يوم كنت صغيره
كنت اقول متى أكبر
واصير مثلهم كبيره والبس
مثلها وأتزين واكشخ مثلها
كان كل همي أكبر
كل يوم اشوف طولي زاد ولامازال
المؤشر ماتغير
كل يوم اشكي لأمي
اني عايشه في حيره ليه الزمن
مايتحرك وأكبر بسرعه
كانت أمي تناظرني بأسى ودها تحكي
ولكن أكتفت بهز راسها
ياترى ليه كل هالأسى ؟
سألتها بس ماجاوبت كانت تقول لاكبرتي تعرفين
وأصرخ بوجهها يوووه متى أكبر؟؟
وتضحك علي تقول لاتستعجلين
ويمر يوم وبعده يوم وأنا انتظر
لاجا يوم ميلادي أطير من الفرح أنقضى من عمري عام ياسلام صرت أكبر
وأمي تضحك توشوش خالتي تقول ودها تكبر
وترد خالتي بكره تتمنى ترجع صغيره
واناضرهم بأستغراب ليه ماودهم أكبر ؟؟
ليه زعلانين لاكبرت عام ؟؟
بس انا ماعلي منهم ودي أكبر والبس واكـشـخ
وتمر سنه ورا سنه وأشوف حلمي يقترب
وكل مايمر عام وأكبر أنصدم في اللي تمنيته
انـصـدمـت القلوب قست والحب صار كذبات القوي ياكل الضعيف
والواسطه هي المتحكم الاول والأخير
والرشوه باب رزقٍ لايسد والحقد والحسد آفة الزمان المرير
آآه ليتني ظليت صغيره ..
توي عرفت نظرة امي وش معناتها
توي فهمت ليه حزنت يوم تمنيت اكبر .