عائد الى الدشرة ياأمي...الرواية التي ابكت هيفاء وهبي واحمد جميل. - عيون العرب

**عيون الطفولة** · #1 10-09-2006, 12:06 PM

طبعاً الروايه على لسان ابو سااره

اخليكم مع الروايه...

================================
بسم الله الرحمن الرحيم ..

كنت جالساً أفرفر في حارتنا الصاخبه أبحث عن قضية أو جريمة قتل أو سرقة عشان أفك رموزها وأحل عقدتها وأكتب عنها في المنتدى، كنت واقفا ً وكأني كونان القزم أحتري أي حدث بسيط عشان أبدأ التحقيق ولكن لا فائده .. وبينما أنا قاعدن أهيت في الحارة مطبقاً المبدأ الذي يقول ان المحقق الذكي يشم رائحة الجريمة قبل وقوعها إذا بي أرى شايب يخرج من باب المسجد وقاعد يلبس نعاله ! أخذت أراقبه عن كثب وياللهول سقط الشايب صريعا ً !!! يا إلهي لقد سقط !! أخذت أقلب الموضوع بسرعه في رأسي : لماذا سقط في هذه العصرية بالذات ؟ وليه يوم انه طاح ما صرخ ولا حتى قال أي ؟ آها طيب وش السبب انه ماطاح الا قدامي؟ من المتسبب.. معقولة قضاء وقدر او محاولة انتحار او هقوتك يابوساره هالجريمة لها علاقة بالورث؟ لا حلو الموضوع من جد غامض وهذي القضيه المعقده اللي كنت أبحث عنها .. قطع حبل أفكاري واسئلتي الذكية المتواليه نهوض الشايب وهو يدعي ويحضرم ويقول كم مره قلت لهم لا تمّ تحطون نعالكم عند باب المسجد حطوها في الخزانه حسبي الله عليكم كل يوم والثاني طايحن لي في نعله ! .. آآآخ ياخسارة أثر الشايب ما مات وسقوطه كان طبيعي ! قهر !! طيب وين ألقى جريمة كيف ألاقي قضية أحقق فيها !! سمعت خلفي جرس سيكل جبيتر 24 ماغط يسوقه هندي معه سطل مويه .. هذا الهندي اللي يغسل مواتر الحاره .. فجأة طلعت له كامري زيتيه من اللفه فما كان منه الا ان تفاداها وراح يسار ورقى دحديرة بيت الإمام وصبخ في الباب وطاح متمدد!! حلو .. حلووووو يابوسارة .. أخيراً لقيت لك جريمة ، هذي هي قدامك وتفاصيلها كامله .. هندي الحارة مات في ظروف غامظة:بس ليش كان مسرع وين رايح ؟ معقوله كان منحاش ؟ طيب من اللي كان لاحقه ؟ طيب ليه يوم طلعت له الكامري نشب في باب الإمام ؟ ليش مثلاً ماتعلق في جدار البيت اللي جنب بيت الامام ؟ ولماذا سقط صريعاً على شقه الايسر مهوب الايمن معقوله كان مخبي شيء! طيب وش كان مخبي؟؟ بسرعه يابوساره حاول تستنتج الحل .. بسرعه يابوسارة بسرعه..! قطع حبل أفكاري قيام الهندي وهو يمسح بنطلونه من التراب ويقول شباب سعودي كله تعبان اتفووو عليكم شباب وخذ سيكله وراح ! أووووه ينعن ام القرف ! قسم بالله مصخت وش هالقضية اللي عيت تجي ! وبعدين يعني ؟ وبعدين يابوسارة !! فجأة لمحت زميلي أبو فهيد طالع من بيتهم وناصيني .. مد يده بحراره يسلم علي .. دققت فيه بنظرات بوليسيه وعطيته أشكل مارديت السلام ولخمته بهالسؤال : ابو فهيد تعال تعال هنا ... وش جايبك ؟ انت بالعادة ماتطلع الا بالليل وش مطلعك العصر ؟ وليش سبحان الله انت اللي تجيني ليش مايكون مثلاً خالد او عبدالاله او تركي ؟ وش هالصدفه الغريبه؟ بعدين حبكت يعني ماتجيني الا بوسط الحاره أرجوك لاتقول صدفه ترى هالأجوبه ماتمشي علي.. بسرعه جاوب وهات أدلتك ..! حط يده على راسي وقال سلامات ابوسارة شكلك تعبان !! رميت الورقه والقلم اللي في يدي بالارض في لحظة احباط وقلت تعبان ؟ إلا تعبان ومنلعن خير خيري !! مهوب معقول يابوفهيد من صبح الله الى الحين أطامر في الحارة أدور قضيه أكتب عنها وما ألقى ؟ يابوفهيد حتى قطاوة الحارة قمت ألاحقهن يمكن أصيد قضية إعتداء او تحرش بينهم ! تخيل يابو فهيد حتى ابومحمد الشايب الهريان المنتهي من شوي تكرفس في درج المسجد وطاح طيحتن قشراء ولا جاه شي! بالله ذا منطق ؟ بالله ذا حتسي يابو فهيد!! لا ومأمون الهندي طلعت له كامري وشمّع في هالباب تشميعتن يحبها قلبك ولا مات !! يلعن أم النذاله طيب ليه مامات عشان أكتب ! تعبان يابوفهيد والله تعبان آآآه .. ظمني لصدره وقام يهدي فيني .. خطمت في بالي فكرة فأمسكت أبوفهيد مع كتوفه وقلت تكفى نخيتك أنت صديقي وحبيبي والصديق وقت الضيق طلبتك رح أطعن شغالتكم خلني أحقق في الموضوع واخلص !! ناظرني وقال مهبول أنت ؟ لا لا امهبول !! قلت يارجال لاتخاف والله العظيم اني لألصق التهمه في ظهر أبوك وأطلعك منها زي الشعرة من العجين بس تكفى عجل علي .. قال أنقلع بس أنقلع والله انك خبل رسمي ! قلت افهم من كلامك ان شغالتكم تعز عليك ؟ اوكي مهيب مشكلة ..طيب أخوك سلمان !! بحلق فيني بخوف: وش فيه اخوي سلمان !؟ قلت شفه فوق سطحكم عند عشة الحمام قاعد يحومهن .. رح تكفى دزه مع السطح خله يمحط فوق الملحق ونحقق خلنا نخلص بسرعه أبوفهيد ماعاد فيه وقت يالله يالله تكفـ .. قاطعتني زبيرية أبو فهيد وهي تعانق رقبتي وعطاني مقفاه رايح لبيتهم وهو يقول والله زمن صرنا آخرتها نماشي مهابيل الشرهه على اللي يجلس معك ياظلال بوارو ! يوم وصل باب بيتهم سوا لي حركة شينه باليد مسحها المخرج !!!

