|
| |||||||
| أرشيف المواضيع الغير مكتمله او المكرره او المنقوله و المخالفه هنا توضع المواضيع الغير مكتملة او المكرره في المنتدى او المنقوله من مواقع اخرى دون تصرف ناقلها او المواضيع المخالفه. |
| | LinkBack | أدوات الموضوع | انواع عرض الموضوع |
|
#1
07-27-2011, 05:04 PM
| ||
| | ||
 لا تضيعني منك الساعه 7:15 الصبـح بداية شهر 6 المفروض بداية الصيف بس طبعاً بديرتنا ما عندنا هالسوالف الحر حر والشوارع زحمه مو طبيعيه فتره امتحانات نهاية السنه يعني اللي مودي مدارس واللي رايح جامعته هذا غير الدوامات ... فاطمه تتلكم بالتلفون: والله سكتي مادري حدي خايفه احس المعلومات كلها طارت الله يستر ادعيلي سويره ساره: الله يوفقج حبيبتي خلاص انتي مو درستي ليش تحاتين سوي اللي عليج وبس خلاص فاطمه: يا برد اعصابج اقولج احصااء امتحان احصاء يعني قوانين وارقام وزفت وانتي تدرين انا ... ساره تقاطعها: شكثر تكرهييييين الارقاااااام .. ادري ادري فطوم والله حفظت هالقصه، بس شتبين اقولج ازيد خوفج واقولج امبيه يويلج شكلج بتاخذين f... فاطمه تقاطعها: فاااال الله ولا فالج ناقصتج انا من صباح الله خير قولي كلمه عدله ساره: اففففف فطوم ترى عورتي راسي لاجذي عاجبج ولاجذي عاجبج مو كفايه مقعدتني من الصبح!!!! فاطمه: زين زين خلاص مابي منج شي رجعي خمدي مالت عليج انا غلطانه اكلم ناس خلصت امتحانات .. (بصوت واطي) مصيبه ساره: هههههه سمعتج يالهبله .. حبيبتي المحتره والله فاطمه: بس جب جب مابي منج عطف واحسان روحي خمدي مالت عليج ساره: انزين لحظه بتيين اليوم بيت عمتي ليلى؟؟ فاطمه: مادري بشوف ساره تقلدها: مادري بشوف .. يعني تكون الاخت تفكر اخاف بس ما بتيين .... والله شكلج بتروحين قبلنا فاطمه: سويره تعرفين تنجعمين؟ ساره تغني: سعووود طاف من الشهر خمـ.... فاطمه تقاطعها: يا حماره ياحماره اوريج بس اشوفج وسكرت التلفون وساره ميته من الضحك عليها ... فاطمه وسعود عيال خاله والكل يدري انهم ميالين لبعض شوي بس مو مبينين حتى لبعض بس تصرفاتهم فاضحتهم فاطمه تكبر عالتكييف مال السياره: واااي ياربي شهالحر استغفرالله ... الله يعافي اللي اخترع التكييف ولا جان احنا مشويين من زمااان .. (تطالع السياره اللي يمها فيها صبي وترجع ) يابختك لا شيله ولا جم طويل احنا اللي ماكلينها بهالحر ... (وتسكت تفكر بكلام ساره وتضحك على ردة فعلها) وصلت فاطمه الجامعه اهي تدرس بكلية العلوم الاداريه تخصص تنظيم وادارة اعمال وبيني وبينكم اهي تخصصت هالتخصص بس تبي توخر عن الارقام والحسابات لانها تعتبرهم كابوس بس مادة الاحصاء الزاميه على كل التخصصات يعني شر لابد منه، تدخل فاطمه المبنى مال القاعات ورفيجاتها ريم ومنى يأشرون لها من بعيد .. فاطمه تهف على ويها بالاوراق: صباح الخير جميعاً ريم ومنى: صباح النور... ريم رفيجة فاطمه حيـل: فطوم ... هههههه مستويه من الحر حدددددج فاطمه: اففف لاتذكريني والله يوم دخلت المبنى بغيت اسجد سجدة الشكر بس فشله جدام الشباب ريم ومنى: ههههههههه ريم: انزين يلا امشو نروح القاعه نراجع شوي فاطمه: لا لا عفيه ريووم الله يخليج مابي اراجع اخاف اتلخبط منى : يمه منج انتي كل امتحان جذي .. (وتقلد صوت فاطمه).. اخاف اتلخبط ما درست زين ..لا ولما تطلع من الامتحان امبيييييييه هببت هببت واهي اعلى معدل و... فاطمه تقاطعها: بسم الله علي الرحمن قولي ماشاءالله يا ام عيون حاره ريم: ههههههههه ماكو فايده فيكم من الثانويه وانتو هذا حالكم كله نجره ما كبرتو؟!! منى:انا شقلت الحين اهي كلتني ... بروح اييب لي قهوه من ستاربكس تبون شي فاطمه بنفس: مانبي منج شي ريم: لا مشكوره حبيبتي انا مابي منى: زين نطروني مو تروحون ... وراحت منى وظلو فاطمه وريم ينطرونها لحد ما يت وراحو القاعه وقعدو ريم ومنى يراجعون وفاطمه مسكره اذونها علشان لاتسمع شي يلخبطها بعدين فجأه ... فاطمه: بس بس والله حرام عليكم سكتو ريم: فطوم شفيج خل نراجع القوانين فاطمه: ريوم والله احس مخي بينفجر ..( جان تقوم) .. بروح انادي المعيده اقولها نبي الامتحان يلا منى: ام قليييب الا قولي بتروحين تسألينها فاطمه تطالع ريم وتأشر على منى: هذي تستهبل ولا شكلها جذي ريم : هههههههههه منى: انا بسكت عنج بس علشان وراي امتحان مابي اعصابي تتوتر فاطمه: اسم الله على اعصابج يالرقيقه ... (ويقطع كلامها صوت تلفونها يرن ) فاطمه ترد: اهلين شوااقه .. (شوق هذي اخت سعود يعني بنت خالة فاطمه) شوق: هلا فطوم شخبارج ؟؟ وينج؟؟ فاطمه: بالقاعه انطر امتحاني شوق: اييييييي صح نسيت عندج امتحان فاطمه: ليش انتي ماعندج؟ شوق: بلى عندي بس حسبت انتي خلصتي مو قلتي الاحد ادارة تسويق؟ شنو امتحانج اليوم؟ فاطمه تغمض عيونها: اففففففففف لا تذكريني شوق: بس بس بس احصاء عرفت من النفخه بغيتي تطيريني فاطمه: شسوي تكفه شواقه ادعيلي شوق: حبيبتي الله يوفقج ويسهل عليج .. الساعه جم امتحانج؟ فاطمه تطالع الساعه: ثمان باقي 10 دقايق ...( وترد تصرخ جنها توها تنتبه) .. عشر دقايق!!!! امبيه شوق باقي عشر دقايق!!! شوق: فطووووم اسم الله عليج شفيج مو دارسه فاطمه: بلى دارسه بس انتي تدرين انا... شوق تقطع كلامها: شكثر تكرهين الارقام حفظناها فطمو انتي سوي اللي عليج والباجي على الله .. انزين لا تنسين اليوم في بيتنا القعده فاطمه: ادري قالتلي ساره شوق: انزين يلا اشوفج اليوم بدخل القاعه .. باي فاطمه: اوكي باي ريم: شوق شنو امتحانها؟ فاطمه: تصدقين ما سألتها ! المعيده تقطع الحديث: صباح الخيـــر يلا ياحلوين عند الامتحان يكرم المرء او يهان فاطمه: والله شكلي يهان ويهان وانا اضحك بعد منى وريم: هههههههههه المعيده : يلا أي نوت أي ورقه على الطاوله بره والتلفونات تتسكر لو سمحتو يلا ترى كله من وقتكم توزعت الاوراق وابتدى الكل يحل بهدوء .. كان الامتحان زين يعني ابشركم فاطمه عرفت تحل بس مرات شوي تسرح وتتذكر ان اليوم بيت خالتها ليلى وبيكون هناك سعود وتفكر وترجع عينها على الورقه وترجع تحل لما خلصت .. بره القاعه كانت واقفه ريم تنطر فاطمه ومنى طلعت من زمان ومشت ، فاطمه طلعت من القاعه يتبع |
|
#2
07-27-2011, 05:07 PM
| ||
| | ||
| ريم: هاا بشري فطوم فاطمه: الحمدلله حليت ما خليت شي فاضي ..قلبي ارتاااح احس ابي انااام ريم: يلا الحمدلله خلاص خلينا نروح عيل فاطمه: يلا اففف بقى امتحان واحد ونخلص ريم: ايي واشوه سهل اقصاه ادارة تسويق حتى ما يندرس فاطمه: ايي الحمدلله ريم: بتطلعين مكان اليوم فطوم؟ فاطمه: اليوم والله بنروح بيت خالتي ليلى ريم بنظرة خبث: اهااااااا فاطمه تقلدها: اهااااا ... شنو شتبين ترى مو ناقصتج كفايه سويره علي ريم: ههههههههه شفيج شدعوه ماتغشمر يعني صايره جبريت اليوم كل هذا ليش بتشوفين سعوووووود فاطمه تطقها بالجنطه : انا غبيه اللي اقولج أي شي مره ثانيه .. (وتمشي بسرعه تطلع من المبنى رايحه صوب سيارتها) ريم: ههههههه وقفي يالهبله فطووووم ( وتلحقها لما وصلت لها) فاطمه تفتح باب سيارتها وتحذف جنطتها على الكشن الثاني وتركب وتوصل لها ريم تمسك الباب ريم: وقفي وقفي لا يكون زعلتي صج؟؟ فطوم شفيج يالكريهه فاطمه: .......... (ماترد يعني معصبه) ريم: فطوم والله اتغشمر معاج شفيج وغلاتي عندج فطوم يلا عاد فاطمه: زين زين سامحتج خلاص ذلفي اشوفج الاحد ريم: هههه هبله .. يلا على خير حبيبتي سلمي على خالتي وشوق وسويره فاطمه: يوصل حبيبتي ..يلا وخري وراي طريج لي مشرف يلا باااي ريم: الله وياج باي ومشت فاطمه بطريجها وتضحك على كلام ريم وساره، بينها وبين نفسها مستانسه وايد لان اخر قعده كانت بيت ليلى من 3 اسابيع لانهم كل اربعا يقعدون بيت وحده من الخالات والخميس قعدتهم الالزاميه بيت خالهم العود وتذكرت الخميس اللي طاف لما دخل سعود يسلم على خالاته مع اخوها عبدالله وقعدت تتذكر شكله ماشاءالله عليه طويل وجسمه مليان ومقفل وعيونه سود واهو اسمراني شوي كان مزيون ... وشغلت فاطمه مطربها المفضل عبدالمجيد اغنية تشطر عاد وافهمها وقعدت تغني معاه " متى عينك تناديني متى قلبك يحس فيني ياخوفي تروح انا سنيني ياخوفي تروح انا سنيني تشطر عاد وافهمها اخاف تكون فاهمني وبس ودك تتعبني عشاني قول ريحني احبك يلا افهمها .. احبك احبك يعني مو داري" وصلت فاطمه البيت وقطت روحها على الغنفه وتفصخ شيلتها .. البيت فاضي بس صوت امها من الصاله الثانيه مبين تتكلم بالتلفون قامت تتسحب شوي شوي صوب الصاله الثانيه .... سعاد(ام فاطمه): حياة والله ماعندج سالفه انتي متى بتكبرين عندج ولد ماشاءالله صار ريال وانتــ... حياة: لاعت جبدي سعاد من هالريل شسوي فيه مايحس مايحس الله يسامح ابوي اهو السبب سعاد: الله يرحمه بعدين هالسالفه خلصنا منها ..