|
| |||||||
| روايات و قصص بالعاميه قصص و روايات باللهجه العاميه |
| | LinkBack | أدوات الموضوع | انواع عرض الموضوع |
|
#26
08-10-2012, 06:17 PM
| ||
| | ||
| اسفرت...دخلت مناير على زفــة ( اسفرت)..بصوت راشد الـــماجد.. وبعد الزفه كان في قصيــده للعروسين..إلقاء خالد المريخي.. مها كانت تسمع كل حرف بكل هدوء لين وصلت لي بيت يقول فيــــه::: مبــروك لك يابدر هاذي البشاير عروسك مناير ملآك يسحر البشر والغريب انها مناير واسمها مناير.... كل من شاف عيونها ذاب و انبهـر.. بدت تعض شفايفها بقوه....تكتم اللي فيها..عشان تحاول تتحكم بدموعها وماتنزل وتخرب كل شي... لين حست بطعم غريب على لسانها... بدت الاضواء تشتعل مره ثانيه... حطت مها ايدها على شفايفهااا ... طعم غريب تستطعمه... واكتشفت اخيرا"...انها قست على نفسها دون ماتشعر..وجرحت شفايفهاا بقوه..ونزف دم بده يتسرب للسانها...وتستطعمه.. ....بس جرح قلبها كان اقوى حزتها.. قعدت العروس و حطوا اغنيه شيله...قاموا البنات رقصوووا.... قامت مهاا بخطووواتها الثابته....وقفت وسط الصاله....نزلت لي الأرض...وفصخت كعبهاا ... ورفعت ذيل نفنوفهااا...وبدت ترقص... كانت تهز جتوفها...وتتمايل بكل رقه ...وقربت من مناير...رقصت جدامها.. ودم ينزف من شفايفهاا....حست فيه بااارد ينزف.... بس كانت تدووور...وترقص......ولما خلصت الاغنيه....قعدت على الأرض...وعينها بعيوون مناير... مناير عفست ملامحها...منو هاذي؟؟. قربت فوزيه من مها اللي كانت قاعده وسط الصاله ع الارض...وجزء كبير من تسريحتها اخترب..ونازله خصلات على رقبتهاا.. ودم نازل لي تحت شفايفها بشووي....وكان جزء كبير من جسمها بااين...بما ان الفتحه اللي بنفنوفها كبيره حييل.. فوزيه: ...عسى ماشر..تحسين انج تعبانه؟ مها( كانت حاسه بدوخه مو قادره توقف على حيييلها...رفعت راسهاا حطت عينها بعين فووزيه...وبعدها مدت ايدها لها عشان ترفعها من الأرض....) فوزيه: قومي يمه قومي..اسمالله عليج قامت مهااا وبإيدها كعبهاا...اشرت حق فووزيه.. فوزيه: هلا؟..وين رايحه مها كانت تأشر على مناير... وهدت ايد فوزيه..وتقدمت بكل هدوء ...و صعدت فوق الكوشه...قربت من مناير...وباست خدهااا...ودمرتها بالدم اللي على شفاتها... مناير رفعت راسها مستغربه.. مها: مبروك .. ونظرتها تقول لمناير::: [روحي وأخذيـــه.. واهنيـــال قلبـــج فيــه.. احظنيــه.. نسيـــه حبي وطـــاريه..] مناير ( ماكان عندها اي رد بدت تطالعها بكل هدوء ).. نزلت مها..وقعدت.. بس هالمره يم دانــه.. اللي كانت لابسه نفنوف اصفر قصير... والمكياج كان اووفر ..عشان يغطي الكدمات دانه: فيج شي (( ماكانت عارفه منو هالبنت اللي يمها)) مها( هزت راسها :لأ) ========================================= شوق كانت داخل الشاور بوووكس تاخذ شااور بعد يوم حاافل بعدة مشااوير اهيا وريلها..تغدوا برااا و تسوقوا وقعدوا عند امه وبنهاية اليوم تعشوووا بجيليز .. خمس دقايق و لفت روحها بفوطه بيضه..وشعرهااا بفوطه صغيره.. فواز كان قاعد ع السرير وحاط الابتوب جدامه ....: نعيما" شوق: انت وبعدين معااك..قلنا محامي...