|
| |||||||
| قصص قصيرة قصص قصيرة,قصه واقعيه قصيره,قصص رومانسية قصيرة. |
 |
| | LinkBack | أدوات الموضوع | انواع عرض الموضوع |
|
#6
10-22-2007, 09:53 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع وشو هي خطة جوري بالضبط؟! وليش هالخوف كله؟! وشو بيصير فالكليه فاليوم الثاني؟! وهل أم جوري بتوافق على سالفة المعسكر؟! تروا أحسن شيء لما يروحون المكان إلي مسمينه معسكررررررررررررر!!!!!
__________________ كل عام وانتم بألف ألف خير |
|
#7
10-22-2007, 09:55 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع مشكوره اختي على القصه وننتظر منك 00الباقيه
__________________ رحلة الألف ميل تبدأبخطوة متى وجدت الإرادة والصبر زالت الصعاب احسن وسيلة للتغلب على الصعاب اختراقها لانعرف قيمة مالدنيا حتى نخسرة ليس الفخر أن لانسقط بل أن ننهض كلما سقطنا |
|
#10
10-22-2007, 10:03 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع (الجزء الثاني) اف نفس الوقت اللي رقدت فيه جوري واستسلمت لأحلامها كان أبو جوري توه راد البيت ويشوف أم جوري: هلا والله بأم عيالي أم جوري: هلا ببو حامد أبو جوري: ماشالله توج راده من المعاريس أم جوري: هيه والله اسميه كان عرررررس صدق ربشه .. عقبال حامد وحروب وجوري أبو جوري: آآآمين .. هيه صح على طاري جوري بغيت أخبرج ب سالفه أم جوري: خير ان شاء الله؟ أبو جوري: الخير اف ويهج ... وخبرها سالفة المعكسر ام جوري: وانته شقا اتوافق على شي مثل هذا؟؟ أبو جوري: خلي البنت تستانس ... ما شفتيها شقا مستانسه ... الابتسامه شاقة الحلج وهذا غير انه محسوب من شغلها فالكليه (مسااااكييين ما يدرون عن خطة جوري) أم جوري: شو هالمنكر بعد! يكرفونهم حتى فالصيف! متى بشوف بنيتيه وبيلس وياها؟! أنا ما يخصنيه من ها كله !! تباني انفّد بنتيه؟!!!! جيه يايبينها ببلاش؟! اودرها فالسيح شهر كامل؟!!!! شو هالمنكر بو جوري: الله يهداج ... مب سايرين يلعبون هم .. وبعدين الكليه مسؤوله عنهم وانا بنفسي سألت عن كل شي وطمنوني يزاهم الله خير وما قصروا ... وقالولي انه بنكون على اتصال وياهم ... يعني ما بيسيرون مقطعه! ام جوري: وانا أتم آكل فوادي شهر كامل .. والله انه قلبي مب مطمن (سبحان الله قلب الأم) بو جوري: اطمني ... وانا باجر بنفسي بسير وبباشر الاجراءات وبحرّص عليهم .. بس عشان خاطري لا تنكدين عالبنيه ... ام جوري وهي متضيجه: ومتى بيسيرون؟ بوجوري: الخميس مب هذا .. اللي عقبه ام جوري: ويديه! خل تتنفس البنيه من الكليه عنبوه ... والسفره شو بتسويبها؟ بو جوري: لا امممرررة لا تحاتين ... اجلت السفره وخليتها ع شهر سبعه .. ها اطمنتي الحين؟ ام جوري: والله انته وبنتك مرتبين كل شي وانا آخر من يعلم! بو جوري: أفا عليج انتي بس! نحن انروم انسوي شي بلياج ( وابتسملها ابتسامه تشرح الخاطر ... اللي خلت ام جوري ترتاح وتسكت) أم جوري: ما ينرام لك وساروا الحجره عسب يرقدون ويرتاحون من تعب يوم حافل . . . اليوم الثاني الصبح جوري وصلت الكليه من وقت على غير المعتاد شلت شنطة اللابتوب وسيده ع الكلاس دخلت الكلاس وكانت منى موجوده وكمن بنيه من اللي يداومون من