رواية احلى ماخلق ربي - الصفحة 18 - عيون العرب

**دلع الغرور** · #86 08-17-2008, 12:18 AM

سوري صار غلط اخر رد مش محسوب

**دلع الغرور** · #87 08-17-2008, 12:19 AM

محمد:الليله كل عمامي راح يجون؟
نواف:اكيد كلهم..!!
محمد:حتى الحريم
نواف:من تقصد يعني؟
محمدآآآ لا بس ماقصد شيء
نواف فاهم الموضوع:وحتى عمي طلال وزوجته وعياله راح يجون
محمد:ايه هذا اهم شي..عاد ماوصيك يامرت اخوي الله الله بزوجة عمي طلال..
ريما:وش معنى هي بالذات؟ فيه عمتي نورة راح تجي وامي ؟<على نياتها
نواف:لا ياريما هو يقصد مايوصيك على بنت العم بس نسى وقال زوجة العم
ريما:اهااا.ابشر ولايهمك
محمد:ماشاء الله عليه اخوي فطين!!ذكي يفهمها وهي طايرة
ريما:قول ماشاء الله!!لاتنظلة
محمد:ماراح يجيه عين هذا
نواف:هيه اذكر الله
ريما:لا حرام عليك اذكر ربك..
نواف:بعدي يامرتي تخاف علي والله انك ذيبه
ريما:ههههه تسلم..
نواف:وانت اذكر الله
محمد:ماشاء الله تبارك الله لااله الا الله.ههههه حتى ريما طلعت تخاف من العين مثلك.. وافق شن طبقة
ريما:ههههههه
نواف:اقول لايكثر كلامك ادوختني
محمد:تدرون عاد نفسي في تشيز كيك!!الله اشتهيته..!!
نواف:تشيز كيك؟
محمد:ايه تشيز كيك..

**دلع الغرور** · #88 08-17-2008, 12:21 AM

نواف:اذا تبي روح لمحل "تشيز كيك فكتوري"
محمد:اللحين مسكر..طيب مافيه بالبيت؟
ريما:ماعتقد يامحمد..!!
نواف:اقول فكنا..بعد شوي راح يجوننا الناس وانت تشيز كيك!!
محمد:وش دخل الناس بالتشز كيك؟
ريما:ههههههههههه

جت ام نواف وجلست معاهم..
محمد:يامرحبا يامرحبا نورك غطى ع الكهربا
ام نواف:مهبول انت!!
محمد:ايه مهبول فيك يالغالية
ام نواف:اقول فكنا منك..
ريما:خالتي تبين شاي؟
ام نواف:أيه اذا ماعليك امر والله ابيه يعدل راسي
نواف:سلامتك يمة..فيك شي؟
ام نواف:لا والله..تعرف امك اذا صار عندها شي
نواف:في هذي معك حق هههههه

: : :

ريما كانت واقفة عند الدولاب (الكبت) محتارة ماتدري وش تلبس من كثر الفساتين الي عندها!!

طلعت واحد احمر قصير وفيه قصات مع تحت..وحطتة على السرير..وطلعت واحد ثاني اخضر وفيه شرايط من الستراس وتكسيرات من قدام..وحطت الثاني على السرير وقفت محتارة ماتدري أي واحد بتلبس..

دخل نواف عليها وشافها واقفة عند السرير وتطالع في الفساتين..ريما اول ماشافت نواف ابتسمت..
ريما:جابك الله..
نواف:سمي يالغلا
ريما:حبيبي وش رايك أي واحد يصلح البسه الليله؟
نواف:انتي لو تلسبين مادري أي شيء طلع حلو عليك..مقيولة احلى من العقد لباسه
ريما:تسلم وكله من ذوقك..
نواف:بلاش الرسميات ديه!!
ريما:ههههه والله موب رسيمات بس كذا طبعي تعودت...المهم نرجع حق موضوعنا أي واحد برآيك البسة؟
نواف:البسي الأخصر..لان الاحمر مايبلس الا لي..
ريما:ياسلام؟!!
نواف:قلت لك..الا حمر ممنوع تلبسينه تحت..بس فوق وحقي
ريما خلاص استحت من كلامه..!!وتبي تضيع السالفة
ريما:وين ثوبك وشماغك..؟
نواف:توهم الخدامات كوهم لي..
ريما راحت وطلعت الثوب والشماغ..ومسكت معاها مبخرة وبخرت ثوب نواف وشماغه!!