رحت لبيتنا وانا في غاية التعب .. فتحت بابنا وانا محبط جداً .. وش هالحظ! نصبح ونمسي على قضايا وسرقات وقتل يوم بغيناها مالقيناها! صدق من قال جرب غيري تعرف قديري !! أدري ما له دخل المثل في السالفة لكن وش أسوي كنت محبط وفي غاية الانكسار !! دخلت المطبخ وخذت كاس جبن طويل ومليته شاهي ورقيت لغرفتي ووضعت دفتر التحقيق والقلم الدبي أبو أربعة ألوان جانباً وانسدحت على مرقدي واذا بأخي الصغير يقول فيه واحد عند الباب يشبهك مرررة واسمه بعد ابوساره يبيك .. نزلت بسرعه فتحت الباب ولقيتني قدامي! قلت بسم الله علي وش أنت ؟ قال لا بأس عليك أخي العزيز أنت أبوسارة الحقيقي وانا أبوسارة الانترنتي المهم تعال أبيك ! قلت مسوي أستخف دمي : انت ماغيره ذاك اللي ماخذه فيه الشبكات الهلاليية مقلب خخ ! قال أقول اخلص علي تعال، انت ماتبي قضيه ؟ تعال أوريك قضية واكتب عنها !! قلت لحظه وش دراك اني أبغى قضيه . قاطعني قائلا لا تنسى اني أبوسارة الانترنتي وأدري بكل شيء .. درعمت وراه وركبت سيارته ومشينا مسافة عشرين كيلو ووقفنا عند استراحه مشبوهة !! نزل ابوساره الانترنتي ونزلت وراه .. فتح باب الاستراحه ولقيت شلة عرابجة أشكالهم تجيب المرض وريحة الشراب فايحه بقوووة منهم !! قالي ابوساره الانترنتي: شايف ذاك الوجه الودر اللي ماسك العود ومدقن وعيونه حمر وماله إلا ثلاثة سنون ؟ .. هذاك اسمه صنهات وهو القضية اللي أبيك تكتب عنها .. دققت في صنهات وقلت موجهاً كلامي لابوسارة الانرتنتي : آهاا ولاحظ كيف قاعد يعزف باليسرى .. غريب ليش مايعزف باليمنى! تتوقع مسوي تمويه او هو اعسرصدق .. لا ولاحـظ بعـ.. قاطعني ابوساره الانترنتي : لا ماشاء الله عليك فطين ! من الحين بديت تحقيقاتك ؟ أقول إلفقه بس واذا عطيتك السالفة بتعرف كل شي .. هذا اللي أسمه صنهات يابوسارة كان من فترة قريبة إمام مسجد وملتزم والحين هذي حالته !! أمش أمش ناخذ لنا راس معسل وأروي لك حكايته ثم حقق على كيف كيفك ..

