاء الله ,,, قم خلنا نروح نصلي ابراهيم = بسيارتي عطر خلنا نشممه يمكن يقوم انا = لا خله يرتاح ,,, هو مرة قالي انه ارتاح بعد ماغمى عليه ,,, خله ,,, يله قم فجأة رن جوال ابراهيم ابراهيم = اوه هذا صويلح ( ورد ) الو ,,, انا بالبيت ,,, خالد ,,, مدري عنه يمكن ببيته ( والتفت لي يبتسم ) ,,, يله يله صالح مشغول انا الحين ,,, مع السلامة طلعنا من البيت ورحنا للمسجد وكان الامام فايز اخو ابراهيم ,,, بعد ماطلعنا من المسجد ابراهيم = ابحتري فايز يطلع من المسجد ونجيب سيارة خالد انا = اوه صح تصدق نسيت سيارته ,,, طيب انا ابروح للبيت الحين بس انتبه لا تلبقون سيارة خالد بالحارة ,,, لبقوها بأي مكان لو بالحارة الثانية ابراهيم مستغرب = ليه .؟ انا = عشان مايشوفها ابو عبدالله ,,, وش بنقوله اذا شاف السيارة وسألنا عن خالد .؟ ابراهيم = ايه صح ,,, والله المشكلة ,,, امممم خلاص ماعليك نلبقها باي مكان المهم نجيبها انا = يله اجل انا مستعجل الحين ,,, احتريك دخلت البيت ومريت المجلس وشفت خالد على حاله ,,, رحت غرفتي ولقيت سالم يبدل انا = متى جيت سالم = توني انا = مريت المجلس سالم مستغرب = المجلس .؟ لا ,,, بروح اشوفه وجا بيطلع لكني مسكته انا = وين وين لا تروح سالم = وش فيه المجلس .؟ انا = اسمع خالد نايم بالمجلس لاتروحله حتى ماتزعجه سالم بفرح = خالد نايم عندنا ,,, ( وكمل كأنه يفكر ) بس ليه ماينام ببيته انا = هو حر ,,, رح هات سلمى ومعاذ وقل لسلمى ماتدخل المجلس ,,, ترا اللي يجي المجلس منكم بضربه رحت للمجلس وجلست عند خالد ,,, بعد ساعة جا ابراهيم وفايز فايز = السلام عليكم انا = وعليكم السلام هلا فايز فايز = هلا فيك وراح على طول وجلس عند خالد يقرا عليه ,,, همست بابراهيم انا = علمته .؟ ابراهيم = ايه ,,, ( ومد علي جوال ) خذ هذا جوال خالد ,,, بروح للبيت شوي يعنني جاي من المدرسة وبعدين اجي ,,, مع السلامة بعد 10 دقايق جا ابراهيم ابراهيم = خالد شفت ابو عبد الله قبل شوي يدخل بسيارته ,,, نعلمه .؟ انا = لا وش نعلمه ,,, بعدين يقول ليه ماجبتوه لبيتي ,,, وش نقوله نقول اننا خفنا من صالح .؟ ابراهيم = إنا لله وإنا إليه راجعون ,,, كله من صويلح هذا خلص فايز وجا عندنا فايز = انتم متأكدين انه مغمى عليه ,,, سبحان الله كنه نايم وراح له مرة ثانية فايز = خالد خالد ( وهز كتفه بشويش) خالد خالد ,,, لا حول ولا قوة إلا بالله ( وجا عندنا ) ماعليه ان شاء الله ,,, عندي موعد لازم اروح الحين ,,, ابراهيم لا تنسى تطمني عليه ,,, مع السلامة وراح ,,, جلسنا انا وابراهيم نحتري خالد يقوم ,,, جت الساعة 2 ونص وهو الى الحين ماصحى ابراهيم = خالد خلنا نوديه المستشفى انا = لا ,,, ماسمعته عيا قبل يغمى عليه ,,, اصبر ان شاء الله الحين يقوم ابراهيم = بس خ وقاطعه رنين جوال خالد ,,, القيت نظرة عليه ,,, مكتوب ( الغالي يتصل بك ) انا = منهو الغالي .؟ ابراهيم = مدري ,,, بس لا ترد انا = ماني راد سكت الجوال ورجع يرن مرة ثانية ونفس المتصل ونفس الشي ماردينا ,,, بعد 5 دقايق رجع يرن وبنفس المتصل ونفس الشي ما ردينا ,,, وجلس الجوال يتصل اكثر من 10 مرات ,,, ارتبكنا من كثر مايتصل ,,, صرنا نروح ونرد بالمجلس ابراهيم مرتبك = هذا اكيد ابو عبد الله يتصل يوم شاف خالد ابطى انا مرتبك = شسوات .؟ ابراهيم مرتبك = ياخي احس مابقلبنا رحمة ابو عبد الله بجنبنا يتصل بولده وهو عندنا مانعلمه انا = لو نعلم ابو عبد الله الحين بيزعل منا بيقول ليه ماعلمتوني ,,, بيقول ليه ماجبتوه لبيتي ,,, وش بنقول ,,, يارب سترك يارب رجع الجوال يرن مرة ثانية لين سكت ,,, فجأة رن جوال ابراهيم ابراهيم = هذا فايز ( ورد على الجوال ) هلا فايز ,,, وعليكم السلام ,,, لا والله الى الحين ماقام ,,, والله مادري ,,, ان شاء الله ,,, بس المشكلة خاله يتصل عليه ,,, لا لا لا لا تقوله ,,, ايه ان شاء الله ,,, مع السلامة رحت لخالد وجلست عنده وحطيت يدي على راسه ,,, انا = خالد خالد قم ابو عبد الله يتصل عليك ابراهيم = امش خلنا نطلع برا مليييييت وانا هنا ,,, احسسسسسس بنفجر انا = اخاف يقوم مايحصل احد ابراهيم = شوي بس ماحنا مطولين طلعنا انا وابراهيم من البيت وتركت جوال خالد عنده انا = ابراهيم رح عند اهلك يمكن يحترونك الحين ابراهيم = لا انا قايلهم اني عندك وقفنا انا وابراهيم شوي بالشارع انا = انا برجع للمجلس ورجعت وبعد 10 دقايق وانا بالمجلس جاني ابراهيم يركض مرتبك ابراهيم مرتبك = خالد الحححق ابو عبد الله طلع بسيارته من الكراج شكله بيروح يدور خالد قم قم ركضنا انا و ابراهيم ولحقنا عليه قبل يروح انا مرتبك = عم عسى ماشر وين بتروح .؟ ابو عبد الله بخوف = الساعة جت 3 وخالد ماجا ,,, اتصل عليه ولا يرد ,,, ابروح لمدرسته ابراهيم = ارتاح ياعم حنا بنروح عنك ابو عبد الله = بارك الله فيكم ياعييلي بس انتم توكم جايين من مدارسكم ,,, انا بدوره ,,, اتصل عليه مايرد ,,, ( واخذ جواله ) يارب احفظ وليدي يارب ,,, ( نزل جواله وبخوف شديد ) مايرد ,,, ( ومشى بسيارته شوي ) انا مرتبك = اصبر ياعم ,,, لا تروح ,,, ااا ,,, خلك ياعم انا وابراهيم بندوره وان شاء الله انه طيب ,,, طف سيارتك طفها وبعد محاولات طاعنا ابوعبد الله ورجع بسيارته داخل البيت ,,, التفتت لابراهيم مرتبك انا = شسوات ابراهيم = امش خلنا نروح للمجلس دخلنا المجلس وخالد على حاله ابراهيم = اعطيه كف ذا والا وش اسوي به ( وراح لخالد ومسك اكتافه وقعد يهزه خفيف ) خالد قم قم ابو عبدالله يبيك قم وعلى آذان العصر رن جوال ابراهيم ابراهيم = خالد الحق هذا ابو عبد الله وش اقوله .؟ انا مرتبك = ااا وسكتت مدري شقول ,,, توكل ابراهيم على الله ورد ابراهيم = الو ,,, وعليكم السلام ,,, اا ,,, لا ما ما ما ,,, مالقيناه ,,, عين خير عين خير ,,, هو وين بيروح يعني اكيد طيب ,,, هاه سيارتي اا لا انا انا انا اخذت سيارة واحد من اخواني مارحت على سيارتي ,,, تطمن تطمن ,,, انا اذا لقيته اتصلت فيك ,,, مع السلامة وبعد شوي رن جوال خالد والغالي يتصل بك ,,, يالله كيف ابو عبد الله خايف عليه مرة انا = الحيييييين وشلون مانقدر نروح نصلي بيشوفنا ابو عبد الله صرنا انا وابراهيم نروح ونرجع بالمجلس ,,, فجأة تحرك خالد ويئن بصوت ضعييييف انا و ابراهيم = خالد وبلهفة رحنا له وجلسنا عنده ,,, مسك خالد راسه بقوة وهو يئن خالد = ااآه ااه راسي راسي صداع ااآه لا ااه ماسك راسه بقوة وينقلب شوي بكامل جسمه على جنبه الايمن وشوي ينقلب بكامل جسمه على جنبه الايسر وياما رفع راسه وياما نزله خالد = راسي راسي ااه ااه راسي ابراهيم = خالد ( ومسك يديه عشان يثبت خالد بمكان واحد ) خالد تسمعني انا = خالد علاجك وينه .؟ رن جوال خالد مرة ثانية ابراهيم = هذا ابو عبد الله خالد رد عليه خالد = راسي راسي ( وكمل بضعف ) ااه راسي تركه ابراهيم و سكتنا عنه لين يهدا شوي وبعد ربع ساعة ,,, خفت حركاته المستمرة لكن انفاسه سريعة وثقيلة التفت بضعف علينا وهو حاط يد وحده على راسه خالد بهمس = وش هالمكان وين انا ,,, اخخخ راسي انا = انت ببيتي ,,, الحمد الله على سلامتك التفت لي وهو بالقوة يفتح عينه من الصداع ابراهيم = الحمد الله على سلامتك ,,, انت اتصلت علي الساعة 9 وقلت تعاللي بسرعة ,,, وشلونك الحين .؟ خالد = ليش انا ببيتك ,,, ليه ماني ببيت خالي .؟ فجأة رن جوال ابراهيم ابراهيم = اوه هذا ابو عبد الله وش اقوله .؟ خالد = ليه انا هنا ابراهيم = خالك ابو عبد الله من اليوم يتصل عليك ,,, تقدر تروح له .؟ خالد بضعف = ابروح الحين قبل يذن الظهر وحاول يقوم بس انا وابراهيم منعناه انا = اصبر يارجال اولا الحين الساعة 3 ونص العصر يعني فاتتك صلاة الظهر والعصر ,,, ثانيا خالك من اليوم وهو يتصل عليك خذ جوالك شفه ,,, هو اسمه بجوالك الغالي .؟ تفاجئ خالد خالد = العصصصصصر ( وأخذ الجوال مني وفتحه ) اوه لا ,,, ليه جبتوني هنا ليه ماني بالبيت .؟ ابراهيم = خفنا خالك يصير ماهو بالبيت وبعدين مادرينا انه بيغمى عليك سكت خالد شوي كنه يستوعب بعدها مسك راسه خالد بهمس = آسف ياجماعة تعبتكم ابراهيم = افا عليك ماتعبتنا ولا شي بس الله يهديك خوفتنا عليك خالد بضعف = شكلي اتعبت نفسي كثير ,,, رحت أمس اودي اهلي للرياض ورجعت بنفس اليوم .؟ انا = متى رجعت .؟ خالد = الساعة 11 في الليل ,,, بس كنت عادي ماحس بتعب ( تنهد وكمل) بس اليوم وانا في المدرسة ماقدرت اركز من الصداع واستأذنت وطلعت ,,, حاولت اركز بالسواقة وارجع للبيت بنفسي بس ,,, اآ ,,, بس ( والتفت لبراهيم متفشل منه ) اضطريت اتصل عليك وانت بالمدرسة عجزت اتحمل راسي كان يعورني ابراهيم = ماعليك ابو خلود بالعكس سويت فينا خير انا وخالد طلعتنا بدري اليوم هههههه انا = ماعليك خالد ,,, اذا كنت تقدر تقوم قم صل ورح لخالك ,,, المسكين من اليوم وهو يتصل عليك حتى كان بيروح يدور عليك بس حنا منعناه ابراهيم = تقدر تقوم .؟ قام خالد بصعوبة ,,, مسكه ابراهيم يساعده خالد = بروح للبيت ,,, ماقصرتوا تعبتكم معي ,,, ابروح اص ( ومسك راسه ) اخخخ راسي اآه طلع خالد من البيت بمساعدتنا واتصل ابراهيم بابو عبد الله ,,, وعلى طول المسكين طلع من بيته ابو عبد الله بخوف = خالد وينك فيه ياولدي ليه ماترد على جوالك ,,, ( والتفت لنا ) وش فيه .؟ تركنا خالد وراح يسلم على راس خاله بس ابو عبد الله ضمه وهو شوي ويصيح ابو عبد الله = اكيد ماكلت دواك ,,, كم مرة اقولك لا تنساه ,,, تعال اوديك غرفتك خالد = لا خال انا اقدر اروح بنفسي احس احسن الحين ( والتفت لنا ) مشكورين شباب وراح يترنح للملحق ابو عبد الله = بارك الله فيكم ياعييلي ,,, الحمد الله انه طيب الحمد الله الحمد الله يارب ( وكمل بحزن ) فقدت عيالي ولا ابي افقد خالد بعد ( وغطى وجهه بشماغه وبعدها رفع راسه) حياكم ياشباب حياكم ابراهيم الحساس بغى شوي ويصيح يوم شاف ابو عبد الله يغطي وجهه بشماغه والدليل صوته اللي تغير فجأة ابراهيم = احم ,,, لا لا حنا ماصلينا العصر مع السلامة انا = بنجي وقت ثاني نتطمن عليه مع السلامة وطلعنا ابراهيم = خالد فيه سؤال يطرح نفسه انا = وش .؟ ابراهيم = الحين انا وانت ليه هجينا من المدرسة ,,, ليه ماستأذنا وطلعنا مثل الناس انا = هههههههههههههههههههههههههههههههههههههههههههههه تصدق مدري ,,, اقول بس انا جوعان بروح اصلي واتغدى بعد صلاة العشا رحت لبيت ابراهيم عشان يروح معي لخالد ,,, اليوم ماطلع خالد ابد ,,, من آخر مرة شفته الى الحين ولا ادري كيف صحته ابراهيم = هلا خالد انا = هلا فيك ,,, ماتبينا نروح لخالد نشوفه .؟ ابراهيم = المغرب جبت سيارته بس ماشفته ولا شفت ابو عبد الله ,,, يله خلنا نروح ضربنا جرس بيت ابو عبد الله وطلع لنا صالح انا = انت دايم هنا ,,, ماعندك اهل ماعندك بيت صالح = اليوم وينكم فيه ,,, مختفيييييين انت واياه وش عندكم .؟ ابراهيم = ماعندنا شي ,,, خالد هنا .؟ صالح = ايه هنا وش تبون فيه .؟ انا = ياخي نبيه وش دخلك انت ,,, هو وينه الحين .؟ وابو عبد الله موجود .؟ صالح = ابو عبد الله موجود ابراهيم = وخالد وينه .؟ صالح = بغرفته ,,, تعالوا تعالوا @@@@@@@@@ يتبع
__________________ تكفون سجلوا بهاذي اللعبه يالله http://themafia.ae/?affuid=77398 |
|
#17
04-23-2010, 12:23 AM
| ||
| | ||
|