جلست تسوي ميك آب حق سهرات كان شكله رايق اخضر وذهبي..!! ورفعت شعرها من النص ومع تحت ملفوف وجهزت طقم ذهب فيه ياقوت بالاخضر كانت متناسق مع الفستان الي راح تلبسة

دخلت الغرفة الي تغير في ملابس..
ريما:نواف حبيبي تعال شوي..
نواف:هلا؟
ريما:ممكن تسكر الفستان مع وراء؟
نواف:ابشري..
نواف حط يده على خصرها..
ريما جلست تصرخ
نواف:هههههه وش فيك..
ريما:لا تكفى ماحب احد يلمس خصري..
نواف:ياسلام انا مو احد..انا نواف ياحرم نواف
ريما:سوري قلبي اكيد انت مو أي احد انت نواف الغالي
نواف:خلاص زعلت منك..

**دلع الغرور** · #89 08-17-2008, 12:24 AM

راح وجلس بالكنابات الي بالغرفة..راحت وجلست عنده تراضية..
ريما:مايهون علي زعل فوفو..!!وش يرضيك يابعد الدنيا
نواف:ابي امممممم ا11 بوسة؟
ريماوجهها احمر:اللحين؟
نواف:ايه..اللحين اللحين
ريما:بس حاطة روج..!!اخاف يطبع عليك!!هههههههه
نواف:هههههههه

نزلت ريما ونواف راح عند ابوه ومحمد في مجلس الرجال..وريما مع خالتها ام نواف..جت عمتها نورة والهنوف..ريما انبسطت لما شافتهم وسلمت عليهم بحرارة..وجت امها وجدتها هياء وخالتها ندى..ضمتها بقوة..وبعدهم جت ام عبد الرحمن ونوف..نوف لما شافت ريما على طول حضنتها وجلست تبكي..ريما تفاجأت من نوف وحركتها..
ريما:وش فيك نوفه حبيبتي؟
نوف:اشتقت لك بس
ريما:ماورى ال بس شي؟
نوف:لا ابد
ريما:خلاص بعد شوي راح اتفرغ لك..
ريما خافت ماتدري وش فيها نوف وليش هالكثر متضايقة وحست ان في فمها كلام وعيونها فيها حزن..!!

العمة نورة:وشلونها إيطاليا ياريما؟
ريما:والله ياعمتي خيال..
ام عبد الرحمن: عساكم رحتوا لفينيسا؟يمدحونها
ريما:أي والله رحنا لها..الصراحة جنان ذيك المدينة
ندى:والله ماتوقعت هالكثر بنفقدك ياريوم..
ريما:الله يسلمك وانا بعد فقدتكم
الهنوف:الله اكبر فقدتينا؟
العمة نورة:من شاف احبابه نسى اصحابه
ريما:هههههه حرام عليكم
ام ريما:والله ماصبر عنها كل يوم اكلمها حتى فهد هاوشني وقالي اتركي البنت مع زوجها
الجدة هياء:الله يوفقكم ويسعدكم
ريما:آمين يايمة
ام نواف:حي الله من جانا..مابرك من ريما الي جمعتنا اليوم
ام ريما:تسلمين ياعيوني
العمة نورة:الهنوف من الصبح يالله بسرعة تأخرنا آخر مابه فيصل عصب منها قال بتودينا لهم الصبح انتي؟ كله علشان ريما
ريما:ياحياتي والله ياهنو تعرف غلاتها مايحتاج..
ام عبد الرحمن: ماشاء الله ياريما فعلاً قمر من حظ نواف والله..
ريما تفشلت من كلام زوجة عمها
ام نواف:أي والله مو بس من حظ نواف الا من حظنا كلنا ريما بنت ولا كل البنات
ندى والهنوف يتهامسون:اكشخ بدت الكنة تغطي علينا
نوف كانت تضحك وتبتسم بس ماتكلم كثير
ندى:نوف وش فيك؟تعبانة؟
نوف:بس راسي يعورني
ام نواف:تبين بنادول؟
نوف:لا مشكورة..مايحتاج..
ريما حاسة ان نوف مو طبيعية..بس ساكتة ماحبت توضح لهم..!!
العمة نورة:شخبار تركي يام تركي؟
الجدة هياء:والله بخير..
الهنوف كانت منصتة للكلام الي ينقال عن تركي
الجدة هياء:نفسي ازوج هالولد وارتاح كل عيالي تطمنت عليهم الاهو..!!وكل ماقلت له شيء..يقول يصير خير..
ندى وريما بس يطالعون للهنوف مما سبب لها احراج كبير..
ام ريما:هههههه شكل ولدك يايمة حاط في باله وحدة
الجدة هياء:ليته على كذا والله لأروح واخطبها له..بس خليه يتكلم..
ندى:قريب راح يتكلم..ان شاء الله..
العمة نورة:الله يعين من هالشباب,,
ام نواف:أي والله يام فيصل اللحين محمد راح يسافر يدرس برى ويتركني..يالله مدري متى بيجتمعون عندي عيالي كل ماجاء واحد راح الثاني..
ام عبد الرحمن: ايه اشوف عبد الرحمن ولدي اليومين هذي نفسيته ماهيب مررة وحالته حالة كله علشان محمد..
ام ريما:والله مافيه خوف عليه ماشاء الله يام نواف محمد ولد متربي وخلوق مافيه خوف عليه بعون الله..
ام نواف: ان شاء الله!!