========================= =====

لبس أبوسارة الانترنتي عبائته ومسك عصا مسوي شايب وأخذ يروي قصة صنهات :

" كان صنهات هاجاً داجاً لا يلوي على شيء ! الناس تروح الساعه ثمان مدارسها ودواماتها وهو يرجع لبيتهم يترنح من قوة السكره !! كانت أمه عجوزن تقطع القلب وقبلها تنصحه .. ياوليدي وراك تسذا !! ياوليدي ماذي بحاله ! ياوليدي خف ربك فيني وفي أبوك والله انك حسرت بنا في عيشتنا .. فيما كان هو يمشي نحو غرفته يتمايل ويقوم ويسقط غير آبه بكلام أميمته .. وأميمته خنت حيلي تناظره وهو يترنح وتهز راسها ولسان حالها يقول الله ياخذ أمن جابتك !! يدخل غرفته وهو يردد زي الهوى ياحبيبي زي الهوى وآه من الهوى ياحبيبي .. كان طربان لكن المصيبه انه كان يحسب هالاغنية لعزازي لإنه كان يختم ترديد الاغنيه بصوت أحرش ضاحك قائلا : هبااال ياعزازي هباااال وحبتين على حبتين على عظمة ياست .. الله يكفينا شر الفقده بس !!

يسمع صنهات صوت تدحيج على باب غرفته .. فيقول وهو يمزمز زقارة الحشيش: ألو! ألو من الداحج ؟ ! بزعمه هالحين إتيكيت وذوق !! يدخل أبوه الشيخ الوقور عليه ويقعد ينصحه وهو يمسح دميعاته: ياوليدي ياصنهات خف ربك فيني .. ثمانين سنه ماقد طبيت أقسام شرطه وسحبتني فيها على وجهي ! هذي شيبتي مارعيتها يابوك مجرجني وراك في مراكز الهيئة قاعد ترقم عجوز سودانيه ياللي ماتستحي! طيب يالثور جرجني وراك على شي يسوى مهوب سودانية وعجوز لاعاد تكفى ترقم وانت محشش ! ولا ذاك اليوم حسبي الله عليك لاقي شغالتن بالسويدي منحاشة تبي المطار وركبتها جبتها غرفتك! قسم بالله لولا فزعة خالك عبدالله ان كان هالحين خايس في السجن بتهمة الخطف يااللوح !عيب ياولدي قسم بالله سودت وجهي والله ان الناس كلوني بحتسيهم! جبت لي مرض القلب حرام عليك ياصنهات ..صنهات! صنهات إنته رحت فين؟..! ولكن صنهات مارد عليه حيث انه كان يغط في شخيرن عميق وآخر علمه بأبوه يوم انه يطق الباب !!<< قاطعت أبوسارة الانترنتي قائلاً: حلالاة والله من يكسر هالشيشة على راسك! أجل شخيرن عميق ! ألله من زين الحتسي تكفى مار اسلم اسلم !!