( تلاحظ فاطمه دخلت الصاله) .. حياة خلاص نتلاقى بيت ليلى اليوم ونكمل كلامنه يلا مع السلامه وتسكر فاطمه: جان اشرتيلي يمه ان في مكالمه خاصه اروح عادي (وترجع لي ورا يعني بتطلع) سعاد: لا بالعكس تعالي انا ابي افتك انبح صوتي وانا اكلمها من الصبح مشاكل فاطمه: خالتي حياة وعمي سلمان اكيد! سعاد: ومنو غيرهم الله يصلح حالهم بس ويطخون شوي فاطمه: ان شاء الله .. انزين يمه اليوم بيت خالتي ليلى؟ سعاد: ايي ان شاء الله( وتروح الصاله وتشغل التلفزيون وفاطمه وراها) فاطمه: انزين متى بنروح؟ سعاد واهي تقلب بالقنوات: بعد صلاة المغرب ان شاء الله روحي نامي حبيبتي هذي قعدتج من الصبح .. (وتطالعها وجنها تذكرت) صج سويتي بالامتحان؟؟ فاطمه : الحمدلله زين بس انتي لا توقفين دعواتج الحلوه ..( وتبوس امها) يلا بروح انام لي حطيتو الغدا نادوني سعاد: ان شاء الله يمه تصعد فاطمه وتدخل على ندى اختها تلقاها مجابله الكمبيوتر وحاطه الهيدفون على اذونها ومندمجه تكتب ولاحست بفاطمه اللي طلعت وسكرت الباب، وتدخل غرفتها بدلت وانسدحت على سريرها وتفكر ان اليوم بتروح بيت خالتها ليلى يعني سعود آآآآآه ياسعود تدري اني احبك ولا لا ؟؟ انزين انت تحبني؟ تصرفاتك أي بس لسانك ليش ما ينطق؟؟؟ افففففف الله يصبرني عليك وتغطت ونامت في بيت الخاله ليلى ام سعود قاعدين بدر وبدور اتعس توأم على الارض دايماً مختلفين ويتناجرون بدور من الصاله اللي فوق تصرخ: يمممممه شوفي ولدج بدر يقلدها: يمه شوفي ولدج ... دلوعه بدور تصرخ: انت شتبي الحين؟؟؟ بدر: قلت لج ابي الكمبيوتر من متى قاعده الكرسي قام يصيح بسج قومي ماشبعتي اصابعج ما قامت تعورج من الكيبورد رحمي حالج وقومي مشطي شعرج .. (ويعفس شعرها بايده) بدور توخر ايده: مالك شغل فيني ان شاء الله اخيس هني مابقوم روح اخذ لاب توب سعود بدور: وليش انتي ما تاخذينه؟؟ بدور: لاني قعدت هني اول والحين روح لانك شوشت افكاري والله مادري شنو قاعده اكتب حق البنيه بدر يطالع الشاشه: ليش منو تكلمين؟؟ ( ويقرا النك النيم بالمسنجر) من وقت لي وقت افكر بصمت .. اوووو عشيقة عبدالله رويشد بدور: بدرووه بتوخر من هني ولا انادي لك امي الحين بدر: انزين بس اول قوليلها اغاني عبدالله رويشد مو حلوه خل نضحك شوي بدور: ....... (ما ترد ومندمجه بالكتابه) بدر يطقها على راسها: صمخه انتي ما تسمعين؟؟ بدور تصرخ:آآآآآييي بلى سمعتك يالسخيف بدر: وليش ما تقولين لها؟ بدور: لان ادري فيك بس تبي تضايق ندى باي شي وانا مالي خلقك عندنا سالفه خاصه (وتقوم من الكرسي وتدزه) .. يلا يلا ماما روح العب مكان ثاني بدر: ماشيييي اوريج وين بتروحين مني بدور تأشر له بمعنى روح روح .. وراح بدر دار سعود خذى اللاب توب وشبك عالمسنجر وقعد يطفر ندى وبدور ويأذيهم لما خلاهم يفصلون ثنتينهم من حنته واستلمو التلفون يكملون سوالفهم .. بدور: انزين ندوووش اشوفج اليوم بيت خالتي ليلى بقوم ابوي يي وبيحطون الغدا ندى: انزين بس عفيه بدور مو تنسين السي دي عفيه ابيه ضروري بدور: لا لا ما بنسى بقوم احطه الحين بجنطة امي ندى: اوكي يلا باي بدور: بايات .. وسكرت ليلى تنادي: بدوور بدر شوووق يلا يمه الغدا نزلت شوق ووراها بدر وبدور يدزون بعض كل واحد يبي ينزل قبل لما بدر دز بدور على شوق على الطوفه ونزل شوق: آآآآآآآآآآي يعلكم شقول يهال انتو يهال!!! بدور: اهو بدى ..انا اوريك ان ما قلت حق ابوي يا حمار بدر يدخل الصاله ولا جنه مسوي شي : السلام عليكم ابراهيم وليلى: عليم السلام .. (ابراهيم ابوهم) ابراهيم: من ويهك واسلوبك المؤدب مبين مسوي بلوه وتدخل بدور: يبه شفت بدر دزاني انا وشوق من عالدري بغينا نطيح ونتكسر بدر يقاطعها: شدعوووه بغيتي تتكسرين بعدين سلمي قبل استحي بدور: مالك شغل انت انا اكلم ابوي ابراهيم: بعرف انتو ما تكبرون؟؟ انا بكلم وزير التربيه يعيد الامتحانات علشان تلهون شوي عن بعض بالدراسه والله قبل اسبوع كان هدوء وتدخل شوق : السلام عليكم الكل: عليكم السلام شوق: والله يبه لازم تشوف حل فيهم انا اقترح مدرسه داخليه ليلى: هههههههههه تصدقين خوش فكره بدور وشوي بتصيح: لا والله لي هالدرجه !!! ابراهيم وبعده يضحك على فكرة شوق: هههههههههه لا يبه اسم الله عليكم تتغشمر اختج شفيج .. مهما تسوون من مشاكل تظلون عيالي غاليين علي وايد بس انتو خففو شوي علينا انا وامكم كبرنا ترى مو حمل هواشكم ليلى شهقت: لالالالالالا عيوني اكبر بروحك انا بعدي شباب بدر: صج يمه جم عمرج؟؟ ليلى واهي تحط العيش بصحن ابراهيم: اممممم تقريباً 35 شوق: هههههه يمه اذا خالي يوسف 33 وقبله خالتي حياة و... ليلى تقاطعها بعصبيه: اكلي وانتي ساكته يلا خلاص الكل: ههههههههههه ابراهيم: ههههه والله يا ليوول لو وين يوصل العمر تظلين حبيبة قلبي الاولى والاخيره بدور وشوق مع بعض: يا عيييينيييي عالحببب الكل: ههههههههههههههههههههه ابراهيم: الا وين سعود؟ ليلى: خنت حيلي على سعود الله قرده بهالدوام .. عنده زام العصر اليوم ودق قالي بيتغدى مع مشاري ويرجع البنك مره ثانيه ما يمديه يرد مشرف ويرد يروح الشويخ مره ثانيه ابراهيم: الله يعينه ..يلا بعده شباب خل يشتغل على روحه وراه زواج ومصاريف باجر ان شاءالله ليلى بفرح وترفع ايدها: ان شاااااءالله يارب وازوجه شيخة البنات اللي تسعده وتهنيه .. يلا يمه سمو بسم الله وتغدو نرجع لمشرف مره ثانيه... غرفة فاطمه منظرها واهي بعدها تتقلب بالفراش جنها تحلم وتحس بايد تطق على جتفها وتنادي اسمها.. كانت اختها ندى ندى: فطوم .. فطوم يلا غدا مابتقومين فاطمه تبطل عيونها شوي شوي واتوخر شعرها عن ويها: صباح الخير ندى: هههههههه صباح الخير شنو!! الساعه 2 الحين فاطمه تقوم وتعدل نفسها: والله ماحسيت بروحي استغفرالله ماصليت ..( تحك عينها) حطو الغدا؟ ندى: بيبرد بعد .. ويدخل عليهم عبدالله (اخوهم العود) : لازم نموت يوع يعني احنا؟؟!! ناطرين وانتو هني تسولفون فاطمه: كا بقووم يلا نزلو انتو خل اصلي والحقكم عبدالله: وماصليتي؟!!! لا تغدينا اليوم يبه انا بنزل يوعان ..( وراح) ندى: والله شكلي بلحقه انتي مطوله .. (وطلعت من الغرفه) فاطمه: مالت عليكم اقوم بس اصلي وانزل اتغدى .. يتبـــــع ..... |
|
#3
07-27-2011, 05:08 PM
| ||
| | ||
| وقامت فاطمه غسلت وصلت ونزلت ودخلت الصاله سلمت وقعدت على طاولة الطعام وتاخذ صحن تحط لها اكل .. فيصل(ابوهم): ها فطوم يبه شسويتي بامتحانج اليوم .. احصاء عدل؟ فاطمه: ايي يبه تكفه لاتذكرني سعاد: شفيج الصبح قلتيلي سويت زين فاطمه : اهو زين بس الله يستر عبدالله : لا خلج على كلمه وحده زين.. ولا الله يستر اذا مهببه قولي عادي ترى ندى: هههههههه لا ماعليك منها تسوي جذي تخاف من العين فاطمه: اقول اذا فيج خير راويني ودخلي الجامعه ودرسي وتخرجي .. انتي الثنويه وللحين تزحفين فيها ندى: والله كيفي ازحف اركض انا ودراستي كيفي فيصل: لا مو بكيفج شدي حيلج وخلصي ولحقي اختج سعاد: أي والله ندوي شدي حيلج يمه عبدالله: يمه ترى ندى شاطره واذا سقطت ترى العيب مو فيها العيب بالمنهج الكل: ههههههههههههههههههههه فاطمه تتطنز: انزين استاذ عبود ممكن تفهمنا شلون؟؟؟ عبدالله يكمل: احم احم الله يسلمج مخ اختنا المصون فوق حدود المنهج .. يعني عبقريه ماشاءالله عليها ومو من مستواها هالكتب والخرابيط.. (ويلتفت على ابوه).. اقول يبه؟ فيصل: هلا يبه عبدالله يتطنز: شرايك ندز ندى تكمل الثنويه بره الكويت فيصل وماشي مطنزه مع عبدالله: شي حلو .. بس وين تقترح؟؟ عبدالله يرجع لورا يعني يفكر: امممممممم والله الربع يمدحون سيلان ! الكل ضحك وفاطمه غصت من الضحك وليلى تطقها على ظهرها الا ندى اللي ودها تقوم تموت عبدالله بس سوت روحها مو مهتمه لانها تدري بعبدالله ما بيخليها بحالها واذا قالت كلمه بيسكتها بعشر وفاطمه بتعاونه فتظل ساكته وتاكل احسن ويرن تلفون عبدالله .... عبدالله والاكل بحلجه: الووووووو سعود: ياكبرها بحلجك ابلع اللقمه اول بعدين تكلم عبدالله : ههههه هلا والله سعود شخبارك حبيب قلبي فاطمه هني قلبها طلع من مكانه يوم سمعت اسم سعود ووقفت عن الاكل وقعدت تسمع كلام عبدالله عبدالله قام عن السفره ويكمل: اليوم ؟؟ والله مو اكيد اشوف وعيون فاطمه تلحقه واهو قايم لييما راح الصاله الثانيه.. سعود: ليش؟؟ تكفه عبدالله لاتصير بايخ الشباب كلهم بيوون عبدالله: ولايهمك بشوف بس انت تقول عندك دوام عصر اليوم متى بتطلع؟ متى بتيي؟ سعود: شدعوه خو اهو عشا ارد البيت ابدل واييكم عبدالله : على خير ان شاءالله بس اقول سعوود .. لاتقولون حق خالد ان يي تر.. سعود يقاطعه: عبود لا تصيير ياهل عاد ... خلود بيي ومانبي مشاكل ياخي تجنبه على مانخلص قعدتنا عبدالله: افففففففف ماشتهيه سعود ماطيقه هالانسان سخييييييف سعود: سخيف سخيف بس ولد خالنا.. وبعدين لاتنسى خالي يوسف بيكون موجود واهو اصلاً معاهم بالبيت بعدين مو حلوه يسمع كلنا طالعين ومو قايلين له مالنا خلق مشاكل مع خالي مبارك عبدالله: على قولتك ..بس السالفه مدام فيها خالي يوسف عيل بيي سعود: حلوو تعجبني جذي .. خلاص نلتقي اليوم؟ عبدالله واهو راد للغدا وفاطمه عينها معاه: على خير حبيبي يلا مع السلامه وقعد يكمل غداه وامه سألته.. سعاد: سعود شيبي ؟ عبدالله: لابس يقول اليوم بيروحون يتعشون بالشاليه ندى: يابختكم مو احنا بيت خالتي ليلى فيصل: هاا اليوم بيت ام سعود سعاد: أي والله من زمان ما تيمعنا هناك .. والله ذكرتني قالت لي دقي على حصه ولا دقيت فيصل: حصه اختي؟ سعاد: ايي فيصل: بس حصه مسافره جنه سعاد: وين مسافره!! فيصل: جنه البحرين! سعاد: لا ما سافرت باجر بيمشون فيصل: ايي حسبت سافرت فاطمه: يابختها عمتي حصه كل اسبوع سفره سعاد: بعد على شغل ريلها حصه زوجها جاسم يصير ولد خالتها واهو تاجر كبير يموت بشي اسمه اراضي وعقارات وبيروح البحرين لانه في مشروع سكني بيروح يشوفه، وفي بيت جاسم وحصه .... حصه عالغدا: انزين حبيبي متى بنرد؟ جاسم: والله على الشغل هناك اذا خلصنا مبجر نرد ..( يقوم من على الطاوله) .. الحمدلله تسلم ايدج حبيبتي حصه تبتسم: الله يسلمك عمري عليك بالعافيه بس ماكليت! جاسم: حرام عليـــج والله طفحت الحمدلله ... هالسلطه كثري منها عجبتني وايد حصه واهي قايمه تشيل الصحون من عيوني الثنتين صحه وهنا يا رب جاسم واهو يشيل معاها: تسلم عيونج يالغاليه وراحو المطبخ .. جاسم حبوب وااايد ويموت بحصه ومدللها على الآخر ويخاف عليها موت صار لهم 6 سنين من تزوجو بس للحين ما يابو عيال ماكان في سبب بس كل شي بايد الله سبحانه وتعالى .. ويرن تلفون حصه .. حصه وايدها كلها صابون: تلفوني .. (وتغسل ايدها تاخذ التلفون و تطالع الشاشه) .. هذي سعاد مرت فيصل .. (وترد) الووو سعاد:الو هلا والله حصه شخبارج حصه: هلا ام عبدالله بخير عساج بخير حبيبتي سعاد: لايكون تتغدون اشوفج تاخرتي على ما رديتي حصه: لا خالصين بس كنت بالمطبخ اغسل الصحون سعاد: ويي حصه مادري متى بتسمعين الكلام وتيبين شغاله حصه: حق منو ليلى انا وجاسم بالبيت بس وانا فاضيه لا شغل ولاشي خليني اتسلى سعاد: الله يعطيج الصحه والعافيه .. عيل ماطول عليج اليوم ترى القعده بيت ليلى مو تخلييين حصه: ان شاء الله سعاد: يلا مع السلامه حصه: الله يسلمج جاسم واهو ينشف ايده بالفوطه: شسالفــــه؟ حصه: سعاد مرت اخوي تقول اليوم القعده بيت ليلى .. ميخالف اروح؟ جاسم: اييي حبيبتي روحي اكيد استانسي... تبين اوصلج ولا تروحين بسيارتج؟؟ حصه: لا مابي اعنيك اروح انا وانت توكل على الله .. (وتحط ايدها على خصرها) خلصت الصحون ولا مثل عوايدك خليت نصهم جاسم : لا ماما يسوي كل شي مزبوط صهن غسليه سوي فوطه نشفي حطي كبت حصه: ههههههههههههههههههههه حبيبي ريلي الشاطر جاسم: ايي قصي علي بجم كلمه حلوه حصه بدلع: شدعوه جسوووم جاسم: يا روح جسوم يا عيون جسوم انتي حصه وخدودها شبت من الحيا: بس عاد والله استحي جاسم يمسك ايدها ويحبها: وانا اموت فيج لما تستحين .. حصوووه ؟ حصه: ههههههههه عيوني جاسم يصرخ: احبببببببببببببببببببببببببببببببببببج حصه: ههههههههههههههههههه بس والله الجيران سمعو جاسم: خل يسمعون مو زوجتي حلالي حصه: اكيد حلالك وملكك انت وبس وبس وبس جاسم ويطالعها بنظرة حنان: الله يخليج لي ولايحرمني منج حصه: ويخليك لي ولايحرمني منك يارب ايي ادري ريل حصه يهبل ومافي مثله صج صج صج قليل هالايام تحصلون نفسه وحصه بعد خوش وحده سنعه وحنونه وقلبها طيب .. يتبع |
|
#4
07-27-2011, 05:08 PM
| ||
| | ||
| والحين نرجع لبيت ليلى ام سعود قاعده تزهب حق اليمعه ليلى مع الخدامه: كله حطيه هني زين وطلعي الصحون اللي شريتهم امس والقلاصات والصواني حطي فيهم المفارش زين الخدامه: اوكي مدام شوق تدخل المطبخ: هاااااا ام سعود اشوفج شايله حاطه توها 4 العصر ليلى واهي تصف بسكوت بصينيه: شسوي بعد مابي اييون وانا بعدي احوس بالمطبخ .. (وتقرا من كتاب الطبخ) ...واحد دريم ويب وكيري .. (وتروح صوب الثلاجه) شوق تطل بالصينيه: شتسوين يمه شكله لذيذ ليلى واهي راده: اسوي جيز كيك ...( ليلى كانت طباخه درجه اولى بالحلويات وشاطره فيهم) شوق: اممم اكيد بيطلع لذيذ ليلى: بدل ما تتكلمين حطي ايدج بشي شوق ترجع لورا: لا لا انا حدي اطالع اطبق لا ..( ويرن تلفونها وتطالع الشاشه ولا ساره) شوق ترد: اهلين سويره ساره: هلا شواقه شخبارج؟ شوق: الحمدلله بخير .. هااا يقولوون خلصتي امتحانات ساره: اييييييي افتكيت قلت لكم ما على المعهد الا انتو مسوين نفسكم شي وداشين جامعه شوق: والله احنا طموحات مو نفسج ساره: ايي عندي عقل .. اقول اليوم في بيتكم صح؟؟ شوق: ايي صح شفيج ليش تسألين؟ ساره: بنات عمامي بيوون؟؟؟ شوق: عمامج منو يوسف ماتزوج؟؟ ساره: اووهو .. عاد هذي .. اقصد عمي سعد وخليفه منو بعد شوق: صارو عمامج؟؟ مو لله ادري .. شتبين قولي يلا عطيني الزبده ولا خل اختصر عليج الصبيان بيروحون الشاليه احمد معاهم ساره بعصبيه: ياحماره اوريج والله ما كان هذا قصدي شوق: حماره شكلج عيل شنو تقصدين ساره: ويهج اقصد عاليه واميره شوق: انتي جحا ولا حسبالج انا غبيه!!... مو نفس الشي خوات احمد ساره: اووووو خلاص مابي منج شي شوق: ههههههههههه توهقتي مبين ساره:لا امي تناديني باي شوق: باي.. ساره تقاطعها : لحظه لحظه صج شنو بتلبسون شوق: مادري عادي أي شي ساره: بكيني عادي يعني شوق: هههههههههههههههه ايي عادي ساره: انزين يلا باي يالهبله شوق: باي يالسعلوه احمد منو؟ الحين اقولكم احمد يصير ولد سعد عم فاطمه .. انزين ليش قالت عمامي طبعاً احتراماً لهم وشي ثاني بعد، الله يسلمكم فيصل وسعاد ام وابو فاطمه عيال عم، يعني اخوان فيصل عيال عم سعاد ومبارك وليلى وحياة ويوسف، وحصه بنت عمهم تصير، احمد صج خوش صبي عمره من عمر عبدالله وسعود باواخر العشرينات واهم الثلاثه ربع .. احمد بالتلفون: ههههههههه الله يقطع سوالفك عبييد هذا انت ماكو فايده منك الحين انت شعليك منه!! عبدالله: شنو شعلي منه اقولك ماشتهيه واللي قاهرني ان بيي الشاليه اليوم مادري ليش راز ويهه يدري محد يطيقه وبعد ايي ويه منجب احمد: انت ماعليك منه وتحاشاه اذا قالك كلمه اسكت ولاترد عبدالله: بالضبط مو شايفني انت عندي قدره على ضبط النفس ... الا مع خلوووووووود ياخي سخيف دمه ثقيل غثيث انسان مهزء ماحبه ماحبببببببببببه احمد:زين زين بطيت اذوني ... (وينزل من السياره ويدخل البيت ).. قولي بس متى الروحه؟؟ عبدالله: عقب الصلاه ان شاءالله .. شرايك امرك؟ احمد: والله ياريت توني واصل من الدوام وهلكان ماقدر بعد اطق درب لي بنيدر عبدالله: قلنا لكم اشتغلو بوزاره لا انت وسعودو طاقين الطموح وماكلين تبن بالدوام اخذوني عبره اداوم واطلع على كيف كيفي احمد: ترى ذلتينا مع وزارتك يبه احنا جامعيين مانشتغل بالوزارات احنا وشهادة الثنويه واحد عبدالله: بس انا مو ثنويه انا معهد احمد: اففففففف ادري اقولك يعني .. الحين خلنا بالمهم .. تمرني؟؟؟ عبدالله: تامر احمدو خلاص ادق عليك احمد دخل البيت وقف بالصاله : على خير عبدالله يلا مع السلامه ( وسكر التلفون وكانو امه شيخه واخته عاليه بالصاله) .. السلام عليكم شيخه وعاليه: عليكم السلام شيخه: يعطيك العافيه وليدي احمد: الله يعافيج يمه .. (ويقعد يبطل زرار دشداشته) اففف حر حر مو طبيعي بررره عاليه: اففف حر وبس الا خيسه هذا تونا بداية سته شلون سبعه وثمانيه بناكل تبن مع الدوام والله الظهر اركب السياره جني راكبه فرن احمد: أي والله لو يخلون الداوم بالشتا بس والله احسن شيخه: والله جان زين عاليه: ههههههه يمه شفيج حلم هذا شيخه: ماتدرين كل شي جايز احمد: احب امي المتفائله ..( ويتلفت) ... عيل وين اميره؟؟ شيخه ومبين عليها ضايقه: فوق روح لها احمد الله يعافيك يمه كلمها شوي اهي تسمع منك احمد: ليش شفيها؟ عاليه: مانزلت تغدت احمد: انا لله وانا اليه راجعون .. هذي وبعدين معاها جنها اول ولا اخر وحده تتطلق لا ويا ليت زعلها على واحد عدل!!!! ياهل ولد امه وكان مشبعها طق شيخه: بس يمه لاتعور قلبي ... روح كلمها علشاني احمد: ان شاءالله يمه .. (ويوقف) انزين ابوي ما رد؟؟ شيخه: بلى نايم بداره احمد: زين يلا انا رايح اكلمها .. عاليه الله يعافيج حطي لي غدا عاليه: ان شا ءالله .. اصعده فوق؟ احمد: لا خليه بنزل صعد احمد ويفكر شلون يكلم اميره ويفتح معاها الموضوع ويهديها .. وصل غرفتها وطق الباب __________________ |
|
#5
07-27-2011, 05:10 PM
| ||
| | ||