ارحم عيووونك حبيبي فواز( يبتسم): طول اليوم مجابلج يالظالمه طمع طمع شوق: وانا يحق لي اطمع فيك مو رريلي حبيبي فواز : كلي لــج شوق: يلا سكر الابتوب فواز:دقايق قاعد اسيف شغلي (save) شوق:لالا الحين سكره ترا قمت اغار منه فواز: كا الحين بسكره ثواني... وتقوم شوووق و تسكر الابتوب و تقعد عليه...وافتلتت الفوطه.. فواز ( يضحك): يالبايخه شوق: انا بايخه...؟ فواز: احلى بايخه شوق: فواز احبك فواز: وانا امووت فييييييج شوق: فواز انا لما خطبتني ماكنت حاطه فبالي اني راح احبك بس الحين والله احبك فواز: وانا ماكنت اعرف عنج شي..واللي عرفته الحين..اني لو اتم طول عمري ادور..ماراح احصل وحده مثلج شوق: تحبني؟( بدلع) فواز: لا ماحبج ( بعبط)<<يحليله المثقف يعرف يعبط شوق: فواااز ماتحبنييي؟ فواز:لالالا اصلا" ما ابلعج آآنا شوق: قد هالكلمه؟ فواز: قدهاا( ويضحك بصوت عالي حاس ان شووق ناويه على شي).. كان متربع جدامها ..دزته لي وره ونامت فووقه وانواع البوكسات... طاحت فوطة شعرها...وكان مبلل ماي... فواز: شووق احبج شوق: اوش لا تتكلم فواز: والله احبج شوق: قلتلك اوش فواز حظنها حييييييييييييييييييييييل..حس انه اسعد انسان بهالوجوود... ================================================= ام بدر تقرب من فوزيه: يلا بيدخلون الرياااييل.. شوي...وقاموا الحريم وتستروا اللي يايه بعبايه لبست عبايتها..واللي لفت الشيله على راسها...تقريبا" صاروا 3 ارباع القاعه اسود بأسود..... قربت فوزيه من مناير و غطتها برداء ابيض خفيف... مها لبست العبايه اخر وحده..حتى انهم اعتقدوا انها ماراح تلبسهاا...قطت الشيله على رااسها..وكانت هاديه حييييييييل... ألف صلي وسلم عليك ياحبيب الله محمد كلولولولولوولوش... دخــلـ بــدر ..مبتسم..مثل اول يوم شافته مها..التعب اللي كان امسيطر على ملامحه زاال...وباين عليه مرتاح آآخر راحه...لاف البشت عليه...وابتسامته احلى مافيييييه....كان لما يبتسم مها تحس الدنيا كلهااا غيرررر...يتغير ويهه 180 درجه لماا يبتسم بـــدر..كان دايما يقول لها احب عيونج ..واهي تقوله تكفه ابتسم..... حست بقلبها بيطلع بره صدرها هالمره...وبضغط مو طبيعي بلباسها الداخلي...حست فجأه انها مضغوطه ..ودايخه....الميك أب كان كله مخترب طبعااا..كان تمسح ويهها بدون لا تبالي...بشكل الميك أب....بس تمت عيونها اهي عيونها..اللي ذلته..وذلت ألف غيره... كانت نظراتها ثااابته...صامده....مستسلمه... ودخلوا معااه مجموعه من الريااايييل..واخيرا" طاحت عينها بعين فيصل...اهو ماعرفهاا..بس اهيا عرفته اكيد....رآعي الصبوره.. ذاكرتها كانت عااطله حزتهاا..بس بصعوبه استرجعت الموقف [[[[ويقرب فيصل ويحط الصبوره بويه مها.... فيصل: بذمتكم شباب ماتشبهها؟ يوسف و عبدالعزيز بطوها ضحكــــ مها: عن الغلط و وخر يلا مناك فيصل: نفس الحلج...كا شووفوا ( ويحرك حلج الصبوووره) مها: بتووخر ولا شلون فيصل: وي حمقت صبورتي ..حمقت مها: اذلف زززين...قذر قطيعه...وخر ذبحتنا ريحتك فيصل يحط الصبوره على الارض..ويرفع تي شيرته و يشم نفسه.:: مافيني ريحه....بس شوي زفر بيدي... ويمش ايده بملابس مها مها: يااااقذرررر...( بصوت عاااااااااالي)]]]]] فيصل شاااب بشوووش نكته يضحك و يرفع عقاله فووووق..