|
| |||||||
| أرشيف المواضيع الغير مكتمله او المكرره او المنقوله و المخالفه هنا توضع المواضيع الغير مكتملة او المكرره في المنتدى او المنقوله من مواقع اخرى دون تصرف ناقلها او المواضيع المخالفه. |
| | LinkBack | أدوات الموضوع | انواع عرض الموضوع |
|
#52
11-06-2011, 02:05 PM
| ||
| | ||
| شكل علي اذكاهم ,,, الله يستر اخاف يلاحظ على ابو سامي والي معه بدر = سيارته هنا ,,, وين بيروح يعني .؟ علي = هذا الي مستغرب منه ( وضغط على يدي ) بتكلم والا وشلون .؟ انا = انتم وش تبون ,,, تبون هوشة .؟ يله وش تحترون راكان بعصبية = نحتري خالد ,,, قلّنا وينه والا بكف الحين عبد العزيز = شوفوا شوفوا ,, هذاك مو خالد .؟ ( وأشر بيده ) التفت وشفت خالد نازل من سيارة مكسيما ومتوجه لنا ,, وعليه بنطلون جنز اسود وبلوزة سودا قرب عندنا وعيونه علي ,, حسيته متفاجئ علي مستغرب = من وين جاي هذا .؟ مو يقول عنده حصة اضافية .؟ بدر بعصبية = شفت الكذوب وراح لخالد قبل يوصل عندنا ومسك ذراعه وسحبه بعنف لين وقفوا عندنا راكان = من وين جاي انت .؟ مو تقول عندك حصة اضافية .؟ خالد بغرور = ولعبت عليكم فعلا مثل ماقال ابو سامي واضح عليه التعب وصدره يرتفع وينزل بسبب صعوبة تنفسه عصب بدر من كلمته ولصقه بعنف على سيارة خالد قريب مني بدر بعصبية = لاطعنا بالحر واخر شي تقول لعبت عليكم علي بعصبية = بدر اصبر شوي البيوت لها درايش اخذت نفس متضايق من علي هالداهية ,,, يقدر يمسك اعصابه بشكل رهيب مو مثل راكان وبدر = ليه واقفين هنا ياعيال التفتنا كلنا للحارس علي = لا ابد ياخال ,,, قاعدين نسولف راكان = وليه تسأل انت والا ممنوع .؟ بدر = يحسبنا قاعدين بمدرسته طالعنا الشايب شوي وبعدها توجه لسيارته ومشى جا راكان ومسك ياقة خالد ولصق جسمه بجسم خالد يرصه على السيارة اكثر راكان بصراخ = مزعجنا امس بالاتصالات والرسايل ,,, والحين تسحب علينا وش شايفنا قدامك ,, رفع خالد يديه ومسك راسه خالد بألم = قصّر صوتك ,, اسمعك من دون ماتصارخ شي طبيعي المصدع مايحب الاصوات العالية ,, كيف بخالد الي يعاني من مرض براسه سكت راكان شوي وبعدها قرب فمه من أذن خالد وصرخ باعلى صوت عنده شهقت ,,, الحقير جلس خالد على الارض وهو ماسك راسه خالد بألم = أأأه لا ,,, راسي ,,, راسي بينفجر سحبت ذراعي من علي ودفعت راكان معصب انا بعصبية = اسلوبك اسلوب بزارين يالتيس جاني علي ومسك ذراعي مرة ثانية علي = لاحق على الاسلوب الي يحبه قلبك ,,, لاتستعجل بدر = علي فكنا منه هالبزر ( وراح ومسك ذراع خالد وقوّمه ) انت وش ينفع معك ,,, تبيني اعيد معك الي صار .؟ راكان = ايه صح بدر ذكرتني ( وقرب من خالد ) ورني اشوف ( ومسك بلوزة خالد يبي يفك الازارير ) مسك خالد بلوزته خالد بتعب = وش تشوف .؟ بدر بسخرية = نبي نشوف تربيتنا فيك هي نفعت والا تبي بعد .؟ وتعاونوا بدر وراكان عليه وفكوا ازارير بلوزته غصب عنه ,, واول ماشافوا الخياطة الي بصدره وهم يبدون بالاستهزاء والضحك بدر = ههههههههه مرقعينه راكان = كان طلبت منهم يحطون سحّاب احسن وماتوا ضحك عليه حتى علي الي حسبته اعقلهم اف ليه مايضربون ويبدون بالهواش ,, ذبحنا الشمس و الحر ,,, قاعدين يستهزؤن وبس ,, والمشكلة مانقدر نبدا خالد = والله الي يمد يده علي والا على خالد قسم لايشوف شي ماشافه وجا بيزر بلوزته بس راكان مسك يده اليمنى ولواها ورا ظهره راكان بعصبية = انت يالخواف تهدد قرب بدر من خالد وتحس ذراعه اليسرى بدر = راكان انت هذاك اليوم طعنت يده هذي صح .؟ راكان = نزّل بلوزته نشوف وتعاونوا عليه مرة ثانية يحاولون ينزلون بلوزته بالكامل حاول خالد يمنعهم بس ماقدر عليهم وجردوه من بلوزته غصب عنه خالد بعصبية = ياكلب هات بلوزتي بال حنا مسك راكان الجرح الي بعضده راكان = انت مزعجنا وماخليت كلمة الا وقلتها لنا ,,, تحمل الي يجيك خالد وهو يتلفت منحرج = هات بلوزتي تكفى بال حنا علي بصراخ = ياجماعة مب الحين ,,, البيوت لها درايش وش فيكم انتم ,, عطوه بلوزته وخلونا ناخذهم للبر وبعدين سوا الي تبون اوه هذا بيخرب علينا انا = انت اسكت ولا كلمة ضرب علي راسي من ورا بقوة علي بعصبية = انت الي تسكت مب انا عبد العزيز = ال فاضي علي وبعدين ماحد عارفنا علي بعصبية = ماحد يعرفنا بس ياخذون لوحة سيارتنا راكان بعصبية = علي صادق ( ولصق خالد بسيارته مرة ثانية ) عطني مفتاح سيارتك خالد = ليه .؟ رص جسمه بجسم خالد اكثر وهو معصب وطلع المفتاح من بنطلون خالد غصب ,,, وخالد ساكت حتى مافتح فمه بكلمة راكان بعصبية = يله امشوا خلصونا ( والتفت لبدر ) وانت عطه بلوزته ( وراح يفتح سيارة خالد ) حذف بدر البلوزة على خالد ولبسها بس مامداه يزر ازاريره الا وراكان ساحبه من يده راكان = يله اركب خالد بعصبية = ماني راكب ورني وش بتسوي راكان بملل = بدر عليك فيه مسك بدر ذراع خالد اليسرى بدر بعصبية = اركب خلصنا ذبحنا الحر خالد = شكلكم ماتفهمون بدر بعصبية = انا الي ابفهمك ومد يده وفرك الجرح الي بصدر خالد بعنف خالد بصراخ = آآآآآآآآآآآآآآه شهقت بخوف ,,, وسحبت ذراعي من علي ودفعت بدر بقوة ابعده عن خالد والتفت له انا بخوف = خالد حاط يديه على صدره وهو شوي ويبكي من الألم جاني علي ولف يديه حوليني علي بصراخ = انت اركب وانت ساكت انا بعصبية = خلني ( وحاولت احرر نفسي منه ) بس تفاجأت بخالد يتساند علي وقرب وجهه من وجهي وهو الى الحين يتألم من حركة بدر وهمس خالد بألم = لا تركب علي بعصبية = يركب غصب عنك دفعني بدر وهو معصب ورفع يده وعطى خالد كف بدر= راكان خلنا نشيله ونركبه غصب التفت خالد للبقالة وهو ماسك خده بمكان الصفعة وبعدها التفت لي وبعدها التفت لعلي وبحركة جريئة فاجئتنا تفل بوجه علي سكتوا شوي يستوعبون وباقل من الثانية تركني علي معصب وهجم على خالد وطرحه بالارض وركب فوقه وماقصر بدر جا وركب على خالد بعد وانا ماسمع الا صراخ خالد توجهت لهم وحاولت ابعدهم عنه بس دفعني احد من ورا وطحت عليهم فوق خالد وبعدها طحت بالارض وركب راكان فوقي ,,, وبدا يعطيني من هالكفوف وانا احاول ادافع عن نفسي ما اقدر افتح عيوني من اشعة الشمس واضرب راكان بشكل عشوائي فجأة سمعت صوت ابو سامي والي معه يصارخون علينا ويطلبون منا نوقف وتجمعوا علينا وقوموا راكان عني ,,, وبدر وعلي عن خالد جلست والتفت لخالد ولقيته متمد وماسك صدره الكاشف ويئن قربت منه وجلسته انا = خالد لايكون تأذيت خالد بألم = صدري صدري ابعدت يده عن صدره وانصدمت ,, حسبي الله ونعم الوكيل ,, ينزف والله اعلم كم غرزة انفكت ( تنهدت ) شكل جروحك ياخالد ماراح تطيب بدر بصراخ = لا تتدخلون بيننا رفعت راسي اطالع بدر الي يصارخ على الرجال ابو سامي بعصبية = على كيف ابوك مانتدخل علي = خلاص حصل خير ابتسمت ابو سامي والي معه لابسين مدني وهالشلة ماتدري انهم شرطة على بالهم جاين يفكون الهوشة وبس ابو سامي بعصبية = حصل خير هاه ,,, ليه الدنيا سايبة رفع خالد راسه خالد بتعب = يالضابط هذولي الي اعتدوا علي وعلى خالد راكان بصدمة = ضابط .؟ ابو سامي = يله شباب اخذوهم علي بخوف = انا مالي دخل بدر بغرور = يله نكيّف عندهم شوي ونطلع ,,, ماراح نطوّل عندهم لا تخافون فجأة رفع ابوسامي يده وعطى بدر كف طيره الجهة الثانية ومسكه ابوسامي وقعد يسحبه للمكسيا الي جا خالد فيها التفت لخالد ولقيته ماسك راسه انا بابتسامة = الحمد الله ,, الله فكنا منهم ,,, ماكنت متوقع اننا بنتخلص منهم بهالسهولة التفت خالد لي والألم واضح بعيونه خالد بتعب = انت خلصت بس انا ماخلصت ,,, اليوم لازم اروح للاسترحة زفرت بضيق ,,, بتروح وانت حتى الجلوس ماتقدر تجلس غير احد يجلسك ,,, بس معه حق لازم يروح ويطلّع الي بالاستراحة باسرع وقت خالد بتعب = انت وش الي جابك هنا .؟ انا = ابو سامي اتصل علي وقال تعال لمدرسة خالد ,,, وبعدين تعال انا يوم اتصل عليك ماترد علي ويوم اتصل عليك ابو سامي رديت عليه على طول ,,, ليه مطنشني يالثور خالد = مابيك تجي ,,, بس انت وراي وراي = عاجبتكم الجلسة هنا انت واياه ,,, قوموا نقزت متفاجئ من صراخ ابو سامي علينا ,,, صح اثرنا انا وخالد بعدنا جالسين بالارض التفت لخالد وقربت راسي له وهمست انا = قم لا يسجننا هالعصبي وقمت وساعدت خالد على الوقوف ورحنا للمركز كلنا الا خالد الي راح مع عسكري للمستشفى عشان يعيدون الخياطة الي بصدره بأوامر من ابوسامي وبعد ثلاث ساعات رجعوا للمركز والى أخر العصر وحنا بالمركز ابو سامي = تقدرون تطلعون واذا استجد جديد نتصل عليكم خالد = يعني خلاص ابو سامي = لا ماهو خلاص ,,, ابوانهم بيجون ولازم تكونون موجودين بس هذا انا اذكرك مرة ثانية هات كل التقارير الاولى الي طلبتها منك ,,, مفهوم ,, لاتنسى .؟ خالد = بس انا مضطر اسافر اليوم ابو سامي = بترك الموضوع معلق مرة ثانية خالد = لا بس مضطر اسافر ابو سامي = بس اولياء امورهم يمكن يحضرون بكرة او بعده لازم تصير موجود خالد = تكفى يابو سامي تابعه بنفسك ,,, انا علمتك بكل شي ,,, انا مضطر اسافر ابو سامي بتنهيدة = انا مستعد ومتعاون معك بس انا ماني قريبك حتى اتابع الموضوع عنك ,, خالد اذا كنت مشغول قل لابوك يتابع الموضوع عنك تساند خالد على الكرسي بتعب والتفت لي وعيونه تحمل كل معاني الحيرة والضياع ,,, ضايع بين المشاكل هنا والمشاكل بالرياض ,, ومن نظراته لي كأنه يطلب مني اتدخل كأنه يقول انا تعبت تكلم معه انت التفت لابو سامي انا = ابوه مسافر ,,, طيب عادي يوكل احد .؟ ابو سامي = عادي ,, الا ابو عبد الله لا يتدخل ,,, التفاهم مع ابو عبد الله الصراحة صعب ,, راسه يابس ابتسمت والتفت لخالد انا = يله خالد امش هز خالد راسه بتعب وقام طلعنا من مكتب ابو سامي ومسكت خالد على جنب انا = بتسافر اليوم للرياض .؟ خالد وهو يتساند على الجدار الي وراه = ان شاء الله انا = بتروح وانت شكلك كذا .؟ خالد = وش فيه شكلي انا = انت حتى الوقوف مانت قادر توقف على طولك ,, متساند على الجدار لف خالد وجهه عني بضيق وابعد ظهره عن الجدار خالد بتعب = خالد والله ماني فاضيلك انا = خالد ان لبدنك عليك حق ,,, انت توك جاي من المستشفى حتى مفعول البنج مايمديه راح عنك ,,, رح للبيت وارتاح وبكرة سو الي تبي خالد = خويلد وش دخل هذي في هذي البنج موضعي واقدر اسافر ومشى عني اف عنيد ,,, لحقته ومشيت بجنبه انا = ان سافرت للرياض اليوم باقول لخالك عن سالفة الاستراحة وانت بكيفك التفت خالد لي معصب ودفعني على ورا ,,, بس دفعته كانت ضعيفة وماحسيت فيها خالد بعصبية = يقالك ماسك علي شي الحين قربت منه ولفيت ذراعي على كتفه وقربته مني زي ماكان يسوي فيني لما اكون متضايق انا بابتسامة = والله انك غالي ,,, بس عنادك يخليني اتصرف معك تصرف ثاني ,,, بكرة يعني بكرة ,,, وان عرفت او سمعت انك سافرت اليوم وريتك الشغل ,,, مفهوم ياثور يطالعني بنظرات معصبة وساكت دفعته قدام شوي عشان نمشي انا = وعلى فكرة رجلي على رجلك ,, روحة للرياض لحالك مافيه خالد = هين ياخويلد مردودة ابعدت ذراعي عنه انا = هذا جزاتي اني خايف عليك ,,, صحيح ,,, افعل خيرا تجد شرا خالد = انت مانت حاس بالنار الي احس فيه ,,, انا مقهور ,, مقهور ياخالد انا = افا ياخالد كيف ماني حاس بالنار الي تحس فيه ,,, لو اني ماني حاس كان ما اهتميت فيك ,,, كان ماتركت اخواني بالشقة لحالهم وسافرت معك سكت خالد شوي خالد بتنهيدة = اعذرني خالد ماكنت اقصد ,,, لاتاخذ بخاطرك ,,, انا منقهر ولا ادري وش اقول ,, الله مارزقني باخوان واحس الله عوضني فيك (التفت خالد لي وابتسم ) تصدق انت احلى جحش شفته بحياتي ابتسمت فرحان يوم شفت ابتسامته ,,, فقدتها انا بابتسامة = تسلم والله ماعليك زود بعد صلاة المغرب رجعنا انا وخالد لمدرسته عشان انا اخذ سيارة ابراهيم وخالد ياخذ سيارته وكل واحد راح لبيته دخلت الشقة وانا تعبان ونعسان وجوعان خلود = هلا خالد ولاول مرة خلود تستقبلني عند الباب بالعادة تصير جالسة بالصالة والا بغرفتها ولا كأني جيت بس هالمرة مستقبلتني والغريب وجهها احمر وكأنها مستحية او متوترة مدري وش قصتها انا مستغرب = هلا فيك وجلست بالصالة على الارض بتعب اف اليوم مانمت ابد على قومتي الفجر انا = خلود ابي أي شي اكله جوعان مرة خلود = ان شاء الله طالعت خلود وهي رايحة للمطبخ مستغرب وش عندها هذي اليوم صايرة مؤدبة ,, والغريب ماسألتني عن شكلي ,, متبهذل قدامها وملابسي وسخة بالعادة تحق معي لين اكره نفسي جت خلود وحطت الصحن قدامي وجلست على الكنب وهي تلعب باصابعها متوترة الله يستر وراها شي ,,, هدوئها ماهو طبيعي وراه شي بسم الله وبديت اكل وانا خايف من خلود وهدوئها المفاجئ خلود = خالد بغيت اغص ,,, ايه انا ادري ,, وراها شي انا = هاه خلود = ان شاء الله عجبك الاكل بالله ,,, كلها سندويشة وعصير حتى العصير حامض انا = قولي الي عندك اخلصي خلود = ام ,, ام ,, آآآ ,, ام محمد وخالتي ام عبد الله جو عندي اليوم العصر وراحوا انا = طيب واذا ,,, ماهي اول مرة يجونك والتفت لخلود ولقيت وجهها احمر مرة وتلعب باصابعها انا مستغرب = خلود وشفيك .؟ خلود مستحية = ام محمد وخالتي ام عبد الله جاين يخطبوني لمحمد فتحت فمي وطيرت عيوني فيها انا بصدمة = وش ,, محمد ونزلت راسي منصدم ,,, محمد يخطب خلود ,,, محمد ماغيره اخو صالح ,, ضحكت غصب عني ,,, والله محمد رجال والنعم فيه ,,, متوظف وعايل نفسه وماعليه كلام محمد يبي خلود اختي ,,, غريب ماعمره جاب لي سيره ,,, انا ادري ان اهله يدورون له على مرة مثل ماقال لي صالح بس وش معنى اختي التفت لخلود الي منزله راسها بقوة شوي ويطيح بحظنها انا = وانتي وش رديتي عليهم .؟ رفعت خلود راسها مستحية خلود = انا استحيت مدري وش اسوي ,,,, انا اروح واتركهم والا اسكت والا اب انا = يعني مارديتي عليهم بشي .؟ خلود = الا قلت راجعوا خالد انا = وش راجعوا خالد وزارة هي ,,, الله يفشلك وش قلتيلهم ان شاء الله راجعوا خالد بالدور الاول والا بالدور الثاني خلود = لا شقتنا بالدور الرابع ,,, يعرفونها هم انا = خلود خلود وهي شوي وتبكي = مدري وش اقول تنهدت وسكت ,,, خلود اختي خطبها محمد ,, ياربي شسوي ماعرف هالسوالف انا انا = طيب ماقالوا شي ثاني ,,, لا محمد ولا ابوه ولا حتى صالح قالوا لي شي خلود = اخذت خالتي ام عبد الله رقم امي ,,, يقولون اول نبي رايك وراي اخوك وبعدين نجي نخطبك رسمي انا = و,, وعلمتي امي .؟ خلود مسحية = لا ,, علمها انت ,,, انا استحي ابتسمت وسكت ههههه تقول علمها انت ,,, علمتني انا قبل تعلم امي ,, مع انه المفروض العكس ,, وش معناه هذا ,, معناه خلود تعتبرني اقرب لها من امي طالعتها فرحان ,,, الله يوفقها ,,, خلود تستاهل بعد صلاة العشا طوال الصلاة وبالي مشغول والله اعلم وش قرا الامام وش ماقرا حنا مالنا غير خلود ,,, بس محمد رجال والنعم فيه ,,, ياربي وشلون اسوي الحين ماعرف ادبر شي ,,, وماعرف ارد عليهم ,,, ماعرف هالامور غير اتصل على امي ,,, واتصل على عمي ,,, بس عمي ماني متصل عليه الا بعد موافقة خلود وموافقتي ,, مع انه اصلا عمي ماله دخل فينا بس الحين انا محتاجه ان ماطاعك الزمن والا طيعه ,,, دايم اقول لايمكن ألجأ لعمي لو مهما يكون والله محتار دخلت الشقة وانا الى الحين اهوجس محمد عمره 25 او 26 وخلود عمرها 16 ,, مو كبير بالنسبة لها .؟ صح ماراح تتزوج خلود الا بعد ماتخلص السنة هذي يعني بيصير عمرها 17 ,,, بس مادري ,, محتار بعد ماتعشينا دخلت غرفتي انام ,,, تعبان على قومتي الفجر هذا غير بكرة وراي سفر صح على طاري السفر طلعت من الغرفة ورحت لخلود ,,, الله يستر مالي خلق للهواش معها ,,, يوم اسافر اول مرة للرياض صارت هوشة وصراخ وزعل حتى عشا ماتعشيت هذاك اليوم الحمد الله اني تعشيت قبل شوي ,,, الحين مدري وشلون اقنعها اسافر دخلت عليها غرفتها ولقيتها تحل واجباتها انا = خلود بكرة بسافر للرياض التفت خلود لي مستغربة خلود = ليه .؟ اخذت نفس الله يعين انا = خالد مضطر يروح للرياض وانا ابخاويه سكت خلود شوي خلود = طيب بس عطني فلوس عشان ارسل سالم للبقالة ,, البيت ناقصه شوي اغراض سكت مستغرب ,,, ماعصبت ,,, ابتسمت غصب عني صايرة عاقلة اليوم انا بابتسامة = خلود انا ابعلم امي عن الخطبة ,, وان شاء الله يوم يومين وانا راجع ,, حاولت مابتسم عشان ماحرجها بس غصب عني ابتسمت اكثر شوي شوي تحول لون وجهها للاحمر خلود بحرج = خالد ( وغطت وجهها بالكتاب ) طلعت عنها وسكرت الباب وانا اضحك ,,, ورفعت يدي للسماء انا = الله يجزاك خير يامحمد ,, عقلتها لي |
|
#53
11-06-2011, 02:11 PM
| ||
| | ||
