|
| |||||||
| قصص قصيرة قصص قصيرة,قصه واقعيه قصيره,قصص رومانسية قصيرة. |
 |
| | LinkBack | أدوات الموضوع | انواع عرض الموضوع |
|
#21
04-23-2010, 12:32 AM
| ||
| | ||
| الخميس الساعة 8 الصبح قومني من النوم رنين جوالي ,,, القيت نظرة عليه ( صالح يتصل بك ) اففففف وش يبي ذا ,,, ماني راد خله يولي ورجعت انام ,,, لكن رجع الجوال يرن مرة ثانية وصالح يتصل بك اعوذ بالله من هالنشبة جلست ورديت عليه انا بعصبية = وش تبي صالح = خالد يرحم امك تعال شف هالمريض يمكن يسمع منك انا مستغرب = هاه ,,, أي مريض .؟ صالح = خويلد انا = وش فيه .؟ صالح = يتلوى من راسه طلبت مني عمتي اوديه المستشفى بس هالمريض عيا انا = وابو عبد الله باقي ماجا من الرياض .؟ صالح = ابو عبد الله مايجي الا بكرة ,,, تعال شفه يمكن يسمع منك انا = طيب يله جاي سكرت عنه ولبست ثوبي وطلعت ولقيت صالح يحتريني عند باب ابو عبد الله انا = وينه .؟ صالح = تعال رحنا للملحق ودخلت غرفته ,,, لقيت خالد منسدح على سريره وعليه بنطلون بدون فنيلة واللحاف طايح بالارض و مفرش السرير محيوس ,,, انتبه خالد لي وهو مازال ماسك راسه خالد بضعف ومستغرب من دخولي عليه بهالوقت = خالد ! رحت له وحطيت يدي على راسه انا = قم اوصلك المستشفى خالد مازال مستغرب مني = وش جابك على هالصبح .؟ انا = صالح علمني انك تعبان قم اوصلك المستشفى التفت خالد لصالح اللي واقف بجنبي خالد بهمس = ليه علمته .؟ صالح = عشان يفكنا منك قم اذلف للمستشفى ,,, والله لولا عمتي كان خليتك تموت بمكانك انا = خالد قم خلني اوصلك التفت خالد لي خالد بألم واضح = مايحتاج بيخف الصداع الحين تأفف صالح وقعد على السرير عند رجلين خالد صالح = اففففف هذي كلمته من الفجر مايحتاج مايحتاج ( والتفت على خالد ) ترا ابتصل ببوك يجي ياخذك ويخلصنا منك يالمريض ناظر خالد صالح وحسيته عصب عليه خالد = اتصل وشف وش يجيك صالح بعصبية = تتحدى اجل ( وطلع جواله ) انا اوريك بغفلة من صالح رفع خالد رجليه كلهن ودفع صالح بقوة ,,, وطاح صالح بالارض بشكل عنيف استغربت منه هالقوة رغم تعبه وتألمه ,,, كل هذي عصبية .؟ قام صالح من الارض وهو ماسك يده اللي عورته بسبب الطيحة اخذ شوي يستوعب الاهانة اوه بتبدا الهوشة الحين انا = ص صالح ماكان يقصد وفي اقل من الثانية هجم على خالد المنسدح وركب فوقه على السرير ويضغط بركبته على صدر خالد وبدا يعطيه من هالكفوف حاولت امسك يدين صالح انا = لا لا صالح ,,, اتركه خالد تعبان انزل دفعني صالح بعصبية صالح = اذلف ان ماربيته هالمغرور وعطى خالد كف قوي وفجأة تصنم صالح منصدم ونظره على خالد صالح بخوف = خ خالد ( التفت لي ) وش فيه .؟ ناظرت خالد لقيته ساكن بس انفاسه سريعة ويديه متمدده على السرير كنه مستسلم لكفوف صالح ومن ملامح وجهه كنه يتألم من شي مسكت يده بخوف انا = خالد قم اوديك وانتبهت ان صالح الى الحين فوقه عصبت ودفعت صالح بقوة وطاح مرة ثانية بالارض انا بعصبية = كله منك والتفتت لخالد لا يكون اغمى عليه ,,, وحاولت اجلسه انا بخوف = خالد تسمعني قم خالد بألم = اتركني ,,, اتركوني اطلعوا مابي احد الحمد الله المهم ماغمى عليه ,,, جلسته غصب عنه انا بترجي = خالد لمصلحتك قم اوديك المستشفى دفعني خالد ورجع ينسدح خالد وانفاسه سريعة = قلتلك مايحتاج ,,, رح لبيتك ,,, رح مابي احد ,,, رح وخذ هالثور معك مابي احد اطلعوا ( ومسك راسه ) سمعت صوت حرمة تنادي صالح ,,, عرفت انها عمته ,,, راح صالح وانا مازلت واقف عند سرير خالد انا = اكلت علاجك .؟ خالد = لا مابي اكل شي اطلع تلفتت ادور مكان علاجه ولقيت على الطاولة اشرطة حبوب كثيرة ,,, رحت للطاولة واحترت مدري أي من هالحبوب المسكن انا = تحتاج لمسكن ,,, اخاف يغمى عليك ماجاني رد منه والتفتت عليه ,,, لقيته على وضعه لكن هالمرة سرحان وانظاره منصبة على السقف ,,, اخذت مجموعة من اشرطة الحبوب ورحت له انا = ايه وقاطعني دخول عمة صالح لابسة عباتها ومتغطية واقفة عند الباب ,,, استحيت منها مدري وين اروح والمشكلة واقفة عند الباب ماقدر اطلع ,,, بالتالي رحت بالجهة الثانية من السرير ام عبد الله = خالد خل صالح يوديك جلس خالد خالد = مافيني شي صالح = ياعمة ماعليك منه هذا بس مدلع ,,, مقومتني من الصبح وهو معند حتى خالد ماسمع منه ,,, خليه بس يذلف ماعطته وجه ام عبد الله = رح للمستشفى ,,, قم خلهم يودونك خالد = مايحتاج ,,, احس احسن الحين حاولت ام عبد الله فيه ويوم عجزت عنه طلعت ,,, ومازال صالح واقف عندنا قلت عشان اصرفه انا = صالح ممكن كوب ماء راح ,,, والتفتت لخالد انا = ايهم المسكن .؟ انسدح خالد والتفت لي خالد = مابي مسكن ,,, بيخف من كيفه ,,, بعض الاحيان يجيني صداع ويروح بدون مسكنات انا = بس الافضل تاخذ مهدي يريحك خالد = تبيني آكله على جوع ,,, امس ماتعشيت ولا اكلت شي انا مستغرب = ليه .؟ خالد = ماني مشتهي ,,, خلاص خالد خلني ,,, اطلع ابي اصير لحالي انا = مثل ماتبي ,,, ترا ابمرك في الليل هز راسه وانقلب على جنبه الثاني معطيني ظهره ينهي الكلام طلعت وصادفت صالح ومعه الكوب صرفته واشوى هو بنفسه يبي يروح ينام @@@@@@@@@@@@@ نهاية الجزء التاسع
__________________ تكفون سجلوا بهاذي اللعبه يالله http://themafia.ae/?affuid=77398 |
|
#22
04-23-2010, 12:33 AM
| ||
| | ||
|