أخذ ابوساره الانترنتي نفساً عميقاً من المعسل الذي أمامه ثم اكمل روايته وقال : في يومن من الايام دق جوال صنهات ! ولم يكن المتصل سوى الداشر العنيف والسمرمدي الخطير أبو عنب . وفيه حكمة تدور بين شياب حارة صنهات تقول : خل ولدك يماشي بليس بس لا يماشي أبو عنب ! كان هذا الداشر سلتوحاً سربوتاً لا يجاريه أحد في الدشره ههه يعني تقدر تقول لو ان الدشير عندهم منتخب كان عطوه رقم تسعه هه هههه !! ما أمدى الراوية الانترنتي يتم هالعبارة الماصله الا وانا لاخه باللي حق الشيشه وقلت الله ياخذك مابزيناك راويه نبزاك وانت تستظرف أنهج علي بس وش يبي أبو عنب من صنهات .. قال الراوية الظريف : أبد دق عليه وقال ياصنهات ترى فيه مروج حشيش في راس تنورة عنده حشيشن يحبه قليبك .. تستعمله منا إلا وثلج النمسا طالعن لك منا ! ياخذ بك لفه هالحشيش اللي عنده على انحاء أوروبا وانت ماتعديت محلك ! فقط تتخيل المكان اللي تبيه واشرب وتخش جو مهوب صاحي ، وانا ياصنهات بأروح أشتري منه حيث اني من زمان ودي أشوف برج ايفل خخخ قال صنهات خلاص خلاص قدام الله يلعن ابو ورى تراني معك !

انطلق ابوعنب وصنهات الى راس تنورة وحدث شي خلا حياة صنهات تنقلب فوق تحت !! كان ابو عنب يقود الماركيز حقه بسرعة 160 .. وكان أمامهم سيارة جيب لاندكروزر .. ما أدري يابوسارة ياخوك من اللي لاعب على أبوعنب وقايل له انه طاره وسواق! حبكت في راسه الا يسقط على الجيب من اليمين!! وهو اللي يزود السرعه ويدز ويدز ويدز يوم أقبل أبو عنب على الجيب وهو اللي ينطل الطارة يمين عشان يسقط ولا درى الحمار الله يرحمه ان فيه أعمال طرق قدامه ، وقبع هو والماركيز وصنهات في الصبات اللي قدامه وعطاك عمره !! صرخت في الرواي الانترنتي : طيب وصنهات ؟ أجابني الراوي وهو ينفث دخان المعسل في وجهي : صنهات دخل غيبوبة شهرين وابو عنب احترق صار فحمتن سوداء حتى ان القواله يقولون مابقى فيه الا سنه الذهبي خخخخ طيب تهقى سنه الذهبي يصير للبروستد الذهبي ؟ ثم اكمل وهو يغالب ضحكاته: بس خل عنك والله ان الراحل ابوعنب كان ثور أجل يسقط على اليمين ياخي خلك واقعي وش هالسواق اللي يقتدي بالسنه حتى في سواقته خخخ ياخي الله ينعن شكله حتى شوماخر ماقد سواها ..! ثم دخل الراوي الظريف في نوبة ضحك عمياء بعد أن أنهى دعاباته السامجه.. انا ماأدري من اللي قايل له انه خفيف طينه ومرح !!