وقت كلهن بصوت واحد: جوري يايه من وقت؟!! مستحيل جوري: أيهاااااا !! اذا أتأخر ما يعيبكم .. واذا ايي من وقت ما يعيبكم !! مشاكل منى: بالعكس وناسه ... يلا تعالي يلسي جوري: محد يفهمني كثرج وشوي وتدخل مها: صباح الخير جوري ومنى: صباح النور البنات: لا اليوم شي مب طبيعي ... دوم حليلها منى اتم تترياكم .. واليوم الثلاثي المرح مجتمعين قبل ما يبدى الكلاس بنص ساعه شي غريييب! منى: لا حول ... لا اله الا الله من عيونكم جوري: شكلهن بنات كلاسج منوه ما بيخلونا نرمس قومن خل انسير برا ونرمس ع راحتنا مها: فرصه ... دوللي بعد بتتأخر اليوم ... يعني الكلاس الأول فاضيييين (دوللي مس من المسات اللي تدرسهم) جوري: ربشه! . . . (وطلعن برا عند الكراسي الخارجيه للمبنى) جوري: شو شعوركن؟ منى: انا بصراحه وايد متحرقصه ... البارحه اللي كنتي اتقولينه كان مجرد حلم واليوم استوى واقع مها: انا بعدني مب مصدقه جوري: ولا أنا بس خلونا من هذا كله نحن لازم نرسم الخطه من الحين وبأدق التفاصيل وانكون قد المسؤوليه... ترى هذا مب شي سهل ... وعسب نثبت ل Elaine انه نحن مب سايرات نلعب مها: هيه صج جوري: اوكي اسمعوني ... اليوم لازم انقرر جنسياتنا يوم بنكون هناك عسب انعرف شو ناخذ ويانا من ملابس ونتعود ع الرمسه مها: انا أظن أنسب شي حقي اني أكون أثيوبيه جوري: صح وانا بعد أشوف جي ... مها: ههههههههههههه شو قصدج؟!!! جوري: خخخخخخخخخخخ انتي ادرى منى: وانا؟ جوري: سيلانيه او هنديه؟! منى: هنديه اهون جوري: خلاص وانا بعد جوري: انزين من وين ناخذ الثياب؟ منى: أنا أعرف محل اف عيمان ... بتحصلون فيه كل اللي تبونه مها: عيل اوكي جوري: خلاص عيل فالويكيند بنلتقي وبنسير رباعه وبنشترى امممممممممممممممم صح ما خبرتكن؟! منى ومها: شو؟ جوري: اللغه اللي بنتكلم فيها هي الانجليزي لأنه ماشالله علينا مانعرف لا هندي ولا أثيوبي ف من اليوم بندرب نرمس انجليزي مكسر وعربي مكسر مها: ما أتخيل هههههههههههه ضحكن ويا بعض: ههههههههههههههه ورجعن الكلاس . . (أظن يا قراء عرفتوا بطلات قصتنا شو بيسوون ... اف هالشهر ... كل وحده منهن بتسير بيت ناس ما اتعرفهم واف امارة بعيده عن محل سكنها بحيث ما يصادفن حد من معارفهن ... وهذا باتفاق الكليه مع مكتب خدم .. وبتقدم نفسها على أساس انها خدامه مؤقته الين ما يحصلون خدامه دايمه من المكتب ... طبعا هالشي مب صعب خاصه مع مشكلة هروب الخادمات ... فكل أسرة اتعاني من هالمشكله ... بتضطر تقبل أي وحده الين ما توصل خدامتها ... والهدف من هالشي هو معايشة معاناة الخدم فالبيوت وكتابة ما يتعرضون له في حياتهم اليوميه وهذا غير المقالب اللي بتستويلهن كونهن مواطنات يعيشن هالتجربه .. خاصه انه مكتب الخدم وباتفاق مع الكليه بيعطي كل وحده منهن ورقه تفيد انها خاليه من الامراض وانها تجيد اعمال المنزل وانها مكمله دراستها وترطن انجليزي بس ضروفها الصعبه حدتها للقيام بمثل هالعمل... يعني خادمات ما يتفوتن صح ولا لا؟! طبعا هالشي سر ومحد يعرفه وأتمنى انكم ما اتخبرون حد .. وعد؟!) يمكن هالشي فيه خروج عن القانون .. بس صدقوني يستاهل المخاطره والله يعين بطلاتنا عاللي بيواجهنه اف هالشهر! يلا