*10* بعد صلاة العشاء وحنا نتعشى خلود = خالد اليوم فيه واحد اتصل يقول ان مستأجرين الشقة طلعوا والحين هي جاهزة تفاجأت ما مر شهر ونص على كلامهم انا = متى اتصلوا .؟ خلود = اليوم العصر انا = وتوك تعلميني خلود = نسيت ,,, يعني خلاص بنطلع من بيتنا انا = شنسوي غصب خلود = وكيف بننقل الاثاث .؟ انا = الشقة مفروشة ,,, اممم انا ابمرها واشوفها اول ,,, واثاثنا اللي مانحتاجه اببيعه ,,, بس انتي جهزي اللي بناخذه من الحين ماردت علي و كنها تفكر انا = وش فيك .؟ خلود = لازم اعلم امي اننا بننقل انا = ماتصلت .؟ خلود = لا ,,, أخر مرة اتصلت من اسبوعين انا = هي تعرف رقم جوالي ,,, اذا اتصلت علي علمتها ,,, بس قولي عاد زوجها يخليها تتصل خلود = حسبي الله عليه أي والله حسبي الله عليه ,,, مايكفي حارمنا منها بعد بيحرمنا من صوتها ,,, ااه ماباليد حيلة المهم كملت عشاي و طلعت من البيت ,,, خلني اروح اتطمن على خالد واشوف وش اخباره ,,, من الصبح ماشفته لا هو ولا صالح رحت لبيت ابو عبد الله وضربت الباب وطلع لي صالح صالح = هلا خالد انا = هلا فيك ,,, جيت اشوف خالد ,,, وشلونه الحين .؟ صالح = الحين انا اللي فاتح لك وتسأل عن خويلد انا = هههههههه هذا انت قدامي مافيك بلى ,,, وبعدين خالد كان تعبان الصبح وجيت اتطمن بس ,,, لا تصير غيور صالح = التعبان اللي تقول عليه شف وش سوا فيني وأشر على جبهته ,,, كان فيه خدش بسيط وشكله توه طازا ,,, وبعدين يعني شكلهم توهم متهاوشين انا بملل = وشو بعد .؟ صالح = المغرب سألته سؤال عادي وعصب ,,, انا ابي افهم انت وش تبي فيه هالمغرور انا = والله مدري من اللي معطي الثاني كف اليوم ,,, لا تنسى انك مصبحه على كفوف ,,, صالح خف عنه شوي يكفي المرض اللي فيه صالح = المهم انت وش تبي الحين انا = نادلي خالد او دخلني عليه صالح = ماني فاضيلك ابطلع عندي مشوار انا = ياخي الملحق هذا هو بالحوش ناده لي شوي ماراح يكلفك صالح = وش تبي فيه .؟ انا بعصبية = رح لمشوارك ,,, آسفين عطلناك ( وطلعت جوالي ) انا ابتصل عليه يطلع = ماله داعي تتصل رفعت راسي لمصدر الصوت وكان خالد جاي لنا وقف بجنب صالح ,,, لا حظت كدمة زرقا بجنب الحاجب الايمن ,,, هذا فيه خدش وهذا فيه كدمة وبعدين مع هالاثنين خالد = ماله داعي تتعب نفسك مع واحد مايفهم صالح = لو ماني مستعجل كان رديت عليك وراح صالح باتجاه سيارته ,,, التفتت على خالد لقيته يناظر صالح وهو يمشي ,,, التفت لي وابتسم خالد = وش رايك حنا نطلع بعد انا = نطلع وين .؟ خالد = مدري أي مكان انا = يله ,,, بس قلّي اول راسك وشلونه الحين .؟ قال بلهجة مصرية خالد بابتسامة = عمر الشئي بئي ركبنا سيارته وطلعنا من شارعنا ,,, صح قبل انسى ,,, التفتت لخالد انا = فيه واحد اتصل على الاهل يقول الشقة اللي استاجرناها صارت جاهزة قطب خالد حواجبه خالد = مو يقولون بعد شهر ونص .؟ انا = هذا اللي مستغرب منه ,,, بس يمكن المستأجرين طلعوا منها بدري ,,, خلنا نمرهم الحين قبل يسكر المكتب خالد = معك ورقة العقد وسند المقدم .؟ انا = اوه لا مو معي ,,, بالبيت رجع خالد لشارعنا وقف عند بيتي ,,, نزلت بسرعة وجبت الاوراق وطلعت ,,, لقيت سالم واقف عند خالد ,,, ركبت بسرعة انا = سالم رح العب مع ربعك وياويلك اذا تعدت الساعة 10 وانت برا سالم = وانت بعد لا تتعدى الساعة 10 خالد = ههههههههههههههههههههههههههه انا بعصبية = انا عندي شغل ( والتفتت على خالد وضربته ) وانت لا تضحك ,,, امش لا نتأخر خالد بابتسامة = مع السلامة سلومي وصلنا المكتب ونزلنا وبعد ماخلصنا من عنده راح معنا هندي يورينا الشقة ونستلم مفتاحها كانت شقة حلوة بس صغيرة شوي واثاثها حلو بعد ,,, تفرجنا فيها انا وخالد على غرفة غرفة ومعنا الهندي صالة وغرفة مخصصة للمجلس والمطبخ باثاثه كامل وحمام واحد وغرفة فيها ثلاث أسرة وفيها دولاب واحد وغرفة ثانية فيها سرير مزدوج ودولاب كبير وتسريحة ,,, تأملت السرير المزدوج ااه المفروض تكون الغرفة هذي لبوي وامي ,,, بس هم وينهم ,,, اآه ليتهم هنا ,,, انا تألمت يوم شفت السرير اجل خلود وش بتسوي انتبهت بذراع يلف اكتافي ,,, التفتت لخالد بحزن خالد = تعال خذ المفتاح من هالهندي وخله يروح ,,, حنا دفعنا المقدم ونقدر نقعد بالشقة براحتنا ( وابتسم ) هزيت راسي والتفتت على الهندي اللي من اليوم وهو ورانا انا = عطني المفتاح الهندي = انا مافيه يشوف حرمة انته ,,, هذا عمارة عوايل مافيه يجي شباب انا = حرمة بجيبها بعدين بكرة او بعده ,,, انت عطني المفتاح الحين ولا يكثر عطاني المفتاح وراح رحنا للصالة وشغلنا التلفزيون ,,, نزلت شماغي وتمددت على الكنب براحة خالد بعد ماجلس = منزلاً مبارك ,,, ماشاء الله شقة حلوة انا = الله يبارك فيك ,,, الصراحة لولا الله ثم عمي ابو عبد الله كان ضعت خالد = الحمد الله التفتت على خالد انا = صح خالد ,,, ابو عبد الله من يوم الاثنين اللي فات وهو بالرياض ,,, اول مرة يطول في السفر ,,, عسى خير .؟ سكت شوي وبعدها مدد رجليه على الطاولة اللي قدامه وهمس خالد بهمس = عنده شغل ,,, متى بتنتقلون للشقة .؟ حسيته يصرفني عن موضوع ابو عبد الله وسفره المفاجئ ,,, اخذت الريموت وجاوبته انا = مدري الصراحة ,,, ماحنا مستعجلين اول شي ابشوف اثاث بيتنا اللي نحتاج واللي مانحتاج ماسمعت منه رد والتفتت عليه لقيته سرحان ,,, لا حول ولا قوة الا بالله وش فيه ذا من امس ماهو على بعضه سكتت عنه ورحت اقلب في القنوات ,,, خذنا ربع ساعة وكل واحد على وضعه ,,, اففف مليت ,,, جلست معصب انا = ياخي انت ممل ,,, لنا ربع ساعة ساكتين التفت لي بكسل ومارد انا = وش فيك خالد وش اللي شاغل بالك خالد بتنهيدة = امور كثيرة ( واعتدل في جلسته ) خالد وش رايك نعتمر سكت من المفاجأة خالد = اربعاء وخميس وحنا راجعين ماراح نطول انا = ماقدر اترك اخواني نزل راسه خالد = صح نسيت انا = هذا غير شغلي ,,, لا تنسى اني تحت التدريب ,,, ومديري عصبي أي غلطة يسجلها علي رفع راسه وابتسم خالد = من هالناحية اطمئن ماراح احد يطردك الحين لكن مثل ماقلت لك مارتحت للمدير واخاف يسبب مشاكل بيني وبين وينلي ويطردك بعد كم شهر انصدمت مشاكل بينه وبين وينلي وش دخله بشغلي انا منصدم = مشاكل ! خالد = خالد من الحين لازم تاخذ دورات انا = تكلم وكأنك واثق ان ماحد يطردني ,,, واي مشاكل تقصد ,,, خالد ماني فاهم شي قمت وجلست عنده يانا ياهو هالليلة يجاوبني غصب عنه وابن امه يتهرب خالد = انا واثق انك بتشتغل كم شهر عندهم بس ماني واثق انك بتستمر انا بسخرية وبنفاذ صبر = وليش واثق ان شاء الله لا يكون مستشفى ابوك خالد = ماهو مستشفى ابوي ( وابتسم ابتسامة جانبية ) بس اذا تضررت انت بيتضرر وينلي فتحت فمي مندهش مسكت راسي ,,, اآه بديت اصدع انا = جننتي باسرارك قال يتصنع البراءة خالد ببراءة = أسراري .؟ ماعندي اس قاطعته معصب وفاير دمي منه انا بصراخ = للمرة الثانية اسألك وش المصلحة اللي يبيها وينلي منك .؟ ولا تلف وتدور تجاوبني الحين الحين تفهم خالد = طيب اعصابك انا بعصبية = جاوب خالد = ابقولك بس خله سر بيني وبينك انا = سرك ببير نزل راسه كنه يفكر قربت ملاصق له انا = ليش ساكت ,,, قل اسمعك خالد = مدري من وين ابدا سكتت عنه ياخذ راحته بعدها رفع راسه يطالعني خالد = قبل ثلاث سنين او اكثر ,,, جا وينلي للسعودية للعمل في مستشفى حكومي في الرياض ,,, وينلي ناجح في عمله كل عملياته اللي اجراها ناجحة والادوية اللي يصرفها للمرضى ماهي مهدئات وبس ,, لا ,, يصرف ادوية في محلها ومواعيده مضبوطة تقدر تقول شاطر في شغله ,,, ااآ ,,, واحد حقير نصراني مثل وينلي اكيد مايهمه الا الاقتصاد والمال وكيف يجمع فلوسه ,,, قرر انه يفتح عيادة تحت ادارته ,,, طبعا القوانين هنا في السعودية ماتسمح للاجانب يمتلكون شقة كيف عاد بعيادة ,,, اتفق وينلي مع واحد تاجر سعودي يفتحون العيادة باسم السعودي مع تكاليف الاجهزة والادوية وتكون الادارة على وينلي والارباح بينهم ( تنهد وكمل ) تدري منهو السعودي اللي العيادة باسمه .؟ انا = من .؟ خالد = ابوي انا منصدم = ابوك عنده عيادة .؟ خالد = لا انا بعصبية = تلعب علي انت .؟ خالد = ماخلصت كلامي انا = اا ,,, كمل ,,, خذ راحتك خالد = ابوي عنده عقلية تجارية ,,, شرا بيت كبير نوعا ما بوسط سكن مليان اجانب في الرياض وحول البيت الى عيادة ,,, لأن الاجانب هم اللي يحتاجون للعيادات الاهلية اكثر من السعوديين ,,, مثل ماتعرف السعوديين يتوجهون اول للحكومية واذا مانفع معهم توجهوا للاهلية ,,, صح والا لا .؟ هزيت راسي باية خالد = ترك وينلي المستشفى الحكومي واشتغل في ادارة العيادة ,,, مر سنتين والعيادة كل مالها وتنجح وتنشهر واجرت عدة عمليات ناجحة واربحاها تزيد ,,, لكن طلعت مشكلة ,,, العيادة تحتاج متابعة من صاحب العيادة نفسه اللي هو ابوي ,,, مراجعات لوزراة الصحة واستقدام ممرضين واطباء وصرف الرواتب وشراء اجهزة جديدة وادوية ,,, خاصة ان كل الارباح تنزل بحساب ابوي ,,, والمشكلة سفريات ابوي كثيرة ,,, عطّل امور كثيرة في عمل العيادة ,,, عدة مرات تأخرت مراجعات للدوائر الحكومية والسبب سفر ابوي ,,, وعدة مرات تأخر صرف الرواتب والسبب سفر ابوي ,,, وعدة مرات تأخر تسديد الفواتير والسبب سفر ابوي ,,, وينلي ماتحمل الوضع ,,, وبنفس الوقت مايبي يخسر العيادة اللي ادارتها تحت تصرفه ومافيه احد يحاسبه عليها بسبب انشغال ابوي ,,, خاصة ان مكانها مناسب وراتبه اللي يحصل عليه اضعاف اضعاف الراتب اللي كان ياخذه من المستشفى الحكومي ,,, يعني عنده عدة اسباب يخليه يتمسك بالعيادة ,,, وقبل ثمان شهور اتفق مع ابوي على اتفاق يرضي ثنيناتهم ,,, تدري وش الاتفاق .؟ انا = وش .؟ خالد = تنتقل العيادة باسمي شهقت متفاجئ انا = العيادة الحين باسمك .؟ هز خالد راسه باية انا بفرح = يعني لك .؟ هز راسه باية انا = ماشاء الله مبروك مع انها جت متأخرة هههههههههههههه سكت ومارد علي ,,, استغربت ليه اشوف الهم بعيونه انا مستغرب = اشوفك مانت فرحان خالد بهمس = ماخلصت كلامي انا = اوه أسف كمل خذ راحتك خالد = انتقلت العيادة بالكامل تحت اسمي ,,, بالكامل ياخالد ,,, والحساب اللي تنزل الارباح فيه انتقل لحسابي ,,, الموظفين الاجانب انتقلوا تحت كفالتي بدل ماكانوا تحت كفالة ابوي من بينهم وينلي ,,, العيادة مليانة بالموظفين الاجانب ومشاكلهم كثيرة ,,, كل هذا عشان يصير لي الاحقية في مراجعة الدوائر الحكومية بالكامل لكن الى الحين ادارة العيادة تحت تصرف وينلي اما انا علي اللي يخص العيادة من برا ,, شراء ادوية والاجهزة الحديثة وصرف الرواتب ومراجعة الوزارة انا = طيب اشوف كل شي من صالحك ليش مانت فرحان خالد = ااه ياخالد من وين افرح وانا اتعامل مع واحد خبيث مثل وينلي ,,, اللي لازم تفكر مليون مرة قبل تشوفه وتتكلم معه ,,, وينلي كان يسرح ويمرح على كيفه بالعيادة بسبب انشغال ابوي عنه و لما انتقل كل شي باسمي قبل ثمان شهور يعني قبل توبتي وقبل مانتقل هنا ,,, كنت بايعها همي اسهر وافرفش مع اصحابي,,, ساعتها مانتبهت للمخالفات الموجودة بالعيادة ,,, ولما عرفت الطريق الصحيح قبل اربع شهور وانتبهت للمخالفات الموجودة بالعيادة بعضها مخالفات شرعية وبعضها مخالفات قانونية والمشكلة واللي ماني قادر اطلع منها المخالفات القديمة اللي كان يسويها وينلي قبل تنتقل العيادة لي انا = وش المخالفات اللي سواها.؟ خالد = وينلي كان على باله اني ابصير مثل ابوي انشغل واتركه ,,, انتبهت انه العيادة مختلطة ويمنع دخول المحرم مع المريضة ,,, هذا غير لبس الممرضات ,,, تصدق المسلمة منهن يمنعهن من لبس الحجاب هذي بعض المخالفات الشرعية ,,, يوم طلبت منه يغير من الادارة و يفتح قسمين للرجال والنساء عيا وقال لا تتدخل في الادارة ,,, قلت له ابطردك واسفرك لبلدك ,,, هددني بالمخالفات القانونية اللي كان غافل عنها ابوي والى الحين موجودة ,,, يعني الضرر بيصير علي انا لان كل شي صار باسمي انا = وشو المخالفات القديمة .؟ خالد = كثيرة ,,, منها جايب امريكي وفرنسي مخلصة اقامتهم ومشغلهم كأطباء تحت اسم العيادة ,,, هذولي اكتشفتهم بالصدفة لما جيت ابسلمه الرواتب ,,, تهاوشت معه هددني قال راح ارسل واحد يبلغ عنهم وطبعا اللي بيتضرر انا لانهم يشتغلون بعيادتي وماحد بيصدقني الكل بيقول اني انا اللي جايب مخالفين انظمة الاقامة ومشغلهم عندي وهو يطلع منها مثل الشعرة من العجين لان كل شي باسمي ,,, ابوي كان غافل ومخليه يسرح ويمرح التفت لي وطالعني بعيون حايرة خالد = بأي يوم يمكن انسجن وانا مظلوم ,,, قلّي وشلون اتخلص منه .؟ كل ماحاولت اتدخل في الادارة هددني ,,, حاولت اطرد الفرنسي والامريكي يهددني بمخالفات ثانية عيا يعلمني عنها انا = يمكن مافيه مخالفات ثانية ,,, يمكن يخوفك بس خالد = وش يضمنلي انه يخوفني بس ,,, يمكن صحيح فيه مخالفات انا = انت مرة قلت مساعده واحد سعودي اسمه ناصر قله ينصحه يمكن يسمع منه قام خالد معصب خالد بعصبية = انا لو اشوف ناصر هذا كان ذبحته والتفت لي وجه احمر من العصبية خالد = ناصر يشتغل بمستشفى ثاني بس واقف مع وينلي ,,, اخ بس لو اشوفه ,,, انا مادري وش سويت لناصر حتى يوقف ضدي ,,, انا حتى ماعمري شفته ,,, قلي انا وش سويت ,,, ليش الناس يكرهوني كذا لييييييش ,,, وينلي و ناصر وصالح و بدر قمت متأثر وضميته اهديه ,,, ضمني خالد بقوة كأنه مايبني اتركه وانصدمت لما سمعته يبكي خالد بصوت باكي = خالد ابي ارتاح ,,, ابي انام وانا مرتاح ,,, ابي انام بدون مايهددني وينلي ابي انام بدون ماتهاوش مع صالح ابي انام بدون مايحرقني بدر ابي انام ابي انام واستمر في البكاء وهو يضمني اكثر كأنه ينشد الراحة بضمتي ,,, ااه ياخالد حياتك كلها مخاطر بين بدر اللي يدورك وبين وينلي اللي مايخاف الله وبين صالح اللي الغيرة معميته ,,, صالح اقدر اخلصك منه بس وينلي وبدر وشلون اخلصك منهم ,,, مابيدي حيلة ابعد خالد عني وكنه هدا ,,, وحسيته منحرج خالد = كله من الحاحك خليتني اصيح كني بنت ورفع فنيلتي يمسح وجهه عن اثار الدموع ,,, حطيت يدي على كتفه انا = اذا كان شغلي بيزيد المشاكل بينك وبينه مستعد اترك الوظيفة خالد = لا ياخالد لا تترك وظيفتك ولا شي ( وابتسم ابتسامة باهتة) تراه مثل مايهددني انا اهدده ههههه كل واحد ماسك الثاني باليد اللي تعوره ( وحط يده على راسه ) اخخخ راسي يعورني انا مستغرب = كيف ,,, اآ ,,, ادري انك تعبان بس ابي اعرف وشلون انت تهدده وهو يهددك خالد = انا اقدر اعطل شغل العيادة وينلي متمسك فيها مرة وخسارة العيادة تعني خسارته ,,, لما جا تسديد الفواتير هددت وينلي باني ماراح اسدد الفواتير وبينقطع الكهرب اذا ماعزل النساء عن الرجال ونفذ اوامري ,,, ولما جا مراجعة لاحدى الوزارات هددت وينلي باني ماراح اسعى في المراجعة الا اذا نفذلي آمر وهكذا آخذ اللي ابيه منه بهالطريقة إلا طرد الاطباء المخالفين عيا يطردهم ,,, اذا هددته هددني يقول انا اقدر ارسل احد يبلغ عنك وتنسجن ,,, صح انه بيخسر بس ماراح ينسجن معي بيسافر لبلده ويرجع يشتغل موظف عادي بأي مستشفى ,,, بس ماراح يضيع مستقبله مثلي ياخالد @@@@@@@@@@@@@@@ يتبع
__________________ تكفون سجلوا بهاذي اللعبه يالله http://themafia.ae/?affuid=77398 |
|
#23
04-23-2010, 12:34 AM
| ||
| | ||
|
يتبع طالعته متأثر ماعندي كلام اقوله له ,,, يالله ورطة ,,, طالعني يحتريني اتكلم يوم طولت وانا ساكت ,,, طلع جواله والقى نظرة عليه خالد = الساعة 12 الحين ,,, وبكرة جمعة ,,, خلنا نرجع هزيت راسي وطلعنا من الشقة وكل واحد رجع بيته ,,, حاولت انام لكن التفكير بخالد طير النوم عني ,,, يالله ياخالد يارب احفظه وابعد عنه عيال الحرام ,,, وينلي _ ناصر _ صالح _ بدر ,,, صالح ان شاء الله ماهو مشكلة اقدر افك خالد من شره صح انه عنيد لكن ان شاء الله يعقل ,,, بس الثلاثة الباقين وشلون .؟ كل واحد خطره على خالد غير شكل ,,, ليه مايتركونه بحاله ,,, مايكفي انه وحيد امه ,,, مايكفي المرض اللي يعاني منه ,,, مايكفي ان ابو عبد الله متعلق فيه ليه ماي صح ابو عبد الله ,,, ابو عبد الله ليه بالرياض الى الحين معقول عشان مشكلة خالد ,,, بس خالد بنفسه قالي خله سر بيني وبينك يعني هذا سر حتى عن خاله الله يستر لايكون فيه شي ثاني مخبيه عني غير عن وينلي وناصر وبدر ااه يارب احفظ خالد من شرهم يارب الجمعة اثناء صلاة المغرب كان ابراهيم هالمرة هو اللي يصلي فينا بعد ماقدمه فايز بسبب صوته المبحوح ,,, والحين يالله يالله امسك نفسي عن الضحك في الصلاة ,,, ابراهيم مرتبك لأنه اول مرة يصلي فينا ,,, وكل شوي يغلط في الآيات مع انها من الصور القصار وابراهيم حافظ للقرآن حتى الفاتحة غلط فيها من شدة ارتباكه ,,, واسمع فايز بجنبي كل شوي يعدل لابراهيم بصوته المبحوح ,,, والحمد الله خلصت الصلاة على خير ,,, الله يتقبل بس مدري وشلون كانت صلاتي طوال الصلاة اجاهد نفسي عن الضحك والسبب ابراهيموه وارتباكه وجه ابراهيم وجهه للمصلين وانظاره على فايز خايف منه ههههههه التفتت على فايز لقيته يحرك يده لابراهيم يعني ياويلك مني والمشكلة ابراهيم مايقدر يطلع من المسجد قبل الناس لأنه يعتبر الحين هو الامام ,,, انا بالعادة اذا خلصت الصلاة على طول اطلع لكن هالمرة نذالة ابشوف فايز وهو يهاوش اخوه هههههه خف المسجد من المصلين وصار مافيه الا كم شايب ,,, جا ابو فايز عند ابراهيم ابو فايز = ماتعرف تصلي والا مانت حافظ شي قام ابراهيم متفشل من ابوه ابراهيم = ااآ ,,, إلا بس مادري وش فيني نسيت ابو فايز = العشا تصليبنا ,,, وراجع القرآن اذا كنت مانت حافظ ( والتفت على فايز ) سمعله والا دور واحد حافظ يصليبنا وطلع ابو فايز معصب على ولده ,,, ضحك فايز فايز = ههههههه خلاص اخذت علقة من ابوي هههههه ,,, ابراهيم عادي يارجال انا اول ماصليت بالناس جبت العيد ههههههههههه كنت زيك واردى بعد ههههههههههه وراح ,,, طلعنا انا و ابراهيم من المسجد ,,, واول مادخلنا شارعنا ومرينا بجنب سيارة ابراهيم الواقفة ,,, شهق ابراهيم كنه تذكر شي ابراهيم = صح ,,, خالد الحق ,,, مفتاح سيارتي داخلها وهي مقفلة انا = وشلون نسيت المفتاح داخلها .؟ ابراهيم = قبل صلاة المغرب كنت بسيارتي جاني فايز وقالّي اني انا اللي اباصلي فيكم ,,, ارتبشت وقفلت السيارة والمفتاح فيها انا = ههههههههههههههههههههههههههههههههههههههه راح يدور حولين سيارته يدور حل ,,, رحت عنده وطليت من عند الدريشة ولقيت المفتاح داخلها انا = امممم مالك الا انك تكسر الزجاج ابراهيم = لا ,,, سيارتي جديدة والزجاج تصليحه غالي درنا حولين السيارة نحاول نلقى حل غير كسر الزجاج ,,, لين جا صالح ومعه ماجد وسعد ماجد = ياخي اكسر الزجاج ,,, اكسره لك .؟ ابراهيم = لا لا بتخرب سيارتي سعد = اكسر الزجاجة الصغيرة ابراهيم = بتتشوه سعد = هههههههههه اكيد المهم تفتحها صالح = وخروا وخروا انا ابكسرها ابراهيم بعصبية = عشان اكسر راسك سعد = ههههههههههههههههههه يافرحتن ماتمت ,,, ماتهنيت فيها ,,, يله بس عن اذنكم ابروح وراح لبيته ,,, صاح ابراهيم محتار ابراهيم = وشلون الحين .؟ فجأة رن جوالي ,,, طلعته من جيبي والقيت نظرة ( خالد يتصل بك ) ,,, ابتسمت ورديت عليه ,,, اليوم ماشفته ابد انا بابتسامة = هلا والله بخالد خالد = هلا فيك ,,, اطلع ,,, الحين بمرك انا مستغرب = انا في الشارع الحين ,,, انت وينك .؟ خالد = اها ,,, ظنيتك في البيت,,, قربت اوصل للحارة ,,, يله الحين جاي سكرت عنه ,,, وطالعت ابراهيم اللي محتار بسيارته انا = مالها ريموت .؟ ابراهيم = لا ,,, بس توبة ابشتري ريموت لها ,,, افففف مالي إلا اكسرها وراح يدور حصاه مناسبة ,,, دخل خالد بسيارته لشارعنا وكانت معه حرمة ,,, لبق سيارته عند بيت ابو عبد الله ونزلت الحرمة ودخلت البيت ,,, عرفت انها ام عبد الله ,,, التفتت لصالح مستغرب ,,, لقيت وجهه لا تعليق يناظرهم عادي ,,, استغربت ماهو دايم يضايق خالد اذا كان في البيت بس عشان هالعمة الحين اشوفه ساكت ولا تحرك حتى ,,, جانا خالد خالد = السلام عليكم انا = وعليكم السلام ,,, وين كنت .؟ خالد = بالسوق ( والتفت لصالح ) ولد اخوها سحب عليها اليوم ,,, طلبته يوديها وعيا صالح = ياخي ماكنت فاضي انا = اها الحين فهمت ( والتفتت لصالح ) ماهو انت دايم ماتبي خالد يصير في البيت عشان عمتك ,,, الحين اشوفك راضي عليه يوديها صالح = نستفيد منه بدل ماهو جالس على قلوبنا الصراحة نرفزني صالح ,,, قربت من خالد عشان مايسمعنا صويلح انا بهمس = لوني منك كان ماوديتها ,,, خلها تشوف ولد اخوها اللي تدافع عنه قرب خالد راسه لراسي خالد = أألف قلبها عشان اقلبها على صالح صالح = وش تقولون .؟ خالد = مالك دخل صالح = ماسألتك ( وناظرني ) وش تقولون .؟ انا = مالك دخل صالح بعصبية = كذا يعن وفجأة سمعنا صوت تكسير زجاج ,,, وكان ابراهيم كسر الزجاجة الصغيرة لسيارته ,,, تفاجئ خالد اللي مو فاهم شي ,,, وقف بجنب ابراهيم خالد متفاجئ = ليش كسرتها ,,, لا يكون فيك نفسية .؟ مارد عليه ابراهيم اللي مو مستوعب كيف تجرأ وكسر سيارته ,,, راح ودخل يده وبعد محاولات بسيطة طلع المفتاح ,,, هنا ضحك خالد يوم فهم السالفة بعد نص ساعة وحنا واقفين نسولف أذن لصلاة العشا ابراهيم بغرور مازح = يله قدامي اشوف انا بصليبكم ,,, ياويل اللي يتأخر انا = هههههههههههههههههههههه لا تذكرني ,,, انا مدري وشلون صليت المغرب وراك ,,, تكفى نبي غيرك هههههههههههه صالح = احلى شي يوم غلطت بالفاتحة ههههههههههههههههههه خالد مستغرب = ابراهيم انت الإمام .؟ ابراهيم = ايه صليت فيهم المغرب وابصلي العشا بعد ,,, فايز تعبان وكلفني الإمامة ,,, يله يله قدامي المسجد صالح = اقول ابراهيم سمعنا الفاتحة الحين ابراهيم بعصبية = وش قالوا لك ماني حافظها انا = لا لا بس عشان نطمئن على إمام مسجدنا ههههههههههههههههه ابراهيم = مالت عليكم ,,, بتمسكونها علي الحين انتبهت لسرحان خالد بعد ماجاوبه ابراهيم على سؤاله ,,, وش فيه ,,, مسكت ذراعه وجريته معي مبتعدين عن ابراهيم وصالح انا = خالد وش فيك .؟ خالد = فرق بين اخوياي قبل وبينكم ( والتفت لي وابتسم ابتسامة عريضة ) ليتني عرفتكم من زمان ابتسمت ولا رديت عليه ,,, التفتت وراي لقيت ابراهيم وصالح متوجهين للمسجد ,,,, تفاجأت بدخول سيارة ابو عبد الله لحارتنا انا = خالك ابو عبد الله التفت خالد يشوفه ,,, ومسك يدي يجرني معه خالد بابتسامة = تعال نسلم عليه احترينا ابو عبد الله ينزل من سيارته لأنه بالعادة بطئ بحركاته وخاصة نزوله من السيارة ,,, راح خالد له وسلم على راسه خالد = هلا خال ,,, تو مانور المكان ههههههههههه ابو عبد الله = انا اللي نور قلبي بشوفتك قطعت عليهم وسلمت على راس ابو عبد الله انا = الحمد الله على السلامة ياعم ابو عبد الله = الله يسلمك ,,, وشلونك وشلون اخوانك .؟ انا = بخير دامك بخير والتفت ابو عبد الله لخالد وبدون مقدمات ابو عبد الله = آكلت دواك .؟ ,,, لا تقولي نسيته سكت خالد شوي وبعدها كمل متضايق خالد متضايق = ترا بديت اشك ان جبهتي مكتوب فيها ( أكلت دواك ) من كثر ماتقولها لي ياخال ضحكنا عليه وعلى تعابير وجهه يوم قالها ابو عبد الله = وش اسويبك اعرفك مهمل نفسك سبحان الله تعلق ابو عبد الله بخالد نسّاه وشلون خالد كان يسكر الجوال بوجهه ,,, ولا كأن صار شي ,,, والغريب خالد وجهه لوح يضحك ويمزح مع خاله وكأنه ماسوى شي فيه قبل يومين ,,, او انا فاهم غلط .؟ سمعنا المؤذن يقوم للصلاة ابو عبد الله = يله الله يصلحكم اخرتوني عن الجماعة وحنا متوجهين للمسجد انا = عمي قريب راح ننتقل للشقة اتصلوا علينا وقالوا جاهزة واستلمت مفتاحها ابو عبد الله = منزلأ مبارك ياولدي تستاهلها ,,, بس الله الله لا تقطعنا انت واخوانك انا = وشلون اقطعك ياعم وانت بمنزلة ابوي وقوفك معي ياعم والله مانساه وسلمت على راسه ابو عبد الله = الله يبارك فيك بعد الصلاة وحنا طالعين من المسجد انا وخالد ,,, وقبل ندخل شارعنا تذكرت اني لازم اطلب سيارة عشان خلود تشوف الشقة وتشوف وش اللي ناقصها انا = اا ,,, خالد ممكن سيارتك شوي ,,, عندي مشوار للاهل ومحتاجها دخل خالد يده في جيب بنطلونه وطلع المفتاح ومدها لي ,,, اخذتها منه وانا منحرج صعب تشحد الاخرين انا متفشل = مشكور خالد ,,, ان شاء الله مابطول خالد = لا عادي ,,, امممم خالد وش رايك تاخذ سيارتي لمدة اسبوع على الاقل ,,, انت وراك نقل ودوام واكيد بتحتاجها تفاجئت من عرضه انا = ومدرستك .؟ خالد بابتسامة = آخذ سيارة خالي ,,, خالي لا وراه لا دوام ولا شي انا = لا ,,, لا يمكن ابو عبد الله اكيد بيحتاج سيارته خالد = ليه لا ,,, لا تنسى وراك نقل شنط وعفش وبتحتاج للسيارة مسكت يده بعصبية وحطيت المفتاح بكفه انا بعصبية = خلاص مانبي سيارتك ورحت عنه معصب ,,, لحقني وحط المفتاح بيدي خالد = خلاص يابن الحلال لا تعصب بس رح لمشوارك انت والاهل سكتت عنه ,,, ماحب اكون عاله على غيري ,,, بعد لحظات وحنا نمشي ساكتين ,,, رجع خالد يعيد اقتراحه خالد = طيب انا اخذ السيارة في الصباح لاني احتاجها وانت ماتحتاجها ,,, والعصر العكس انت تحتاجها وانا ماحتاجها وتاخذها انت في العصر ,,, خلاص انحلت هههههه التفتت له معصب على شفقته لي انا بعصبية = خالد وبعدين معك رفع يديه قدامه باستسلام خالد = خلاص خلاص مثل ماتبي اخذت خلود والجيش اللي معها ورحنا للشقة ,,, تفرجنا فيها ,,, ومثل ماكنت متوقع اول ماشافت خلود السرير المزدوج تأثرت وبكت ,,, لكن على أي حال اعجبت خلود بالشقة وباثاثها ,,, اما سالم وسلمى ماعجبوا الا بالمصعد كل شوي طالعين نازلين ,,, بعد ماشافت خلود الناقص رحنا نرتاح شوي في الصالة وقررنا ننتقل الاسبوع الجاي خلود = خالد شيل السرير المزدوج مابيه تفاجأت منها انا = ليه .؟ نامي فيه انتي عشان ينام معك معاذ نزلت راسها وبكت ,,, قمت وجلست عندها انا = خلود واذا شلناه بيغير شي .؟ ,,, استفيدي منه ,,, وبعدين ماتدرين يمكن تزورنا امي في يوم ,,, وتنامون انتي وهي عليه ماردت علي ,,, وبعد ماهدت شوي خلود = اتصلت عليك .؟ انا = لا ,,, بس بتتصل ان شاء الله الساعة 12 إلا ربع طلعنا من الشقة ونزلت خلود وجيشها ودخلوا البيت ,,, لبقت السيارة قدام بيت ابو عبد الله ,,, واتصلت على خالد خالد = الو انا = وينك .؟ خالد = بالبيت انا = اطلع شوي وطلع وسلمته مفتاح سيارته انا = مشكور خالد = انا اقول لو تخليها معك عشان دوامك العصر مدري ليه بعد ماعلمني خالد عن مشكلته مع وينلي كرهت دوامي ,,, اخاف تزيد المشاكل بينهم بسببي ,,, وخالد الصراحة ماهو ناقص مشاكل يكفيه اللي فيه انا = اا ,,, خالد انا افكر اترك الوظيفة وادور على وظيفة ثانية طير خالد عيونه فيني خالد مستغرب = ليه .؟ ( وسكت كنه تذكر ) خالد لا تخليني اندم اني قلتلك انا = مابي ازيد مشاكلك مع واحد مايخاف الله خالد = انسى اللي قلتلك امس ولا تفكر فيه ,,, وبعدين حتى لو تركت وظيفتك ياخالد ,,, انا اذا نجيت من وينلي ماراح انجى من بدر اللي ابوه له واسطات في الشرطة ( وحط يده على كتفي ) خالد انا ماصارحتك باللي امس الا اني تعبت من كثر ما اكتم بنفسي وحبيت افضفض ,,, اربع شهور وانا بين تعذيب نفسي من وينلي وتعذيب جسدي من بدر ,,, صدقني امس يوم رجعنا من شقتك حسيت براحة كنت احس نفسي خفيف لاني فضفضت لاحد اعرف انه ماراح يفشي سري واقدر اقول له كل اللي بنفسي مدري ليه بغيت اصيح ,, زين اني مسكت نفسي انا = اا ,,, طيب ابو عبد الله يدري عن وينلي النحس خالد = خالي مايعرف انجليزي حتى يتعامل معه ,,, وبعدين ماحب اضايق امي وخالي بمشاكلي بيجنني خالد في يوم ,,, وابوه مايتكلم عن ابوه ابد ولا يذكره انا = وابوك وش موقفه من هذا كله .؟ كنه تفاجئ من سؤالي و تدريجيا نزل راسه بحزن وسكت ,,, حطيت يدي على ظهره انا = لا تنسى انه ورطك باهماله ,,, ماشوفك تكلم عن ابوك مازال ساكت ومطنشني ,,, شكله مصر انه مايتكلم عن ابوه وعن موقفه من مشكلة العيادة انا = طيب خالد طلبتك عطني رقم ناصر خالد مستغرب = ليه .؟ وش تبي فيه .؟ انا = مدري ,,, بحاول معه عشان اعرف وش يبي منك خالد = مابيني وبينه شي ,,, اقولك ماعمري شفته ولا اعرفه انا = معليش عطني رقمه خالد = طيب قلي وش تبي فيه .؟ انا = الحين مدري ,,, بس يمكن احاول اجرر منه كلام واعرف وش المخالفات الثانية اللي ماسكها عليك وينلي ,,, طلبتك خالد عطني رقمه حرك اكتافه بحيرة خالد = طيب مثل ماتبي ,,, بس من الحين اقولك ناصر ذيل وينلي ماراح تطلع منه بنتيجة وعطاني رقم ناصر وكلن رجع بيته ,,, الصراحة ماببالي شي معين ,,, ابحاول اكلم ناصر واشوف وش يطلع معي @@@@@@@@@@@@@@ نهاية الجزء العاشر
__________________ تكفون سجلوا بهاذي اللعبه يالله http://themafia.ae/?affuid=77398 |
|
#24
04-23-2010, 12:35 AM
| ||
| | ||
|
* 11 * بعد مرور شهر الاحد طلعت من الدوام مستانس وفرحان اليوم استلمت اول راتب لي في حياتي ,,, صحيح قليل لكن احسن من المكدة الشاقة والمتعبة واللي ماحصل من وراها الا كم ريال ,,, قبلوني بشكل معتمد بالوظيفة لكن موب رسمي يعني في أي يوم يمكن يقولون لي مع السلامة ,,, على العموم الشهر اللي فات لاقيت ضغط كبير بالنسبة لي بين انتقالنا لشقتنا الجديدة وبين الدراسة خاصة انه الشهر اللي فات صادف امتحاناتنا الشهرية وللأسف مستواي في الدراسة تدنى بشكل كبير ,,, وبسبب انتقالنا لشقتنا الجديدة تغير علينا اشياء كثيرة خاصة انا وسلمى وسالم اللي متعلقين ومتعودين على جيراننا الا خلود ماتغير شي عليها بالعكس مستانسة هنا اكثر من بيتنا الاول سالم وسلمى صاروا مايلقون احد يلعبون معه في الشارع وكل شوي يتحسرون على ايامهم بين اصدقائهم في شارعنا الاول ( رجعونا لبيتنا ,, نبي بيتنا الاول هذاك احلى ,, هنا مافيه احد ) هذي كلماتهم اللي صرنا نسمعها منهم بكل وقت وكل ماشافوني اطلع ( خالد ودنا لبيتنا الاول ,, خالد بنروح هناك ,, خالد زهقانين ليش جبتنا هنا ) أما خلود عكسهم تماما مرتاحة هنا ,,, وماتغير عليها شي ,,, ام سعد وبعض الجارات يزورونها,,, وتعرفت على جارة من نفس عمارتنا اكبر منها بسنتين بس متزوجة حديثا وصارت صديقتها تقول خلود كل عصر يإما صديقتها عندها او خلود تروح لها ,, وفي الليل مزح وسوالف على التلفون ,,, مادري وشلون مايملون معاذ لقينا صعوبة بسببه ,,, بالبداية كنت اوديه بنفسي لبيت ابو سعد في الصباح ولبعد المسافة بين بيت ابو سعد و شقتنا وثم الرجوع مرة ثانية لمدرستي يسبب لي عدة مرات تأخير عن الحصة الاولى وفي الظهر ارجع مع الشباب كالعادة لحارتنا اخذ معاذ وارجع لشقتي كانت بداية شاقة بالنسبة لي ,,, لين تعرفت خلود على جارتها وصديقتها وتكفلت فيها صديقتها بمراعاة معاذ في الصباح ,,, وشكلها تاخذ معاذ بروفات في تربية الاطفال ,,, يله حنا نستفيد منها وهي تستقيد منا أما أنا مثل سالم وسلمى ابي ارجع لبيتنا الاول ,,, هناك اذا طلعت بوقت فراغي القى ابراهيم وصالح