يتبع صالح = بغرفته ,,, تعالوا تعالوا وراح للملحق ولانه في الحوش دخلنا وراه ,,, وكان الملحق مقفل ,,, ضرب صالح باب الملحق بعنف ابراهيم = شوي شوي صالح = ماتشوفه صاك على نفسه مسكت يد صالح وجريته شوي انا = خلاص خله يمكن مشغول سحب صالح يده مني صالح = نطلعه غصب عنه وضرب الباب ضرب اعنف من الاول صالح بصراخ = افتححححححح الباب همس ابراهيم باذني ابراهيم = هو يبيها من الله سمعنا صوت خالد من ورا باب غرفته خالد = قسم بالله ان ماذلفت لوريك شغل الله ,,, ازعجتنيييييييييي ابراهيم = ههههههه لا الحمد الله طيب طيب هههههههههه صالح = شفتوا قلة أدبه ,,, مايحترم احد ( ورجع يضرب الباب ويكمل بصوت عالي ) افتح اقول افتح ابراهيم وخالد يبونك انا اكلم خالد من ورا الباب = خلاص خالد اذا كنت ماتبي تطلع لا تطلع نجيك وقت ثاني اول ماخلصت كلامي وينفتح الباب ,,, وكان خالد لابس بنطلون وطلع لنا وهو يلبس فنيلته خالد = والله آسف حسبته المروح ذا ,,, مادريت انكم معه ,,, حياكم حياكم دخلنا غرفته خالد = اللي اسمائهم بحرف الصاد مايدخلون ودفع صالح برا الغرفة وقفل الباب عنه خالد = حياكم الله الغرفة حوسة عذرونا ههههههههه كان اثاث الغرفة فخم ,,, السرير والطاولة والدولاب و الاب توب محطوط على الطاولة وشغال ,,, شكله كان يلعب فيه لكن فعلا كان كل شي حوسة وخاصة السرير والطاولة جلس ابراهيم على السرير وجلست بجنبه ,,, اخذ خالد كرسي الطاولة وجلس قبالنا ,,, كل هذا وصالح مازال يضرب الباب ويصارخ علينا ابراهيم = شكلك مشغول مانبي نزعجك بس حبينا نتطمن عليك خالد = لا والله ماني مشغول ولا شي ,,, بالعكس فاضي ولا عندي شي اسويه ( وحط يديه على اذانيه ) اخخخ ازعجنا هذا ,,, مع ان معه سبير الغرفة الا انه مثل ماتشوفون يقعد يطق يطق لين افتح انا ,,, يبي يزعجني وبس انا = وهو من متى وهو هنا .؟ خالد = من المغرب وهو مطيح عندنا ابراهيم = وانت ليه حابس نفسك هنا ,,, الى الحين تعبان .؟ خالد = لا ,,, الحمد الله اخذت مسكنات و الحين احسن ,,, بس صالح مطيح عندنا ومالي خلق اشوف وجهه ,,, قلت ادخل النت احسن ,,, اوه ازعجنا هذا انا = دخله فكنا منه قام خالد بعصبية وفتح الباب ومسك ثوب صالح وجره داخل الغرفة خالد بعصبية = ازعجتنا ( ودفع صالح على ورا ) ياخي معك السبير ليه ماتدخل بهدوء صالح بغرور = لا السبير عند الحاجة اذا كنت نايم مثلا او مانت هنا ذيك الساعة نستخدم السبير عصب خالد اكثر ومسكه خالد بعصبية = الواحد ماله خصوصية عندك ,,, قسم بالله كرهتني بعيشتي قام ابراهيم وحال بينهم ابراهيم = هدوا اللعب شباب ,,, صالح وش فيك قسم بالله صاير كريه قمت ومسكت خالد انا = امش ياخالد ودنا المجلس نبي نسلم على ابو عبد الله ونمشي ,,, اكلك علاجك .؟ التفت خالد على الطاولة لأن فيها اشرطة الحبوب متنثرة على الطاولة اللي فيها الاب توب وبعض الاشرطة فاضية خالد = اكلته والا ماكلته ماينفع ,,, حياكم للمجلس ,,, حياك ابراهيم طلعنا من الغرفة ودخلنا المجلس وصالح معنا ,,, جانا ابو عبد الله يهلي ويرحب بعد نص ساعة من السواليف والاخبار ,,, رن جوال خالد خالد = هلا ,,, وعليكم السلام ,,, ايه عرفتك ,,, هاه وش صار تراكم طولتو ,,, ( وطول وهو ساكت وابتسم رغم الهالات الواضحة اللي بوجهه) ,,, ههههههههه طبعا حبيبي هالايام مافيه الا بالقوة ,,, اخذت اللي ابيه منه واطمئن انا عند وعدي ,,, بس عطني العنوان مرة ثانية لو سمحت,,, ( حك راسه) والله شف يالحبيب انا مادل هنا زين لكن اباخذ معي واحد واتصل عليك ,,, بس الساعة كم اقابل المدير .؟ ,,, خلاص حلو ,,, قلت لك اطمئن وطمنه انا عند وعدي ,,, خلاص اذا جيت للرياض تفاهمت معه ,,, هلا حياك الله ,,, مع السلامة ونزل جواله وتوسعت ابتسامته اكثر ,,, والتفت لي ,,, وقبل يقولي شي ابو عبد الله = تتفاهم مع من .؟ التفت خالد لبو عبدالله خالد = مع واحد ابو عبد الله بعصبية = ادري انه مع واحد ,,, ليه ماتبي تقولي .؟ خالد = وش اقولك .؟ ابو عبد الله بخوف = هذا بدر .؟ لا يكون بتروح لهم للرياض .؟ خالد = لا ماهو بدر هذا واحد ثاني صالح = مدير وش اللي بتقابله .؟ خالد = البزارين لا يتكلمون ( والتفت لي ) خالد ممكن شوي .؟ وقام و قمت معه وقبل نطلع من المجلس التفت خالد لصالح خالد = ان جيت وراي قسم لفجر فيك وطلعنا ودخلني غرفته خالد = خالد انت تدور على وظيفة صح .؟ نزلت راسي انا = ايه خالد بابتسامه = وابشرك لقيتلك وظيفة من الفرح ضحكت غصب عني انا بفرح = والله ,,, وييييييين .؟ خالد = واحد اعرفه بالرياض لق وقاطعته ,,, خيييييييييييييبة انا بخيبة أمل = الوظيفة بالرياض .؟ خالد = ههههههههه لا لا ماهي بالرياض الوظيفة هنا انا بفرح = احللللف خالد = هههههههههه وش فيك مانت مصدق قربت اصيح من الفرح اخيرا اخيرا انا = وييييييييين .؟ خالد = بالمستشفى الأهلي المستشفى الاهلي هذا دورت عندهم ومن شروطهم شهادة كمبيوتر ,,, لا بالله راحت الوظيفة اجل انا = المستشفى الاهلي .؟ انا رحت لهم مرة وقالوا لازم شهادة كمبيوتر ماعندي شهادة منين اجيبلهم حط يده على كتفي وابتسم اكثر خالد = هالمرة مايحتاج ,,, اسمع يوم الاثنين نروح انا وانت للمدير ونقابله وصدقني بتتوظف عنده من دون شهادة الكمبيوتر ,,, ( وكمل بنبرة غريبة ) ياحبيبي كل شي بالواسطة يمشي انا بحزن = انا ماعندي واسطة خالد = موعدنا يوم الاثنين ,,, خلنا نروح عند خالي الحين ,,, بس اسمع لا تقول لحد لين يتم كل شي وطلع من الغرفة ,,, ماعندي واسطة ,,, ولا عندي شهادة ,,, معقول انا بتوظف ,,, بس مدري ليه احس انه ماراح يصير شي ,,, كل المستشفيات يحتاجون شهادة كمبيوتر = خالد انتبهت لخالد اللي يحتريني انا = السموحة سرحت شوي خالد = هههههههههههه امش جلسنا شوي عند ابو عبد الله ورجعنا انا وابراهيم و كلن على بيته ,,, متى يجي يوم الاثنين ,,, خايف خايف ,,, اخاف مايصير شي ,,, اخاف بعد هالفرح ماحصل شي ,,, خالد يقول بالواسطة ,,, من وين لي واسطة ,,, خالد لو انه من هالديرة كان قلت يمكن يعرف احد يتوسط لي هنا ,,, بس خالد من الرياض حتى الاماكن في هالديرة مايدلها بيعرف لي احد يتوسط لي ,,, حتى لو كان يعرف ,,, معارف خالد هم معارف ابو عبد الله ,,, العم ابو عبد الله تعب وهو يدور لي على وظيفة ماحصل ,,, لو ان لهم قريب واسطة كان راح له ابو عبد الله من مبطي وماتعب نفسه كل هالتعب على الفاضي ,,, وش وراك ياخالد ,,, اوه مو مهم وش وراه المهم احصل وظيفة ,,, يارب يارب @@@@@@@@@@@ نهايه الجزء السابع
__________________ تكفون سجلوا بهاذي اللعبه يالله http://themafia.ae/?affuid=77398 |
|
#18
04-23-2010, 12:24 AM
| ||
| | ||
|