قلت هها طيب وبعدين وش حصل ؟ فأجابني وهو يمسح دموعه من الضحك :- بعد مرور شهرين أفاق صنهات من غيبوبته .. قعد يفكر في صديقه اللي مات .. قعد يفكر لو ان الله خذ وداعته معه كان وش يواجه ربه يقول ؟ يقول رايح ياربي أشتري حشيش من راس تنوره ! ياصنهات ربك ما أبقاك حي الا يبيك تتعظ وهذا درس لك .. لا من اليوم لازم أبدأ صفحه جديده مع ربي وأكون انسان ثاني .. وبالفعل يابوسارة ياحبيبي هذا اللي صار .. تطوع صنهات أبشرك والتزم وطارت اميمته وأبيه من الفرح .. وصار أبشرك بعد يأذن في مسجدهم اذا تأخر المؤذن .. وتعرف على شلة مطاوعه عقب شلة الدشير .. بعد أبو عنب وأبو خدره وأبو ثعيل صار يماشي أبومجاهد وأبوالبراء وابو عمير .. ومشت أموره تمام إلا من بعض الاشياء اللي كانت تكدر صفو حياته .. نقزت في وجه ابوسارة الانترنتي وقلت بكل شفاحه: وش؟وش هي يا راويتنا هاللي تنكد عليه حياته ؟ .. قال أقول اقضب ارضك وخل عنك اللقافه لا أدوحك فيذا .. بتجيك السالفة كلها .. ياطويل العمر في احد المرات كان صنهات يطلّق رجليه في الدائري وينصح الشباب اللي متكين هناك .. لقى مجموعة شباب طربانين ويعزفون عود ويغنون رائعة فهد بن سعيد "على الوعد جيتكم" .. سلم عليهم وجلس وهو مبتسم الوجه وقال للعازف : حبذا لو تدوزن على العود وترخي الوتر الرابع شوي والله ان تجي معك الاغنية صح .. انلخموا الشباب وشلون هالمطوع خبير في العود لا وقاعد يعلمهم بعد ! ابتسم لهم صنهات وقال يااخواني انا كنت اعزف عود ومن الله علي بالهداية والله مافي الاغاني خير ومن هالنصايح ومن هالاسلوب الزين إلين قام الشاب وقال : والله ياشيخ صنهات يمرون علينا بعض المطاوعه ويكسرون مراويسنا وعودنا ونتهاوش معهم لكن انت اسلوبك غير يدخل القلب ويأثر في النفس وهذا العود أكسره انا بيدي وان قاله الله ما عاد أعزف أبد .. انتشى صنهات ثم وادعهم وذهب لمطعم ماما نورة وهو سعيد بما فعل وطلب اثنين شكشوكه وعصير برتقال .. لكن اللي ضيق صدره شلة خكارى ناعمين لابسين الجنز الضيق وهالبلايز المزلطه وقصات الشعر اللي تخليك ماتدري راعيها بنت او ولد ! قاموا هالخكارى ينطلون عليه كلام : شباب شكله منحاش من برنامج ارهاب اكاديمي حق طاش !! والثاني يقول : وااو ابوحفص الظاهري عندنا بالرياض خخخ .. والثالث يقول : ياااي شكله مو حلو شوفوا ثوبه كيف واصل وسط ساقه خخخ .. وفجأة سمع صنهات صوتاً أجش صادر من آخر طاولة بالمطعم يختلف عن الأصوات الناعمه اللي من شوي..
كان هذا الصوت الأحرش يقول : ياخوي اطلب ان بغيت مفطح مهوب شكشوكة بس لا تفجرنا هههههه ! التفت صنهات على صاحب هالصوت الأجش ولقاه عربجي جالسن بآخر طاوله شكله يوحي انه من عرابجة الدخل, ثم التفت على الخكارى الثلاثه لقاهم ميتين ضحك على ذبة العربجي مادروا انه قايلها عشان يتميلح عندهم!!

خذ صنهات الطلب واحتسب الأجر وطلع وهو ساكت .. لكن لفت نظره ان العربجي هالمرة جالس في طاولة الخكارى الثلاثه وقاعد يتبادل الضحكات معهم !! حس صنهات انه كان مجرد وسيلة لغرض قذر من هالعربجي .فما كان منه الا ان خذ شطة الكريستال الكبيرة وراح للطاولة اللي جالسين عليها وقال للعربجي : شف عصيرك طاح فيه ذباب .. ما أمدا العرجبي يدنق الا وشطة الكريستال مسنترة في وسط راسه وطاح مغمى عليه وصارت فوضى بالمطعم وجت الشرطه وصكوا على صنهات اسبوع كامل ودخلت امه العناية المركزة وماطلع الا بكفاله وحب خشم !!