ويقرب يم واحد من الشباب و يتكلم معاه..ويضحكوون..كانت فيه طاقه مو طبيعيه يتنقل بالقاعه بشكل عجيب...يروح يبوس راااس امه...ويقرب يم اخته يصور معاها..ويكلم بدر....وبعدين نسف الغتره و وقف عشان صوره تجمع اهل المعرس و العروووس... مهااا للمره الألف تبتعد شفتها العليا عن السفلى..تعجب واستغرااب.. فيصل شيسوي هني؟؟؟!!!!! بس كل تركيزها كان على بدر. اللي صعد الكوشه و باس راس منايرررر..وقتها مها ماكانت قادره تتمالك اعصاابها.. مسكت ايدها حيل و ضغطت عليها بأضاافرها...كانت تقمت حرتها بكل الطرق..... بعدها طلعوا الرياااييل ..وتم بدر بروحه مع مناير.. شوي...ويحطون اغنيــــة.. (( والله و تحقق منـــايا ..شوفوا حبيبي معـــايا..)) وينقلون الدبل..من اليمين إلى اليساار.. وبعدها ياابوا العصيرر.. بدر كاان يبتسم ..راضي بالواقع ..بدا ينجذب لمناير..لأنها كبيره وراكزه وبعيده كل البعد عن الاحلام..بنت واقعيه بكل ماتحمله هالكلمه من معنى...عكس مهاا كانت حساسه شفافه رومانسيه مسيطره عليها الاحلام...وعمري ماراح اكون مع مها الا بالاحلام..ومناير الواقع اللي بتقبله واعيشه غصبن علي بعدها حطوا [ لــمني في مـــحجــر عيونــك حبيبي وخلـــني...].. قامت مناير وساعدوها الحريم عشان تنزل من الكوشــه.. ولما نزلت....وقفت وسط الصالـــه..وبدت تتمايـــل..بس بثقل... مها وقتها ابتسمت نص ابتسامه..مستهزءه او يمكن الغيره ذبحتها... وقتها بس عرفت....انها خلاص..لازم تنسى هالريال...وتمحيه من قلبها ...بدر ماضي..والماضي مستحيل يرجع..على كثر ماتمنيت ان الخبر مو صحيح وبدر لي آنا...لي آخر لحظه.....لكن والحين..وبعد ماشفته بعيوني معاها...مات آآخر امـــل...بس جانب آخر من عقلها يقووول..يطلقها..و قالت لهالجانب..اوووووووش.. وشالته من مخها نهائيا...خلاص الريال مايبيني..وكاهو متهني...والله يهنيه.. توها بدت تشعر بألم في شفاتها...لكنها تسلحت بجرأتها ...وتقدمت بخطواتها.... وقفت جدام بدر.....: مبروك بدر بدر كان يصور ما انتبه لها..وعادت كلامها مها: مبروك بدر بدر: ها ..هلا..الله يبارك فيج...صوره بعد مع دانه ( ويأشر للمصوره ويبتسم) !!!!!!!!!!!!!!!!!!!!!! مها انسكبت دمووعها بكل هدوء..وبدت تتلفت يمين ويساار..يا ناس هاذا بدر؟؟...هاذا بدر؟؟؟...اللي جدامي و واقف الحين..بدر!!!!..كلموني ردوا علي...تزاحمت الدموع بعيوونهاا..وبدااا جفنها ينصبغ بلون الدم... وكانت مو قادره تتنفس...حاسه بضيقه مو طبيعيه تشق صدرها شققققق هاذا انته.؟ اللي عشقته.. وش جرالك.. منته انته؟.. وينك انته؟؟.. وكل اللي قلته؟.. وين غرامك اللي اعتده.. هاذا إنته؟؟!!!!!!!!!.. الصدمه خلتها ماتنطق بغير..( الله لا يوفقــك حبيبي).. حبيبيّ!!!!.. اشفيني آآنا...ليلحين اقول انه حبيبي؟؟؟ طاحت شيلتهاا على جتفها.. انتي اللي يبتي لنفسج الذل كله هاذا يامها.. ولا انتي شيايبج..ليش ييتي.؟؟.. ليتني سمعت كلامج يايمه ليتني.. لأ ..زين اني يييت..عشان اقدر انساه.. نظراتهاا كانت غريبه نوعا" ما..وتتلفت ...خطوه..بعدها خطوه...ولما وصلت لي نص الصاله ..سمعت صوت ضحكــة بدر..إلتفتت لقته لام(حاظن) امه حيييييييل من ظهرها..والحضور يضحك... كان بدر يكلم مناير ...ويصورون ...