| صعد احمد ويفكر شلون يكلم اميره ويفتح معاها الموضوع ويهديها .. وصل غرفتها وطق الباب .. اميره بصوت مبحوح: منوو؟ احمد: انا .. فتحي شوي اميره قامت تفتح الباب، احمد واميره علاقتهم مع بعض قويه واااايد واهي ماتحب ترده او ترفض له أي طلب، اميره تفتح الباب وترجع تقعد على سريرها يي احمد وقعد يمها احمد: شدعوه عطينا ويه اميره شفيج ..؟ اميره: ... احمد يرد يسأل: شفيج اميره؟ .. متضايقه من شي؟ اميره سبقتها دمعتها اللي نزلت على خدها بدون صوت احمد يمسح دموعها: اميره ليش جذي؟؟ ليش تسوين بنفسج جذي؟؟؟ اميره واهي تصيح : تعبانه احمد .. تعبانه .. (وتقط نفسها على السرير وتصيح بقهر) احمد: اسم الله عليج من التعب ياحبيبتي مو جذي اميره والله مو زين عليج هذا بدال ما تحمدين ربج على انج افتكيتي منه اميره تقوم: انا ما اصيح عليه اصيح على نفسي .. (وتشهق من الصياح وترجع تكمل) قضيت عمري معاه بهم ونكد لو شنو اسوي مايعجبه حطيته فوق راسي بعد ماهتم واخرتها ..( وتصيح) .. يطلـ .. يطلقني..( وقط نفسها عالسرير وتصيح وتكمل) صرت له كل شي اللي يامرني فيه اسوي واهو كلمه وحده من امه تفره فر علي ليش ياربي حظي جذي ليش ليش ليييش احمد يرفعها وياخذها بحضنه: اميره والله ما يستاهل دموعج .. (وخنقته العبره وانبلع الكلام مايدري شنو يقول) .. اميره تمسح دموعها:اسفه احمد ضايقتك .. توك راد من الدوام تعبان وانا زياده عليك احمد يبتسم: شهالكلام جم اميره عندي انا... لا حبيبتي انا اتضايق لما اشوفج تكتمين وتشيلين بقلبج .. (وجنه يبي ينسيها) امي تقول ما تغديتي صج؟ اميره تهز راسها بمعنى ايي احمد: هبله انتي تطوفين غدا ام احمد؟؟ اميره تبتسم: لا والله بس ماكنت مشتهيه احمد: والحين عقب ما شفتي ويهي الحلو ... لا تقولين مو مشتهيه تقصين ويهي! اميره تبتسم : .. تبي الصج ميته يوع احمد: عيل يلا قومي غسلي ويهج ونزلي على ما ابدل وانزل نتغدى مع بعض اميره: ان شاء الله احمد: .. ايييي من قدي اموور معاي عالغدا اميره: شدعوه عليك احمد: انزين لا تغترين بنفسج ترى بس جذي اقولج علشان تستكتين يلا ذلفي تحت نطريني اميره: ههههه زين زين .. (ويرن تلفون احمد) احمد يطالع الشاشه: هذي عمتي حصه الوو حصه: هلا بالقاطع احمد: هلا عميمه هلا والله شخبارج حصه: اخباري زعلانه منك احمد: افا عمتي حصه زعلانه لا صبري لحظه حصه: شفيك؟ احمد: انتحر وارجع حصه: ههههههههه الله يقطع سوالفك اسم الله عليك احمد: فديت هالضحكه شلونج عمه حصه: بخير حبيبي شلونك انت وشلونك مع هالدوام احمد: والله ماخذني منكم مثل ما انتي شايفه حصه: الله يعطيك الصحه والعافيه ... الا وين اميره ادق جهازها مسكر والبيت مشغول احمد: موجوده بس البيت مادري يمكن امي تكلم احد ولا عاليوو حصه: مادري بس يمك اميره ابيها احمد: أي دقيقه ..(ويكلم اميره ) عمتي حصه تبيج اميره: الوو هلا عمتي حصه حصه: هلا اميره شلونج حبيبتي؟ اميره: هلا فيج عمه الحمدلله بخير حصه: دوم حبيبتي وينج عيزت ادق تلفونج مسكر اميره: ماكو حاطته عالشحن والله ونسيت افتحه .. (احمد يأشر لها ان بيروح يبدل وينزل) حصه: اييي .. الا اقولج بتروحون بيت ليلى اليوم ؟ اميره: ليلى؟؟ اخت سعاد مرت عمي فيصل؟ حصه: أي منو غيرها؟ .. شكلج ماتدرين وين الله قاطج؟! اميره تقوم وتطلع من غرفتها: مادري عمتي اهم اللي اعرفه كل اربعا عند وحده حصه: أي انا سعاد دقت قالت لي شنو مادقت عليكم؟ اميره واهي تنزل الدري: مادري دقيقه عمه خل اسأل امي ...(تدخل الصاله) يمه اليوم بنروح بيت ليلى؟ شيخه: ايي يمه دقت ليلى وقالت اليوم عندها اميره ترجع للمكالمه: الو ايي عمه بنروح حصه: انزين اقولج .. ميخالف تمرين تاخذيني لان جاسم بيروح الشاليه واهو راد ياخذني من بيتكم اميره: ايي ان شاء الله ولايهمج عمتي امرج عقب الصلاه حصه:أي دقي قبل لا تطلعين حبيبتي يلا سلمي على امج مع السلامه اميره: يوصل مع السلامه (وتسكر) يمه عمتي حصه تسلم عليج شيخه: الله يسلمج يمه (وتبتسم ابتسامة امل) ها يمه تتغدين؟ اميره ترد على ابتسامة امها: ايي بتغدى مع احمد بس وين عاليه؟ شيخه: بالمطبخ تحط الغدا اميره رايحه المطبخ: اروح اشوفها عيل ..( تدخل وتشوف عاليه تحط الصحن وتقولها) حطي بعد واحد عاليه تفاجأت: بسم الله الرحمن الرحيم .. من وين طلعتي انتي خرعتيني اميره: هههههههههه سوري مو قصدي حطي صحن ثاني عاليه: الغدا حق احمد اميره: ادري انا باكل معاه عاليه مبتسمه: صج يلا زين .. تدرين شلون شكل الغدا بيحلو بحطلي صحن انا بعد اميره: يالدبه شنو ما تغديتي؟؟ عاليه: بلى بس شوقتوني ارجع اتغدى اميره: يلا عيل يبي الصينيه بالصاله احمد يدخل المطبخ: لا لا خليها هني عالطاوله ناكل عاليه: يلا احسن بعد مالي خلق اشيل واحط وقعدو تغدو وسوالف وضحك حست اميره براحه كبيره ومن داخلها تحمد ربها اللي رجعها لبيت اهلها بين اخوانها اللي يحبونها من بعد طلاقها من زوجها اللي تزوجته على حب بس كل شي تم غصب عن امه وظلت وراهم تتدخل بحياتهم لما طلقتها منه ... في بيت ام سعود كانت الدنيا قايمه بسبب هالقعده لانها توسعت وايد غير خوات ليلى عزمت حريم عيال عمها اللي اهم خليفه وسعد، مع ان سعاد قالت لها ماله داعي بس ليلى خافت يسمعون ويتشرهون عليها .. ليلى: افففف حياة توني خالصه من سعاد حياة: والله ماعندج سالفه بلا شكو احنا بمنيره وشيخه .. قولي شيخه صج خوش مره وطيبه بس منيره ام لسانين لييش نسيتي اهي وسعاد بينهم مشاكل من اول ليلى: مانسيت بس هالسوالف قديمه الحين من متى نشوفهم من مناسبه لي مناسبه بعدين احنا عيال عم وهذي صلة رحم حياة: مو انا شقردني غير صلة الرحم ليلى: حياة وبعديييين!!!!!!! حياة: خلاص انتي وسعاد بس تجعموني .. ليلى: انا ما قلت جذي حياة بس اقصــ... حياة تقاطعها: خلاص خلاص حفظت الاسطوانه .. اقولج انا بيي الحين ترى ليلى: حياج البيت بيتج وخيتي حياة: تسلمين لي والله انا قلت بيي الحين مدامه بيطلع بيقطني مابي اطق طريج لي مشرف بروحي ليلى: اللي يسمعج ساكنه بصليبيخات اقصاها القرين حياة: ولو مابي مو زوجي خل يتكفل فيني ليلى: يمه منج ومن لسانج .. تعالي يلا انطرج حياة: يلا مع السلامه ليلى: الله يسلمج .. (وسكرت وتذكرت) خل اروح اشوف اللي بالفرن( وراحت المطبخ) وهي تحوس بالمطبخ يدخل عليها ولدها بدر... بدر: يمه حبيبتي ليلى واهي تطالع الكيك اللي بالفرن: شتبي اخلص بدون مقدمات بدر: احم .. يمه تدرين انج احسن ام بالدنيا ليلى معطيته ظهرها تجهز الصحون: ادري .. خلصني شتبي؟؟ بدر: يمه انا احبج وايد و.... ليلى تلف عليه وبايدها صحن: ترى بكسره فوق راسك وراي شغل مو فاضيتلك بدير قول شتبي! بدر يرجع لي ورا: افا ام سعود هذا وانا الجعده بدر ليلى تصرخ: بدير... بدر: زين زين زين لاتعصبيييين ... ابي فلوس ليلى بعصبيه: جم؟؟ بدر ينزل راسه ويحوس باصابع ايده: تدرين اليوم الاربعا والشباب ... ليلى تقاطعه : خلصني جم؟ بدر: 50 ليلى تشهق: الله واكبر عليك ... 10 دنانير ماكو غيرهم تبيهم ولا روح بدر: لا لا ابيهم عطيني (ويحك راسه) .. العوض ولا القطيعه ليلى: روح فوق قول حق شوق امي تقول عطيني عشره بدر: وشوق شكو؟ ليلى: تبي روح حق شوق ماتبي روح بدون فلوس (وتروح عند طاولة الطعام اللي بالصاله تحط صينية الجاي) بدر: صايره دكتاتوريه يمه هالايام ليلى واهي معطيته ظهرها: اذلف عن ويهي سعود بدر: هههههه يمه انا بدر ليلى تلف عليه: افففففف روح روح لخبطتني .. (ورجعت المطبخ) بدر صعد الدري ميت من الضحك على امه بعدين وقف يفكر ... بدر: انا غبي شلون مافكرت بهالفكره ويصعد ركض عالدري لي غرفة شوق يوقف ويطق الباب شوق: منو؟ بدر مبتسم: اخوج حبيبج شوق تبطل الباب: حبتك القراده شتبي؟ بدر واختفت الابتسامه من ويهه: شفيكم علي اليوم!!! شوق واقفه عند المنظره تحط ميك اب: مو فاضين لك قول شتبي يلا مشغوله بدر عند الباب ويطالع ويه شوق: ايي اسف اختي قطعت عليج حصة الرسم على ويهج شوق تدزه تسكر الباب وبدر يوقفها : لا لا شواااقه اتغشمر شفيج افا عليج شوق: شتبي؟ بدر: امي تقوا عطيني 50 دينار شوق ترفع حواجبها: لا ؟؟ امي قالت لك؟؟ بدر: ايي حتى قالت روح قول حق شوق تعطيك شوق تصرخ: يممممممه بدر: اصصص ليش تنادينها شوق: خاطري افشلك شوي واسالها جم قالت لك اعطيك بدر: افففففف عدوه مو اخت عطيني خلصيني شوق تطلع من بوكها عشره: تفضل استاذ بدر بدر باحباط: مشكوره .. (ويحطهم بجيبه ويطلع .. يتلحطم ولا يدعم ببدور) بدور: وييييييعه عمي انت ماتشوف؟؟؟ بدر: اسم الله عليج يالمفتحه!!!! ويطالعها من فوق لي تحت بدور: شفيك تطالعني جذي اول مره تشوفني! بدر: لا بس الحين عرفت احنا بشنو توأم بدور: بشنو يا عبقري زمانك؟؟ بدر: باللبــــــس يالصبيك ( ويركض) بدور تصرخ: ماعليه وين بتروح تاليتك بترجع البيت .. (وتدخل دار شوق) شوق تحط كحل: شتبين انتي بعد فلوس ماعندي اخر عشره خذاها بدر بدور: كليتيني مابي شي بس احوس ..(وتطالعها) شتسوين؟ شوق تطالع روحها بالمنظره: احط مكياج ..(وتلف على بدور) روحي لبسي يلا الحين بيوون بدور: لابسه شفيج شوق: لابسه... (وتمسك تي شيرتها) هذا لبس ؟؟ بذمتج بتقعدين جذي ؟؟ بدور: اففففف بدينا ... شوووق مالي خلق ترى شوق: انزين حطي كحل شوي بليشر عدلي هالويه الاصفر بدور: مابي مابي غصب .. اقوم انزل تحت احسن لي .. (وتطلع من الدار وتنزل) |
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ارجوك لا تضيعنى .........العشر تناديك | معا نحو طريق الجنه | نور الإسلام - | 1 | 11-29-2008 12:34 PM |
العرض العادي