طلعت ام صنهات من المستشفى وضمت وليدها لحظنها وقالت ياوليدي لايهمونك هالناس والله انهم ودهم يصيرون مثلك لكن بليسهم صاحي وانت عيذك بالله بليسك مخزيه ربك ... قام صنهات وحب يدها وتسامح منها وقعد يصيح ويقول يمه مانمت بالسجن وانا داشر والحين نمت فيه وانا ملتزم لكن سامحيني وما اعودها وقام يصيح وامه تصيح وابوه يصيح . وأوقف الراوي الانترنتي روايته وذب الشيشه وقعد يصيح بعد هو . . قمت أهدي فيه وأترجاه يكمل الروايه وبعد إلحاح وافق وطلب مني أقرب له الكلينكس ثم قام يسمح دموعه واستطرد قائلا : دق ابو مجاهد على صديقه صنهات وقال لازم تغير جو وماجاك الا تكفير ان شاء الله وابيك تخاويني عندي شغيل شمال الرياض منها توسع صدري ومنها تغير جو وتوسع صدرك .. دقايق واذا بأبومجاهد عند بيت صنهات وانطلقوا بسيارتهم وهم منسجمين ويسولفون مستانسين وتسودهم الطمأنينة وراحة البال وصفاء النفس .. كان ينبعث من مسجل السياره رائعة نداء وحداء : بقرآني وايماني وتكبيرات اخواني أهز الكافر الجاني وأحمي منه اوطاني .. مع النشيد والحماس كان ابو مجاهد صافق الطبلون وماسك السيد الأيسر وداعس .. يوم قام الكورال يردد أهز الكافر الجاني وهو اللي يتفاعل ابو مجاهد ويهز الدركسون يابوسارة وقامت تحوس بهم السيارة في الجسر المعلق وصاروا الناس يوخرون عنهم لكن راعي كابرس رويال ما أمداه يتفاداهم وهو اللي يقربع فيهم !! نزلوا من السيارة يشوفون الوضع واثر راعي الكابرس نزل معصب يلعن ويسب ويشتم مما جعل أبو مجاهد يستشيط غضباً وقال له هالحين يا البثر تشوف سيارتنا تحوس في الشارع وكلن يتجاوزنا وتجي انت يا النشبه وتصدمنا !! انفعل راعي الكابرس وقال والله انكم قويين وجيه غلطانين ميه بالمية وتهوشون بعد.. انتم اللي مطيورين ومسرعين وشاطفيني قبل كيلوين وتزورقون بين السيارات الله ياخذكم انت وسواقتكم على وش مسرعين والله لو انكم رايحين تحررون فلسطين ! قال أبو مجاهد : الشرهه مهيب عليك على اللي عطاك سيارة ورخصه يا الغشيم أجل الشارع اربعة أسياد يا الأحول ماحلا لك تمشي الا في السيد اللي تبترم بنا السياره فيه !! وكلمة من ابو مجاهد وكلمة من الرجال إلى أن أطلق راعي الكابرس كلمة هزت أبومجاهد هزاً عنيفاً حيث قال : اسعدالله من يصك عليكم في قوانتناموا يا اتباع بن لادن ! فما كان من ابومجاهد الا ان شاله ومحط به ورفعه فوق ورجد به على الارض وهو يصرخ : بن لادن شيخك غصبن عنك ماتسوى ظفره يا قطعة العلماني اتفوو عليك بن سته وستين كلب والناس تحاول تخلص الرجال من أيدي ابومجاهد لكن ابومجاهد كان مستصح ونشيط ماشاء الله عليه ولعن الطيب في أصله .. جت الدورية وركبتهم ثلاثتهم وراحت بهم لقسم العليا .. وأثناء التحقيق في حادث التصادم وتحديد نسبة الخطأ قال راعي الكابرس خلك ياظابط من الحادث تراهم من انصار طالبان!! خبيث راعي الكابرس حسبي الله عليه .. وقال بعد انهم طقوني يوم سبيت بن لادن ! وهنا انقلبت القضية من حادث تصادم الى أمن دولة ودخلوهم على النقيب !! سألهم النقيب : وش تعرفون عن بن لادن ؟ و وش تاريخكم الجهادي ومتى اخر مرة حاولتوا التسلل عبر الحدود للعراق يالله جاوب انت وياه .. قال صنهات لأبومجاهد يالله جاوب الله يبلشك .. قال النقيب اوكي ماراح تجاوبون انا اللي راح أربيكم .. وصك عليهم شهر في السجن لا حس ولا خبر وما أحد درى عنهم ! وقام والد صنهات يابوسارة يطامر في مرافق الدولة يدور ولده وأمه ماغير تون وتنوح خنة حيلي.. معليش أبوسارة تسمح لي آخذ بريك حاس اني ما أقدر أكمل وتوقف الراوي وقام يصيح !! ثم أكمل حديثه بعد الفاصل وعلمني انهم أخذوا من صنهات وابومجاهد تعهد وتواقيع وحطوهم تحت المراقبة وطلعوهم .. أول ما طلع صنهات نصى بيتهم وضم أمه وقاام يصيح ويقول انه مظلوم وصاحت امه وقالت له والله قهر ياوليدي اني صرت أخاف عليك وانت مطوع أكثر من خوفي عليك يوم انك داشرن سريبيت.. وقعدت تصيح وصاح صنهات وصاح أبوه وتوقف الراوي الانرتنتي للمرة الثالثه وقام يصيح بعد ..! وبيني وبينكم أنا بعد دعقتها وقمت أصيح ..!