ماكانت قادره تسمع شكان يقول من صوت الديجي.. بعدج يا مها واقفه...بتسمعين بدر شيقوول!!!...توكلي مها توكلي....قطيه ورا ظهرج..مثل ما اهو ورا ظهرج الحين... مشت بخطواتها الواثقه...وصار الحضور كلهم ورا ظهرها ..لأنها متجهه لباب الخروج....وطلعت مهاا..ولا احد سأل عنها.. ========================================= فواز نايم و شوق غافيه على صدره.. فواز: حياتي شوق: هـه ( كانت غافيه) فواز: بفتح مكتب شوق( شالت راسها وقربت منه): مكتب محاماه فواز: لا مكتب خدم شوق( تطقه على صدره): يلا عاد مو وقت غشمره فواز: اي خلاص شهادتي وعندي..اقدر افتح مكتب من حسابي الخاص شوق( ترد تحط راسها على صدره): ياحبيبي لازم تشتغل بالحكومه بعدين يصرحون لك تفتح مكتب..ولا ماتعرف القوانين يامحامي فواز: اح شلون طافتني شوق: نام حبي نام..انت قمت تحلم وانت قاعد فواز: ليش ماتشجعين شوق: ياحبيبي والله اشجعك بس لاحق ع المكتب انت الحين اشتغل بوظيفه حكوميه و راتبك راح يصير هاااااااااااااالكبر ( وقطت راسها على صدره حيييييييييل داااايخه مو قادره تتحكم بروحها) فواز: خلأص عمري نامي امبين انج حدج بره الخط شوق...غمضت عيونها... فواز: الله يخليج لي.. شوق ( حطت ايدها على شفايفه..) عشان يسكت وينام.. =============================================== دخلت مها البيت الساعه 12..شكلها كان معتفس حدددددده.. والآي شدو الاسود امغطي خدودهاا..تمت امبطله عيونها لي ال2 الفجر( الفير).....قامت بتصلي.... شافت ويهها بالمنظره..كان رعب... الكحل سايح واملطخ خدها....شفايفهاا منتفخه من تحت ..وفيها جرررح ناشف...توقف نزول الدم..بس تم العوار .. توضت للصلاة....وصلت ركعتيييين.. بعدها ردت لسريرها لقت مخدتهاا مدمره من مكياجهاا...حطت راسهاا... وغـــــــمــضــــت عــــيـــــــونـــــــــــهـــــــــا.. ======================================== مناير دخلت غرفة الفندق.....وبدر سكر الباااب حييييييييييل... قط الغتره و العقال....والقحفيه..والدشداشه... وفتح سحاب نفنوفها بــكــل هـــدوء.. ======================================= شرقت الشمس..... مناير حاطه راسها على صدر بدر... شكلها كان حيل اكبر منه...قربت منه حيل..دققت بملامحه....صغير بدر..صغيــر!!.. باست خده...ولمها....وكملت نوومتهاا.. بعد 4 ساعات ..الساعه 11ظهرا"... يدق تليفون بدر... خالد: بدر تعال لي انا تحت ابيك ضروري بدر: شفيك عسى ماشر(( مناير رفعت راسهاا اللي كانت حاطته على صدره..: خير حبيبي؟)) خالد: خير ..قوم بس وتعال.. بدر: يلا كاني الحين يااايــلك.. خالد: لاتطول.. وسكر التليفون مناير: حبيبي شصاير؟؟؟ بدر: علمي علمج لاتخافين دقايق وراد ( ويبوسها..) مناير: بنطرررررك( بدلع..) بدر غسل..ولبس دشداشه..ونزل تحت.. كان خالد واقفين يم رياييل لابسين دشاديش.. الريال: تفضل معانا بدر: خالد ..يبه فهمني شسالفه خالد: انا معاك لا تخاف.. بدر: خلني ابلغ الاهل بس الريال(مباحث): امش معانا مانبي نربك الناس في فندق مشهور مثل هاذا...ولاحق على الأهل بدر: ياخوي انا معرس امقعديني وماخذيني شتبون فيني الريال: بالمخفر تعرف شصاير.. بدر( يرفع موبايل): حبيبتي لاتحاتين انا ساعه وراد مناير: شنو شصاير وين رايح؟؟ بدر: بعدين افهمج.... |