نرجع لقصتنا خلص اليوم الدراسي وكل وحده من بطلاتنا ردت بيتها بعد يوم شاق وممتع اف نفس الوقت . . . جوري وهي اتصف سيارتها فالباركينج المخصص لها فالبيت: يااي ما أتخيل انه الحلم بيتحقق ولأول مرة بعيش تجربه يديده وبعيش اف مكان ماعرفه وأحلى شي اني بعيش فالعين .. ياااااااااي ... اشكثر احب هالمدينه خاصه من عقب القصص اللي اقراها وردت سيتها على ورى وغمضت عيونها وهي تحلم بهالمغامرة الغريبه من نوعها وشوي ولا حارب يدخل سيارته فالباركينج ويشوف سيارة جوري ومستغرب انها شغاله يتحراها ناسيتنها كالعاده: لا حووول ويا هالبينيه مادري وين مخها تنزل من السياره وتنسى السويج داخل!!! ونزل من سياره وهومتأفف ويوم يتقرب من السياره يشوف حد داخل وتم يجرب راسه من الجامه لأنها مخفيه بس كان يبين انه حد داخل وكان يبا يتأكد وهو يقول افخاطره: طاع هاي!!! قلن الاماكن راقده فالسياره !! لا وشكلها مستانسه بعد !! الا ازيغها وجان يسير صوبها ويدق ع الجامه بالقو جااان اتفز جوري وتفتح الباب: ايييييييييييييييييييييييييييه زيغتني حرااام عليك والله بمووووت حارب وهو ناقع ضحك ع شكلها: انتي بتخبرج؟ ماعندج حجره ترقدين فيها؟! وااايد عايبنج شكلج جي؟! جنج سيلانيه مب مسحيه شعرها جوري افخاطرها: هههههههههههههه هيه والله .. أيام وبستوي صدق سيلانيه .. لا صدق بستوي هنديه وتضحك بصوت عالي ههههههههههههههههههههههههههه حارب وهو مستغرب: بسم الله عليج! شو يضحكج؟!! جوري وهي تنتبه لأخوها الفضولي: اففففف ماشي ماشي انته ماعندك شغله غيري!!! ياخي عرس و جابل حرمتك حارب: بصراحه كنت افكر فالموضوع بس غيرت رايي! لازم اطفربج عدل وعقب بفكر اعرس جوري وهي تطلع من سيارتها: حشى بلاهم شباب العايله مضربين عن الزواج الا خليفه احسنكم كلكم حارب وهو يمشي وياها جدا الفله: خل نستانس اف حياتنا قبل جوري: كل هذا وما استانستوا؟!!!! حامد 24 ساعه مسافر ويتحرى عمره صغير وانته وراشد دقيتوا 27 وبعدكم!! حارب: الحين انتي شو حارنج؟!!! جوري وهي تتطالعه وهي مستنكره سؤاله: اللي حارني اني ابا أكشخ ...! أبا أفصل فساتين ...! أبا أتخقق في اخواني! حارب وهو يطالعها من فوق لتحت: بس هاللي هامنج؟! تكشخين صدق انج سطحيه وما عندج سالفه جوري وهي مب مهتمه: سطحيه سطحيه عادي المهم استانس ودخلوا داخل الفله وهم يتناقرون أم حامد يالسه فالصاله: ما شالله يايين ويا بعض اليوم حارب وجوري يحبون امهم على راسها جوري: هذا حارب يلعوزني حارب وهو يطالعها بنص عين: مادري منو اللي راقد فالسياره جان ما ييتج جان تميتي لي العصر أم حامد: صدق جوجو؟ راقده فالسياره؟ جوري: انتي بعد اتصدقين ولدج؟! يقص عليج حارب: هيه صح أم حامد وهي تدري بجوري لأنه مب اول مرة اتسويها وفيها ضحكه: انزين يلا سيروا بدلوا ملابسكم وصلوا عسب تتغدون جوري: انا مابا شبعانه حارب: بس انا صدق يوووعان ... حطولي الغدا الحين لأني مصلي فالدوام أم حامد: من عيوني ودخلوا حارب وجوري غرفهم جوري وهي اتدور على عمرها فالحجره .... يااااااااااااااااااااااااااي وأخيرا بيتحقق الحلم بس أحس بطني يعورني مب متخيله مووووووول يلا ليش أفكر هالكثر؟! الحين بصلي وبرقد وعقب برمس حامد اتولهت عليه موت وفعلا صلت العصر وتمت تدعي ربها انه ايسر امورها ويصبرها على بعد أهلها وعقب ما خلصت ربعت سيادتها ولبست بيجامتها وانخشت تحت اللحاف وعلى طول رقدت من التعب . . فالطرف الثاني غلا توها راده من الدوام ويالسه تتغدى اف غرفة الطعام ... بس سرحانه وما تاكل شي وتدخل عليها أمها (أم خليفه) أم خليفه: بلاج فديتج؟ ليش ما تاكلين؟ غلا وتوها تنتبه لأمها: هااااا؟! لا ماشي أم خليفه: مب عوايدج اتمدين البوز شبرين غلا وهي تتذكر انها مب مخبره امها انه جوري بتسير شهر كامل المعسكر: افكر اف جوري بنت عمي أم خليفه: رب ماشر؟ بلاها جوري؟ أحيدج البارحه عندها غلا: مافيها الا كل خير بس بتسير عني شهر كامل أم خليفه: أحيدها بتخلص الدوام هالاسبوع وانتي كنتي مستانسه شو الطاري الحين؟ وخبرت غلا أمها عن معسكر جوري وانها بتم شهر كامل وكان راشد يسمعهم ويسوي عمره مب منتبه وهو منتبه على كل حرف أم خليفه: حليلها ... حتى فالاجازة يكرفونها؟! ما تسوى عليهم هالشهاده غلا اف خاطرها: أصلا جوري هي اللي تبا هالشي أم خليفه: عيل شو رايج انه عندي لج خبر يفرحج غلا بدون نفس: ماظن أم خليفه: تدرين انه شهر 7 بنسافر ويا قوم عمج وبتكونين 24 ساعه ويا جوري غلا وهي مب مصدقه: والله؟ صدق؟ يااااااااااااااااااااااي الله يبشرج بالخير يا ويه الخير عيل جوري ما خبرتني؟! أم خليفه وهي مبتسمه بويهها السمح البشوش: أصلا هاي مفاجأتنا لكم ويمكن جوري بعدها ما تدري غلا وهي اتنش واتبوس أمها على خدها: فديييييييتج يا أحلى أم فالدنيا أم خليفه: يالله اشكثر اتحبين جوري غلا: وأحبكم كلكم بعد أم خليفه: يالله عسى ما يفرقكم الرب ويرزقكم الرياييل اللي يستاهلونكم غلا اتنش وهي مستانسه: انا بسير الحجره بريّح شوي أم خليفه: برايج فديتج راشد وهو يشوف غلا مستانسه: شوي شوي عن تتخرطفين هالكثر مستانسه عسب السفر؟ غلا وهي متشققه: هييييييييه ... ما تتخيل كيف أحب انكون انا وجوري رباعه وخص فالسفر راشد وهو بعد مستانس بس ما يبا ايبيّن: الله يعيننا عليكم غلا وهي مطنشه وسارت حجرتها وطاحت ع الشبريه وهي اتقول: آآآآآآآآآآآه روووعه ... يعني الصيف بيكون روعه هالسنه (لأنه قوم غلا دوم يسافرون مع أهل أمهم ونفس الشي أهل جوري يسافرون مع خوالهم ونادرا ما يجتمعون جوري وغلا فالسفر ... ولكن هالمرة التخطيط يا على مزاج غلا وأكيد على مزاج جوري يوم بتعرف) وقامت اتدق حق جوري اتبشرها بس للأسف جوري اف عالم ثاني ويا أحلامها وتيلفونها ع السايلنت غلا وهي محبطه: اففففف أكيد راقده ... بدقلها عقب وحطت راسها تبا ترقد ... بس وينها ووين الرقاد ... الأخت صدق متحرقصه لوووووول وسارت عند أختها روبي اتشوفها شو تسوي (للتذكير: روبي آخر العنقود وعمرها 13 مراهقه من الخاطر وعليها صرعات عجيبه وكل يوم لها لوك غير شكل بس دمها خفيف وقلبها طيب وماخلت مجله فنيه الا وشرتها ... اتعرف أخبار كل الفنانين العرب والغرب  4 ساعه حاطه الهيدفون ع راسها خخخخخخخ)غلا وهي اتدق الباب: روبي؟ رووووبي؟ حشى وينها؟ وشوي وينفتح الباب وتطلع روبي بلبسها الغريب غلا: بسم الله شو لابسه وبعدين شلي الهيدفون من راسج واسمعيني روبي: افففف شو تبين لا تخربين علي عند تمارين رقص غلا: انتي ما تستحين على ويهج؟! لو أبوي يسمعج بيسفرج روبي: آآآآآآآآه ياليته يسفرني عسب أروح أقابل نجوم هوليوووود ويمكن أستوي مشهووورة مثلهم غلا: طاع هاي! صدق مراهقه ... لو سفرج ابوي تتحرينه بيوديج أمريكا! أقصاها عزبة يدتج ويحبسج ويا البوش والهوش روبي وهي شكلها متقززة: Oh My God! كلامج يحطم أحلامي غلا: الله والاحلام عاد روبي: غلا أنا محترمتنج لأنج أكبر عني ولا تنسين انج في حدود غرفتي غلا: من حلات غرفتج! ماخليتي لون الا وحطيتيه! خخخخخخخخخخخخخ روبي: ياماما هاي الموضه اشعرفج انتي! غلا: وييييييع أي موضه؟!!! عنقاااااش روبي: ياربيييه كيفي كيفي ... محد يفهمني الا جوري ...! غلا: تراها الا خبله مثلج روبي: انزين جان ما خبرتها غلا بكل ثقه: ما بتصدقج وبعدين لا تغيرين السالفه ... شو مسويه اف شعرج؟؟؟؟؟ ولا هذا لبس ينلبس؟؟؟ وعييييييييييه روبي: بلاه شعري؟ حلوووو يجنن وتوه راشد ظاهر من حجرته وخطف صوبهم والا يشوف روبي وفج عينه: بسم الله!! سكنهم في مساكنهم! أحيد الجنانوه فالليل! شو مطلعنهم هالحزة؟! روبي وهي معصبه: محد يقدر هالجمال وهالدلع راشد: أمحق دلع ... سيري غيري اللي عليج وامسحي هالصبغ من ويهج ! الحين بييج خليفه وبيلعن خيرج (اخوهم خليفه سبق وذكرت انه معرس وهو شوي شديد بعكس راشد اللي كول وشبابي) روبي وهي زايغه: اففف من هالبعبع سار عنهم راشد وفيه ضحك على أخته المراهقه اللي كل يوم ويايتنهم بصرعه يديده << الله يهديها غلا: عرفتي ان بنسافر ويا قوم عمي؟ روبي: هيه دريت غلا حشى ينيه ! كله منخشه فالحجره وكل الأخبار عندها روبي: أعوذ بالله من عينج غلا وهي اتلف بتسير عنها روبي: لحظه غلا: خير Miss Teenager! ؟ روبي وهي اتسوي عمرها طيبه: ما بتظهرين ويا جوري اليوم؟ غلا: واذا؟ روبي: يعني افهميها أبا أيي وياكم غلا: نعم نعم؟؟ روبي: بليييييييييز ... من زمان ما شفت جوري واشتقت لها وأبا اتشرى بعد غلا: اففففف ... الحين انا أطلع ويا ربيعتي .. انتي ليش رزة فيس؟!!! تتحريننا كبرج؟!! اطلعي ويا ورد وود (ود وورد توأم وأعمارهم 14 وشكلهم وايد كيوت ... وهم بنات أصغر أعمامهم واسمه مايد ودارس برا ومتزوج عن حب ومب وايد عود عمره 37 ووايد سوالف وكل حد يحبه) روبي: هاك اليوم طلعت وياهم ... بس جوري من زمان ما شفتها وأكيد عندكم سوالف حلوة غلا: اففف انزين؟! روبي: انزين غلا: انجلعي .. عموما اذا بتين مابا تلبسين هالخرابيط واتفشليننا روبي: بتذلنا هاي! اففف غلا: ما سمعت؟! عيدي روبي: لا ماشي اوكي على أمرج وسارت غلا حجرتها وتمت روبي تتحرطم على اختها وردت غرفتها وشغلت الهيدفون وتمت ترقص كالعاده . . . يتبع
__________________ كل عام وانتم بألف ألف خير |
|
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| أروع قصص الحب | قتيبة الهيتي | نور الإسلام - | 19 | 09-25-2007 10:05 PM |
| من أروع الرسائل في سيرة نبينا المصطفى محمد عليه أفضل الصلاة و أزكى السلام | ياسين | نور الإسلام - | 10 | 02-27-2007 03:35 PM |
| كلما أحزنكى زوجك أذهبى الى حبيبك | شمس مصر | نور الإسلام - | 6 | 07-13-2006 08:25 PM |
العرض العادي
