|
| |||||||
| أرشيف المواضيع الغير مكتمله او المكرره او المنقوله و المخالفه هنا توضع المواضيع الغير مكتملة او المكرره في المنتدى او المنقوله من مواقع اخرى دون تصرف ناقلها او المواضيع المخالفه. |
| | LinkBack | أدوات الموضوع | انواع عرض الموضوع |
|
#61
11-08-2011, 06:32 AM
| ||
| | ||
| مدري هي فاهمه ان خالد مغمى عليه والا تحسبه نايم والا متعودة على هالوضع ,,, بس البنت خايفة مني انا مرتبك = احم ,,, آآآ ,,, رولا ,,, خ ,,, خالد نايم ,, روحي ادخلي داخل ( ومديت يدي لها ابي ابعدها بس هي صاحت باعلى صوتها ) رولا وهي تبكي = خالد ( وانكمشت على نفسها بجنب اخوها وهي لاصقه فيه وماسكه ذراعه بقوة خايفة مني ) انا لله وش هالبلشة ,,, انا وش الي جابني ,,, انا متربك = رولا بس بس اسكتي ,,, ماني بقايل شي بس اسكتي وش اسوي الحين اتصل على ابو عبدالله ,,, مو حلوة اقعد بيته لحالي واهله داخل ,,, المشكلة يحسب خالد صاحي ,,, شسوات انسحب واطلع بسكات والا وش اسوي ,,, التفت لخالد ,,, الي مو حاس باحد ,,,مغمض عيونه كنه نايم وراسه مايل لجهتي انحنيت عليه وحطيت يدي على خده ,,, يالله حار ,, شاب ضو ,,, حرارته مرتفعه المشكلة ابو عبدالله توه طالع وانا بيت الناس ,,, لو اطلع احسن فتحت باب الملحق ابطلع بس لحظة ,,, خالد وقف معي باحلك الضروف اقوم انسحب من عنده كني عامل عمله ,,, المفروض اوديه للمسشفى ,,, اهله اذا شافوا حرارته مرتفعه بيظنون انها حرارة عادية ,,, وخالد تعبان مرة ومحتاج عملية مستعجلة ,,, مو حلوة بحقي اتركه وانا عارف وش عنده المشكلة مافيه احد اقوله يساعدني يشيله معي ,, لازم نوديه للمستشفى ويسوي العملية باسرع وقت ,,, حرارته مرتفعه مرة ,,, واكيد خاله على باله تعبان تعب عادي مايدري المسكين عن حقيقة تعبه ,,, ياربي شسوي فايز مالي الا فايز ,, هو الوحيد الي يدري ,,, ابتصل عليه يشيله معي سكرت باب الملحق والتفت على رولا هالنشبة انا = رولا روحي داخل يله داسه وجهها بذراع اخوها وتبكي تنهدت ليت رولين هنا ,,, يقدر الواحد يتفاهم معها وتسمع الكلام مو مثل هذي اخاف امد يدي وتصيح باعلى صوتها رجعت للسري ومديت يدي بحذر احاول اطمنها اول ماحطيت يدي على شعرها وهي تصيح رولا = خالد ,,, ماما ( وحطت يدها على صدر اخوها ومسكت فنيلته وقعدت تهزه بقوة ويدها الثانية ماسكه ذراعه ) خالد قوم انا خايفة قوم ابتعدت شوي عن السرير ,, واتصلت على فايز ,,, شوي ورد انا بضيق = الو ,,, فايز فايز = هلا خالد انا = فايز يرحم والديك تعال ,,, خالد اغمى عليه وحرارته مرتفعه مرة وابو عبدالله ماهو موجود ,,, تعال شيله معي فايز = وانتوا وين .؟ انا = انا بيت ابو عبدالله تعال فايز = بس انا ماني قريب ,,,, اصبر ابتصل على ابراهيم انا = لا فاي بس سكر قبل اكمل ,,,, اذا وداه ابراهيم معي للمستشفى اكيد بيدري عن مرض خالد تنهدت ,,, مو مهم ,,, الى متى يعني الكتمان التفت لخالد ورولا ولقيت النشبة مغطيه وجهها بصدر اخوها وتبكي مسكينه تدور الامان بواحد مغمى عليه ومايدري عنها شسوات الحين مابيها تشوفنا وحنا نشيل اخوها قدامها انا = رولا خالد نايم ,,, روحي داخل مغطيه وجهها وتبكي ,, اضربها هذي واخليها صدق تخاف مني والا وش اسويبها رجعت للسري وجلست ,,, انا = رولا ترا بكف الحين روحي لماما يله رفعت راسها تشوف وجه خالد وهي تبكي رولا = خالد ( وحطت يدها الصغيرة على خد اخوها ولفت وجهه لها ) خالد قوم ( واول ما ابعدت يدها عن خده مال وجهه مرة ثانية ,,, ويوم شافت مارد عليها غطت وجهها على صدره وبكت اكثر ) تنهدت ,,, كسرت خاطري رولا فجأة رن جوالي ,,, القيت نظرة عليه ( ابراهيم يتصل بك ) اخيرا انا = الوه ,,, ابراهيم تعال ابراهيم = انا عند الباب ,,, شسالفة مافهمني فاي سكرت بوجهه ,,, ورحت ركض لباب ال رجعنا انا وابراهيم للملحق ورولا على وضعها اشوا ان الي معي ابراهيم ماهو صالح والا خافت منا اكثر رحت لها ولقيتها متشبثه برقبة خالد وتبكي ماباليد حيله لازم ابعدها عنه غصب ,,, صاحت والا ماصاحت شلتها بالقوة وبصعوبة فكيت يديها عن رقبته وطلعتها بالحوش واول مانزلتها بالارض وهي تحط رجلها وتدخل البيت رجعت لابراهيم بسرعة اخاف تجي ام خالد والا عمة صالح ونبتلش اكثر شلنا خالد وركبناه بسيارة ابراهيم بمكان الراكب