|
#27
08-10-2012, 06:19 PM
| ||
| | ||
| البــارت 22 بدر( يرفع موبايل): حبيبتي لاتحاتين انا ساعه وراد مناير: شنو شصاير وين رايح؟؟ بدر: بعدين افهمج.... ============================================ المخفر...... الضابط: شنو علاقتك بكل من...عبدالعزيز..وفهد بدر: عبدالعزيز كان رفيجي..وفهد رفيج عبدالعزيز...اهو اللي عرفنا عليه خالد: نقدر نعرف شسالفه الضابط ( يكلم الشرطي): دخل عبدالعزيز ويدخل عبدالعزيز.. عبدالعزيز: اي ..هاذا اهو..هاذا بدر اللي ذبح فــهــد خالد: عبدالعزيز انت تدري ليش ذبحه بدر عبدالعزيز: تهاوشنا بلعبة القمار و ذبحاه..اي هاذا بدر اللي ذبح فهد الضابط: اسكت خلاص..لما أأذن لك تتحجى تكلم...بدر...الشاليه الواقع في بنيدر قطعه ,,,,,,,,,,,,,,,,,,,, شارع ,,,,,,,,,,,,,,,,,,,, رقم,,,,,,,,,,,,,,,,,,,,,,,,,,,,,,..بإسم الوالد...وصارت فيه جريمتين قتل ..وانت تدري مازال التحقيق فيهم بدر: عدل الضابط:جاشيم ( حارس الشاليه)..اهو المحبوس على ذمة هالقضيه وليلحين مافي حكم صادر بحقه ليلى..ماتت بعد الاعتداء الجنسي عليها..وماتت اثر طلقة نار من مسدس ....عيا  1بدر: وسؤالك؟ الضابط: ليلى ماتت على ايد عبدالعزيز..بس اللي بنعرفه..فهد شلون مات بدر: انا اللي ذبحته الضابط: سجل اقواله... بدر: دخلت الشاليـــه..في وقت متأخر..وقتها كان عمري 18 سنه ..وتوني قاص الليسن..دخلته انا و خالد..كنا ندري ان عبدالعزيز هناك..عبدالعزيز عرفناه من الدوانيه..الشباب عرفونا عليه...لقينا بنت عنده ...وكانت مو كويتيه حسب اللي عرفته من لهجته المضطربه..مزيج من مصري و كويتي...كانت مغتصبه...عبدالعزيز طلب منا نتستر على الموضوع ونشاركه بجريمته القذره...وبالخطأ ذبح عبدالعزيز البنت ولما حاول خالد يتدخل...فهد هاجمه..وتدخلت انا بسجين..طعنته في ظهره..وماحسيت فيه الا واهو جثه بين ايدي... =============================================== مها كانت نايمه العصر...وفجأه رن تليفونها... مها:: شوووق!!!! شوق: هلا حياااااااااااتي مشتاقلتلج مها: مشتاقتلي؟؟..شوق انتي اسبوعين ماتدرين عني..ادق ماتردين...شسالفتج؟ شوق: والله ياحياتي انتي ماتدرين عن شي باجر لي تزوجتي تعرفين المره المتزوجه مو مثل البنت مها: اها ...شلونج عساج مرتاحه ( بنفسيه لأانها تضايقت من كلام شوق..حيل تغيرت عليها..صج لي قالوا..كل متزوجه تتغير على رفيجاتها و خواتها) شوق: واي يامها لو اقعد اقولج شكثر انا مرتاحه ماح تصدقيني مها: عسى دوم انشالله شوق: المهم انا حبيت اتطمن عليج و اطمنج علي...سلميلي ع الوالده مها: يوصل شوق: يلا حبيبتي مع السلامه.. مها سكرت التليفون ....احلى صدمه!!..هاذي شوووق؟؟؟؟؟؟ جذي الزواج يسوي؟؟؟؟ الله واكبر.. الله واكبر عليج ياشووووق.. جذي تكلميني؟؟!! حطت راسها ع المخده وحاسته بينبط من الصدااع... ========================================= طافت الايام هااديــه... انقطعت اخبــار بدر وبالأصح ماكانت عارفه شصارله ..