ريما(اها عرفت ليش نوف متضايقة..ياحياتي يانوف ..والله مسكينة كاتمة بقلبها كل ذا..انا لازم اتكلم معاها احس ان نفسها تتكلم مع احد..بس مو لاقية ..)

ريما:نوف تعالي شوي ابيك فوق..
ندى:يالله الهنوف خلينا نروح معاهم..
ريما:ياسلام انا ماقلت بنات..قلت نوف
الهنوف:واحنا حرام عليك ؟انا اقولكم من تزوجت نواف خربت
ريما:لبى قلب نواف!!
ندى:عيب عليك مو قدامنا هالكلام قوليه فوق
ريما:هههههههههه يالله نوف
نوف:لا بجلس هنا
ريما:اقولك قومي معاي..
نوف:لا معليش
ريما راحت وجرت يدها:يالله ماعندي انا..
نوف قامت:اوكي

صعدت ريما ويا نوف لجناحها..!!

**دلع الغرور** · #90 08-17-2008, 12:28 AM

الهنوف:غريبة وش فيهم؟
ندى:انا اقولك وش فيهم..نوف متضايقة..وريما بتخفف عنها..
الهنوف:نوف من ناحية متضايقة متضايقة مدري وش فيها؟
ندى:ترى ريما ماتحب تشوف احد متضايق لازم تحقق معاه وش فيك وليش ومتى
الهنوف:ههههههه وانتي الصادقة لازم تحقيق..

: : :

عند الرجال...
ابو عبد الرحمن:هاه نواف وشلون العرس؟
نواف:والله شيء..انصح العزاب يتزوجون
ابو نواف:هههههههه
ابو ريما: ماشاء الله يعني تبي تزوجهم؟
نواف:والله ياعمي الي يبي الراحة والدلال يتزوج
ابو عبد الرحمن:ههههههههه

الشباب كانوا جالسين في آخر المجلس...

عبد الرحمن:شباب شوفوا معاي صورة في الجوال وحدة تهبل عليها عيون تذبح وشعر وطول وجمال يقولون مطربة لبنانية
فيصل:شوقتنااااا وينها؟
محمد:والله حلوة ..
فيصل:وش حلوة الا تذبح
عبد الرحمن:ههههههههه انا تخبلت عليها صدق روعة..
فيصل:نواف وش فيك ماتطالع للصورة..ولايعني تزوجنا وكبرنا؟
نواف:ليش اطالع في الصورة وانا عندي بختصار ][ أحلى ماخلق ربي ][

: : :