وانطلق ابراهيم مسرع الظهر كنا انا وابراهيم بالمستشفى بعد ماشافه الدكتور ,,, والمشكلة الدكتور الي فحصه اليوم هو نفسه الدكتور الي كذبت عليه وقلت ان خالد اخوي ,,, وابراهيم من يوم عرف عن مرض خالد من الدكتور وهو يهاوشني عشان ماعلمناه طوال هالمدة مادري وش فيهم علي كله يهاوشوني انا ,,, كأني انا سبب المرض اول شي هاوشني الدكتور الي بالرياض وبعدين الدكتور هذا والحين ابراهيم ابراهيم بعصبية = وانا أخر من يعلم ,,, كل يوم معكم ليه ماعلمتوني ,, وبعدين وش معنى يعلمك انت ولا يعلمني انا ,,, مع اني كل يوم اسأله واخر شي مايعلم الا انت رن جوالي والقيت نظره عليه ( امي تتصل بك ) طنشت ابراهيم وقمت مبتعد عن ابراهيم عشان ارد على امي انا = هلا امي = خالد وينك تأخرت من طلعتك الصبح لهلأ ماجيت انا بتنهيدة = يمه تغدوا لا تحتروني ,,, خالد تعبان وانا الحين عنده بالمستشفى امي = اوه ,, ربي يشفيه ويئومو بالسلامة سكرت عن امي ورجعت لابراهيم رن جوالي مرة ثانية والقيت نظرة عليه ( ابو عبدالله يتصل بك ) اوه هذا ثالث مرة يتصل علي من يوم شلنا خالد ,, اكيد رولا علمتهم ,,, توكلت على الله ورديت عليه وعلمته ان خالد بالمستشفى وسكرت عنه وانا متضايق الحين بيجي ويعرف عن مرض خالد ,,, بس احسن خله يعرف يمكن يقدر يلين راس خالد اليابس ويقنعه يتعالج ,,, الغبي انتشر المرض بجسمه ,, ومن سنه وهو كاتم الخبر الى متى يعني ,, مدري وش السبب الي خلاه يكتم المرض عن اهله خالد غريب وغامض عجزت افهم عليه ولأني مابي اشوف ابو عبدالله ,,, طلعنا انا وابراهيم من المستشفى بعد مامرينا الدكتور مرة ثانية يطمنا على خالد بس الدكتور ماطمنا ,,, حالته خطره والمرض متأخر معه واصر علي اوقع موافقة على العملية بالاخير اضطريت اعترف له اني ماني اخوه وخاله بعد بيجي بعد يومين يوم الخميس اليومين الي راحوا ماقدرت امر خالد ,,, اهله مسنترين عنده بكل اوقات الزيارة كنت اتصل عليه واخذ اخباره بالجوال ,,, صوته مايبشر بخير متضايق انه اهله عرفوا ,,, تعبان نفسي وجسدي صالح يقول ابو عبدالله من يوم عرف عن مرض خالد لا ليله ليل ولا نهاره نهار وام خالد اشد ,,, والصراحة ماشفت أعند من خالد ,,, الى الحين رافض العملية بس مع الحاح امه وخاله رضى بالكيماوي ,,, وامس قالي ان صبح الخميس الي هو اليوم بياخذ اول جرعه لازم ازوره ودي اشوفه واتطمن اتصلت على صالح اسأله عن اهل خالد هم بيزورونه العصر والا لا ,,, وعلمني ان الصباح لاهله والعصر للي ب يزوره العصر رحت للمستشفى وصعدت الدور الثالث رايح لغرفته ,, بس شد انتباهي رجال اول مرة اشوفه جالس على الكراسي قدام الغرفة وكأن كل هموم الدنيا على راسه ,,, منزل راسه وحاطه بين يديه وجالس بشكل حزين ,,, غريب ليش جالس قدام الغرفة ,, ياما يدخل والا يروح ,,, صدق ناس غريبة دخلت على خالد ولقيت عنده ابو عبدالله ومحمد وابوه ابو عبدالله جالس على كرسي ويمسح على شعر خالد ويكلمه بصوت واطي سلمت على الموجودين وانحنيت على خالد اسلم عليه بس تفاجأت بعيونه حمر كأنه توه باكي وجه احمر ,,, انا مستغرب = كيف حالك .؟ ( وسلمت على خده ) مارد علي ,,, يجاهد دمعته وساكت ابو عبدالله بحزن = الي تبيه بيصير ياولدي المهم راحتك ماني فاهم شي ,,, التفت لمحمد ابيه يفهمني ,,, بس لقيته يطالع خالد وساكت ابو محمد = الرجال يحتري وتوه جاي من سفر رفع خالد يده يمسح دمعته الي نزلت خالد بصوت باكي = يرجع من حيث ماجا ,,,, مابي اشوفه محمد = ابوك اول ماجا مطار الرياض على طول لمطار القصيم ومن المطار جا للمستشفى على طول من دون حتى مايرتاح ,,, كله يبي يشوفك فرحت ابو خالد هنا ,,, زين والله ,,, اخيرا ترك تجارته وحس بولده خالد بصراخ = مابي اشوفه مابي اشوفه ( وتكتف كنه بردان وهمس ) آآآآه جسمي ينهشني ,,, تعبان ,,, آآآآه التفت محمد لبو عبدالله محمد = خلاص عمي خله الحين ,,, اليوم ماخذ كيماوي وتعبان رحت لمحمد وهمست باذنه انا = شسالفة .؟ قرب محمد راسه مني وهمس محمد = ابو خالد دخل قبل شوي بس خالد ماخلاه يسلم عليه لين طلعه الدكتور ,, ومن اليوم حنا نحاول بخالد يسمح لبوه يشوفه ,,, خالد مجنون رسمي اها شكله فاتني ,, كنت اتمنى اشوف ابوه ابو محمد = خالد الله يصلحك ت خالد بصوت باكي = مابي اسمع شي ,,, خلوه يرجع ,,, عشر سنين وهو ماعمره سأل عني ,,, توه يسأل توه يذكرني ( وبكى ) رجعت لسريره وحطيت يدي على راسه انا = خلك احسن من خالد بصراخ = خلوني بحالي ,,, مابي اشوف احد طلعنا من عنده وابو عبدالله يالله يمشي من همه استغربت من الرجال الي شفته قبل ادخل على خالد ,, الى الحين على وضعه ويوم شافنا وهو يقوم ويتوجه لنا = هاه طمنوني ابو محمد = اذكر الله = لا إله إلا الله ,,, طمنوني ياجماعة الخير محمد = اصبر عليه ان شاء الله يلين ويسمحلك تدخل التفت لابو عبدالله = ولدي يابو عبدالله ,,, ليه ماعلمتوني الا الحين ,,, وحيدي ماحد رد عليه قطبت حواجبي مستنكر ,,, معقول هذا ابو خالد .؟ = انا وش سويت ,,, ليه مايبي يشوفني ,, اول ماعلمتوني خليت الي بيدي وجيت ,,, ابي ادخل عليه ابي اشوفه ابو محمد = استهد بالله ,,, الولد تعبان اكيد بتشوفه بس اصبر عليه شوي جلس الرجال على الكرسي بحزن وحط راسه بين يديه = ليه مايبي يشوفني ابو عبدالله بحزن = انت السبب يابو خالد ,,, من يوم خالد صغير وهو يشكيلي من غيابك عنه ,,, سفراتك الي ماتنتهي اشغلتك عن ولدك رفع ابو خالد راسه لابو عبدالله ابو خالد = وانا اشتغل لمن ,,, له ولاخواته ,,,, هذا جزاي يابو عبدالله ( والتفت لبو محمد ) انا اتعب واشقى لمن ياجماعة الخير ,,, اخر شي جزاي ولدي يطردني ( ونزل راسه وغطى وجه بشماغه ) توكلت على الله وتدخلت انا = كره خالد لك بسبب مدير عيادتك الامريكي يابو خالد رفع ابو خالد لي وعيونه حمر انا = انا خوي خالد واعرف عنه اكثر منك ,,, ولدك يابو خالد عاش ايام سودا من تحت وينلي ,,, الامريكي الي وثقت فيه وحملت ولدك حمل اثقل منه ابو عبدالله مستغرب = وشلون يعني علمتهم بكل شي ,,, وعلمتهم عن موضوع البراميل وعن تهديدات وينلي لخالد وعن المخالفات و المخالفين وماخلصت من كلامي والا وابو خالد دموعه على خده ندمان ابو خالد = اطرده واسفره واي شي يبيه خالد مني ابسوي انا = وش عقبه ,,, خالد يقولي انك تصدق وينلي وتكذبه ابو خالد = ماكذبته ,,, اتلانتس عارف شغله مادريت انه مبهذل ولدي من وراي انا = تخلص منه وريح ولدك ابو خالد = ابسوي كل الي يبيه خالد بس ابي اشوفه ابي اشوف ولدي ,,, ابوديه لاحسن المستشفيات ويتعالج عند احسن الاطباء لو اخسر تجارتي وحلالي المهم خالد مايضيع مني ابتسمت وهذا ياخالد مشكلة وينلي وانحلت بكلمة من ابوك ,,, الله يهديك ياما قلتلك كلم ابوك بس عنادك وانشغال ابوك عنك من يوم كنت صغير كرهك بابوك ثنيناتهم غلطانين استاذنتهم ودخلت على خالد ابشره التفت خالد لي اول ماشافني دخلت انا بمزح = ماش انا لزقه مامني فكه تطردني وارجع وجلست بكرسي ابو عبدالله خالد بتعب = جسمي ينهشني ,,, الكيماوي تعبني ماريحني انا بابتسامة = ابو خلّود ابشرك وينلي الله خلصك منه خالد بألم = آآآه ( يحك في جسمه بألم وبعدها التفت لي بتعب ) وشلون .؟ انا = المهم ان الله خلصك منه ان شاء الله مو مهم وشلون سكت خالد وهو يطالعني مستغرب وبعدها طالع السقف خالد بتنهيدة = كنت اعاند يوم عرفت ان ناصر وينلي طمعانين بالعيادة والحين انمسك ناصر ,,, وينلي ابسفره حتى لو بلغ علي عن المخالفين ,,, العيادة الحين مابيها ,, ابرجعها لبوي والا وشوله ارجعها هي بترجع من كيفها انا بعصبية = خالد تعوذ من الشيطان ,,, وان شاء الله تقوم بالسلامة خالد بألم = امي ياخالد ,,, امي وخالي كنت كاتم مرضي عشانهم ,,, م ( وسكت يجاهد دمعته ) انا بحزن = خالد ان شاء الله بتشافى وابوك مستعد يوديك لاحسن المستشفيات وتعالج خالد بتعب = ندمان ,,, ندمان اني ماحفظت القرآن ,,, ضاع عمري بالعب والاغاني والمغازل ,,, وبعد ماتبت انشغلت بالمشاكل ,,, ندمان ليتني حفظت انا = الوقت قدامك احفظ ,,, ان شاء الله بتشافى وتصير إمام مسجد بعد ,,, لا تيأس مد يده واخذ جواله ,,, ضغطه شوي وبعده مده لي يوريني اخذته منه وشفته فاتح على الفيديو الي شفته قبل كذا ( الفيديو الي كان خالد يرقص مع شباب ) خالد بصوت باكي = هذا انا يوم كنت بصحتي ,,, ماعرفت الله بالرخاء ,, كنت لاهي ( وبكى ) انا بألم = خالد هذا بلاء ,, الله اذا احب عبدا ابتلاه ,,, لا تيأس خالد وهو يبكي = خالد طلبتك انا = آمر ياغالي بالي اقدر عليه خالد = المحل ابكتبه باسمك اصرف على اخوانك الايتام منه تكفى ,,, عسى الله ينفعني به بعد مماتي ( وزاد بكاه ) انصدمت ,,, سكت مدري وش اقول ,,, خالد شكله مايبشر بخير ,,, حاولت اتمالك نفسي انا بحزن = ان شاء بتقوم بالسلامة وتتابع المحل معي ,,, تراني مالي غنا عنك ,,, خل عن خالد بصوت باكي = تكفى خالد طلبتك ,,, الكل بينساني اذا مت مثل مانساني ابوي وانا حي ,,, خذ المحل واصرف على اخوانك منه تكفى ابيه ينفعني اب ( وبكى ) انا بصوت باكي = ماراح اردك ( وسكت شوي ) بس سامح ابوك عطه فرصه خالد = انا ميت ميت من وين اعطيه فرصه ,,, ابوي توه يتذكرني .؟ اذن المغرب وخالد رافض يسامح ابوه ,,, او يمكن سامحه بقلبه بس مايبي يشوفه ,,, بعد 3 اسابيع بدت المدارس من اسبوعين واحمد توظف باحدى المدارس الاهلية وخالد طوال الثلاث اسابيع وهو بالمستشفى واهله الى الحين مارجعوا للرياض ,,, بعد أخر زيارة تعب خالد بعد اول جرعه وارتفعت حرارته وصارت ممنوعة الزيارة عنه باستثناء ام خالد لكن سمحله الدكتور باستخدام الجوال وطوال الثلاث اسابيع اخذ اخباره بالجوال بس ,,, خالد = مليت ابي اطلع ,, ثلاث اسابيع وانا محبوس هنا انا = استجيب مع الدكتور وان شاء الله تطلع ,,,, انت مشكلتك نفسيتك خالد بتنهيده = تدري وشلون ,,, شكلي ابطلع من المستشفى على مسؤوليتي انا = انهبلت انت ,,, الدكتور مانع الزيارة عنك عشان مناعتك ضعيفة ,,, والحين بتطلع ,,, صدق انك ثور خالد = اف ابتسمت يا انا مشتاق له ,,, مشتاق لطلعاتنا ,,, مشتاق لسهراتنا ,, فعلا اف متى يطلعونه من المستشفى اما ابو خالد بعد منع الزيارة عن خالد راح للرياض يصفي الحساب مع وينلي وانا مستانس انه ابوه بدا يحس فيه |
|
#62
11-08-2011, 06:33 AM
| ||
| | ||
| بعد يومين الثلاثاء اليوم بالمدرسة اتصلت على خالد بس مارد ,,, اتصلت مرة ثانية ولا رد جا الظهر وانا مستمر بالاتصال عليه بس مايرد غريب امس بعد اتصلت عليه ولا رد واليوم نفس الشي وين راح هذا ,,, خالد طوال الاسابيع الثلاث كل ما اتصل عليه يقول طفشان من حبس المستشفى وده يطلع,,, ودايما اتصل عليه بالجوال اسليه العصر وانا جالس بالصالة مع امي جاني اتصال من رقم غريب انا = هلا = خالد .؟ انا = نعم معك خالد = انا ابو خالد تركي تفاجأت ,,, متصل علي انا ,,, ليش انا مستغرب = هلا ابو خالد ابو خالد = انت تقول تعرف عن خالد اكثر واحد ,,, ماعمر خالد قالك وش المخالفات الي يقول عنها اتلانتس .؟ مافهمت شي انا مستغرب = شسالفة يابو خالد .؟ ابو خالد = انت مو تقول تعرف عن خالد كل شي .؟ ,, اتلانتس ماسك على خالد اشياء يقول راح يضر ولدي اذا طردته انا ,,, وش الاشياء الي ماسكها على خالد .؟ علمني عشان اعرف اتصرف شكل وينلي هذا والله اعلم انه كان يشتغل بسجن ابو غريب تهديداته كلها تهديدات نفسية ,,, وش الاشياء الي ماسكها انا متأكد انه ماهو ماسك شي,,, البراميل وافتكينا منها ,,, اكيد يكذب اكيد هذا كله تخويف بس ابو خالد = الو انا = هلا معك ,,, طيب طردته والا لا .؟ ابو خالد = ماقدرت اطرده خفت على خالد منه ,,, اسألك انا الحين وش المخالفات الي يقصدها ,,, علمني عشان اعرف اتصرف انا = والله يابو خالد مافيه الا سالفة البراميل وانتهينا منها ,,, اطرده ماعليك منه هذا كله تهديد عشان يخوفكم ابو خالد = اكيد .؟ بس اتلانتس يقول بيبلغ على ولدي وانا خايف عليه انا = علمك وش المخالفات .؟ ابو خالد = لا ,,, عيا يعلم انا = خلاص اجل ,,, اكيد كل تهديداته كذب ,,, اطرده وتخلصوا منه سكرت عنه وانا متضايق من هالنشبة وينلي ,,, اعوذ بالله خلاص الناس استغنوا عن خدماتك ,,, ناشب لهم ليش امي = مين هاد .؟ انا = هذا اب ورن جوالي مرة ثانية رنه وحدة وانقطع فتحته ولقيته من ابراهيم ابتسمت شكله اتصل علي بالغلط التفت لامي انا = ايه اقولك ه ورن جوالي مرة ثانية رنة وحدة وانقطع ,, فتحته ونفس الشي من ابراهيم استغربت وش فيه ذا مطفر ويبيني اتصل عليه والا وش ,, اتصلت عليه بس مارد ,, اتصلت مرة ثانية ولا رد عصبت هالحمار شكله فاضي امي = شو فيه خالد مين هاد الي عم يتصل عليك .؟ انا = ابراهيموه شكله فاضي ,,, شوي و جتني رساله بجوالي وفتحتها ولقيتها من ابراهيم ,,, قريت الرسالة وشهقت بقوة منصدم ,,, بغى قلبي يوقف من الصدمة وش ,,, عدت قراية الرسالة مرة ثانية ( خالد يطلبك الحل ) ارتعشت يدي وصارت انفاسي سريعه انا بصوت باكي = لا ,,, مو معقول امي بخوف = شوفيك خالد ,,, شوفيك عدت اقرا الرسالة مرة ثانية ,,, لا اكيد ابراهيم غلطان ( خالد يطلبك الحل ) انا بصدمة = خالد ( وتجمعت الدموع بعيوني والتفت لامي ) يمه خ ( وسكت ماقدرت اكمل ) امي مستغربه = شو .؟ طلعت دموعي وانا اعيد الرسالة ( خالد يطلبك الحل ) خافت امي واخذت الجوال مني وقرته قمت وطلعت من الشقة بسرعة ورحت للمستشفى ,,, يكذب ابراهيم يكذب قبل امس مكلم خالد ,,, انا متأكد ,,, لا مو معقول ,,, انا فقدت ابوي الي احس بالامان معه مابي افقد خالد الي هو الثاني يحسني بالامان ابراهيم اكيد غلطان ,,, ايه غلطان ,,, اصلا ابو خالد توه مكلمني وصوته عادي ,,, ايه ايه صح ,,, يمكن انا ماقريت الرسالة زين دخلت يدي بجيبي ادور جوالي بس مالقيته ,, صح اثرني نسيته بالشقة ,,, لا لا ابراهيم غلطان خالد مكلمني قبل امس ,,, صح صوته كان تعبان ,,, بس ماستغربت من صوته ,,, خالد دايم تعبان من يوم عرفته وهو تعبان رحت للدور الثالث لغرفة خالد ,,, وقف منصدم ,, لقيت صالح وابراهيم وابو محمد واقفين قدام الغرفة وجيهم ماتبشر بخير ,,, التفت لي ابراهيم المتلثم بشماغه وجا عندي ابراهيم وصوته متغير = خالد ودعنا من نص ساعة ,,, حاولت اكلمك بس عجزت وارسلتلك رسالة ,,, رح سلم عليه قبل يحطونه بالثلاج ( وبكى ) طالعته احاول ادور الكذب بعيونه بس هو بنفسه يبكي التفت لصالح المتلثم وجالس على الكرسي بجنب ابوه ,,, لا كذب خالد حي رحت مسرع لغرفته ودخلتها ولقيت ابو عبدالله جالس على الكرسي ومغطي وجهه بشماغه ويبكي التفت بخوف لخالد بس لقيته مغطى بالكامل بشرشف المستشفى الابيض ,,, شهقت ,,, لا رحت وكشفت الحاف عنه ,,, وشهقت طيرت عيوني بوجهه الي تحول للون ازرق خفيف ,,, ملامحه مافيها حياه ,,, وين ابتسامته ,,, وين أنينه الي دايم اسمعها منه ,,, انا = خالد مديت يدي ومسكت اكتافه بس ابعدتها بسرعة وبخوف ,,, بارد ,,, معقول ,,, لا لا اكيد المكيف بارد ,,, خالد مامات مديت يدي الي ترتعش وحطيتها على صدره الكاشف ,,, دموعي غطت عني الرؤية ,, بارد ,,, ليه ,,, انا بصوت باكي = خالد قم ,,, لا تخليني ,, لمن تبيني اشكي ,,, خلك معي مسكت اكتافه وهزيته انا بصوت باكي = خالد مارد علي انحنيت عليه وضميته لصدري بقوة وبكيت انا = خالد بعد ماتعودت عليك تروح ,,, ليش جيت من الرياض ليش ,,, ليش خليتني اتعرف عليك ,,, ليش عودتني عليك ليش ,,, رفعت راسي اطالع وجهه ,, كنه نايم بس بدون نفس بدون أثر للحياة ,,, مديت يدي وضربت خده انا = لا خالد ,,, محتاجك ,,, لا تسوي مثل ابوي وتخليني مارد علي ,,, ليش مايرد ,,, معقول ,,, آآآه ياخالد غطيت وجهي بوجهه البارد وانا ارص صدره بصدري انا = لا ياغالي لا تخليني ( وبكيت اكثر ) حسيت بيد على ظهري ابو محمد = اذكر الله وادعله بالرحمة سلمت على خده وخده الثاني وضميته مرة ثانية وانا ابكي جو ممرضين يبون ينقولنه ابو محمد = خالد الي تسويه ماهو زين ,,, ادعله بالرحمة ,,, وخر عنه خلهم يحطونه بالثلاجة لين يجي ابوه انا بألم = لا ,, خلوه ,,, خالد مايبي ابوه ( ورصيته بين يدي اكثر ,,, مابي افقده ,,, لا ) وخروني عنه غصب وانا اشوفهم يغطونه مرة ثانية وطلعوني انا و ابو عبدالله من الغرفة شفت صالح الى الحين جالس على كرسيه انا بصوت باكي = ارتحت الحين ,,, هذا هو خالد ترك بيت عمتك لك ,,, اشبع فيه وجلست على الارض ابكي اليتم مرة ثانية خالد اخوي ,,, اخوي الي وقف معي ,,, عمي وهو عمي تركني ,, مالي غيرك ياغالي آآآآآه جت ممرضة ومعها اغراضه وعطته ابو محمد وراحت تذكرت كلمته (هذا انا يوم كنت بصحتي ,,, ماعرفت الله بالرخاء ,, كنت لاهي ) جواله فيه الفيديو ,, مابي احد يشوفه ويسبه قمت وطلبت الجوال من ابو محمد ,,, استغرب بس ماعارض ابو محمد مستغرب = زي ماتبي ,,, حنا والله الى الحين ماوصلنا الخبر لابوه لا تجيب طاريه قدامي يابو محمد تكفى ,,, سكت عنه واخذت الجوال جلست على الكرسي بحزن جا فايز ومحمد وابو فايز ,,, وسلموا على خالد وراحو يواسون ابو عبدالله الي حالته ماتسر لا صديق ولا عدو اذن العشا وانا بالمستشفى وجوال خالد بيدي ,, جالس قدام ثلاجة الاموات ماني مصدق مابي اطلع بدون خالد ,,, تذكرت اول موقف بيني وبينه ((()))((())) انا = بأي سنه تدرس .؟ التفت لي خالد = بثالث ثانوي ,,, مع السلامة ودخل بيت خاله ,,, استغربت وش فيه ذا ,,, معقول زعل لأني اخذت اخواني منه يوّلي ,,, مو مرتاحله اصلا ((()))((())) آآآآه مارتحت لواحد كثرك ياغالي ,,, ليش رحت وخليتي قمت وانا الدنيا مسودة بعيوني ,,, وطلعت من المستشفى ومواقفه كل شوي تمر بالي ((()))((())) انا بحزن = مشكور خالد قسم بالله ماستاهلك ,,, انا اردك وانت توقف معي خالد = اول شي انا وعدتك من زمان اني اساعدك بالتجارة ,, ثاني شي انت معذور بردك لي ,,, وماحد يقدر يلومك ,,, وماحد يبي يرمل اخته بعز شبابها ,, انا لو اني بمكانك وجاني واحد يخطب اختي وانا اعرف انه عنده السرطان ,,, رديته وشتّه برا بيتي بعد ,,, انت على الاقل ماشتّني ( وابتسم ) انا بصدق = قسم بالله ماراح القى لاختي واحد احسن منك ابتسم خالد برضى خالد بابتسامة = تسلم ((()))((())) بكيت ,,, ياليتني فرّحت قلبك دخلت الشقة ودمعتي مانشفت كل يوم اذكر موقف معه لقيت احمد وامي جالسين بالصالة وسلمى بحضن امي ,,, اول ماشافتني امي وهي تقوم امي = خالد خوفتني عليك انا بصوت باكي = يمه خالد راح احمد = ادعيلو هوا هلأ محتاج لدعواتنا تذكرت كلمة خالد ( المحل ابكتبه باسمك اصرف على اخوانك الايتام منه تكفى ,,, عسى الله ينفعني به بعد مماتي ) بكيت اكثر ,,, يبي المحل صدقة جارية له وهذا هو مات قبل يسوي الي يبيه ويكتب المحل باسمي فعلا خالد محتاج لدعواتنا ,,, خالد محتاج لشي ينفعه بعد موته ,,, واخذه الموت قبل يسوي أي شي رحت لغرفتي وانا اجر رجولي جر ولقيت سالم منبطح على سريره ويبكي رفع راسه اول ماشافني وقعد يطالعني وهو يبكي ,,, جلست على سريري بحزن ,,, راح ياسالم راح جاني سالم وقف قدامي سالم وهو يبكي = امي تقول خالد مات ,,, ابي خالد ( وارتمي بحضني ) ضميته زي ماكان يضمه خالد ,,, راح ياسالم ,,, راح الحنون ,,, راح الي يحن عليك اكثر مني ,,, انا ماعمري ضميتكم بصدري ,,, هو ضمكم اكثر مني الاربعاء جت الساعة 10 وانا جالس على سريري ومنزل راسي على ركبي واتذكر خالد امي = خلص خالد ,, ئطعت ئلبي عليك ,,, ادعولو بالرحمة ,, انته ماكلت شي من انبارح رفعت راسي لامي انا بحزن = ماشتهي ,, يمه تكفين خليني بحالي امي بتنهيدة = مدري شو صارلكون حتى اخواتك مو راضين يهدوا ,,, انا ابعرف انو كان الله يرحمو وئف معكون كتير بس مو هيك تساو بنفسكون مارديت عليها وقفت امي شوي و طلعت طاحت عيني على جواله ,,, مديت يدي واخذته ,,, انا مافتحته من يوم اخذته من ابو محمد لقيت مكالمات لم يرد عليها ,, فتحتها وكان اكثر الاتصالات مني ,,, امس وقبل امس كنت اتصل عليه ومايرد ,, مادريت انه ماراح يرد علي للابد ولقيت مكالمات من رنا ومن مامي ومن ابراهيم بس اكثر المكالمات التي لم يرد عليها مني ,,, آآآه اشتقت لك فتحت الاستديو ولقيت فيدو كنت ناسيه ,, وابتسمت على الذكرى خالد مصورني فيديو يوم كنا بعرفة شفت نفسي على قمة جبل عرفة وخالد مصورني من اسفل الجبل وسمعت نفسي اسأله من فوق انا = وش تسوي .؟ وسمعت صوته بالفيديو يرد علي خالد = انقز ابصورك فيديو آآآآه يازين صوته ,,, له وقع ثاني ,,, ماكان يشدني صوته بهالشكل ,,, الحين صوته حلو ,, سمعت نفسي ارد عليه من فوق وانا اضحك انا = هههههههههههه وش بيفيدني تصويرك اذا تكسرت وشفت نفسي اختفي من فوق الجبل ,,, سمعته صوته الحلو مرة ثانية خالد = ماش مانقز ابتسمت ,,, وقتها يوم كنت بعرفة ماسمعته يقول هالكلمة ,,, شفت خالد يكمل تصوير شوي وانقطع الفيديو آآآآه ياغلاتك عدت الفيديو ابي اسمع صوته ,, وارسلت الفيديو لجوالي رحت لفيديو يومنه يرقص مع الشباب وارسلته لجوالي ومسحت الفيديو من جواله ,,, جواله اكيد بيرجع لاهله مابيهم يشوفون هالمقطع وشفت فيديو ثالث ماعمري شفته بس شكله توه جديد شفته يصور صالح فيديو شكله بغرفته وجالس على سريره ,, ما اشوف الا رجليه متمد ويصور صالح الي قاعد يفتش بطاولته معصب صالح بعصبية = وينه ,,, طلعه وينه سمعت صوت الغالي يكلم صالح وهو مروّق خالد = ماني معلمك التفت صالح للكامير معصب صالح بعصبية = وشوله قاعد تصور انت الحين ,,, علمني وين حطيته .؟ خالد = هه اصورك اثبات على جرايمك البشعه ,,, الحين وشوله تفتش بطاولتي قلتلك ماهو عندي صالح بصراخ = اخر مرة شفته معك خالد = انت تبي تهاوش وبس هذي غرفتي قدامك مافيها شي ,,, يله خذ راحتك ودوّر وانا ابصورك عشان اوريه خالي ويع شفت صالح يهجم عليه بس ماشفت وش صار بعدها ,,, طاح الجوال من على السرير وكل شي صار اسود شوي وانتهى المقطع ابتسمت بحزن ,, دايم يتهاوشون ,,, قطع علي رنين جوالي ,, القيت نظرة عليه ( صالح يتصل بك ) وش يبي هذا شكله مالقى احد يتهاوش معه واتصل علي انا بحزن = نعم سمعت صوته هادي صالح = الجنازة بتجي الساعة 11 اذا كنت تبي تشارك بتغسيله تعال بكيت ,,, جنازة .؟ بصعوبة تمالك نفسي ورديت انا بصوت باكي = ابجي الحين ارسلت الفيديو الاخير وكل صوره وصوري الي بجواله لجوالي طلعت من غرفتي وانا اجر رجولي جر ولقيت امي بالصالة وتحاول بسالم ياكل انا = يمه وين احمد .؟ امي = راح لدوامو تعال كول حبيبي انا = ماشتهي ,,, خليه يصلي بجامع ال .... ,,, ويحضر صلاة الجن ( وطلعت دموعي غصب ) الجنازة هزت امي راسها وسكت رحت للجامع الي فيه المغسله ولقيت هناك صالح واخوانه عدا محمد وابراهيم وماجد علمني صالح ان اهل خالد راحوا له اليوم وسلموا عليه بالمسشتفى وابوه الحين داخل بغرفة انتظار الرجال ينتظر جنازة ولده ,,, اما ابو عبدالله تعب عليهم وماقدر يجي مدري كم مر من وقت وحنا نحتري لين شفت محمد وفايز وسعد واحد رابع ماعرفه يشيلون خالد ويدخلونه المغسلة اصريت ادخل واغسله بنفسي انا بصوت باكي = كلها ساعة وانحرم من شوفته للابد انا ابدخل مع ابوه واغسله ,,, تكفون دخلت انا وابوه المغسلة ولقيت المغسل مجهز خالد المتمد على سرير غريب مستور العورة قربت منه وانا ابكي مديت يدي ومسحت على شعره انا بهمس = الدنيا مالها طعم من بعدك سمعت المغسل يعلمنا وش علينا نسوي وحنا نفذ ,,, وانا اسمع ابوه يبكي بصمت المغسل = حركوه حتى يلين شوي وبعدها نعصر بطنه بخفه ونصب عليه الماء نفذنا وانا عيني على الجرح القديم الي كان بصدره ,,, لا شعوريا مرت اصبعي على الجرح مثل ماكنت اسويه فيه دايم ( وتذكرت يوم يستنجد فيني وينادي باسمي ) المغسل = الحين ينجى ويوضئ كوضوئه للصلاة انتبهت على المغسل ,,, وابتعدت شوي عن ابوه ينفذ الكلام المغسل = الحين نغسل راسه برغوة السدر وجسمه بالسدر ثلاث مرات وفي الاخيرة نغسله بالكافور حتى يطرد الحشرات عنه نفذت هالمرة كلامه بمساعدة المغسل ودموعي على خدي ,, اشوف خالد بين يدي بلا حركة ,,, آآآه ياخالد ياما اغمى عليك وحركتك بين يدي لكن هالمرة صعب ,,, صعب ياخالد راح المغسل يجهز الكفن بسرير ثاني غريب ( ثلاث اكفان ) طيبها بالبخور وحط عليها الحنوط نقلنا خالد للسري الثاني ولفيناه بالكفن وابقينا وجهه لين يسلمون عليه الشباب انحنيت عليه وضميته بقوة انا بصوت باكي = خليتني اذوق اليتم مرة ثانية سلمت على خده وخده الثاني ورجعت اسلم مرة ثانية على خده ورصيته بصدري اكثر ابعدني المغسل عشان ابوه يسلم عليه شوي وجو الشباب سلم ابراهيم وفايز ومحمد والبقية اما صالح سمعته يكلمه وهو يسلم عليه صالح بصوت باكي = سامحني ( وضمه مرة ثانية ) صلينا عليه بعد صلاة الظهر وانا ادعي له من قلبي ربي يرحمه شفت ابو سامي بالجامع واحمد وابو عادل وفيصل ,, آآآه يافيصل خلاص راح خوينا وتركنا ,,, جاني فيصل وسلم علي وراح من دون أي كلمة شيعناه للمقبرة وهناك نزلت انا ومحمد لقبره وحطيناه بالحد ,,, سمعت محمد يقول محمد بهمس = بسم الله وعلى سنة رسول الله وقلت مثله بصعوبة ,,, وحطينا البن وطلعنا وبدا كل واحد يحث على قبره ثلاث حثيات انا بصوت باكي = يعني خلاص ,,, ماراح اشوفه ,,, ابيه من لي غي حسيت بيد على كتفي وانا جالس فايز = ادعله بالرحمة ,,, هو محتاجك الحين راحوا وانا بقيت جالس بمكاني ,,, حاول فيني ابراهيم نرجع بس مارديت عليه بالتالي جلس معي اخذت ساعة وانا ابكي عند قبره وادعي الله يثبته عند السؤال وصلني ابراهيم للشقة ودخلتها وانا كل شوي يرجع لي موقف مع خالد لقيت خلود وامي جالسين بالصالة طالعت خلود وانا ساكت وتذكرت كيف كانت ماتداني طاريه ((()))((())) خلود بصراخ = خالد خالد خالد ,,, متى نفتك من خالد هذا ,,, اف اذانا ,,, وصلت حتى تتهاوش مع شباب ,,, ولا ,,, يبون خالد مايبونك انت ,,, وش عليك منهم ان شاء الله يذبحونه ,,, انت لا تتدخل فيهم التفت لها معصب انا بعصبية = خالد وش اذاك فيه .؟ ,,, هو ماهو على راسك ,,, هذا بدل ماتدعين له يطلع من المستشفى بالسلامة تقولين ان شاء الله يذبحونه ,,, وفارقي عن وجهي تراها واصلة معي خلود بعصبية = ان شاء الله مايقوم ابد ,,, الله ياخذه ونفتك منه ((()))((())) انا بحزن = هذا هو ماقام ابد ياخلود رحت لغرفتي وجلست على سريري بتعب ,,, شوي ودخلت علي خلود حسيتها مترددة تبي تقول شي بس طلعت دموعها بصمت وطلعت من غرفتي من دون أي كلمة العصر رحت انا واحمد اعزي ابو عبدالله مع اني انا محتاج من يعزيني دخلت بيت ابو عبدالله وطاحت عيني على الملحق ,,, وماقدرت امسك نفسي وبكيت ياما سولفنا هنا وياما دخلت عنده ,,, دخلت المجلس وانحنيت اسلم على راس ابو عبدالله الجالس انا بصوت باكي = عظم الله اج ,,, أجرك مارد علي يبكي شفت ابو خالد جالس بحزن بس ماسلمت عليه ((()))((())) خالد بصوت باكي = يرجع من حيث ماجا ,,,, مابي اشوفه محمد = ابوك اول ماجا مطار الرياض سافر على طول لمطار القصيم ومن المطار جا للمستشفى على طول من دون حتى مايرتاح ,,, كله يبي يشوفك خالد بصراخ = مابي اشوفه مابي اشوفه ( وتكتف كنه بردان وهمس ) آآآآه جسمي ينهشني ,,, تعبان ,,, آآآآه ((()))((())) ماتحملت ابقى وطلعت من المجلس بعد ما ناديت صالح صالح = آمر انا بحزن = تكفى هاتلي رولا ورولين ابي اسلم عليهم استغرب بس ماعلق ,, صالح = الحين اقول لعمتي تجيبهم وقفت بالحوش احتريهم شوي وجا صالح ومعه رولين بس ,,, تأملتها ,, وجهها شاحب وعيونها حمرا كأنها توها باكيه و صالح = رولا عيت تجي التفت لصالح وانا اتذكر كلمة خالد ( رولا محرومة من حنان ابوها تبيني احرمها من حنان اخوها بعد ,,, جربت الحرمان ومابي اخواتي يجربونه ) جلست على ركبتي وضميت رولين لصدري انا بصوت باكي = انحرمت رولا من اخوها ,,, خالد اخوي راح ( وبكيت اكثر ) خلاني لحالي ابعدت رولين عني وطالعتها انا بصوت باكي = انا اخوك يارولين ,,, انا اسمي خالد يعني انا اخوك بعد صالح وصوته متغير = خالد قمت والتفت له بصمت صالح بحزن = خالد قال لامه يوم كانت الزيارة ممنوعه عنه انه يبي يكتب المحل باسمك ,,, قالتلي عمتي اوصلك الخبر وامه الحين مصره انك تقبل المحل ,,, بعد ماتهدا الامور تروحون وتحولونه لاسمك ( والتفت لرولين ومسك يدها وراح داخل البيت ) طلعت من البيت ورحت للمقبرة السلام عليكم دار قوم مؤمنين وإنا إن شاء الله بكم لاحقون جلست عند قبره وانا اتذكر مواقفه وطلعاتنا وتمشياتنا ومشاكله وحبه لاخواته ولاخواني ومزحه وضحكه وصراخه وهوشاته مديت يدي ومسحت على قبره انا = اشتقتلك ,,, الدنيا سودا من بعدك اذن المغرب وانا الى الحين عنده رجعت للشقة وانا اعيد الانشودة الي بجوالي ياصديقي عقب موتك دمعتي صارت عذاب مدري حزني محتويني او انا الي محتويه صرت اجاوب لسألوني كيف حالك يوم غاب دمعة(ن) تخنق عيوني وعبرة تصرخ ابيه كل شي(ن) حولي يسأل ينتظر رد الجواب حتى آهاتي تحيّر دمعتي تصرخ ب ليه يابلا قلبي ياليت القبر محفور(ن) باب افتحه لاضاق صدري وان تولهنا اجيه آه و آه وكل آهاتي مثل دمعي عذاب مدري حزني محتويني أو أنا الي محتويه *** تمت *** ( غموض خالد ) منقوول *** للكاتبة هدوئي *** |
|
#64
11-08-2011, 06:51 PM
| ||
| | ||
|
النهاية رووعة تسلمي وابنتظار البارت اللاول من الرواية الجديدة:wardah: 
__________________ أَخِلاَّءُ الرِّجَالِ هُمْ كَثِيرٌ وَلَكِنْ فِي البَلاَءِ هُمْقَلِيلُ فَلاَ تَغْرُرْكَ خُلَّةُ مَنْتُؤَاخِي فَمَا لَكَ عِنْدَ نَائِبَةٍخَلِيلُ وَكُلُّ أَخٍ يَقُولُ أَنَاوَفِيٌّ وَلَكِنْ لَيْسَ يَفْعَلُ مَايَقُولُ سِوَى خِلٍّ لَهُ حَسَبٌوَدِينٌ فَذَاكَ لِمَا يَقُولُ هُوَالفَعُولُ ادخل واطلب احلى التوقيعات مع و وردة:rose: http://vb.arabseyes.com/t279006.html |
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ( غموض ماسامي ) | عشيرة اليوتشيها | أرشيف المواضيع الغير مكتمله او المكرره او المنقوله و المخالفه | 2 | 03-15-2013 12:37 PM |
| ((غموض خالد)) | احساس مصرقع | قصص قصيرة | 65 | 08-06-2010 10:55 PM |
| غموض الحب- | العنيد1985 | أرشيف المواضيع الغير مكتمله او المكرره او المنقوله و المخالفه | 6 | 11-07-2009 09:51 PM |
| الاصفر اناقه -غموض-وكبرياء | غادةالكاميل | حواء ~ | 25 | 10-18-2009 09:17 PM |
.gif "Icons(7)")
العرض العادي