ماتدري انه في قضيه مرفووعــه عليه و الحكم ليلحين ماصدر... فيصل كان قاعد مع امـــه يوم اليمــعه العصر.. فيصل( يغمز حق امه عشان تقول حق ابوه انه ناوي يخطب) ام فيصل: هو شفيك تغومزلي قول تحج مامن غريب بو فيصل: ها يبه شناوي عليه بعد فيصل: يمه شقايلج انا لايكون نسيتي بلييييييييييه هاذا وانا قايلج انا ام فيصل: ايه ..أسكت بس ( وتأشر له يسكت..) مبارك ولدك بيعرس بو فيصل: شنو؟؟؟؟ فيصل ولدي بيتزوج...من بنته هاذي؟ ام فيصل: تعرف عايلة البرواز بو فيصل: عايله و النعم فيهم ..ايهم فيه..البرواز اللي صوب المنصوريه ولا اللي صوب الضاحيه فيصل ( يشق الحلج): لا يبه ..اللي بالمنصوريه بو فيصل: والنعم فيهم كلهم...بنت البرواز اهي؟ ام فيصل: والله يابو فيصل انا قاعده قعدة حريم قبل 3 ايام و يبت لهم طاري البنت..قالولي مزيونه وسنعه..وتدري فيه ..كلام ام ناصر مايتحرف..يعني البنت صج ماكو مثلها بو فيصل: شسم ابوها؟ فيصل: ها..يبه شدراني... بو فيصل: انت من وين عرفتها فيصل: يبه تصير اخت مرت رفيجي بو فيصل: لحظه يابوك خل اركز ..عيد ع البطيء فيصل: آنا يبه عندي رفيج اسمه عبدالرحمن ولد الضاحي.. بو فيصل: وصل فيصل: هاذا متزوج بو فيصل:وانا شكو فيه فيصل: اسمعني انزين يبه..المره اللي ابيها تصير اخت زوجته بو فيصل: وين شفتها انزين فيصل: رايح ازوره و شفتها وبنت مزيونه بنت حلال و خلوقه ومارفعت راسها جدامي بو فيصل: زين عيل يبه...دام جذي..هاذي الساعه المبارجه اللي نزوجك فيها و تنقلع عن ويوهها فيصل: اي يبه انقلع بس خل امي تخطبها لي اليوم ام فيصل: خلاص لا تحن ترا ينيت انا ..اسبوع ما ارتحت من حنتك...اليوم عقب الصلاة نروح نخطب فيصل: وربي انتي تهبلين عطيني خل ابوسج اهوووو ام فيصل: فيصل وثول سعبلت على خدي..قم يلا وخر فيصل: ولدج انا سعبولتي اهي نفسها سعبولتج الله يهداج..المهم ماعلينا ( يعدل العقال)..من وين بتييبون مهر المره.. بو فيصل: الحكومه تعطيك اربع وانا ازيدك اربع.. فيصل: والسكن يبه بو فيصل: يبه البيت فاضي مافيه احد الحين غيرك انت و نوره هالياهل...تقدرون تاخذون راحتكم..وانت بعد شهر بتتوظف ..تقدر تاخذ شقه اجار.. فيصل: وربي انت تهبل ..عطني خل ابوووس بو فيصل: فيصل ويهد وخر عني الله يغربل ابليسك... فيصل: يعني خلاص انا صرت معرس بو فيصل: انت مع ويهك وايد واثق من انها بتوافق فيصل: وليش ماتوافق انا ريال..وخوش ريال..شقردي...وعندي شهاده..مزيون و ماعندي سوالف خرابيط..واصلي بو فيصل: احلف انك تصلي فيصل: والله يبه اصلي بو فيصل: خلاص بسك قرقه الله يتممها على خير فيصل: يبه شصار على بدر بو فيصل: بعد شهر الحكم فيصل: بيييه والله ماسوت عليه منحوووس..من تزوج مانام عند مرته الا ليله وحده ام فيصل: استح الحين وقوم عن ويهي فيصل: انشالله يمه انشالله بس انتي يودي هاج ( يعطيها استكانة الجاي..ويقوم).. ========================================= ام جراح:يمه مها..قومي ابيج بسالفه مها( يمه خير ماشبعت نوم سكري الليت) ام جراح( تضحك ضحكة عيايز): قومي بقولج شغله تفرحج مها( ماظنتي تفرحني ..تشيل راسها من المخده...وتقعد و تطق على فخوذها حيل مالها خلق امها كلش): امري يمه شتبين (( متخدره وفيها النوم)) ام جراح: يااييينا حريم بعد شوي ..واظن ياييين خطبه..قومي تسنعي يمه مها( تحك راسها): بليييييييه انا قايلتلكم اني صغيره وبعدي..