* 8 * الاحد بعد صلاة العصر وانا طالع من المسجد = خالد التفتت وراي وكان ابراهيم يناديني انا = هلا ابراهيم ابراهيم = خالد شفت خالد .؟ قلت امزح معه انا = لا ماشفت نفسي اصبر ابدورني ابراهيم = ههههههه لا اقصد خالد تركي شفته .؟ انا = لا ,,, وش تبي فيه .؟ ابراهيم بغرور= اليوم معالي سموي عازمكم على كوفي على كيف كيفك انا = تقول عازمكم .؟ انا ومن .؟ ابراهيم = انت وخالد وصالح وماجد انا = خالد وصالح ,,, تبي تحول الكوفي الى حلبة مصارعة انت .؟ ابراهيم = هههههههههههههههههههههههههههههه وش تبيني اسوي اجل ,,, اخاف اعزم واحد واترك الثاني ويزعل علي واحد منهم صرنا نمشي لين دخلنا الحارة ,,, ودخلت البيت شوي اقول لخلود اني بطلع وبعدها رحت لابراهيم ولقيت ماجد عنده انا = السلام عليكم ابراهيم وماجد = وعليكم السلام ابراهيم = باقي صالح وخالد واخذ جواله يتصل عليهم انا = اقول وش المناسبة عندك ابراهيم = مافيه مناسبة بس من زمان ماطلعنا مع بعض لمكان محترم جا صالح وانضم معنا صالح = السلام عليكم الجميع = وعليكم السلام ابراهيم = وين خالد مايرد على جواله صالح = وانا وش دراني عنه ماجد = وشلون ماتدري و انت طالع من بيت خاله تو انا = رح صالح ناده صالح = خلونا نروح موب لازم يصير معنا ,,, يله يله بس امشوا ابراهيم = لا وين ,,, اخاف يزعل صالح = خله يزعل ابراهيم = مافيك خير انت ( واخذ جواله يتصل) افففف مايرد ,,, ابروح اطق الجرس عليه راح ابراهيم وبعد شوي جا ابراهيم = تو قايم من النوم يقول بيصلي ويجي الحين بعد ربع ساعة وحنا بسيارة ابراهيم نسولف جانا خالد لابس بنطلون كالعادة وفنيلة كحلية صالح = ياخي انت ماتحترم احد شف كلنا كاشخين الا انت خالد بملل = امسينا وامسى الملك لله ,,, دايم بمسي واصبح على وجيه الشياطين ,,, وش دخلك انت ,,, حتى نسيتني اسلم ( والتفت لنا ) ماجد خالد ابراهيم و بس السلام عليكم انا وابراهيم وماجد = ههههههههههههههه وعليكم السلام ماجد = ههههههه و صالح مهو السلام عليه هههههههههه ابراهيم = ههههه اركب اركب رحنا للكوفي وصلينا هناك المغرب ورجعنا وكلن دخل بيته لأن انا وابراهيم وصالح وماجد علينا امتحان بكرة إلا خالد لأنه مهو من نفس مدرستنا ,,, وطوال اليوم ماتكلمت مع خالد عن موضوع الوظيفة ,,, افففف متى يجي يوم الاثنين ,,, يارب اتوظف يارب ,,, مع اني غاسل يدي بسبب هالشهادة يعني لازم كمبيوتر اف بس الاثنين بعد صلاة العصر رجعت على طول للبيت اجهز ملفي قبل يمرني خالد نروح نقابل مدير المستشفى الاهلي ,,, يارب يارب اتوظف انا رايح لهم قبل وماحصلت شي ,,, الله يستر بس ,,, جهزت ملفي وطلعت من البيت احتري خالد ,,, بعد 5 دقايق طلع خالد من بيت خاله لابس بنطلون لونه سكري وفنيلة سودا ,,, استغربت بيقابل مدير ويلبس بنطلون خالد = السلام عليكم ,,, هاه جاهز .؟ انا = وعليكم السلام ,,, ايه جاهز خالد = خالد تدل مكان المستشفى الاهلي والا اتصل اخذ العنوان مرة ثانية .؟ انا = ايه ادله ( وكملت بارتباك ) خالد انا رحت لهم قبل وماستفدت شي يقولون لازم شهادة كمبيوتر ابتسم وحط ذراعه على كتفي وقربني منه خالد بابتسامة = توكل على الله وخلنا نمشي انا بارتباك = اا ,,, طيب اجيب ملفي دخلت البيت بسرعة وقلت لخلود اني بطلع ورحت لخالد اللي كان ينتظرني بسيارته ,,, طوال ماحنا نمشي وانا مرتبك معقول بتوظف معقول يارب يارب ,,, فجأة رن جوال خالد خالد = هلا اسلام ,,, وعليكم السلام ,,, الحمد الله بخير ,,, وشلونك .؟ ,,, كيييف .؟ ,,, مكة .؟ ,,, ومتى .؟ ,,, و قلت لامي .؟ ,,, وش قالت .؟ ,,, اكييييييد ترا ابتصل عليها وأسألها ,,, خلاص اوكي ,,, ايه خلاص موافق ,,, بس هاه تراه يوم واحد بس ويوم الجمعة ترجع ,,, بكرة ان شاء الله اجيكم ,,, بس اسلام انا عندي شرط ,,, امممم تشتري لي هدية ,,, ههههههه ,,, بس .؟ طول عمرك بخيل .... خلاص بكرة وانا عندكم اذا جيت حجزت لك ,,, ايه ,,, ههههه ان شاء الله عمي ,,, ( وكمل بنبرة غريبة وبصوت هامس ) اسلام ادع الله يشفيني ,,, تسلم ,,, مع السلامة وابعد الجوال عن اذنه وقعد يضغط الجوال وهو يسوق خالد = مشكلة الهندي اذا صار مطوع يبي كل شوي يروح لمكة ههههههه انا من الارتباك مارديت عليه ,,, ويوم شاف خالد اني مارديت التفت لي والجوال باذنه خالد = خالد توكل على الله ان شاء الله بتت ( ورد الطرف الثاني عليه بالجوال ) الو السلام عليكم ,,, وشلونكم ,,, بخير ,,, الحمد الله طيب ,,, وشلونك.؟ ,,, بخير دامك بخير ,,, اممم يمه قالك اسلام انه يبي يروح مكة.؟ ,,, وانتي موافقة .؟ ,,, ايه كلمني ,,, لا بس اتصلت اتأكد منك ,,, خلاص انا بجيكم ,,, لا مافيه تعب ,,, يمه لا تخافين ,,, مافيه تعب ابد ,,, انا اصلا جاي للرياض جاي ,,, يمه الله يخليك لا تخافين ,,, صدقيني مافيه تعب ,,, ايه اكيد ,,, هههههه احلف يعني ,,, طيب ,,, ان شاء الله ,,, اطمئني ,,, ان شاء الله ,,, طيب ,,, طيب ,,, يوصل ,,, مع السلامة وصلنا المستشفى وقف خالد السيارة والتفت لي خالد = تبي الصراحة ياخالد انا ماعرف عنك معلومات الا من خالي وعشان اصير على بينة وانا اتكلم مع المدير احتاج اشوف ملفك ,,, تسمح اشوفه .؟ انا مرتبك = اا ,,, طبعا اكيد وعطيته ملفي ,,, فتحه خالد شوي وبعدها التفت لي خالد = اخذت دورات او أي شي .؟ انا = لا ,,, ماكان عندي عشان اسجل دورات خالد = معك لغة .؟ نزلت راسي وهمست انا = لا حط خالد يده على فخذي خالد = بتتوظف ان شاء الله ,,, خلنا ننزل عطاني ملفي ونزل ونزلت معه ,,, وكان يسأل مباشرة عن مكان المدير لين وصلنا له السكرتير = لكم موعد .؟ خالد = طبعا السكرتير = من اقوله .؟ خالد = خالد السكرتير = ثواني وراح السكرتير وسمح لنا بالدخول ,,, وقبل ندخل على المدير ,,, اخذ خالد الملف مني ودخلنا ,,, جلس خالد وجلست قباله وانا مرتبك ,,, كأننا أب ويسجل ولده ,,, خالد هو اللي يتكلم وانا ساكت ومرتبك خالد = معك خالد المدير = اهلا ,,, أي خدمة خالد = معك خالد من طرف الدكتور وينلي وينلي اسم ذا والا وش المدير = انت الاستاذ خالد تركي .؟ استاذ ,,, خالد استاذ خله يخلص من الثانوي وبعدين ناده استاذ رد عليه خالد بابتسامة غريبة ماهي ابتسامته اللي دايم ,,, كنه يسخر من المدير خالد بابتسامة = نعم انا خالد تركي المدير = انت اللي تبي الوظيفة .؟ أشر خالد لي خالد = لا ,,, اخوي خالد هو اللي بيتوظف هنا التفت لي المدير المدير = ممكن الملف يأخ خالد .؟ مد خالد الملف له لانه معه ,,, وقعد المدير يتصفحه شوي وبعدها اغلق الملف ,,, والتفت لي المدير = معك شهادة حاسب .؟ انا مرتبك = لا المدير = ولا حتى دورات .؟ انا مرتبك = ولا حتى دورات التفت المدير لخالد المدير = الوظيفة المناسبة سكيورتي فقط خالد بغرور = الظروف ماتسمح ياليت تشوف وظيفة ثانية وتكون محترمة انصدمت كيف يكلم المدير كذا ,,, لا بالله طارت الوظيفة المدير = بس ياستاذ خالد ,,, هذا أخر مؤهلاته المتوسطة خالد = طبعا بتكون أخر مؤهلاته المتوسطة لأنه الى الأن ماتخرج من الثانوي التفت لي المدير وبعدها التفت لخالد وبعدها نزل راسه يفكر وبعد شوي اخذ ورقة يكتب فيها وبعد ماخلص مد الورقة لي المدير = راح اعينك في الاستقبال في القسم الرجالي شهقت من الفرحة ,,, نزل خالد يده وأشر لي يعني لا تفضحنا خالد = ومتى اوقات الدوام .؟ المدير = استقبال اكيد بيكون العمل الفترة الصباحية والمسائية خييييييييييبة صباح ومساء ,,, واخواني خالد = لو سمحت ,,, خالد الى الأن يدرس يعني صعب يداوم في الفترة الصباحية المدير = هذي مشكلة الاخ خالد ( والتفت لي ) تقدر تترك الدراسة وتداوم عندنا .؟ انا مرتبك = اا ,,, هذي آخر سنه لي المدير = مش و قاطعه خالد خالد = كلمك الدكتور وينلي اتلانتس.؟ اذا ماكلمك ابتصل عليه عادي ماعندي مشاكل التفت المدير له المدير = طبعا كلمني ,,, بس فترة وحدة ولموظف استقبال ما يصير خالد = بس انتم وافقتوا على طلبه المدير = وافقنا بس خالد = اجل بترد بكلامك بعد ماوافقت المدير = لا ,,, بس هذا عمل في مستشفى انت على بالك انه في مدرسة او كلية عشان فترة وحدة بس ,,, هذا مستشفى ياستاذ خالد خالد = من اللي كلمك بالضبط الدكتور وينلي او ناصر .؟ المدير = من ناصر .؟ خالد = الدكتور ناصر المدير = اللي كلمني الدكتور ناصر مد خالد رجله وطلع الجوال من جيب بنطلونه خالد = والدكتور ناصر بنفسه ابلغني قبل أمس بانكم موافقين على توظيفه لفترة وحدة وعطيتوه موعد شسالفة ,,, ماني فاهم شي ,,, سكت شوي المدير وبعدها التفت لي ومد يده لي يبي الورقة اللي عطانياها ,,, افا لا يكون رجع بكلامه المدير = الورقة عطيته الورقة وكتب فيها وبعدها مدها لي مرة ثانية المدير = موظف استقبال في الفترة المسائية تحت التدريب لمدة اسبوعين ويبدأ دوامك في الاسبوع القادم ,,, تقدرون تروحون الحين لمدير الموظفين لابلاغه التفتت لخالد فرحان ماني مصدق ,,, ابتسم لي خالد وقام خالد = شكرا ,,, بالاذن وطلع وطلعت معه و رحنا لمدير الموظفين وبعد ماخلصنا من عنده طلعنا من المستشفى ,,, ناظرت خالد وهو يمشي قدامي رايح لباب السواق وقبل يفتح الباب ناديته انا = خالد التفت لي خالد = هلا فكيت ازمة ياخالد ,,, فتحت باب رزق لايتام ,,, انقذتني وانقذت اخواني ,,, مشيت لين وصلته ,,, مادري وشلون اشكره ,,, ماقدرت امنع نفسي اني اضمه بقوة ,,, لصق خالد بسيارته متفاجئ مني ,,, وبعد ماستوعب ضحك ولف ذراعه علي الحين اقدر اشتري لسالم الشنطة اللي هو يبي ,,, اقدر اشتري لخلود كل اللي تبيه ,,, الحين ماراح يحسون سالم وخلود بالنقص انا بنفسي ماراح احس بالنقص ,,,الحين اقدر اسدد الديون ,,, اقدر استأجر شقة ,,, الحين نقدر نعيش زي الناس خالد = ترا ابسويها على نفسي من كثر ماتعصرني تذكرت اني الى الحين ضاغط عليه ,,, ضحكت على كلمته وابعدت عنه انا قربت اصيح = خ خالد فكيت ازمة ,,, م مشكور ,,, مدري وش لف ذراعه على كتفي وقربني منه خالد = الحمد الله ,,, وضعك كان صعب ,,, واللي زاد الطين بلة انك مامعك دورات تنفعك ,,, مثل ماقلت لك قبل ياخالد كللللللل شي يمشي بالواسطة ,,, اسألني انا ,,, كل شي ياخالد حتى الشرطة ( تنهد وكمل ) يله اركب ,,, وتراني عازمك بمناسبة الوظيفة ركبت السيارة وطوال ماكنا نمشي وانا افكر ,,, اسلوب خالد مع المدير غريب ,,, يمكن المدير قريبه ,,, بس وشلون يكون قريبه وخالد هو اللي عرف بنفسه للمدير ,,, لحظة لحظة وش الاسم اللي ذكره خالد وش اسمه وش اسمه ,,, اسمه غريب ,,, ويني او ويلي شي زي كذا وش سالفته وشو هذا ,,, من اسمه اكيد موب سعودي ,,, الغريب في الموضوع انه على طول اول ماذكر خالد الاسم عرف المدير السبب اللي حنا جايين له ,,, طيب هو كان بيخليني سكيورتي ,,, لما قاله خالد الضروف ماتسمح على طول المدير سمع كلامه وخلاني في الاستقبال ,,, وناصر ,,, ذكروا ناصر بعد ,,, من ناصر هذا التفتت لخالد ,,, او مثل ماناده المدير ,,, الاستاذ خالد وش سالفتك ياخالد كل يوم اكتشف فيك شي غريب ,,, وصلنا لمقهى كوفي وبعد ماجلسنا انا = خالد شسالفة .؟ التفت خالد لي مستغرب خالد مستغرب = وش سالفته .؟ انا = من ويني ,,, هذا اللي اسمه غريب اللي قلت اسمه عند المدير قبل شوي خالد بابتسامة = هذا اللي توسط لك انا مستغرب = ماعرفه ,,, اول مرة اسمع فيه ,,, وش يعرفه فيني عشان يتوسط لي .؟ خالد = انت ماتعرفه وهو مايعرفك ,,, بس انا اعرفكم ثنيناتكم انا = يعني توسط لي عشانك .؟ هز خالد راسه بايه انا = وشو هو ,,, من اسمه ماهو سعودي خالد بابتسامة = هذا واحد دكتور بالرياض اسمه وينلي انا = ويتوسط لواحد مايعرفه عشانك ,,, شكلك غالي عنده مرة خالد = ههههههههههههههههههههههههههههههههههههههههههههههه مات من الضحك ,,, وش فيه ذا خالد = هههههههههههههههههههههه غالي .؟ هههههههههههههههههههههههههه انا = ليه تضحك .؟ ,,, ياخي واضحة ,,, ماتوسط لي وهو مايعرفني الا انك غالي عنده ويعزك سكت خالد وناظرني وهو يبتسم انا = ليش تطالعني كذا .؟ خالد = وينلي الكلب ماتوسط الا لمصلحة انصدمت يشتمه وهو المسكين متوسطلي عشانه انا = وليش كلب .؟ خالد = الكلب اشرف منه طيرت عيوني فيه وسكتت ,,, وش فيه ذا انقلب ,,, كمل خالد كلامه خالد = وينلي نصراني ,,, أمريكي ,,, تعرف معنى امريكي .؟ ,,, والا اشرحها لك .؟ ماهو هذا خالد ,,, ابتسامته اختفت واسلوبه في الكلام اختلف ,,, تلفتت يمين و يسار في الكوفي لا يكون مضيع وأظن ان اللي جالس معه خالد خالد مستغرب = وش تدور .؟ انا = خالد شسالفة .؟ خالد = وش سالفته بعد .؟ انا = ليه تشتمه بهالشكل .؟ خالد = اجل امدحه .؟ اقولك امريكي نصراني ,,, ماهو مسلم انا = ماقصدت كذا ,,, اقصد انه توسط لواحد مايعرفه بس عشانك تقوم آخر شي تشتمه خالد = اقولك توسط لمصلحة انا = وش المصلحة اللي يبيها دكتور من طالب ثانوي ابتسم خالد خالد = المهم حصلنا على اللي نبي ,,, امممم اقول خالد خذها نصيحة مني حاول تسجل في دورات وتحصل على شهادة كمبيوتر ,,, لأني تبي الصراحة مارتحت لهالمدير واخاف يطردك بعد كم شهر مارتحت له الصراحة تذكرت الحكمة اللي تعلمتها من معرفتي بخالد وابتسمت انا بابتسامة = احكم في الناس باخلاقهم وافعالهم ولا تحكم من اشكالهم خالد متضايق = مدري بس مارتحت له انا = ههههههه تبي الصراحة انا اول ماشفتك مارتحت لك لكن الحين ههههه عزيز وغالي ههههههههههه سكت خالد يناظرني وبعدها نزل نظره على الطاولة اللي قدامنا يدور عن شي ,,, فجأة اخذ كيس سكر القهوة ورماه علي خالد = اثرك ماترتاحلي انا = هههههههههههههههههههههه اقولك هذا من اول الحين عزيز وغالي خالد = ههههههههههه تسلم انا = طيب منهو ناصر .؟ خالد = مساعد الكلب ,,, تقدر تقول ذيله انصدمت ليه يتكلم عنهم بوقاحة بهالشكل انا = يقربلك .؟ خالد = لا ولا عمري شفته انا = من وين تعرفه هالدكتور الامريكي .؟ هو طبيبك اللي يعالجك .؟ خالد = لا ,,, هذا واحد اعرفه من زمان ,,, من قبل مايجيني المرض ,,, اصلا تخصصه بعيد عن مرضي انا = وش المصلحة اللي يبيها منك .؟ خالد = قرب يذن المغرب ,,, وش رايك نتمشى بالسيارة شوي .؟ يتهرب ,,, دايم يتهرب من اسئلتي ,,, سألته عدة مرات عن ابوه وتهرب مني والحين اسأله عن الامريكي وتهرب ,,, مالي الا عمي ابوعبد الله أسأله وارتاح ,,, اكيد يعرفه ,,, تمشينا لين اذن المغرب وبعد الصلاة رجعنا ,,, وقف خالد سيارته قدام بيتي ,,, وقبل مانزل مسك خالد يدي ,,, التفتت له مستغرب خالد = لحظة قبل تنزل ومد يده وفتح الدرج اللي قدامي وطلع كرتون الجوال النوكيا اللي طلب مني آخذه ,,, ومده لي خالد = هالمرة اتمنى تقبله انا = لا يمكن خالد = بمناسبة الوظيفة ,,, الهدية لا ترد ياخالد انا = الوظيفة اصلا بسببك ,,, انت اللي سعيت لها عشاني ,,, والوظيفة اكبر هدية بالنسبة لي ,,, مشكور و ماتقصر وفتحت الباب عشان انزل لكن مسك يدي مرة ثانية انا = خالد وبعدين معك خالد = الوظيفة من وينلي الكلب مو مني ,,, الجهاز هذا هو اللي مني ,,, يعني تقبل هدية من نصراني وماتقبل هدية من اخوك المسلم ( وابتسم ابتسامة واسعة ) انا بحزن = انت تشفق علي @@@@@@@@
__________________ تكفون سجلوا بهاذي اللعبه يالله http://themafia.ae/?affuid=77398 |
|
#19
04-23-2010, 12:25 AM
| ||
| | ||
|
يتبع انا بحزن = انت تشفق علي خالد = انا ماشفق عليك انا اغليك لأنك صديقي ,,, تذكر بيوم العزيمة يوم تقولي اعتبرني صديقك ,,, هذا انا اعتبرك صديقي بس انت شكلك ماتعتبرني صديقك طالعته احاول افهم بايش يفكر فيه ,,, وصدره أي قلب يحمل وليه يسوي هذا كله لي وليه انا ,,, ومامنعت نفسي اسأله هالسؤال مديت يدي وضربت صدره كأني اضرب باب انا = هالصدر أي قلب داخله .؟ سكت خالد شوي وبعدها رد خالد = داخله قلب عانى من الوحدة انا = احمد ربك انت مانت وحيد ,,, وش تقول عني انا ,,, لا أخ اعتمد عليه ولا أب خالد = بس لك صديق مو صديق واحد بس ,,, اصدقاء ياخالد ابراهيم وصالح وماجد ويمكن غيرهم بعد ,,, انا لا أخ ولا صديق ولا أب ,,, اقبل الجهاز وصر صديقي ولا تحرمني من الصداقة اللي ابحث عنها انا مستغرب = ولا أب .؟ ,,, وأبوك .؟ ,,, انت بنفسك قلت انه حي خالد = خالد اتمنى تقبل الجهاز ,,, الا اذا كنت رافض صداقتي هذا شي ثاني تهرب من السؤال مرة ثانية مديت يدي واخذت الكرتون انا بابتسامة = عنيد ,,, وانا قابل صداقتك بدون جهاز ولا غيره خالد بابتسامه = بكرة الثلاثاء ومضطر اسافر للرياض يكون بينا اتصال انا = بتغيب الاربعاء بعد .؟ خالد = شسوي مضطر ونزل ونزلت ,,, دخلت البيت وانا فرحان قعدت ادور خلود اببشرها عن الوظيفة انا = خلود ,,, خلود ,,, خلود خلود = هاه سمعت صوتها وعرفت انها في غرفتها انا بفرح = خلود خلود توظفت هههههه اخيرا توظفت خلود بعدم تصديق = قل والله انا = ههههههههههههههه ,,, وظيييييييفة والدوام الاسبوع الجاي خلود بفرح = قل والله انا = هههههههههههههههه ولا والفترة المسائية بس يعني ينتهي الدوام الساعة 8 في الليل يعني وظيفة من دون ماترككم اخر الليل خلود بفرح = قل والله وانا = ههههههههههههههههههه وش فيك معلقة على قل والله خلود بفرح = ماني مصدقة ,,, ههههههه اخيرا الحمد الله الحمد الله وسكتت يوم شافت الكرتون بيدي ,,, بدري خلود مستغربة= وش هذا .؟ واخذته مني وعلى طول عرفته خلود = واو جوال وفتحت الكرتون خلود = واو وابو كميرا بعد ,,, احسن من جهازك الاول ,,, من وين لك .؟ انا = هدية خلود مستغربة = قل والله انا = هههههههههههههههههههه خلود = ياسلام احب اصور ,,, ابصور كل شي ,,, وين شريحتك بنشغله ,,, ابي اصور ,,, حلو يهبل خلود دايم تضحكني بحركاتها ,,, رحت وجبت شريحتي وشغلناه وطوال الليل وهي تصور الا تصوير نفسها طبعا اخخخ بس لو اعرف وش يبي الامريكي الدكتور من خالد الطالب @@@@@@@@@ نهايه الجزء الثامن
__________________ تكفون سجلوا بهاذي اللعبه يالله http://themafia.ae/?affuid=77398 |
|
#20
04-23-2010, 12:30 AM
| ||
| | ||
|