في غرفة ريما..
ريما:نوف انتي مو طبيعية وش فيك؟
نوف:لا سلامتك مافيني شي
ريما:لاتكابرين..انا اعرفك وافهمك من عيونك..!!
نوف سكتت وكانت عيونها في الارض
ريما:علشانه راح يسافر؟
نوف من سمعت كلمة السفر حطت راسها بحضن ريما ونزلت دموعهاا..
نوف:انا محتاجة اتكلم مع احد ريما كنت انتظر متى تجين على نار..ابي افضفض لك ما ارتاح اتكلم لأحد غيرك..والله اعتبرك اختي الا ماجبتها امي
ريما:وانا بعد ابادلك نفس الشعور وانتي اختي الغالية ..تكلمي حبيبتي ريحي نفسك..
نوف: ياريما راح يسافر ويتركني..تخيلي بيجلس 8 سنين برى..وين الي يحبني؟الصراحة حسافة حبي له قبل
ريما:لا يانوف حرام عليك لاتظلمين الولد..
نوف:وش اظلمة ما اظلمة شوف عينك..راح يروح خلاص يعني تبيني انتظره 8 سنين؟مستحيل..!!!
ريما:محمد مخطط على شيء..بس انا مو فاهمة وش يدور في باله..!!بس خليك واثقة ان محمد يحبك ويبيك ماراح يتخلى عنك..!!اصبري انتي
نوف:بنصبر ونشوف..
ريما:وش رايك بانه اليوم كان يتكلم فيك..
نوف:صدق؟ وش قال؟
ريما:قال ياريما ماوصيك على بنت عمي..
نوف:احلفي..
ريما:والله لاتتسرعين نوفة...وبعدين انا جاية من السفر ابي اشوف الكل مبسوط ومستانس مو كذا عاقدة حواجك وطفشانة..يالله خلينا ننزل لهم تلاقين ندى والهنوف على اعصابهم..!!!
نوف:هههههه يالله خلينا ننزل
ريما:ايه هذا الكلام الصح..ابي اشوفك دايماً مبسوطة ولايهزك شي وانا اختك..

: : :

ابو ريما:مادامنا كلنا مجتمعين بعد بكرى الكل معزوم عندي بالمزرعة..بمناسبة جيت نواف وريما با لسلامة..
ابو نواف:كثر الله خيرك..
فيصل:عساك على القوة يابو ريما..
نواف:ماله داعي الكلافة ياعمي..
ابو ريما:افا والله يانواف انت وريما عيالي وان ماسويت العزيمة لكم لمين راح اسويها..!!؟
نواف:تسلم ياعمي
ابو عبدالرحمن:بس يابو ريما المزرعة بعيدة وراح يروح نص الوقت على الطريق..
ابو ريما:ومين يقول اننا بنجلس بس يوم..انا عازمكم الاربعاء والخميس والجمعة..نبيكم تباتون عندنا..ونبي ننبسط وهذي مثل ماقلت لنواف وريما..وش رايكم؟
ابو نواف:والله ياحلوها المزرعة وجوها..على بركة الله..الاربعاء الاربعاء..
ابو عبدالرحمن:اجل يهون الطريق اذا الدعوى فيها جلسة 3 ايام
محمد:والله انك شيء ياعمي ...المزرعة من زمان عنها..
ابو ريما:هههه اهم شيء تنبسط يامحمد..
عبدالرحمن:ايه مشتاقين لها بالحيل ..
ابو ريما:لا وازيدكم من الشعر بيت حطيت فيها دبابات علشانكم
عبد الرحمن ومحمد قاموا وباسوا راس ابوريما..
ابو ريما:ههههههههه لوانا داري انكم بتفرحون هالقد كان من زمان حاط فيها دبابات..
نواف:ياعيني على المصالح..!!
فيصل:وربي يفشلون حبة الراس علشان دباب
نواف:هههههههههههههه
فيصل:ههههههههه

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الكتب الممنوعة (قائمة)	اقبال	تحميل كتب مجانية, مراجع للتحميل	130	03-02-2009 10:38 PM
رأيي في رواية بنات الرياض بعيداً عن الوصاية الفكرية	hosam_e7e	قصص قصيرة	3	10-15-2007 10:10 PM
دروس(الدرس الأول ( علم الحديث رواية و دراية/ 1. علم الجرح و التعديل)	المشتاق لله	نور الإسلام -	9	08-29-2007 09:25 PM
علم الحديث رواية	omaymah	نور الإسلام -	4	04-17-2007 02:38 PM
بين رواية ( بنات الرياض ) .......ورواية ( بنات بيت حانون ) .........دعوة للمقارنة	الداعية	ختامه مسك	11	11-21-2006 02:31 AM