بعد عدة محاولات اقنعت ابوسارة الانترنتي بالاستمرار في روايته .. فقال : بعد الحادثة هذي حلف صنهات لأمه انه مايفجع قلبها أبد ... وحلف لها بعد ان ماله دخل في كل اللي صار وانه كان مظلوم وانه لابد من الثبات ومجاهدة النفس وان هذا ابتلاء من الله و.و .. الخ.. ! مر اسبوعين على هالحادثة وثم للأسف يابوسارة صارت مصيبه جديده .. ! قلت للراوي لا تقول تكفى ! ترى قسم بالله أم صنهات قطعت قليبي تكفى خلاص انثبر واسكت ,, قال الراوي الانترتني لا لازم أكمل لك هماك أزعجتنا تبي قضيه تكتب عنها ..كان يمشي صنهات بسيارته في حال سبيله وفجأة توقفت السيارات عشان نقطة تفتيش ! كان قدامه هوندا حمراء وأنوارها صفر وفيها عشرين أنتل ونسافاتها خضر ومليانه خوال ومعطين المسجل أعلى صوت وطربانين للخبيتي وزقايرهم في يديهم ( يا حب الخوال للزبرقه خخخ )).. ناظرهم الشرطي ثم قال أمشوا . راحوا الخوال في سبيلهم .. التفت الشرطي على السيارة اللي في السيد الأيسر لقى فيها مراهقين اثنين ويدهر مسجلهم بصوت نوال الكويتيه .. أشار لهم الشرطي بيده ومشاهم .. ثم أعطى الشرطي نظره لصنهات وقال أنت يا ابو لحية وقف !!! اثباتك رخصتك استمارة السيارة !!! تنرفز صنهات يابوساره !! هالحين سيارات العرابجة وهالدشير تمشي عادي وانا توقفوني !! قال الشرطي اقول كل تراب بس واخلص هات اثباتك !! طنقر صنهات يابوساره وكلمة منه كلمة من الشرطي لين تدخل الشرطي الثاني وقال وش فيه ؟ قال زميله : هالحبيب رافض يعطينا اثباته ويتدخل في عملنا !! دقق الشرطي الثاني في صنهات وقال ماشاء الله وش رايك بعد تجلس مكاننا وتوقف اللي تبي وتمشي اللي تبي؟ لا وش رايك بعد أدق لك تحيه؟ إلا ماودك بعد تسوق دوريتنا الله لايهينك ؟ لا هين انت منتب مظبوط شكلك مانت خالي .. شباب انفضوا السيارة نفض لاتخلون شبر الا مفتشينه !!! فماكان من صنهات الا ان صحت عفاريته وتوقدت فيه هرمونات العربجة السابقة فتلاعن مع حقين التفتيش ودبغوه لين قام يغني حمار بطنه وسلموه للأمن العام وبعد التحقيق والنظر في تاريخه الدموي السابق صكوا عليه ستة أشهر غير قابلة لمجرد الشفاعه!!