* 9 * الثلاثاء بعد صلاة العصر بفترة وقفت عند باب بيتي عشان معاذ يتفرج على الاطفال اللي يلعبون = خالد بسم الله الرحمن الرحمن تفاجأت باللي يناديني وكان خالد وش يسوي هذا هنا مو يقول أمس انه بيروح للرياض اليوم ,,, كان لابس بنطلون جنز وفنيلة رمادية وجالس على كبوت سيارته واقف بجنبه ابراهيم وشماغه على كتفه ومتركي على فخذ خالد والغريب ابراهيم يكركر من الضحك وخالد هادي وساكت وصلت لهم وانا اضحك على ابراهيم انا = وش فيك تضحك أشر على يد خالد وهو يضحك ابراهيم = شف سبحة ولابس جنز فاهم الاصالة غلط ههههههههههه كان خالد معه سبحة ويلعب فيها ضحكت عليه فعلا شكله مضحك خالد = من اليوم يضحك علي والمشكلة ناشب بحلقي يبي قصيدة انا = ابراهيم صادق عطنا قصيدة ههههههههههه مد خالد يديه لي خالد = انت اللي عطني معاذ اخذ معاذ وجلسه في حضنه ولأن خالد ماله حضن بسبب البنطلون صار معاذ جالس على الكبوت بين رجلين خالد ابراهيم = لا تصرف عطنا قصيدة ايها الشاعر ههههههههه اخذت شماغ ابراهيم ولبسته خالد مات ابراهيم من الضحك على شكل خالد بنطلون وشماغ وسبحة خالد = خويلد ناديتك ابيك تصير عون صرت فرعون والتفت لمعاذ وعطاه السبحة ونزل الشماغ من راسه ورماه بوجه ابراهيم خالد = هاه والحين تبون قصيدة .؟ ابراهيم = انت فلة هههههههههه ليتني صورتك تركيت على فخذ خالد الثاني انا = أي والله ليتك صورته بيستانس عليه صالح ههههههههههه خالد بمزح = مركى عندكم انا انا = ليش ماسافرت للرياض مو تقول بتروح اليوم خالد = الا بروح بس خالي ماهو موجود ,,, وقاعد احتريه عشان اسلم عليه ابراهيم = ياخي انت ليه ماتصبر الى الاربعاء تراها كلها الفرق يوم واحد بين الثلاثاء والاربعاء انا = و ابراهيم صادق ابراهيم = والا شكلك ماتصبر عن الرياض ههههه خالد = لا ماقص وقطع كلامه رنين جواله ,,, و لأن بالعادة ماتقدر تاخذ شي من جيب البنطلون الا وانت واقف او تمد رجلك اذا كنت جالس انسدح خالد بالكامل على الكبوت وطلع الجوال من جيب بنطلونه وجلس ... هنا مات ابراهيم من الضحك عليه خالد = الو ,,, هلا ,,, ( وحط يده على فم ابراهيم يمنعه من الضحك عشان يقدر يسمع ) وعليكم السلام ,,, هلا حياك الله ,,, ايه ان شاء الله بكرة او بعده ,,, لا لا اليوم ماقدر ,,, حياك الله ,,, مع السلامة (وابعد يده عن ابراهيم ) عليك ضحك هههههه مزعج هههههه انا = ههههههه وهذا غيض من فيض ههههههه ماسمعت ضحكه الحقيقي هههههههه خالد = صدق .؟ ابراهيم سمعنا نغماتك ابراهيم بمزح = كم تدفع واسمعك خالد = ههههههه حتى الضحك صار بفلوس ( القى نظرة على جواله ) تأخرت وخالي ماجا ابراهيم = سلم علي وانا اوصله لخالك ههههههههههههه خالد = هههههههههه ومجاني والا بفلوس بعد انا = اتصل على خالك وشف وينه نفذ خالد كلامي واتصل خالد = الو ,,, السلام عليكم ,,, خال وين وسكت يوم شاف خاله دخل بسيارته للشارع خالد = ههههههههههههههه طيب مع السلامة ابراهيم = لو انك داري كان اتصلت عليه من زمان ههههههه التفتت لبراهيم اللي من اليوم وهو يضحك انا بابتسامة = مروق اليوم وش عندك .؟ ابراهيم بغرور = انا كل يوم مروق نزل خالد من الكبوت وعطاني معاذ يوم شاف خاله وقف سيارته خالد = خذ اخوك وراح يسلم على خاله ,,, واحتراما لبوعبد الله رحنا انا و ابراهيم نسلم عليه بعد خالد = توصي شي ,,, بمشي الحين وسلم على راس خاله ,,, وسلمنا حنا عليه بعد خالد انا و ابراهيم = السلام عليك ياعم ابو عبد الله = هلا هلا والله وعليكم السلام ( والتفت لخالد ) تمشي تروح وين .؟ خالد = للرياض ابو عبد الله = لا حول ولا قوة إلا بالله ,,, حسبي الله ونعم الوكيل سكتنا مستغربين منه خالد منصدم = عسى ماشر ياخال ابو عبد الله بعصبية = كم مرة اقولك هالطبع خله ,,, بتسافر وتخلي مدرستك ,,, كل اربعاء لازم تغيبه تكلم ابراهيم يبرر لخالد ابراهيم = اهله هناك ابو عبد الله بعصبية = هذا ماهو عذر ,,, اصلا امه بنفسها اتصلت علي تشتكيلي ( والتفت على خالد معصب ) كل شوي ماسك خط رايح للرياض خالد = هد اعصابك ياخال كلها ساعتين ثلاث ساعات وانا واصل ابو عبد الله = وبالساعتين هذلي وش يضمنلي ان مايصيبك اللي يصيب راسك دايم ,,, ياولدي انا خايف عليك من هالخطوط ,,, انت تدري وش يصير فيك اذا جاك هالصداع والا ماتدري .؟ ,,, امك تشتكيلي تقول خله يخفف السفر ,,, امك خايفة عليك وانا خايف عليك ( والتفت لنا ) قولوله يمكن يسمع منكم ماندري وش نقول انا = يحفظه الله ياعم ويخليه لكم ابراهيم = اعصابك ياعم ولا تكدر خاطرك وخالد ماعليه خوف ان شاء الله ... طالع ابو عبد الله خالد الساكت شوي وكنه هدا ابو عبد الله = اكلك دواك .؟ خالد = اآ ,,, ايه ابو عبدالله بتنهيده = الله يوصلك بالسلامة ويحفظك ,,, اتصل علي اول ماتوصل خالد = إن شاء الله وسلم على راسه ,,, دخل ابو عبد الله بيته والتفتنا انا وابراهيم لخالد انا = اعذره خايف عليك ابراهيم = وتبي الصراحة هو معه حق ,,, بعد ماشفتك اغمى عليك صار ينخاف عليك صراحة ساكت بس واضح انه متضايق انا = حاول الاسبوع الجاي ماتروح ابراهيم = على الاقل مرة وحدة بس عشان خالك خالد متضايق = واخلي اهلي لحالهم ,,, انتم تقدرون تخلون اهاليكم لحالهم وانتم تعرفون ان ماعندهم احد .؟ انا = ابو عبد الله قبل شوي يقول ان امك هي بنفسها ماتبيك تسافر خالد متضايق = بس عشان مامسك خط ,,, والا هي دايم تتصل علي باليوم اكثر من 5 مرات والمشكلة اذا سمعت صوتي متغير والا شي يزيد خوفها ,,, بعض الاحيان ,,, ( تنهد وسكت وهو متضايق ) ابراهيم = وبعض الاحيان أيش .؟ مسك خالد جبهته متضايق ورجع شعره ورا خالد بعصبية = ولا شي ,,, مع السلامة وركب سيارته ومشى التفتت لبراهيم انا = شكله بين نارين الدراسة هنا واهله هناك ابراهيم مستغرب = اموت واعرف وش اللي خلاه يدرس هنا ,,, اذا كانوا متضايقين هالكثر ,,, ترا الرياض اكثر مدارس هذا اللي يصاحب رفقاء السوء مايعيش مرتاح ,,, لكن طبعا سكتت عن ابراهيم ولا قلت له شي بعد مرور اسبوع الاربعاء انتهى الاسبوع الاول من دوامي في المستشفى ( الاسبوع الأول من التدريب ) غيرت رايي بإني اسأل ابو عبد الله عن وينلي هذا لاني الصراحة خفت خالد يزعل مني لما يدري اني سألت خاله من وراه وهو اللي ساعدني ,,, مع ان الموضوع شاغل بالي ,,, وش الصلة بين خالد وهالامريكي ,,, وش المصلحة اللي يبيها الامريكي من خالد ,,, ماعندي الا اني احجر لخالد لين يقولي طوال الاسبوع كنت اخذ سيارة صالح او ابراهيم ومرة اخذت سيارة فايز واليوم اصر علي خالد انه يوصلني يبينا نتمشى بعد ما أطلع من الدوام لأنه على قولته ماتمشينا من يوم ماداومت ماجد وصالح وابراهيم اشوفهم بالصباح وحنا في المدرسة اما خالد طوال الاسبوع ماشفته لانه مو من نفس مدرستنا وماعرف شي عن اخباره حتى في الشارع ماشوفه لأني الصباح في المدرسة والظهر اكون نايم والعصر الى الليل في الدوام ,,,, واليوم بالصدفة شفته بالشارع واصر انه يوصلني للدوام وبعد ماخلص من دوامي يمرني ونتمشى الساعة 9 طلعت من الدوام وشفت سيارة خالد بس مافيها احد ,,, استغربت تلتفتت يمين ويسار ادوره بس ماشفته تقربت من السيارة وشفته سادح مرتبة السواق وخالد عليها منسدح لابس بنطلون جنز اسود وفنيلة بيضا مخططة وسرحان ,,, انظاره منصبة على سقف السيارة كأنه يفكر ,,, وجواله بيده يلعب فيه بتفكير سارح لدرجة انه مانتبه لي ,,, فتحت باب الراكب انا = السلام عليكم انتبه لي وعدل في المرتبة خالد = وعليكم السلام انصدمت من شكله ,,, عيونه حمرا وكأنه باكي وصوته متغير انا = لايكون تأخرت عليك خالد = لا ابد انا = خالد ,,, عسى ماشر فيك شي رد علي من دون مايلتفت لي خالد = م مافيني شي ,,,, امممم من زمان ما فرفرنا بالشوارع انا واياك حتى صاير ماشوفك انا = من المدرسة للدوام على طول ,,, الله يستر ,,, انتهى الاسبوع الاول من التدريب ,,, اخاف بعد هالاسبوعين يطردوني ويقولون ماتصلح خالد = عشان كذا اقولك خذ دورات تنفعك باكثر من وظيفة انا من البداية قلت لك مارتحت لمديرك انا بتنهيدة = الله يعين ,,, المشكلة المسؤول اللي يدربني عصبي وأي غلطة مني حتى لو تافهه يسجلها علي ماسمعت رد من خالد والتفتت عليه ,,, لقيته يسوق وتفكيره سارح انا = خالد وش فيك .؟ التفت لي وبعدها طالع قدام ,,, نظراته حزينة انا متأكد خالد بهمس = مافيني شي انا = بس انا حاس انك فيك شي ,,,, قل فضفض خالد بهمس = ماعندي شي اقوله انا = خالد ليش تخبي عني اسرارك خالد = ماعندي اسرار انا = الا عندك بس ماتبي تقولي خالد بملل = خالد لا تصير لحوح ,,, قل لك مافيني شي ,,, أأأ ,,, يمكن بس متضايق شوي ,,, ماعليك الحين نتمشى وتروح الضيقة عني ,,, المهم وشلون الدوام معك .؟ وقبل مارد رن جوال خالد ,,, القى نظرة على جواله وسكره في وجه المتصل ,,, ورمى الجوال بغضب بحضنه وهو يتأفف واستقر الجوال بين رجلين خالد في المرتبة ,,, استغربت تصرفه انا = الحمد الله دوامي ماشي اصلا الى الحين مابان شي ونفس الشي مالقيت رد من خالد والتفتت عليه ولقيته نفس الشي سرحان ,,, وشوله يسألني اجل اذا كان ماهو معطيني بال طالعت قدام وسكتت عنه تمشينا بالسيارة وحنا ساكتين وكل شوي التفت على خالد والقاه نفس الشي سرحان ,,, ليش طلب نتمشى اجل وطوال ماحنا نتمشى يرن جوال خالد ويسكر الجوال في وجه المتصل انا = من هذا اللي يتصل .؟ وليش ماترد عليه .؟ خالد = رقم غريب انا بعدم تصديق = رد عليه يمكن يبيك ضروري خالد بعصبية = بس انا مابيه استغربت ليش يصارخ علي انا مستغرب = اعصابك طيب تنهد خالد وسكت انا = خلنا نرجع اذا كنت تعبان رجع شعره لورا بضيقة خالد بهمس = اوكي واخذ طريق الرجوع ,,, لحظة لحظة تذكرت اليوم الاربعاء ,,, التفتت على خالد انا = خالد ليه مارحت للرياض ,,, اليوم الاربعاء قطب حاجبيه ورد بعصبية خالد بعصبية = موب رايح ,,, عندك مانع انصدمت وش فيه ذا ,,, ولأنه عصب علي عصبت عليه انا بعصبية = لا ماعندي مانع ,,, رجعني البيت احسن من مقابل وجهك زفر بضيق وسكت ,,, رجع رن جواله مرة ثانية ,,, ازعجني هالجوال وعصبت اكثر ,,, تجرأت هالمرة ومديت يدي وأخذت الجوال من بين رجلينه انا بعصبية = هات اشوف ,,, انا برد والقيت نظرة على المتصل ,,, لكن خالد سحبه مني على طول خالد بعصبية = لا تتدخل في شي مايعنيك سكتت منصدم ( الغالي يتصل بك ) ,,, خاله ابو عبد الله ,,, ليه مايرد عليه ,,, ليه يسكر الجوال في وجه خاله ,,, ماتوقعت انه عاق بخاله لهالدرجة انا منصدم = الغالي هو ابو عبد الله .؟ خالد بهمس وهو مازال معصب = مالك دخل انا مستغرب = ليه ماترد عليه ,,, حرام عليك سكت ومارد علي ,,, بالتالي سكتت عنه لحظة تذكرت العم ابو عبد الله من يوم الاثنين وهو مسافر والى الحين مارجع التفتت لخالد مرة ثانية انا = ابو عبد الله مارجع من السفر .؟ خالد بهمس = لا انا = هو وين سافر .؟ خالد بتنهيدة = للرياض انا = وليه ماترد عليه .؟ مهما كان هذا خالك ويخاف عليك مارد علي انا = عشان كذا مارحت لاهلك لأن خالك راح لهم .؟ مازال ساكت ,,, استغربت وش فيه وصلنا شارعنا ونزل كل واحد لبيته وش فيه خالد اليوم عصبي ,,, و ابو عبد الله هالمسكين يتصل عليه ومطنشه ,,, بتسببلي جنون ياخالد ,,, استغفر الله العظيم بس ,,, اروح انام احسن لي ,,, بكرة خميس لا مدرسة ولا دوام ,,, فكة @@@@@@@@@@ يتبع
__________________ تكفون سجلوا بهاذي اللعبه يالله http://themafia.ae/?affuid=77398 |
|
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| غموض الحب- | العنيد1985 | أرشيف المواضيع الغير مكتمله او المكرره او المنقوله و المخالفه | 6 | 11-07-2009 09:51 PM |
| الاصفر اناقه -غموض-وكبرياء | غادةالكاميل | حواء ~ | 25 | 10-18-2009 09:17 PM |
| O صناعة الحب O ش/ عآئض القرني - جودة عالية - | mkaass | خطب و محاضرات و أناشيد اسلاميه صوتية و مرئية | 7 | 01-06-2008 07:06 PM |
| نظارة الشمس الكبيرة.. غموض وجاذبية | مغربية | حواء ~ | 10 | 08-22-2007 12:05 AM |
العرض العادي