جم مره نقول يعني جم مره ( تتحجى بثقل جنها سكرانه) ام جراح: اختج تزوجت يوم كانت بعمرج..وكاهي الحمدلله متزوجه ومرتاحه..وانشالله كلها سنه و تتعالج وتييب درزن يهال(منال تعالج بما انها تأخرت بالحمل) مها: اي انشالله..يمه تكفين قدري اوضاعي راعي ظروفي فينييييييييييييييييييييي النوووووووووووووم ام جراح: بتقومين ولا شلوووووون مها( بثقل): شلووون ام جراح تشيل اللحاف عن مهاااااااا.. ================================================== = الساعه 6 المغرب.. ام جراح: حيالله من يانا..ياهلا ومرحبا.. فوزيه( تقولب بعيونها تطالع البيت...):ياهلا فيج ام جراح..شلون شلون صحتج ( داشه مستشفى الحبيبه) ام جراح: والله بخير عساج بخير... فوزيه كانوا معاها حريم ثنتين... قامت ام جراح وصبت لهم الجااي... فوزيه: والله ذبحنا هالغباار..مايمدينا نمسح و ننظف..الا واهو هاب علينا مره ثانيه ( خوش سالفه تتحجين فيها يعني مسولفه مع الويه) ام جراح: اي والله يا ام فيصل..بعد شنسوي تعودنا ام مصعب( تتدخل):تمرضنا بسبة هالجوو..بس شنسوي الله ياخذ والله يعطي يا ام جراح ام جراح: عدل كلامج ام ام مصعب: ام مصعب ام جراح: ياهلا والله ام فيصل: والله ياوخيتي لا نلف ولا ندور..ولدي فيصل توه راد من بره ..دارس ببريطانيا ..وانشالله كلها شهر و يتوظف...وحبيت اشوفله بنت الحلال اللي تستاهله و تسعده..ومالقيت انسب من بنتكم مها..ادب و اخلاق و سنع والله يخليها لج انشالله ام جراح: تسلمين يا ام فيصل...والله ان فيصل حسبت جراح اكثر من مره اشوفه ايي لعبدالرحمن ودش قلبي هالصبي الله يخليه لج انشالله..بس مها بعدها صغيره توها متخرجه من الثنويه..وانتي تدرين الزواج يلهي عن الدراسه ام فيصل: هذااك قبل يا ام جراح..الحين البنت صارت تدرس وبطنها هاااااااااااااللكبر ..خبرج تغير يا ام جراح تعالي شوفيهم بالجامعه شزينهم وشحلاتهم متزوجات و حمل بعد...صدقيني الزواج مايعطل ولا شي..كانا احنا درسنا و تزوجنا اشوف ماتعطل شي ام جراح: والله يا ام فيصل سديتي حلجي..كلامج صح والله..انا انشالله اشاور البنت واشوف رايها..وانشالله الله يكتب اللي فيه الخير.. ام مصعب: هو؟؟ ماراح نشوفها  ام جراح: لا الحين انشالله نازله...( ترفع حسها و تنادي..) مهاا..مهاا..يلا يمه تعالي.. دخلت مهاا....وصوت كعبها كان عالي...انسمع قبل لا تدخل الصاله...بيدها صينية العصير...فاله الشعر...ولابسه تنووره شيفووون ...وكان لبسها راقي حيل..كانت اكبر صدمه انها تشوووف فوزيه اهي اللي يايه تخطب...هاذي!! مو ام مناير زوجــة بدر!!!!!!!...توترت شوي ..قربت الصينيه ...و و زعت العصير..وبعدها حطتها ع الطاوله و قعدت...ورفعت خصله من شعرها كانت نازله على فيسها...وبدت تلعب بخاتمها متوتره و مستغربه..... ام فيصل: مشالله تبارك الرحمن...شزينها وشحلاتها..تقولين خليها تكمل دراستها..تبينها تضيع منا..لا يا ام جراح ..احنا نبيها لولدنا....الا يامها..مو جني شفتج بعرس بدر قبل اسبوع مها( ابتسمت بتوتر): اي خالتي...بدر رفيج جراح اخوي فوزيه: وي صج انه مايستحي..ما قال لنا..جان ع الاقل عرفنا نرحب فيكم...ياهلا ويامرحبا...بس جني شفتج يييتي بروحج؟ ام جراح: اي يا ام فيصل انا وقتها ارتفع عندي الضغط وماقدرت احضر بس بالمبارك عليييكم زواجه ( وبدت تتلفت مستغربه من هالصدفه....وعطتها صاروخ ..صج عيايييز بسرعه يألفون).. مها نزلت راسهاا...معقوله!!!..فيصل اهو اللي ياي يخطبني.... ام فيصل: طلباتكم يا ام جراح..جني اشوف الموافقه بعيون مها مها ابتسمت ...شكلها بتعيد نفس الحركه مع فيصل و مها.... ام جراح: لا اهي مستحيه شوي...عطونا فرصه وانشالله نرد لكم خبر ام فيصل: وي ليش تستحي كلنا حريم..مابينا ريال... ام جراح ( قاطعتها): اهي لازم تقعد مع الولد شوفه شرعيه وبعدها تقول رايها.... ام فيصل: اللي يريحكم..يلا سريناا.. مها قامت وقفت.... ========================================== مها لما صعدت غرفتهاااا ماتدري تستانس ولا تتضايق....ماتبي توافق على انسان ماتكن له اي مشااعر...عشان بس تغيض بدر..ولا تبي تخسر انسان شاريها...بدت مشاعرها تتضارب...واقوالها تتناقض مها: يمه انا ماقلتلج ما ابيه ام جراح: توج تقولين مابلعته مها: يمااااااااااااا خلاص انا اموافقه سكري الباب و طلعي بنام ام جراح: هاذا زواج يابنيه..تحجي عدل مو وقت غشمره مها: اي انا اموافقه شفيج..روحي بشريها ..عيوز النار ام جراح: استحي على ويهج هاذي بتصير خالتج مها: يماااااااا انا اموافقه ام جراح: صج زمن خايس قبل العروس تتخشش لما احد ايي يخطبها و ماتنطق بهالكلمه من الحيا.. مها: انتي طلبتي رايي..بليييييييييييه شقول يعني ام جراح: من السنع انج تسكتين وانا اقولج السكوت علامة الرضا وألمج مها( تشق الحلج): لا واللللللله..يلا كا انا الحين ساكته ام جراح: ماينفع معااج ( وتهفها بالمخده..وتضحك مها وتنزل خصلاتها على ويهها..وتقول اووووووووووف و تطير خصلاتهااا) ام جراح: والله وكبرتي يا مهاوي مها: اي حتى كا شووفي صرتي مره ( تتخصر بجسمها وتعرضه ) ام جراح: الحمدلله والشكر لك.. فاصخه الحيا ماكوووو منعدم الحيا بهالبنيه.. طلعت ام جراح تروح تبشر ابو جراح و ولده.. ومها هني لما اختلت بروحها..[ انا شسويت..اانا من صجي ابي فيصل هالخبل...بس الريال حبوب و عنده شهاده ....ليش ما ابلعه انا ليييييييييييش..بس اهوا ولد عم بدر...يعني اذا خذيته راح..لأالالالالا استغفر الله على هالتفكير الخااااايس..انا ابي فيصل لذاته..مو عشان بدر..بدر خيموت خل يحترق...ماقام يهمني .....قطت المخده فووووووق لين حاشت السقف..وبدت تضحك بخبال....] انتظروووا ال 23 |
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| الفتاة التي وقع الجميع بحبها بسبب جمالها وسحر عيونها | zainab12 | أرشيف المواضيع الغير مكتمله او المكرره او المنقوله و المخالفه | 25 | 06-20-2012 07:35 PM |
| ملحمة الخيانة =و ظلمتها .. ظلمت من طول عمرها احبتني و بدموع عيونها غسلت | ابتسم رغم الامي | قصائد منقوله من هنا وهناك | 1 | 10-11-2011 09:44 PM |
| حينما سقطة دمعه من عيونها | محمود محمد خضر | أرشيف المواضيع الغير مكتمله او المكرره او المنقوله و المخالفه | 22 | 10-09-2011 04:23 PM |
| رواية سحرتني عيونها/بقلم الكاتبه:][قمر مشتاقه][ | دلع بس بسنع | روايات و قصص بالعاميه | 66 | 11-08-2010 10:32 PM |
1Likes
العرض العادي