| * 30 * يوم الثلاثاء بعد صلاة الفجر رجعت للشقة ومريت غرفة خلود عشان اقومها خلود ماشاء الله عليها نومها خفيف بسرعة تقوم ,,, مسكينه تعودت على المسؤولية وهي صغيرة واهتمامها بمعاذ الي يقومها باخر اليل خلاها تحس بأي حركة حتى لو هي نايمة فتحت باب غرفتها بس وقفت بمكاني متفاجئ لقيت خلود جالسة على سريرها وتبكي انا منصدم = خلود وجلست عندها على السرير انا = وشفيك ليش تبكين .؟ تمسح دموعها بمنديل ومعاذ نايم بحظنها خلود بصوت باكي = مافيني شي ,,, رح خلني لحالي انا = خلود وشلون مافيك شي .؟ قوليلي ليش تبكين .؟ زاد بكاها اكثر انا = خلود خلود وهي تبكي = ابي امي ,,, خالد خلها تجي ,,, ليش انا دايم اسوي كل شي تنهدت بحزن ,,, امي باعتنا برخيص ياخلود انا بحزن = وش الي جاب طاريها ,,, خلود امي تركتنا من سنة ,,, وش معنى الحين تبكين خلود = امس انحرجت ماعرفت وش اسوي عند الحريم ,,, امس كنت محتاجتها مرة ,,, المفروض يكلمون امي مايكلموني انا ,,, بس انا ماعندي ام ,,, امي موجودة بس انا ماعندي ام ( والتفت لي ودموعها على خدها ) خالد خل امي تجي ,,, مابي انحرج مرة ثانية قدامهم ,,, صعب ياخالد انا استحي اطلع لهم وهم جاين يخطبوني ,,, لو عندي اخت كبيرة كان خفت عني شوي ,,, انا مليت كل شي علي انا ,,, وشلون يعني اصير ام نفسي وانا عندي ام وغطت وجهها بيديها وبكت اكثر ضميتها وسندت خلود راسها على صدري ورفعت يدي امسح على شعرها ويدي الثانية ماسكه معاذ عشان مايطيح من حظنها انا = هذي امي الي تدافعين عنها ,,, خلود انا راح اتصل على امي واصر عليها تجي ,,, بس ماضمن ان تهتم فينا ,,, الي تخلت عن معاذ وهو عمره سنة بتخلى عنك وانتي عروس ,,, خلود انتي دايم متعودة على ام سعد ,,, ام سعد اقرب لك من خلود بصوت باكي = بس ام سعد ماهي امي ,,, انا ابي امي امي انا = خلاص خلود اهدي وانا اليوم ان شاء الله بتصل عليها ( وابعدتها عني ) يله قومي صلي والبسي وانا هالمرة اباخذ معاذ وسلمى اخليهم بيت ابو سعد هزت خلود راسها ,, وقمت وابتسمت لها احاول انسيها امي انا بابتسامة = خلود يعني افهم الحين انك موافقة على محمد رفعت خلود راسها تطالعني ودموعها على خدها خلود بصراخ = انا مايهمني محمد اصلا ماعرفه ,, انا يهمني امي وبس ابي امي تنهدت وطلعت من غرفتها وانا ضايق صدري ,,, ادري انك تحتاجين امي ياخلود ,,, ادري ان البنت بطبيعتها تحتاج لامها بهالوقت بس ماباليد حيلة ,,, زوجها احمدوه يمشي امي على كيفه ,,, بس لك علي ياخلود اني انشب بحلقها لين تجي ,,, وخل احمد يطق راسه باقرب جدار اخذت معاذ وسلمى ونزلتهم عند بيت ام سعد ورحت للمدرسة وهناك تفاجأت انا وابراهيم وماجد بتعكر مزاج صالح وطوال اليوم وهو معصب ماجد = ياخي وشفيك اليوم ماتنكلم ابراهيم = يمكن طايح من السرير صالح بصراخ = بتسكت انت والا وشلون وطوال اليوم وهو على هالحال لين طلعنا من المدرسة ورحت امشي معهم رايح للحارة عشان اخذ معاذ وسلمى وطوال الطريق وحنا ماسكين صالح تعليق دخلنا الحارة وتفاجأت بسيارة خالد واقفه ,,, غريب بالعادة يطلع من مدرسته بعدنا التفت لصالح ونسيت انه معصب انا مستغرب = صالح ,, خالد اليوم ماراح للمدرسة .؟ مادريت الا بضربة قوية على ظهري صالح بعصبية = لا تجيب طاريه قدامي لشوتك حطيت يدي بمكان ضربته انا بعصبية = ياخي وشفيك سألتك بس صالح = يانا ياهو بهالبيت ,,, مدري متى نفتك منه هالمغرور,,, من عذر ابوه يوم مايبيه ابراهيم بملل = هدوا العب شباب ماجد بملل = صاير شي بينكم بعد ,,, ماتملون انتم .؟ انا = بيت ابوك موجود انت الي راز وجهك بيت خاله رفع يده علي بتهديد صالح بعصبية = بتسكت لالفعك الحين انا بعصبية = الفعني وشف وش بيجيك ماجد = انا لله ,, وبعدين معاكم انتم ,, خلاص كل واحد يروح لبيته فكونا ابراهيم باستهبال = هيه ماجد تراك بحارتنا بيتك بالحارة الثانية ماجد = هاه ,, ايه صح تصدق نسيت ههههههه طلع ابراهيم جواله ابراهيم = ابتصل على خالد يطلع ,,, يمكن بعض الناس تروح شياطينها ( وطالع صالح بطرف عينه ) صالح بعصبية = قصدك هو الشيطان بنفسه ,,, لا تتصل فيه خله يطس ماجد = الا الا اتصل يمكن خالد ماكل حلاوته ومايبينا نعرف ضحكت على ماجد و رحت لبيت ابو سعد واخذت اخواني ,, رجعت للشبا وانا اضحك على معاذ يدعك عيونه بيده ماهو متعود على الشمس لو ماني ماسك يده الثانية كان صدم بالجدران ,, لقيت الشباب واقفين عند بيت ابراهيم وخالد واقف معهم اما صالح ماشوفه انا بابتسامة = هاه ماجد مين الي ماكل حلاوة الثاني ( والتفت لخالد ) سلام عليك ايها المغرور المتغطرس المتعجرف خالد مستغرب = انا مغرور ومتغطرس ومتعجرف انا = هذا كلام صالح مالي دخل انا التفت لي ابراهيم ابراهيم = اترك عنك ,,, حتى هذا عيا يقول وش فيه صالح انا مستغرب = شسالفة .؟ خالد بضيق = مافيه سالفة ,,, لاتكبرون الموضوع ,,, اصلا صالح دايم وهو كذا ماهي اول مرة انا = بس اليوم معصب بزيادة ,, وش صاير بينكم خالد وعيونه على معاذ = ولاشي ماجد = يله عاد خالد ابراهيم = يتستر عليه جلس خالد على ركبتيه وضم معاذ لصدره ومعاذ ماصدق خبر غطى وجهه بصدر خالد عن الشمس خالد بابتسامة = خويلد وشفيه اخوك ماجد = لا تغير السالفة = خالد التفتتا كلنا لصالح الي واقف عند باب بيت ابو عبد الله وينادي على خالد بعصبية زفر خالد بضيق خالد بضيق = وش يبي ذا بعد ابراهيم = رح لايطلق قنبلة نوية تنسفنا خالد بصوت عالي = وش تبي .؟ صالح بعصبية = تعال اقول قام خالد والتفت لي خالد = لا تروح ابيك شوي وراح عند صالح وقفوا عند الباب والغريب صالح يكلم خالد بعصبية وخالد يسمع له وساكت التفت للشبا وانا مستغرب انا = بينهم شي ابراهيم = خل نروح لهم نشوف ماجد = بايع عمرك انت طنشه ابراهيم وراح لهم ,,, ولحقه ماجد ,,, التفت لاخواني ماقدر اطول عليهم واوقف تحت الشمس لازم اروح للشقة ,,, وصالح وخالد ماهي اول مرة يتهاوشون التفت للشبا ومالقيت الا ماجد وابراهيم واقفين لحالهم ,, غريب وين راح صالح وخالد انا بصوت عالي = وش فيهم .؟ جاني ابراهيم وهو مستغرب ابراهيم = دخلوا البيت قبل نوصلهم غريب ليش دخل وهو قال احترني طلعت من الحارة رايح للشقة ,,, صح خلني اتصل على امي قبل اوصل عند خلود ,,, طلعت جوالي واتصلت ,,, وبعد السلام والكلام علمتها عن خطبة خلود امي بفرح = شو ,,, بتحكي جد ,,, والله وكبرتي وصرتي عروس ياخلود ,,, ياحبيبتي يابنتي ياحبيبة ألبي سكت ,,, ايه واضح انها حبيبة ألبك امي بفرح = محمد رجال بتزكرو منيح ,,, عطيني خلود اباركلها انا بضيق = حنا ماوافقنا عليهم الى الحين امي = وليش ماتوافئوا محمد شب منيح وامو كمان ست طيبي انا = الراي الاول والاخير لي ولخلود امي = وانا مالي راي انا بضيق = لا ,,, راي وراي خلود اهم من رايك امي = شو هالحكي خالد ليش بتحكي معي هيك انا = اسألي نفسك امي = شو خالد كل يوم يعني بنحكي بهالموزوع ,,, خالد حبيبي صدئني انا ئلبي وعئلي معكون انا = اسمعي يمة ,,, خلود محتاجة لك الحين ,, انا حاس فيها وفاهمها اكثر منك ,, خلود تستحي تقابل الحريم وهم جاين يخطبونها وماهي قادرة ترد عليهم لازم يجي الرد على ام محمد من امها امي = ماحدا اتصل علي انا هلأ عرفت منك انا = ادري ,,, هم يبون يعرفون راي وراي خلود اول وبعدين يجون رسمي امي = يعني خلود موافئة .؟ انا بعصبية = حنا ماعلينا نرد عليهم والا مانرد ,, يمه خلود تعبانة ومتضايقة تبيك ,,, يمة خلود محتاجة لك امي = واحمد انا بصراخ = كل ماقلت لك شي قلتي احمد واحمد ,,, اسمعي عاد اختاري واحد منا يأنا ياحمد ,,, ان ماجيتي هالاسبوع وطعتي احمد انسي ان لك ولد اسمه خالد ورقمي هذا انسيه امي = لا لا خلاص حبيبي بئول لاحمد ,,, بس لاتحرمني منك انا = مع السلامة وسكرت عنها وانا متضايق قبل صلاة العصر بنص ساعة اتصل علي خالد وانا بغرفتي انا = هلا خالد خالد = ليش رحت انا = لاطعني بالشمس انا واخواني ودخلت بيتك وتبيني احتريك خالد بتنهيدة = اوكي ,,, ابمرك الحين نمشي للرياض انا = الحين .؟ خله العصر باقي نص ساعة على الاذان خالد = مستعجل ابي اوصل الاستراحة قبل اليل انا = طيب طيب كيفك وسكرت عنه ورحت لخلود بالصاله ,,, انا علمتها اني اتصلت بامي بس ماعلمتها هي بتجي والا لا ,,, لأني باختصار ماضمن امي ولا اضمن زوجها احمد النذل انا = خلود ان ابمشي للرياض الحين هزت خلود راسها وسكت انا = يوم يومين وراجع ان شاء الله طلعت محفظتي عشان اعطي خلود بس انصدمت بالمبلغ الي معي ,,, 1000 ريال بس ياربي شسوات من وين اجيب غيرهن من وين اصرف على اخواني ,, والامتحانات قربت ومافيه وظيفة تقبلني ,,, وماعندي سيارة اكد ,,, ياربي افرجها من عندك ,,, عطيت خلود 500 وخليت معي 500 ,,, ورحت لغرفتي متضايق الحمد الله اننا بشقة مدفوع اجارها مقدم والكهرباء والتلفون والماء وكل شي من ضمن الآجار ,,, الله يجزاك خير ياخالد فكيت ازمه ,,, لو اني في بيتنا الاول ,,, كان الحين شايل هم الكهرباء والتلفون بس ولو لازم احصل على وظيفة اخواني يبون والشقة تبي اغراض ,, نزلت راسي على الطاولة بيأس ,,, شسوات لازم اطلع وادور بس الحين مواعد خالد اروح معه للرياض = خالد رفعت راسي لسلمى سلمى = خالد عند الباب ( ونفخت صدرها بغرور ) وقلتله اطلق ,, شفت انا اعرف انا مستغرب = اطلق ! وشو اطلق .؟ سلمى = اطلق عشان يدخل المجلس ابتسمت انا = اسمها اقلط مو اطلق وقمت رايح للمجلس عند خالد اخذنا شوي وطلعنا من الشقة متوجهين للرياض وطوال الطريق وانا ساكت ومهموم ,, هم الوظيفة الي ماني قادر احصلها وهم امي الي ماهي راضية تحس فينا ولو مرة ,,, ياليتها تجي على الاقل عشان خلود التفت لخالد الي جالس بمكان الراكب ولقيته يطالع قدام وسرحان رجعت اطالع قدام وانا ضايق صدري ,,, اخاف امي تختار احمد وتطنشني انا انا ماني بحاجتها بس خلود وخواني الصغار الي محرومين من حنانها وهي موجودة بالشرقية وقريبة منا ,, ليش طيب تسمع كلام زوجه خالد = خالد وش فيك .؟ انتبهت على خالد والتفت له انا بتنهيدة = مافيني شي ( وطالعت قدام ) خالد = ايه واضح وشفته بطرف عيني يفتح الدرج الي قدامه ويطلع علاجه وبدا يلهم من هالحبوب خالد = تصدق هالعلاج احس صار ماله مفعول ,,, الصداع فيني فيني كان اكلتهم والا ماكلتهم ( وسكت يحتريني ارد ) سكت ومارديت خالد = مرة اكلت من المسكن ثلاث حبوب دفعة وحدة مع انه المفروض حبة وحدة عند الزوم ( وسكت يحتريني ارد ) سكت ومارديت خالد = بس عادي ماصار لي شي ,,, احتري يغمى علي ,,, يعورني بطني ,,, يخف الصداع ,,, يصير أي شي ,,, بس شكلي تبلدت ماحسيت بأي شي ,, لا الصداع خف ولا اغمى علي ولا شي ( وسكت) ما رديت خالد = تصدق اني موزع علاجي بكل مكان ( وسكت يحتريني ارد ) ما رديت خالد بتنهيدة = بيت خالي ,,, وبسيارتي ,,, وبيت اهلي بالرياض ,,, باقي بيتك احط نسخة من علاجي ,, وش رايك ( وسكت ) ما رديت خالد = تصدق ان خالي مايدري اني مسافر للرياض ,,, قلتله طالع للبر مع شباب ,,, عاد تخيل بر بعز الحر ماتجي صح .؟ ( وسكت ) مارديت خالد = تصدق اني قاعد اكلم لوح الحين ( وسكت ) ما رديت خالد = تصدق يعني انه وشفيك .؟ سكت ولا رديت خالد = يله عاد خالد ,, وشفيك اليوم ,, بالعادة تثرثر فوق راسي ,,, ليش ساكت انا بضيق = خالد ممكن تبلع لسانك وتسكت خالد = ماني قادر انوم سولف معي انا = نام الحين باقي ساعة ,,, ساعة ونص ونوصل خالد = لي يومين مانمت كيف تبيني انوم الحين ,,, علمني بس وشفيك ,, مانت طبيعي اليوم انا = خويلد بتسكت والا وشلون وسكت اخيرا ,, اعوذ بالله مابغى بس المسكين طوال الطريق المتبقى وهو ماسك راسه بين يديه او يجر شعره ,, شوي يسدح المرتبة وشوي يرفعها وماسمع منه الا أأأخ راسي ,,, صداع ,, راسي بينفجر وانا اسمعه وساكت بعد ساعتين وصلنا الاستراحة قبل غروب الشمس بفترة وقفت السيارة والتفت لخالد انا = العامل فيها .؟ خالد وهو ماسك راسه بألم = مدري ,, خلنا نزل ,,, اخ راسي نزلت ونزل خالد ,,, اتصل خالد على صادق عامل الاستراحة وفتح لنا البوابة واحد هندي والتفت لخالد صادق = بابا كالد كيف حال انته .؟ بس مارد عليه خالد ودخل الاستراحة على طول التفت لصادق وطلبت جواله رفض بالبداية بس غصبته واخذت الجوال منه ورحت الحق على خالد وتوجهت للغرفة حسب الي اذكره بالفيديو ,, لين وصلت الممر الي يروح للغرفة وشفت خالد من بعيد واقف عند بابها استغربت وركضت لين وصلته انا مستغرب = وش فيك واقف ليه ماتدخل وماحتريت رده دخلت الغرفة بس وقفت بمكاني منصدم الغرفة فاضية بالمرة ,,, مافيها شي ابد ,,, وين البراميل وين الطاولة الصغيرة ,, عجيب اكيد موب هذي الغرفة التفت لخالد الي الى الحين واقف بمكانه انا = شسالفة ,,, هذي نفس الغرفة الي بالفيديو وطلعت جوالي وفتحت على الفيديو بس سحبه خالد مني وقعد يطالع الفيديو لين انتهى خالد بعصبية = اكيد صادق الكلب وطلع معصب من الغرفة ,,, لحقته ورحنا للعامل وهجم خالد عليه بس بسبب تعب خالد وضعفه والعملية الي بصدره مسكته وابعدته عن العامل وهجمت على صادق وطرحته بالارض واستلمناه ضرب انا وخالد حقنا معه ومافيه فايدة مانسمع منه الا ,, بابا انا مسكين انا مافيه معلوم قمت عنه انا = اتركه خالد مافيه فايدة منه هذا التفت خالد لي منقهر خالد بقهر = كيف يعني والصور والفيديو وراح لباقي الغرف يدور فيها ,,, رحت لغرفة العامل ومالقيت شي ,,, رحت لمكان المسبح ومافيه شي ,,, رحت للمطبخ ومافيه شي وماخلينا مكان مادورنا فيه ,, خالد من جهه وانا من جهه حل الظلام علينا وحنا الى الحين ندور ومافيه شي غير طبيعي ,, كل شي عادي حتى برا الاستراحة درنا فيها ,,, رجعت للغرفة مرة ثانية وانا وشوي واستخف معقول ,,, لو الصور بس قلنا مفربكة بس الفيديو وشلون طلعت من الغرفة وجلست على الارض ومديت رجلي بتعب أأأخ تعبت وانا امشي وادور كني مهبول شفت خالد واقف بنص الاستراحة انا بصوت عالي = خالد التفت لي وجا يترنح وقف قدامي خالد بتعب = ناصر بيضيعني انا = خالد اهدى شوي ,,, مدام ان الاستراحة فاضية ,,, مايقدر يسوي شي خالد بصراخ = الفيديو معه ,,, انا بضيع ,,, على الاقل لو لقينا شي اقدر اخذه للشرطة ويشوفون البصمات بس الحين لا ,,, الحين بيتهموني اني اخفيته ( وبكى ) ناصر بيضيعني ,,, ناص انا بحيرة = خالد انت تعبان اجلس خلنا نعرف نفكر مسك خالد راسه بين يديه ودموعه على خده خالد = مابي امي تعرف ,,, انا مظلوم ,,, ناصر بيذلني ,, راسي يعورني راسي بينفجر لاحظت عليه كل شوي يضعف ,,, ويترنح وهو واقف ,,, كأنه ماهو قادر يوقف اكثر ,, لا يكون بيغمى عليه ترا ماني فاضي انا بخوف = هيه خالد مو الحين ومادريت فيه الا وهو يطيح علي ,,, مسكته وابعدته عني وجلست على ركبتي وانحنيت عليه انا بخوف = خالد ماهو وقتك الحين ,,, قم ,,, خالد تسمعني متمد على الارض وهو شبه فاقد وعيه ,, ويهذي بكلام مو مفهوم انا = خالد رد علي ( تنهدت ) ياربي شسوي فكيت ازارير بلوزته اشوف العملية اذا تضرت من الطيحة والا لا ,,, بس لقيت عليها لزقة كبيرة ,, ايه صح امس خاطوا الجرح مرة ثانية انا = خالد ,,, خالد رد علي وضربت خده على خفيف انا = خالد يهذي بكلام مافهمت منه شي ,,, لاهو الي مغمى عليه ولا هو الي صاحي |
|
#54
11-06-2011, 02:13 PM
| ||
| | ||
| قمت وركضت لصادق يشيله معي نوديه للمستشفى اول ماشافني العامل اركض قام خايف مني صادق بخوف = بابا انا مافيه معلوم مسكته وجريته معي ,, وشلنا خالد وحطيناه بالسيارة بمكان الراكب وانطلقت فيه للمستشفى والمشكلة مادل شي بالرياض ,, وقفت اقرب سيارة وخليت راعيه يدلني على اقرب مستشفى وماقصر الرجال مشى قدامي بسيارته يدلني توترت اكثر يوم شفت خالد بجنبي اغمى عليه قبل اوصل المستشفى وصلت اخيرا ودخلناه الطواري وجلست بكراسي الانتظار احتري الطبيب يطلع من عنده بعد حوالي ساعة جاني الدكتور انا بخوف = هاه دكتور الدكتور = اضطرينا ندخله العناية المركزة لين تستقر حالته شهقت وطيرت عيوني فيه انا بصدمة = وش العناية الدكتور = المريض حالته متدهورة ,,, ممكن اعرف وش سبب العملية الي بصدره .؟ جينا بنحط عليه تخطيط القلب لكن تفاجأنا بالعملية واضطرينا نشيل الضماد ونحط بداله التخطيط نزلت راسي منصدم ,,, ربي سترك ,,, يارب قومه بالسلامة الدكتور = المريض سبق وسوى عملية بالقلب .؟ الخياطة بمكان القلب وعلى بال هالدكتور انها عملية لعرض صحي عادي انا بحزن = لا ,,, خالد اعتدوا عليه شباب وتعرض لطعن بيده وصدره الدكتور = بس العملية واضح عليها جديدة ,,, كيف يسمح له الدكتور يطلع وه انا = امس عادوا الخياطة عشان كذا تشوفها جديدة الدكتور = انت اخوه .؟ انا = لا الدكتور = طيب عطني رقم ابوه او أي قريب له ,,, فيه امور لازم نتكلم فيها لمصلحة المريض انا = خالد ابوه مسافر ,, وماله اخوان ,,, وانا اعرف عنه كل شي ,, قل وش تبي تتكلم عنه الدكتور = لازم اتكلم مع ولي امره ,,, خالد صحته متدهورة ولازم يتخذ قرار باسرع وقت ,,, رجاء عطني رقم أي شخص قريب له ,, عمه خاله أي احد انا = ليه خالد وش فيه ,, ليه مدخلينه العناية .؟ الدكتور = لين تستقر حالته ونطلعه ,,, ممكن تعطيني الرقم انا مشغول وشلون افهمه هذا الحين ,,, ابو عبد الله مايدري اننا بالرياض اصلا مايدري ان خالد عنده السرطان انا = ماحد يدري انه فيه السرطان غيري سكت الدكتور شوي الدكتور = وليش ساكتين الى الحين ,,, المريض لازم يبدا بالكيماوي ,,, او يجري عملية باسرع وقت ,,, المرض ينتشر بجسمه وانتم ساكتين طلعت دموعي غصب عني ,,, يارب اشفه الدكتور = جيب العلاج الي ياخذه المريض ابي اشوفه مشيت خطوة بروح للسيارة بس تذكرت ان اسماء الادوية مكتوبة بجوالي انا بحزن = اسماء الادوية بجوالي ( وطلعت له الجوال وريته ) الدكتور = من متى والمرض معه .؟ انا بصوت باكي = من سنه الدكتور بعصبية = هذا تهور يأخ ,,, المريض بحاجة للعلاج والراحة ,,, والمناعة عنده ضعيفة جدا ,, عطني رقم أي قريب له وبلا كثرة حكي انا = خالد مايبي احد يعرف الدكتور = المريض لازم يبدا بالعلاج ,,, صحته ماتتحمل اكثر سكت مادري وش اقول وش اسوي الدكتور = اذا فاق من الغيبوبة لازم يوافق على الكيماوي ,,, الادوية الي ياخده المريض مجرد مسكنات ,, لازم يبدا بالكيماوي مفهوم وقعد يهاوشني كأني انا السبب ,,, قاطعته انا بصوت باكي = دكتور تكفى ابي اشوفه الدكتور = الزيارة ممنوعة الحين ,,, اذا استقرت حالته وطلعناه من العناية تقدر تشوفه انا = تكفى ابي اشوفه الحين الدكتور = قلتلك ممنوع ونشبت بحلقه لين وافق وطلبت منه بعد ارافق معه اذا طلعوه من العناية رفض اول شي وبعد الحاح واصرار وافق حسيته كره اليوم الي صار فيه دكتور بسبب الحاحي عليه لبست الملابس الخاصة لزوار العناية المركزة ودخلت على خالد وشفته قدامي متمد على السرير مكشوف الصدر وعليه تخطيط القلب وحوله الوايرات و الاجهزة ومحطوط على فمه كمامة الاكسجين وموب حاس بالي حوله وصوت الجهاز يزن باذني بكيت غصب عني وانا اشوف خوي الروح بالحالة هذي ,, قربت منه وحطيت يدي على راسه انا بصوت باكي = خالد قم ياغالي مغمض عيونه وملامحه هاديه رفعت راسي للرضة الي تتابع حالته انا = خالد بيقوم صح .؟ ماقدرت اتحمل وانا اشوفه بهالحال وانحنيت عليه ابي اضمه واحس بوجوده ,,, بس منعتي الممرضة ,,, من امس وهو تعبان ,, لا مو من امس من قبل امس من يوم كان يستدرج الشباب وهو تعبان وزاد عليه السفر وهم الاستراحة انا بصوت باكي = خالد ماتحملت اكثر وطلعت من العناية وانا متضايق ,, وجلست على اقرب كرسي يارب اشفه ,,, قم ياخالد ,, قم انا احتريك تذكرت اني ماصليت العشا والمغرب جمع وتقصير لاني مسافر رحت لمكان اصلي فيه ورجعت اجلس على الكرسي قدام غرفة العناية وانا ادعي الله انه يقوم بالسلامة ونمت وانا مادري عن نفسي من التعب بغيت اطيح من الكرسي وقمت مفزوع ,, مدري كم مر علي من وقت وانا نايم ,, اخ يارقبتي طلعت جوالي اشوف الساعة ,,, الله ,,, الساعة 2 في اليل قمت بتعب وطليت على خالد من ورا نافذة الباب ,,, وشفته على حاله وممرضة ثانية غير عن الاولى تتابع حالته ,,, نزلت راسي بحزن ,,, جلوسي هنا ماينفع لازم اروح بس وين اروح وين طلعت من المستشفى وركبت سيارة خالد ورحت للاسترحة ,,, الساعة الحين 2 بروح اتسل على الاستراحة واراقب هالهندي يمكن كل المصايب منه ,,, والا وشلون ناصر يدخل الاستراحة على كيفه ,,, اكيد انه دخل البراميل وصور الي صور وطلعهم واكيد العامل بيكون عنده علم ويمكن متفق معه بعد ,,, مانستبعد شي وصلت وقفت السيارة من ورا الاستراحة وركبت عليها وبعدها ركبت على الجدار ظلام ماشوف الا نور غرفة العامل والحمام والمطبخ ,,, يانا يانت ياصادق راح اراقبك لين يذن الفجر ,,, ونشوف ( تنهدت ) الحمد الله اني اخذت جواله وصرت على هالحال اراقب فوق الجدار كني بومه ,, وماشفت أي شي غريب على العامل يطلع من الغرفة ويروح الحمام والا طلع وراح للمطبخ ويرجع للغرفة مرة ثانية ,,, وماجاه احد من برا الاستراحة ولاهو الي طلع ,, الفجر صليت باحد المساجد ورحت لخالد بالمستشفى ,,, ولقيته على حاله بالعناية سألت عنه والحمد الله طمنوني انه استقرت حالته بس ماصحى من الغيبوبة الى الحين جلست انتظر وانا مادري وين اروح والا وش اسوي ,,, والافكار توديني وتجيبني الساعة تسع الصباح بشروني انه فاق من الغيبوبة وطلعوه من العناية ونقلوه لغرفة عادية ,,, دخلت عليه الغرفة كمرافق وقفت عنده اتأمله كان تحت تأثير مخدر ولاهو حاس فيني طاحت عيني على الخياطة الي بصدره ومرت اصبعي عليها وتذكرت كلامه امس وحنا بالطريق يوم كان يسولف فوق راسي وانا مطنشه ورجعلي كلامه يوم يقول سولف معي انا بابتسامة = خالد قم ابسولف معك مثل ماتبي بس قم يبدل الله من حال الى حال بكيت غصب عني ,,, امس كنت بحال والحين بحال جلست على السرير بجنبه وانحنيت عليه وضميته انا بصوت باكي = خالد ياشينك ,, قم عاد ,,, ماتشبع نوم انت ,,, من امس المغرب وانت نايم ,,, قم مادري كم مر علي من وقت وقمت عنه سلمت على خده وخده الثاني وجبهته وطلعت رايح للاسترحة مرة ثانية ,,, لازم استمر واراقب هالصادق هذا ,,, عندي احساس انه بيجيه احد او هو بيروح لاي احد ,,, اكيد له يد بالموضوع براميل كبيرة تدخل الاستراحة وتطلع وهو يقول مافيه معلوم وصلت الاستراحة ونفس الشي ركبت فوق الجدار بوضعية مايشوفني فيها العامل وصرت اراقبه لين اذن الظهر ولاشي جديد ,, لا طلع ولا جاه احد وماشفت عليه أي شي غريب رجعت للمستشفى وانا تعبان مرة بسبب الوضعية الي كنت جالس فيها وفوق هذا جالس تحت الشمس دخلت على خالد ولقيت عنده ممرض يغير المغذي ويتابعه وخالد الى الحين نايم وموب حاس باحد ,,, سألته عنه وطمني انه بخير وطلع الممرض جلست على كرسي وحطيت راسي على السرير ,,, ودي انام تعبان العصر قومني من النوم رنين جوالي القيت نظره عليه ( امي يتصل بك ) انا بتعب = الو = اسمع وليك هذا موب صوت امي ,, هذا ,, هذا ,, هذا صوت النذل احمد عصبت اول ماسمعت صوته النشاز انا بعصبية = وش تبي انت وجهك احمد = راح نيجي عنكون يومين لا اكتر بس من شان إمك ,, عم تفهم والا افهمك كمان انا بعصبية = طول عمرك نذل وسكرت بوجهه ,,, زفرت بضيق ,, كلب حقير ,, امي ماشافناها من سنة والحين يجيبها عندنا بس يومين ,, التفت لخالد النايم انا = علمني خالد وش اسوي ,, خلود واخواني يبون امي ويومين مايكفون ,,,, انا بعد مشتاق لامي مرة ,,, بس امي باعتنا ,,, اختارت احمد وخلتنا ,,, تدري خالد انا ماراح اسامحها ,,, ولولا اخواني كان ماطلبت منها تجي ,,, ماراح اسامحها قمت صليت بالغرفة وبعدها وقفت عند الباب اتفرج على الرايح والجاي وانا اتذكر ابوي وامي وحياتنا قبل وحياتنا الحين شوي ودخلت الغرفة وانا متضايق ,,, خلني اتصل على خلود ,, جلست على الكرسي بجنب خالد ,, وطلعت جوالي بس حسيت بحركة ,,, رفعت راسي لخالد وفرحت لما شفته يفتح عيونه ويئن انا بفرح = خالد وقربت الكرسي منه اكثر انا بفرح = اخيرا قمت ياثور يالي ماتستحي يتلفت بعيونه على الغرفة يحاول يستوعب انا بابتسامة = ابو خلّود حنا بالمستشفى الحين التفت لي وهو مقطب حواجبه مستغرب خالد بهمس وتعب = وينه انا مستغرب = وش الي وينه .؟ خالد = لقيته انا = وش تقول خالد ( وضربت خذه على خفيف ) اصحى خالد انت بالمستشفى الحين سكت شوي يحاول يستوعب قمت وتركته ورحت انادي على الدكتور جا الدكتور و فحصه شوي وتركناه ربع ساعة يصحيح وبعدها بدا الدكتور يكلم خالد عن ضرورة التعالج بالكيماوي لكن تفاجأنا بخالد رافض وبشده العلاج بالكيمياوي ,, حاول فيه الدكتور لين مل وطلع انا مستغرب = خالد ليش ماتبي تتعالج خالد بعصبية = ليش جبتني المستشفى .؟ انا = كنت تعبان وش تبيني اسوي اجل .؟ خالد = مثل مادخلتني طلعني انا = صاحي انت بتطلع الحين وانت بهالحال خالد = ماعلي منك مثل مادخلتني طلعني قربت منه وغطيت وجهه بيدي انا بعصبية = نام نام ,, وش الي قومك شهقت يوم عض على يدي انا بعصبية = اح ياحمار خالد = طلعني ,,, لازم اطلع ,,, لازم اروح للاسترحة انا بضيق = على طاري الاستراحة رحت لها امس واليوم وراقبت صادق ولاشفت عليه شي وامس مالقينا بالاستراحة شي ,,, فيه حل واحد بس ياخالد ,, ومن ورا خشمك توافق عليه سكت خالد شوي خالد مستغرب = وش .؟ انا = فايز خالد = وش فيه .؟ انا = فايز يعرف شباب يشتغلون بالهيئة ,, خلنا نروحله ونعلمه بكل شي ,, لازم تبلغ انت قبل يبلغ عليك ناصر خالد بعصبية = تبيني ابلغ على نفسي ,,, وشفيك مجنون انا = لا ,, اقصد تروح للهيئة وتعلمهم بكل شي وهم يتصرفون خالد = مامعي شي يثبت اني مظلوم ,, والصور لاستراحتي انا = خالد خلنا نحاول , السكوت كذا ماراح يفيدنا ,, بالعكس حتى لو عطيت ناصر الي يبي ,,, بيذلك مرة ثانية وقعدت اقنعه لين اخيرا وافق ورحت الح على الدكتور لين رخصه بالخروج طبعا بعد ماوقع خالد انه على مسؤليته ومسكنا الخط راجعين ,, رغم تعب خالد وصلنا الشقة الساعة 11 في اليل وقرنا يبات خالد عندي في الشقة لأنه مايقدر يرجع لبيت خاله وهو قايل لابو عبد الله انه راح يرجع من البر يوم الجمعه واليوم الاربعاء دخلنا الشقة ودخل خالد المجلس وعلى طول رحت لخلود وعلمتها ان امي راح تجي عندنا يومين والاخت طارت من الفرحة ,, شوي وتصقع بالسقف طلبت منها تسوي لنا عشا ومن فرحتها ماعارضت رغم تأخر الوقت تعشينا انا وخالد واتصلنا بفايز يجي للشقة ضروري وعلى الساعة 1 في اليل جا فايز عندي ,, وعلمناه بكل شي وريناه الصور والفيديو وبعد ماستوعب خاصة انه انصدم لما عرف ان خالد عنده عيادة واستراحة وهو بهالعمر ,, وبعد ما حلفنا ان خالد مظلوم فايز بعصبية = هذا اسمه ابتزاز التفت خالد لي وسألني خالد مستغرب = وش معنى ابتزاز .؟ سكت ,, حتى انا مدري وش معناه انا بغباء = اول مرة اسمعها فايز = الله يخلف هذا وانتم بثالث ثانوي ماتعرفون معنى ابتزاز ( كمل معصب ) ابتزاز يعني ناصر قاعد يستفز خالد ,, يعني قاعد يلوي يد خالد بالصور والفيديو خالد = ماعلينا وش معنى ابتزاز ,, المهم وش نسوي فايز = وهذي يبيلها سؤال من بكرة نروح انا وانت للهيئة ونعلمهم بكل شي ,, والباقي خله علي ,,, راح اتواصل مع هيئة الرياض ونراقب ناصر والعامل ( وقام والتفت لخالد ) انا بكرة عندي دوام مرني لمكان شغلي ونطلع انا وانت ونروح للهيئة وهات الصور والفيديو وجوال العامل ,, ( والتفت لي ) ليت خليت الجوال معه ياخالد وليتكم ماضربتوه بعد ( وتنهد ) ماينفع الكلام الحين ,,, فات ,, يله استاذن اشوفكم بكرة على خير خالد = فايز تراك ماشفتني اليوم ,,, لاتعلم خالي اني جيت التفت فايز لخالد وسكت شوي وبعدها ابتسم فايز بابتسامة = ياخي ماني مصدق ان لك عيادة وطلع الخميس راح فايز وخالد للهيئة وعلى الساعة 11 الصباح جا خالد وعلمني ان فايز راح للرياض يتابع الموضوع هناك مع هيئة الرياض وخالد طوال اليوم وهو جالس على اعصابه المغرب اتصل فيه فايز وعلمه ان الهيئة راح تراقب ناصر والعامل لمدة اسبوع او اسبوعين ,,, وعلى الله الجمعة رجع خالد لبيت خاله يقاله جاي من البر بعد صلاة المغرب تفاجأت بابو عبد الله جاي عندي بالشقة ,, دخلته المجلس وانا مستغرب زيارته المفاجأة ,,, وبعد ماضيفته صدمني بالسبب الي زارني عشانه ,,, صدمة عقدت لساني انا بصدمة = وش ,,, اختي خلود ابو عبد الله بابتسامة = انا كنت ابي احتري العطلة الطويلة بس ام عبد الله الله يهديها خطبتها لولد اخوها محمد وانا مادري ,,, وانا من زمان ابي خلود لولدي خالد ,, وخفت انكم تردون على اهل محمد ,,, وانا والله من زمان ابيها لخالد وقلت لامه وماعندها مانع هي شافت خلود وتبيها لولدها ( وابتسم اكثر ) وحنا حاضرين بالي تبونه نزلت راسي منصدم ,, وش الورطة هذي ,, خالد ,,, خالد مريض ياعم خالد معه سرطان ,,, تبيني ازوج اختي واح ( وتنهدت ) استغفر الله العظيم ,, خالد والله انه رجال والنعم فيه ,, وقف معي بأحلك الضروف ,, بس ابو عبدالله = انا جيتك اليوم قبل تردون على اهل محمد ,, فكروا وردوا لنا خبر ,,, والله يتمم على خير كان صارت لمحمد والا لخالد رفعت راسي انا مرتبك = آآآ ,,, مو المفروض يجي معك ياعم ابو عبدالله = الا وهذا حقك والمفروض يجي بس خالد توه جاي من البر انا = هذا مو بعذر ياعم ,, لا يكون مغصوب ولا يبينا ابو عبد الله = لا والله ,, قلت له انا وماعارضني,,, خالد رضي الله يرضى عليه ,, بس هو يقول قل لخالد اذا وافقوا علي جيت ,, وبعدين انا ما اكفي والا لازم يجي خالد ( وابتسم ) انا بتنهيدة = انت الخير والبركة ,,, ياعم ابو عبد الله = صح هو ماهو متوظف وتوه يدرس بس تراه عنده مستشفى باسمه حولها له ابوه قبل كم شهر ,, ويصرف على نفسه منها ,,, فكروا ياولدي وردوا لنا خبر وقام وطلع من الشقة رجعت للمجلس وانا الى الحين منصدم ,,, ياربي شسوي اخاف اذا رفضناه اخسر صداقته ,,, اصلا خلود ماتداني طاريه صح انها خفت بعد العمرة وصارت ماتذمر لما يجينا بس الحين اجي واقولها خالد خطبك ,,, بتلفعني باقرب قدر وش الورطة الي انا فيها ياربي طلعت جوالي واتصلت فيه خالد = هلا خالد سكت ومارديت خالد = ادري ادري احس انك الحين تقول عني وش هذا الي وجهه لوح وجاي يخطب اختي انا بتنهيدة = يعني داري ان خالك جاني اليوم خالد = من يوم خالتي ام عبد الله خطبت اختك لمحمد وهو يكلمني بالموضوع ,,, خالي على باله اني طبيعي ,,, والصراحة ماقدرت اقوله شي واعلمه عن مرضي والي زاد الطين بله انه مكلم امي من زمان ومخطين ثنيناتهم بتزوجيني وانا اخر من يعلم ( وتنهد ) كانوا يبون يتقدمون رسمي بالعطلة بس يوم عرفوا عن محمد خافوا تطير العروس مني وهم يبونها لي ,,, آسف خالد والله ماقدرت اقول أي شي ولا اعلمهم بأي شي انا = يعني انت ماتبي تتزوج .؟ خالد = مافيه احد مايبي يتزوج ياخالد ,,, اكذب عليك اذا قلت مابي اتزوج ,,, انا ابي ,, بس المرض مايبي انا بعصبية = يعني انت ماتبي اختي بالذات .؟ ساكت ومارد علي انا = يعني عادي لو راحت منك .؟ ساكت ومارد انا بصراخ = ليش ماترد .؟ انا = خالد خالد = معجب بتحملها مسؤولية اخوانها ,,, معجب باهتمامها بمعاذ وكيف كانت خايفة عليه حتى مني يوم كنا بمكة ,,, اذا كانت مثل اخوها باخلاقه اكيد ابيها ويسعدني اتزوجها ,,, بس السعادة بعيدة عني ياخالد سكت خالد = من حقك وحقها ترفضوني ,,, خالد انا مريض ومالي حق اعيش زي الناس ,, انا كم يوم واودعكم زفرت بضيق رجع على اليأس الي عايش فيه انا = وش هالكلام انت الثاني خالد = انا مكاني المستشفى وبس ,,, واذا وينلي وناصر ماتركوني بحالي بيصير مكاني السجن ( وتغير صوته ) الله يوفقها اختك مع محمد وسكر بوجهي نزلت راسي بألم ,,, خالد يائس بالمرة ,,, واذا رفضته بيزيد يائسه اكثر انا اميل لخالد اكثر من محمد وابي خلود تصير لخالد ,,, خالد غالي وطيب وحنون تذكرت حبه لاخواته وكيف كان يضمهن ويقبلهن ويداعبهن ,, انت حنون ياخالد ,,, يارب اشفه ,,, لازم يتعالج عسى الله يكتب له الشفا |
|
#55
11-06-2011, 02:14 PM
| ||
| | ||
| * 31 * وانا بمعمعة افكاري وهواجيسي وبالورطة الي ورطتها والطلب الي طلبه ابو عبد الله احس راسي ثقيل ,,, ياربي شسوي ,,, ماراح القى احسن لخلود من خالد بحنانه وطيبته ,, انا شفت قدام عيني وهو يحن على اخواته ,,, والي حنون على اخواته اكيد بيكون حنون على زوجته ,,, محمد رجال بس مادري كيف تعامله مع اهل بيته يوم كنا بيتنا الاول ,,, كنت اشوف محمد يركب اخواته معه السيارة ويروحون ,,, بس هذا مايعني انه حنون عليهم ,, كل الشباب يودون اخواتهم مو بس محمد وخالد اعرفه اكثر من محمد خالد معي اربع وعشرين ساعة ,,, لو الي خطبها صالح مو محمد اهون ,,, صالح اعرف كيف يفكر بس محمد لا قمت وطلعت من الشقة رايح للمسجد اصلي العشا ,,, بس محمد وابوه ماجابوا لي سيرة ولا كلموني ,, المفروض يكلموني انا او على الاقل يكلمون عمي البخيل لا يكون خلود فاهمة غلط ,,, يمكن ام محمد وام عبدالله يدعون لها بالزوج مثل الحريم الكبار وخلود فهمتهم غلط طلعت من المسجد وانا ماسك الجوال بيدي ابتصل بامي يمكن كلمتها ام محمد اكثر رسميه من خلود ,, اتصلت بس رد علي زوجها النذل احمد ,,, اف فاضيله هذا ,,, سكرت الجوال بوجهه وانا اكره اسمع صوته ياربي وشلون الحين ,,, خالد مريض وشلون ازوج اختي لواحد عنده السرطان وانا عارف انه عنده السرطان وشلون اصرف ابوعبدالله ولد اخته وشلون والاهم وشلون اصرف خالد من دون ماجرحه ومن دون مايأثر على علاقتنا اتصلت على ابو عبدالله قبل ادخل العمارة ابوعبدالله = الو انا مرتبك = السلام عليكم ابوعبدالله = هلا خالد وعليكم السلام وشلونك وانا عمك .؟ انا = بخير دامك بخير ,,آآآآ ,,, اقول عمي ,,, آآآآ ( وسكت مدري وشلون اصرفه ) ابوعبدالله = هلا بغيت شي .؟ انا مرتبك = اقول عمي ماتشوف انه بدري على خالد واختي ,,, خالد توه يدرس واختي بعد ابو عبدالله = انا قلتلك اني كنت ابي اكلمك بالعطلة الطويلة يعني بعد مايتخرج خالد ,,, وقلتلك اني انا من زمان ابيها لخالد وكلمت امه وابوه يعني حنا مفكرين فيها من زمان وكنا نحتري العطلة بس ,, وحنا ماحنا مستعجلين ,, لو يتزوجون بعد سنة سنتين ,,, انا بس ابي اضمن ان خالد لاختك واختك لخالد ابتسمت كذا حلو يكون خلود تخرجت من الثانوي بس تجري الرياح بما لا تشتهي السفن ,,, خالد مريض انا = انت ياعم داري ان اهل محمد خطبوها لمحمد .؟ ابو عبدالله بعصبية = الله يلعن الشيطان ,, ام عبدالله تصرفت من دون ماتقولي هي عارفة اني ابيها لخالد بس هي همها عيال اخوها وبس ومايهمها ولدي خالد ,, وراحت من دون مادري لاختك وكلمتها قبلنا مع انها عارفة اني ابيها لخالد ,,, انا ياولدي ضربتها على تصرفها ,, ولو ماني مستحي من اخوها كان طلقتها اف والله بلشنا بابو عبدالله ومرته كل واحد همه مصلحة ولد اخوه ويعاندون بعض علشان عيال موب عيالهم ,,, فقدانهم لعيالهم الحقيقين خلاهم يتعلقون بعيال موب لهم ,,, هذا مفكر بخلود من زمان لولد اخته وهذي تقدمت لخلود قبل زوجها وخطبتها لولد اخوها ,, كل واحد همه مصلحة ولد اخوه وبس والي اكلها انا ابوعبدالله = الو انتبهت لابو عبدالله انا مرتبك = آآآآ ,,, معك ,, بس يابو عبدالله الراي الاول والاخير لاختي واسمحلي اذا وافقت هي على الي تقدملها قبل ولدك ,, واقولها لك من قلب خالد صديق وعزيز علي وماراح القى لاختي احسن منه ,,, بس اهل محمد سبقوكم سكت ابو عبدالله شوي ابو عبدالله بتنهيدة = مسموح ,,, مسموح ياولدي ,,, والي يشاور الحريم غلطان وانا عمك وانا غلطت يوم شاورت ام عبدالله انا = مع السلامة ابوعبدالله = شاور اختك والله يوفقها كانت لمحمد والا للغالي ,, مع السلامة وماصدقت اني سكرت عنه ,,, دخلت الشقة ولقيت خلود جالسة بالصالة ,,, جلست بجنبها ناوي اكلمها بالموضوع قبل تجي امي ,,, الراي الاول والاخير لي ولخلود امي مالها دخل فيه انا = آآآ ,, خلود مر اكثر من يومين على زيارة ام عبدالله وام محمد وماعلمتيني برايك ,,, يمديك فكرتي ,, صح .؟ حمر وجه خلود ونزلت راسها بقوة من الحيا انا = هاه خلود وش رايك بمحمد .؟ منزلها راسها وتلعب باصابعها ,, انا بنفسي منحرج اتكلم معها بموضوع زي كذا ,,, ياليت ابوي موجود كان انا ارتحت انا منحرج = خلود اكلمك انا خلود وهي منزلة راسها = مثل ماتبي انا منحرج = انت الي وش تبين ,,, موافقة بمحمد والا لا .؟ قولي ايه والا لا .؟ نزلت خلود راسها اقوى ,,, شوي وتنكسر رقبتها انا = ارفعي راسك وكلميني خلود = ان شاء الله انا = وش الي ان شاء الله خلود .؟ رفعت راسها شوي خلود بحيا = موافقة ( وسكت شوي وبعدها كملت ) يعني فرصة اريّحك قطبت حواجبي ماني فاهم شي انا مستغرب = تريحيني .؟ نزلت راسها خلود = اساعدك بمصروف البيت واريّحك من مصروفي ومصروف اخواني وان شاء الله بمهري اشتري لك سيارة وانا ابشتري لاب توب ( والتفت لي وجها احمر ) وبيت محمد قريب عندنا ابجيكم كل يوم واسوي الغدا والعشاء لكم فتحت فمي منصدم انا منصدم = تشترين لي سيارة .؟ خلود = ايه بمهري اقدر اشتري سيارة لك واشتري لاب توب واخليه هنا عندنا واشتري كل شي نبيه انا بحزن = يعني انتي موافقة على محمد بس عشان كذا تلعب باصابعها خلود بخجل = وش اسوي انت ماتقدر جرحتني تبي تطلع من عندي عشان محمد يصرف عليها احسن مني ,,,, تبي تطلع من عندي بس عشان تشتري الاب توب الي كانت تطلبه مني من زمان وانا رافض لانه مامعي نزلت راسي بألم ومنجرح ,,, خلود طلباتها لنفسها قليلة وعلى قلها مالبيته لها قمت بألم ورحت غرفتي وسكرت على نفسي ,,, انا بصعوبة اوفر طلبات الاكل والشرب والمدارس واهملت احتياجات اخواني الثانية ,,, خلود بنفسها متى اخر مرة شرت لبس جديد ,,, بالعيد الي فات ماشرت ولا اخواني شروا ولا حتى انا ,,, بس انا كلها ثوب ابيض ومايميزون الناس هو جديد والا قديم بس خلود بنت ولبسها يختلف عنا ,,, وخلود بسبب حاجتها لحريم اكبرها منها صارت اجتماعيه وتشوف البنات جلست على السرير وانا اتذكر يوم كنا بيتنا الاول ,,, جتني خلود مرة وقالت ابي مكياج مدري مناكير مدري وش المهم شي تافه وخاص فيها انا يومها كنت شايل هم الكهربا والتلفون وعيت وماشريت لها الي تبي وبعدها خلود صارت ماتطلب مني الا اغراض للبيت ,,, واثرها بنفسها الى الحين ,,, ايه وليه مايصير بنفسها ماهي تشوف بنات واكيد تشوف لبسهن واهتمامهن بنفسهم هذا غير صديقتها المتزوجه اكيد تشوف منها وتسمع انسدحت على السرير ابي انام ابي اهرب من هالهموم ,,, خلود تبي تطلع من عندي وتفتك من العيشة الي انا حارمها منها خلود تبي تتزوج عشان تعيش ,, بكيت غصب عني ,,, تعيش .؟ تبين تتزوجين ياخلود بأي احد بس عشان تعيشين حياتك ,,, تبين تسوين مثل البنات ,,, تبين واحد يصرف عليك احسن مني ,, تبين واحد يشتري لك الاب توب الي انا معي عليه ,,, بس والله ياخلود مامعي ,, مامعي انا بعد محروم ,,, ليش ياخلود ليش ,,, قمت ومسحت وجهي بيدي بعصبية ورحت لخلود بالصالة بس مالقيتها هناك ,,, ورحت لغرفتها ولقيتها جالسة على سريرها انا بعصبية = خلود الى الحين تبين تتزوجين محمد .؟ نزلت خلود راسها بقوة مستحية ,,, فاضي لحياها هذي رحت لها ومسكت شعرها وشديته عشان ترفع راسها وتطالعني انا بعصبية = تبين محمد يصرف عليك ,,,, تبين لاب توب ياخلود ,,, طيب بشتري الي تبينه ,,, بس زواج مافيه ,,, لا من محمد ولا من غيره ,,, سامعة ( وهزيت شعرها ) لا من محمد ولامن غيره ,,, ان اتصلت فيك ام محمد والا ام عبدالله قولي خالد عيا تسمعين والا اعيد .؟ خلود بخوف = آآآه خالد شعري ,,, عورتني دفعتها انا بعصبية = بسد فمك بالي تبين ,, طيب ياخلود طيب وطلعت من الشقة معصب ,, مدري وين اروح ,,, جرحتني خلود ,,, اختي انا تبي تطلع من عندي باي طريقة هه شكلها ماصدقت انها انخطبت ,, اكيد قالت فرصة اتخلص من خالد وبخله ,, واكيد اخواني مثل تفكيرها ,, وليش مايصيرون مثلها ,,, سالم من متى ماشريت له ملابس ,, وسلمى ومعاذ ,,, كلهم يبون يفتكون مني يبون يرتاحون مني ,,, ياخسارة والله ياخلود ياخسارة اتصلت بابراهيم واخذت سيارته ,, ابروح اكد ,,, واكد واكد واكد واكد لين اجمع قيمة الاب توب واسد فم خلود فيه وارجع اكد واكد واشتري احتياجات اخواني الباقية ,,, اخواني يشوفون اقرانهم واكيد يصير بنفسهم ,,, سالم كم مرة طلب مني سيكل وكنت اعي يأما اهاوشه والا احاول اقنعه بانه مامعي ,, وسلمى بعد ,,, انا كنت اهتم بالاكل والشرب وطلبات المدارس واغراض البيت المهمة ,,, الاشياء الصغيرة الي يحتاجونها احرمها منهم ,,, بس والله غصب عني ,,, يعني هو على كيفي ياخلود يوم السبت رجعت الشقة الفجر وانا هلكان وتعبان طوال اليل وانا افرفر بالشوارع اروح لمحطة الباصات واروح اوصل من هالمسافرين ,,, ولحسن الحظ ان امس الجمعه واكثر المسافرين جاين من مكة واروح اوصلهم لبيوتهم وارجع مرة ثانية للمحطة واوصل غيرهم ,,, بس قيمة الي وصلتهم ماتجيب اقل من ربع الاب توب ,,, دخلت غرفتي من دون مامر غرفة خلود ,,, قومت سالم وانسدحت على سريري ونمت = خالد خالد اف حتى من النوم محروم ,,, فتحت عيوني وشفت خلود قدامي وعلى طول تذكرت رايها فيني خلود مستغربة = خالد مانت رايح للمدرسة اليوم .؟ انا بعصبية = مالك دخل فيني ,,, اذلفي روحي لمدرستك وخذي اخواني وارميهم عند جارتك خلود بزعل = خالد وش فيك ,,, امس طلعت معصب ,,, ونمت انا وانت مارجعت ,,, واتصلت عليك ولا ترد جلست ودفعتها بيدي انا بعصبية = كلامي امس وصليه لامي وخليها تتصل بام محمد وتقولها خالد رافض ,, تسمعين والا بكف يطيرك الحين خلود شوي وتصيح = طيب وشوله معصب علي ,,, وش سويت انا .؟ امس عورتني بشعري والحين تهاوشني ,, خلاص انت رافض وش دخلني انا تعصب علي انا بصراخ = اذلفي طلعت خلود من غرفتي ورجعت انا انسدح على سريري وانا اجاهد دمعتي ,,, وينك يبه ,,, محتاجك ,, شف خلود وين وصلت بتفكيرها بسبب الفقر والحاجة ,,, يبه خلود تبي ترتاح مني ,,, تبي احد يصرف عليها ويحسها بانها مثل البنات العاديات ليت خلود انطوائية ,, بس خلود بسبب حاجتها لام سعد ولجارتها صارت اجتماعيه واكيد تشوف ,,, هذا غير البنات الي معها بالمدرسة الساعة 9 الصباح طلعت من الشقة ورحت بسيارة ابراهيم اكد بس بهالوقت مالقيت احد اوصله ,,, رحت للشركات والمستوصفات ادور على وظيفة بس كلهم يبون اقل شي ثانوي وكمبيوتر ,,, ياربي من وين من وين رحت افرفر واي واحد اشوفه واقف بجنب الطريق اوصله ,, واذا ماشفت احد رحت للمطار عسى وربما فيه احد يبي توصيل الساعة 10 في اليل قررت ارجع للشقة واشوف اخواني ,,, طوال اليوم مامريت عليهم ولا تغديت ولا تعشيت معاهم ولا حتى اتصلت عليهم ,, خاصة خلود من المغرب وهي بس تتصل علي بس انا مطنشها المشكلة سيارة ابراهيم من امس العشا الى الحين وهي معي ,,, مستحي منه لازم ارجعها له ,,, والمشكلة صالح مالي وجه اخذ سيارته وانا توني راد اخوه ,,, وسيارة خالد مرسيدس اخر موديل ماتصلح للمكدة ,,, وين واحد معاه مرسيدس جديدة ويكد ماتجي ,,, غير كذا رديته ,,, ماعندي الا ماجد اباخذ سيارته يوم ,,, وبعدها اباخذ سيارة ابو سعد يوم ,,, وطيب وبعدين منين لي سيارة اكد ,,, ليت عندي سيارة لي انا وبس تذكرت كلمة خلود (بمهري اقدر اشتري سيارة لك ) تنهدت بحزن ماعمري شكيتلها ليش فكرت بهالشي ليش ,,, يارب افرجها علي ,,, ابي احصل وظيفة ,,, بس من وين رجعت سيارة ابراهيم له ورحت لماجد واخذت سيارته ورجعت لاخواني دخلت الشقة وقفت بمكاني منصدم ,,, امي وزوجها جالسين بالصالة امي حاضنة خلود وعلى ملاحمهم آثار الصياح انا منصدم = يمه قامت امي وهي تبكي ,, وانا مطير عيوني فيها ,,, امي تغيرت ,,, تغيرت مرة نحفانه اكثر من قبل ,,, وجهها ماهو الوجه الي راحت من عندنا امي = ياحبيبي يابني ,, يسلملي هالطول يسلملي هالوش ماحلاه طلعت دموعي غصب عني ,,, ذكرتني بحياتنا قبل ,,, ذكرتني بابوي ذكرتني بحياتي يوم كانت بدون هموم ضمتني امي وهي تقبلني وترصني لحظنها ,,, لفيت يديني حوليها وانا ابكي ,,, ابي اشكيلها همي ,,, آآآه يمه حرمتيني من حظنك سنة كاملة ,,, ليه رحتي وخليتينا ,,, يمة فهمي خلود فهمي اخواني فهميهم قولي لهم كل شي غصب عني امي وهي تبكي = ليه تأخرت تؤبرني ,, عم اتصل عليك مابترد ,, خفت عليك كتير انا بحزن = انتي خليتيني سنة كاملة يعني ماخفت علي الا الحين زاد بكا امي اكثر امي = ليش مابدك تفهم علي ابتعدت عن امي شوي والتفت للرجال الجالس ,, لابس بنطلون وكرشته قدامه ويطالعنا احمد = وهي امكون اجيت لعنكون ( وقام ومد يده لي ) كيفك خالد .؟ صافحته شوي وسحبت يدي على طول ,,, كارهه وكاره شوفته مسكت امي يدي وجلسنا ,, وسالم وسلمى جالسين مؤدبين وماسمعت صوتهم ابد ماهم على خبري ومعاذ جالس بحظن سالم ويطالع بالحرمة الغريبة يوم الاحد رجعت من المسجد الفجر ورحت لغرفتي واخذت مفتاح سيارة ماجد وطلعت من الشقة قبل يشوفني احد ,,, ابرجع اكد ,,, الي مثلي مايستحقون الدراسة ولا اعلى الشهادات رحت اهيم على وجهي بالشوارع وهالمرة وصلت **اين خارج المدينة المهم احصل فلوس وبس المغرب قررت ارجع للشقة ,, امي بتصير عندنا يومين ,,, المفروض اجلس معها خاصة انها تتصل علي طوال اليوم ارد عليها واقولها مشغول تاخذ ساعة ساعتين وترجع تتصل علي مرة ثانية واقولها الحين اجي تاخذ ساعة ساعتين وترجع تتصل ,, اتصل علي ابراهيم وكعادته يسأل عني اذا غبت عن المدرسة واجد ,,, القيت نظرة على جوالي ,,, الا خالد ماتصل علي ,,, هذا الي خايف منه ,,, علاقتنا تتأثر بعد الخطبة ,,, من يوم الجمعة الى الحين ماتصل علي ولا جاني بالعادة يتصل علي باليوم اكثر من عشر مرات ويجي عندي بالشقة ويسهر معي او نطلع نتمشى ,,, حتى انا مالي وجه اتصل عليه او اشوفه وانا ابرده ياربي وشلون ارده بلباقة ومن دون اجرحه ,,, وشلون افهمه تفكير اختي الغبي ,,, خلود ماتصلح تتزوج الحين ,,, ( تنهدت ) مع ان ابو عبدالله قال ماهم مستعجلين يعني تبقى سنة سنتين لين يكبر عقلها ,,, مع اني ماعتقد انه بيكبر ,, حتى لو كبر ,,, خالد مريض ,,, مرض الله اعلم وحده هو بيشفى منه والا لا دخلت الشقة ,,, وجا بوجهي النذل احمد = شو جيت ,,, انت هيك بترك ضيوفك يوم كامل .؟ انا بكره = مالك دخل دخلت غرفتي وانا متضايق بس لاحظت على غرفتي مرتبة وسريري مرتب ,,, رفعت حواجبي مستغرب خلود ماعمرها رتبت غرفتي ,,, جلست على السرير وانا تعبان شوي ودخلت علي امي امي بفرح = اشتئتلك كتير حبيبي ,,, ليش ماجيت تتغدا معنا ,,, بدكياني احطلك اكل هلأ انا بحزن = مابي منك شي سكت امي شوي وبعدها راحت وسكرت الباب وجلست بجنبي على السرير امي بصوت باكي = قسوتك معي عم يئتلني ,,, خالد واللهي لا ليلي ليل ولا نهاري نهار عم ابكي بدل الدمع دم عليكون سكت عنها ومارديت امي = خالد صدئني انا كل يوم بئول لاحمد بدي اشوف اولادي بس هوا دايم بيئول بعدين بعدين ,,, ولما جينا للسعودي بالشرئية طلبت منو مليون مرة اني اشوفكون ولو من بعيد لبعيد بس كان عنا مشكلة السكن ولهلأ مالئينا سكن ,, السكن بالدمام اسعارها مرتفعه وبالاخير سكنا مع واحد صاحبو هوا ومرتو انا بسخرية = تصطفلي منك إلوه سكت امي شوي بعدها غطت وجهها بيديها وبكت ابكي يمه ياما حنا بكينا مدري كم مر على امي وهي على هالحال انا = علمتك خلود براي بموضوع زواجها .؟ حاولت امي تهدا شوي وبعد محاولات ردت علي امي بحزن = ليه مابدكياها تتزوج محمد ,,, محمد شب منيح حرام تفوت عليها فرصة هيك انا = رايك مو مهم امي بصوت باكي = ليش خالد انا إمها ( وبكت ) انا = والام تترك بنتها سنة كامله امي بصراخ = ليش مابدك تفهم ليش انا = يمة ردي على ام محمد وقولي لهم راي امي = شو ذنبها خلود من شان ترفض هيك شب منيح انا = يكون بعلمك تقدم لها واحد غير محمد واحسن منه بعد وانا رافضه امي بصدمة = شو ,,, مين ,,, وليه رافضو كمان .؟ انا = كذا مزاج امي بصوت باكي = خالد حرام عليك اختك شو ذنبها يضيع مستئبلها هيك انا = خلود اجتماعية واهتمامها فينا خلا الناس يعجبون فيها يعني مستقبلها ماراح يضيع ان شاء الله امي = ولن انا بضيق = يمه ردي على الناس وبس امي = فهمني ليه ,, ش انا بعصبية = ردي على الناس وبس امي بحزن = مثل مابدك تؤبرني ,, المهم رضاك علي ,, واختك إلها الله التفت لامي انا بحزن = يمه انتي ماتعرفين خلود ,,, ماتعرفينها اكثر مني ,,, يمه خلود محرومة وتبي بأي طريقة ترتاح مني وتعيش حياتها ماقدرت امنع دموعي ورميت نفسي بحضن امي ابكي الهم ,,, ابكي الحرمان انا بصوت باكي = يمه انا تعبان مر وقت لين هديت وبعدها طلعت من الغرفة بعد ماجبت لامي التلفون عشان تتصل على ام محمد وجلست بالصالة الي كان فيها النذل يتفرج على التلفزيون احمد = شو وين قناة سوريا .؟ انا = مشفره وان شاء الله اشفرك انت التفت لي احمد = خالد هاي الشقة ملك والا مستاجرها انا = مالك دخل احمد = الصراحة انتو يالسعودين مايصعب عليكون شي ,,, كيف ئدرت تشتريها .؟ انا بعصبية = ياخي انت تفهم والا ماتفهم ,,, قلتلك مالك دخل يالتيس سكت وعيونه تدور على الشقة الاثنين طوال النهار وانا اكد خارج وداخل المدينة ومارجعت الا العشا دخلت الشقة ودخلت المطبخ عشان اشرب ماء ولقيت خلود بالمطبخ خلود = خالد امي تس ودفعتها بيدي قبل تكمل كلامها انا بعصبية = ابعدي عن وجهي وفتحت الثلاجة وشربت ماء وطلعت من المطبخ ,,, وعيون خلود تتبعني وساكته جلست بالصالة وانا محتار مدري وشلون ارد على ابو عبدالله براي ,,, اروح له لبيته والا اتصل فيه ,,, ياربي منحرج منه ,,, اخاف يزعل مني وهو بمثابة ابوي واعزه والا اروح له بالمسجد ,,, لا وش بالمسجد فيه احد يتكلم بمواضيع مثل هذي بالمسجد والا اخلي احمد يرد عليه ,,, عشان اذا زعل ابو عبدالله تجي الفلعة على احمد اف والله مدري وش اسوي ,,, طيب اتصل وش اقول ,,, ولدك معه السرطان ,,, والا اقول خلود موافقة على الزواج بأي احد عشان تشتري لي سيارة والا اقول له خلود موافقه عشان تشتري لاب توب ( تنهدت ) حسبي الله على الي اخترع الاب توب بس ,,, لو اعرف منهو ,,, كان علقته بالمروحه واشغلها على اعلى شي واخليه يفر يفر يفر لين يدوخ عشان مرة ثانية مايخترع شي دخل احمد الشقة جاي من برا احمد = شو جيت انا بعصبية = وانت كل ماشفتني قلت شو جيت ,,, وانت وش عليك جيت والا رح وسكت فجأة ,, صح هذا وشلون دخل الشقة بدون مايطق الباب انا مستغرب = هيه انت تعال ,, كيف دخلت الشقة من دون ماتطق الباب احمد = بالمفتاح شو يعني انا مستغرب = من وين لك المفتاح احمد = افوت واطلع زي مابدي انا بصراخ = على كيف ابوك هو احمد بسخرية = لأه على كيفي انا ( وجلس على الكنب ) انا بعصبية = انت مو تقول بتاخذون يومين بس ,,, اشوفك طولت ,,, السبت والاحد والاثنين ثلاث ايام مروا عليكم احمد = وغيرت راي بمزاجي ,,, بدنا نطول اكتر ,,, شو مابدك إمك تبئى معكون انا = امي حياها الله بس انت لا حياك الله ,,, هات المفتاح ,,, الشرهة مو عليك الشرهة على الي عطاك المفتاح احمد بغرور = شئة امكون شئتي ,,, وعم افكر نسكن هون احسن ,, هو*** الاجارات غالية كتير قمت معصب انا = نعم .؟ احمد برود = أي الشئة حلوة كتير صح ضيئة وصغيرة بس حلوة ,,, واذا كان على شغلي ,,, انا مدرس انجليزي والمدارس الاهلية هون كتير عصبت اكثر بروده وهجمت عليه وحاولت اخذ المفتاح منه |
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ( غموض ماسامي ) | عشيرة اليوتشيها | أرشيف المواضيع الغير مكتمله او المكرره او المنقوله و المخالفه | 2 | 03-15-2013 12:37 PM |
| ((غموض خالد)) | احساس مصرقع | قصص قصيرة | 65 | 08-06-2010 10:55 PM |
| غموض الحب- | العنيد1985 | أرشيف المواضيع الغير مكتمله او المكرره او المنقوله و المخالفه | 6 | 11-07-2009 09:51 PM |
| الاصفر اناقه -غموض-وكبرياء | غادةالكاميل | حواء ~ | 25 | 10-18-2009 09:17 PM |
العرض العادي