وماجد وخالد ,,, لكن على العموم انا اهون من سالم وسلمى اللي شوي وينتحرون من الطفش ,,, صحيح اني مضغوط بسبب العمل والدراسة لكن كل ماطلعت من دوامي في الليل اتصل على خالد او هو يتصل علي ويمرني ونتمشى او نروح للشقة على طول ونسهر في المجلس ,,, واللي مستغرب منه خالد طوال الشهر اللي فات ماراح للرياض واذا سألته عن السبب يغير السالفة ,,, وبسبب ضغط الدوام والدراسة نسيت و انشغلت عن اتصل بناصر ,,, اصلا ماعندي طريقة استدرج كلام من واحد ماعمري سمعت صوته ولا يعرفني ولا اعرفه ,,, بالله اتصل في ناصر وش اقوله ,,, اقوله وش المخالفات او اقوله وش تبون في خالد ,,, ابد مو معقول ,,, أما من ناحية المواصلات مازلت اعاني منها ,,, صرت ماطلب سيارة احد ,,, احس اني زودتها ,,, ولجأت أخر شي لسيارات اللموزين وخاصة لما اروح العصر للدوام اما في الرجوع فخالد يمرني اكثر الاحيان المهم طلعت من دوامي مستانس على الراتب ,,, اتصلت على خالد كالعادة لكن مارد علي ,,, استغربت مو من عادته ,,, اخذت لموزين وطوال الطريق وانا اتصل بخالد ولا يرد ,,, وين راح هذا ,,, مستانس اليوم نبي نسهر ,,, وصلت الشقة ولقيت سالم وسلمى ومعاذ يتفرجون على سبيس تون وخلود تحل واجباتها بشرت خلود على اول راتب وذكرتني بشي كنت ناسيه خلود = حاول تشيل من كل راتب شوي عشان الاجار ,,, لا تنسى ان ابو عبد الله هو اللي دفع خمس الاف على مقدم شقتنا ,,, يعني لازم تحاول ترجعله ,,, مانبي زود ديّانة علينا انا = صح ذكرتيني ,,, راتبي 1500 ,,, ابعطيه كل شهر امممم 300 ريال وقمت رايح لغرفتي ,,, ابتصل على خالد اسأله عن ابو عبد الله ,,, خلود مع حق لازم ارجع لابو عبد الله فلوسه مانبي زود ديانة علينا ,,, وشكلي ابروحله الحين واعطيه حقه ,,, مادام الليل باوله ,,, ماوراي شي اتصلت في خالد ولا يرد ,,, وش فيه هذا ,,, ليه مايرد ,,, رجعت اتصل اكثر من خمس مرات ,,, مستانس ولازم نسهر ,,, كل يوم يسهر معي وش معنى اليوم واخيرا رد ,,, = ألو لحظة هذا مو صوت خالد كنه صوت صالح ,,, ابعدت الجوال عن اذني اتأكد ,,, لا ماني غلطان هذا رقم خالد ,,, سلمت عشان اتأكد من الصوت انا مستغرب = الو ,,, السلام عليكم = هلا خالد وعليكم السلام الا هذا صالح انا مستغرب = صالح .؟ صالح = ايه صالح ,,, وش فيك ماعرفتني انا = و خالد وينه .؟ صالح = هذا هو جنبي سكتت شوي مستغرب انا = طيب ليه مايرد على جواله .؟ صالح = خالد مغمى عليه من العصر والى الحين ماقام شهقت متفاجئ ,,, لا حول ولا قوة الا بالله ,,, وانا اقول الرجال وينه اثره بعالم غير عالمنا ,,, الله يقومه بالسلامة صالح = الو انتبهت لصالح ,,, وتذكرت انه راد على جوال خالد انا بعصبية = صويلح مو من حقك ترد على جوال خالد صالح = وش اسويبك ازعجتني باتصالاتك ,,, قلت ارد عليك انا بحزن = مادريت انه مغمى عليه ,,, امس سهر معي وكان زين مافيه شي صالح = لا اليوم على الغدا كان مصدع ,,, راحتله عمتي لغرفته تبي تقومه للصلاة وعرفنا بعدها انه مغمى عليه وشلون خالد الحين بغرفته ,,, اجل وش يسوي هالثور بغرفة خالد والرجال فاقد وعيه ,, ولا ,, مستانس يرد على جواله ,,, عصبت على وقاحته انا بعصبية = الحين خالد مغمى عليه بغرفته .؟ صالح ببرود = ايه نرفزني ببروده انا بعصبية = الرجال فاقد وعيه تقوم تدخل غرفته وتستعمل اغراضه ,, ولا ,, وتقول ازعجتني باتصالاتك ,,, يعني من زمان مكيّف بغرفته وماخذ راحتك صالح = الح وصكيت الجوال بوجهه قبل يكمل ,,, نرفزني ,, عليه وقاحة ماشفت مثلها ,,, خالد ماهو بدنيانا ولا يدري عن اللي حوله يقوم يقتحم غرفته والله اعلم وش يسوي ,,, هذا اذا ماسوى شي بخالد نفسه ,,, وماستبعد عن صالح يعطي خالد كفوف الحين ,,, يسويها اوه صح نسيت اسأل عن ابو عبد الله موجود والا لا ,,, افففف نساني صويلح ,,, يله اقابله بكرة ان شاء الله الاثنين قبل انتهاء دوامي اتصل علي خالد كعادته ,,, ابتسمت مدري متى صحى من غيبوبته أمس ,,, الحمد الله على كل حال انا بابتسامة = هلا خالد خالد = هلا فيك ,,, خلصت .؟ انا = باقي ربع ساعة على الدوام خالد = يله الحين جاي انا = لا تتعب نفسك ,,, اقدر ادبر نفسي خالد = يله يله بس مع السلامة طلعت من المستشفى ولقيت خالد بسيارته يحتريني ,,, ركبت وبعد السلام خالد = وش رايك نروح لمطعم نتعشى .؟ انا = لا ,,, اول ابي اقابل خالك قبل ينام خالد مستغرب = خالي .؟ ,,,, ليش وش تبي فيه انا بابتسامة = ودني له وتعرف التفت لي خالد وبعدها طالع قدام خالد بابتسامة = شكلك مستانس ,,, ونسنا معك انا = هههههه من أمس مستانس ,,, اتصلت عليك امس عشان نسهر ,,, بس اا وسكتت خالد مستغرب = بس وش ( وطلع جواله يتفحصه ) امس انت متصل علي .؟ انا = اا ,,, ايه اتصلت بس رد علي صويلح خالد = الحقير ( وتنهد بحزن ) خالد انا امس كن وقاطعته انا = ادري ,,, علمني صالح ,,, الحمد الله على سلامتك خالد = الله يسلمك ,,, شكل صالح يفتش جوالي ,,, مادريت انك اتصلت علي امس الا منك الحين ليته على جوالك بس ,,, يمكن يفتش غرفتك كلها وصلنا بيت ابو عبد الله ونزلنا ,,, كان في الشارع ابراهيم وصالح ,,, رحت اسلم عليهم ابراهيم = هلا هلا انا بابتسامة = هلا فيك ابراهيم = لونك جاي قبل 10 دقايق كان لحقت على الرجال اللي يسأل عنك انا مستغرب = رجال يسأل عني .؟ صالح = ايه ,,, يوم شاف ان بيتكم مافيه احد سأل عن بيتك الجديد ,,, عاد حنا عطيناه رقمك انا = اها من هذا اللي يسأل عني ,,, لايكون احد الديانة بس ,,, استاذنت عن ابراهيم ودخلنا بيت ابو عبد الله ,,, وصالح معنا جا ابو عبد الله يهلي ويرحب وبعد السلام والسوالف انا = اا ,,, عمي ( وطلعت ال 300 ريال ومديتها عليه منحرج ) اا ان شاء الله كل شهر ابسددلك اللي اقدر عليه ابو عبد الله = وش هذا انا = عمي انت ماقصرت معي وسددت مقدم الشقة وهذا ابو عبد الله مقاطعني = مقدم الشقة .؟ ( والتفت لخالد وبعدها التفت لي ) خالد رجع فلوسك بجيبك هذي ماهي لي انا مستغرب = وشلون يعني ماهي لك .؟ ابو عبد الله = رجع فلوسك ,,, ماهو انا اللي دفعت المقدم ,,, خالد ضرب صدره وقال انا التفتت بسرعة لخالد متفاجئ ,,, لقيته يطالعني مرتبك ,,, كمل ابو عبد الله كلامه وانا مازال نظري على خالد ابو عبد الله = اسمع الله يصلحك اذا كان خالد ضايقك الا ترجعله فلوسه انا اوريك فيه واسد فمه عنك خالد مرتبك = والله ياخال ماقلتله شي اخذ ابو عبد الله الفلوس اللي بيدي وحطها بجيب ثوبي الامامي ابو عبد الله = لا تزعلني منك ياولدي ,,, وخالد خله علي سكتت وانظاري مازالت على خالد اللي جرحني بكذبه علي ,,, جرحني بشفقته علي ,,, نزلت راسي واستاذنت من ابو عبد الله وطلعت واخذت طريق الرجوع للشقة مشي ,,, بعد ما تعديت شارعنا والشارع اللي بعده ,,, لحقني خالد بسيارته ,,, وصار يمشي بمحاذاتي بسيارته خالد = خالد اركب مارديت عليه خالد = خالد لا تصير غثيث اركب مارديت عليه ,,, وقف خالد سيارته ونزل وقف قدامي انا بعصبية = وش تبي .؟ خالد = خالد وش فيك دفعته على ورا معصب انا بعصبية = ليه كذبت علي ,,, ليه قلتلي ان الاجار من ابو عبد الله خالد = ماكذبت عليك انا بعصبية = انت بنفسك قلت انك سحبت المبلغ من حساب ابو عبد الله ,,, واثره منك ,,, انا ابي افهم ليش تشفق علي ( ودفعته على ورا ) ابعد عن طريقي اشوف مسك ذراعي وجرني باتجاه سيارته @@@@@@@@@@@@@@ يتبع
__________________ تكفون سجلوا بهاذي اللعبه يالله http://themafia.ae/?affuid=77398 |
|
#25
04-23-2010, 12:37 AM
| ||
| | ||
|
يتبع خالد = طيب خلاص ولا تزعل اليوم عشاي عليك وبنزين سيارتي بعد عليك وش تبي بعد انا بعصبية = تاخذني على قد عقلي تنهد وجرني لباب الراكب وفتح الباب خالد = اركب انا = ماني راكب ابي ارجع الشقة خالد = خلاص نسهر بشقتك ركبت ومشى خالد بالسيارة ,,, طلعت المبلغ ومديته له انا = خذ ناظرهن وبعدها طالع قدام ومارد علي ,,, بالتالي رميتهن بحظنه وتفرقن بين رجليه وصلنا شقتنا ونزلت واحتريته ينزل انا مستغرب = مانت نازل خالد = مشوار بسيط وراجع وريوس بسيارته وراح ,,, وش فيه ذا ,,, دخلت شقتي وبعد نص ساعة سمعت صوت الجرس ,,, اكيد هذا خالد طلبت من خلود تندس شوي ,,, لأن اللي يدخل يصير على يمينه الصالة وعلى يساره ممر يودي للمجلس فتحت الباب وكان فعلا خالد نزلت نظري اشوف اللي معه ,,, اففففف خالد كل ماجا يسهر معي لازم يجيب حاجة ,,, بعض الاحيان كيك وبعض الاحيان بيتزا ومشروبات ,,, او أي شي خفايف ,,, ومايجيب على عددنا بالعكس يزيد كأنه يقول لختك اللي داخل ,,, واذا قلتله ليش متعب نفسك ,,, يرد علي ب ( لا تاكل منه ) او ( ماهو لك ) ,,, لين تعودوا عليه اخواني ,,, وصاروا يفرحون بجيته حتى معاذ اذا شافه جا يركض له ويرتمي بحظنه انا = هلا خالد ,,, ليش متعب نفسك مايحتاج خالد = خلاص خله لي واخذ طريقه المعتاد للمجلس ,,, سكرت الباب وعلمت خلود ان خالد عندنا ورحت للمجلس ,,, لقيت سالم ومعاذ عنده وسلمى بحظنه ,,, ويلجون عليه بسوالفهم جيت وجلست انتظرهم تخف لجتهم ,,, قام معاذ واخذ الحاجات اللي جابها خالد واخذ يجرها بيوديها لخلود عشان تعطيه انا = تعال معاذ انا اعطيك جلست بالارض وجاني معاذ وصرت اعطيه لين جت سلمى وسالم وخالد بعد معهم وجلسوا بالارض عندي بعد نص ساعة رمى خالد بحظني 240 ريال انا مستغرب = وش هذا .؟ خالد = عشا اليوم منك وهذا الباقي انا = هذا الباقي من ال 300 خالد = ايه ,,, واذا كنت ماتبيني ادخل شقتك مرة ثانية لا تاخذهم ,,, ولا تعيد سالفة الاجار مرة ثانية انا بعصبية = انت حمار خالد = وانت تيس انا = يا جحش خالد = يا ثور سالم = ههههههههههههههههههههههههههههههههههههههه مات سالم من الضحك خالد = شكلها اعجبته هههههه ابتسمت وسكتت ,,, ليه ياخالد هذا كله ليه ,,, شفقة والا احسان والا مجرد صداقة ,,, طيب ابراهيم وصالح مايسون اللي تسويه انت ,,, وش قصتك معي ,,, وش تبي توصل له ,,, وليش انا خالد = خالد انتبهت لسرحاني انا = هلا طلع جواله وقعد يضغّط خالد = شف آخر نكته وتخيل من من .؟ انا مستغرب = نكته ومد جواله قدام وجهي عشان اقرا ,,, اخذت الجوال وكانت الرسالة مكتوب فيها (وين ايامك خلودي ابشرك حبيبي عرفنا مكان مدرستك الموقرة نشوفك هناك ) والمرسل راكان انا مستغرب = من راكان .؟ خالد = راكان وبدر و علي و عبد العزيز انا بصدمة = هذا من ربع بدر هز راسه بايه رجعت اقرا الرسالة مرة ثانية انا = يقول عرفوا مكان مدرستك خالد بتنهيدة = الحمد الله ان الامتحانات كانت الشهر اللي راح ,,, ابغيب اسبوع او اسبوعين لين يملون من اني اجي انا = حسبي الله عليهم ,,, طيب وشلون عرفوا رقم تلفونك خالد = اصلا من يوم ماتركتهم ماغيرت رقم جوالي وسيارتي ,,, يكفي المدينة بكبرها غيرتها وانتقلت هنا ,,, ماتوقعت انهم بيلحقوني ياخالد انا مستغرب = ماغيرت رقم جوالك ,,, يعني هذي ماهي اول رسالة خالد = لا ماهي اول رسالة ,,, كانوا دايم يرسلون علي او يتصلون بس ماكنت ارد انا = يرسلون وش يقولون .؟ خالد = تهديد وكلام فاضي ,,, لكن كنت متطمن انهم مايعرفون مكان بيت خالي ولا مكان مدرستي وكنت اطنشهم ولا ارد عليهم انا = طيب انتقل لمدرستنا خالد بحزن = الى متى الهروب ياخالد ( وتنهد ) والله تعبت ,,, مليت ابي ارتاح سكتنا نفكر بالورطة الجديدة اللي طاح فيها خالد ,,, وبعدين يعني معهم @@@@@@@@@@ نهاية الجزء الحادي عشر
__________________ تكفون سجلوا بهاذي اللعبه يالله http://themafia.ae/?affuid=77398 |
|
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| غموض الحب- | العنيد1985 | أرشيف المواضيع الغير مكتمله او المكرره او المنقوله و المخالفه | 6 | 11-07-2009 09:51 PM |
| الاصفر اناقه -غموض-وكبرياء | غادةالكاميل | حواء ~ | 25 | 10-18-2009 09:17 PM |
| O صناعة الحب O ش/ عآئض القرني - جودة عالية - | mkaass | خطب و محاضرات و أناشيد اسلاميه صوتية و مرئية | 7 | 01-06-2008 07:06 PM |
| نظارة الشمس الكبيرة.. غموض وجاذبية | مغربية | حواء ~ | 10 | 08-22-2007 12:05 AM |
العرض العادي