أبوه توفى يابوسارة قبل خروجه بشهرين !! ايييه يابوسارة مات أبو صنهات واميمته حاسها السكر والظغط والقلب ومرت ستة أشهر كأنها عشرين سنه .. وأبشرك طلع صنهات وقام يبوس يدين أمه ورجلينها ويصيح واخوانه واخواته حوله يشاهقون .. وفجأة غابت أمه ثم رجعت ومعها موس حلاقة وعود عراقي وزقارتين حشيش !! قال وش ذا يا أميمتي ؟ قالت أحلق لحيتك ياوليدي وارجع حشش واقضب هالعود وغن ليل نهار .. ياوليدي الزمان انقلب وتغير ياوليدي دشرتن قدام عيوني ولا طوعن يخليني ما أشوفك الا بالسنه حسنه !! انهار صنهات وسقط أرضاً وقام يصيح وامه تصيح واخوانه يصيحون وتوقف الراوي وقعد يصيح في زاويه وانا مسكت الزاوية الثانيه بعد وقمت اصيح !!

والحين هذا صنهات يابوسارة شوفة عينك .. ماسك العود وزالط أم اللحية وريحة الشراب تفوح من الاستراحه وقاعد يشدو برائعة بشير : "خلصت من جملة الخلان أحسن لي أعيش وحداني, ماعاد أعاشر جميع انسان يكفيني العذاب الذي جاني" .. وأبشرك بعد له الحين سنه ما طب السجن ولا شاف من الله شر.. ويخرب بيته زمان انا أشهد انه انقلب ياخوك.. هاه بتكتب عن هالجريمة ؟! عطيته أشكل ومارديت عليه لأني كنت أرنو ببصري نحو صنهات من طرف الباب ..(( ليتكم تقتبسون ارنو ببصري وتعلقون عليها حاس اني بدعت فيها والله ))

طلعنا من الاستراحه وركبنا سيارة الراوي ابوساره الانترنتي عشان يوديني للبيت .. ترررن تررن كان هذا جوالي يدق..ألو هلا ابوفهيد وش عندك؟ قال إلحق يابوسارة الحق وش أبشرك، سواقنا اندبغ في شارع العليا وانسرق موتره يالله تعال حقق جبت لك حادثه تحقق وتكتب عنها .. قلت يابوفهيد خلاص مابي قضايا .. هاللي عندي تسد وزود .. طوط طوط <<< صفقت بالسماعه في وجهه !

===============================

^خخخخـ^ ^خخخخـ^ ^خخخخـ^ ^خخخخـ^ ^خخخخـ^

^خخخخـ^ ^خخخخـ^ ^خخخخـ^
احلى لطشه لكم

**عيون الطفولة** · #2 10-11-2006, 10:24 PM

وينــــــــــــــــــــــكم
ليش ما عجبتكم القصه

^205^

هانت الأيام · #3 10-22-2006, 05:58 AM

هاااااااااااااااي عيووون
القصه تجنن تجنن مررررررررررره وانا يعجبوني القصص إللي بالعاميه
مرره مرره حلوه
بس مدري إذا واقعيه او لا
لكن عجبتني
يسلموووووووووووووووووووووو وماقصرتي
ويعطيك العافيه ولا تحرمينا من جديدك
باااااااااي