|
| |||||||
| قصص قصيرة قصص قصيرة,قصه واقعيه قصيره,قصص رومانسية قصيرة. |
 |
| | LinkBack | أدوات الموضوع | انواع عرض الموضوع |
|
#11
10-22-2007, 10:06 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع وفالطرف الثاني جوري فتحت عيونها وكانت الساعه 6 المغرب واتحس بكسل فضييييع ولفت ع تيلفونها ولقت 4 missed calls وحده من غلا  من منى والرابعه من اختها جواهرجوري بكسل دخلت ريولها فالشبشب الفرو الوردي واتوجهت للحمام ... اتغسلت واتمسحت وطلعت عسب اتصلي المغرب وعقب ماخلصت صلاتها تمت تدعي كالعاده وحست عقبها براحه ونشاط وسارت تتصل اف جواهر بس ما ردت جوري: خل اتصل اف منوووووه عيل شكلها متحرقصه داقتلي مرتين ويرن التيلفون توت توت تو وقبل ما اتخلص ثالث رنه ردت منى: ألو جوري: أهلييييين منى: انتي وينج؟ من الصبح أدقلج جوري: كنت راقده منى: امممممممممم اسمعيني انا اليوم بسير بتشرى حق المعسكر جوري: اليوم؟ انتي قلتي الخميس؟! منى: ترى عبود أخويه قاللي ما بيعطيني السياره باجر فبنتهز الفرصه اليوم وبسير وهذا غير انه باجر عندنا عزيمه وما بقدر اطلع جوري: ياهي حاله! عيل أنا شو أسوي؟! منى: شوفي انا باخذلي وباخذلكم وياي شو رايج؟ جوري: هزرج؟ منى: هيه أحسن وعشان ما ننكشف جوري: انزين أهلج ما سألوج ليش تبين تاخذين ملابس هنديه؟ منى: ترى قلتهم انه بيكون معسكر وفيه حفلات وبنمثل يعني اخرررررررط جوري: ههههههههههه صدق انج مب سهله عموما انتي لا تكثرين من الثياب لأنه نحن بنلبس Uniform وهالملابس بس حق اجازاتنا يوم بنتلاقى اوكي يا عسل؟ منى: زين يوم خبرتيني ... بس من وين بنيب ال Uniform ؟ جوري: مع اني أتوقع انه يوم بنسير هناك بيعطوننا Uniform الا انه ما بنخاطر وانا طرشت اليسا بشكارتنا اتسير اتفصل لنا وقلتلها عشان الكليه منى: وصدقت؟ جوري: جيه ما اتعرفينها اليسوه الوغده؟ تمت تتحرطم واتقول اونه انته واجد مشكل ههههههههههههه منى: انزين ما بتخبر؟ جوري: لا ماظن وان خبرت ... أنتي تراج عطيتيني الفكره ... وبقولهم عدنا تمثيليه جوري ومنى بصوت واحد: هههههههههههههههههه جوري: المهم حبيبتي انا بخليج واول ما اتردين خبريني شو خذتي اوكي؟ منى: اوكيك .. يلا بباي جوري: باي . . . سكرت جوري عن منى وهي اتحس انها مستاااانسه من الخاطر وقالت بتنزل تحت واتشوف اهلها شوي وعقب بتدق لغلا وكالعاده لازم تربع عالدري ما اتعرف تنزل مثل الناس ومن كثر ما هي مستانسه قررت انها تستغنى عن الدري وتتزحلق ع الدرابزين ويوم وصلت تحت ماشي بريك وجان اتطيح عويهها! بس حست انها ماطاحت ع الارض حد ماسكنها وشوي شوي رفعت راسها والا اتشوف عمها مايد وحذاله راشد ولد عمها وهي حضرتها نازله بالبجامه وطايحه بعد! يا سلااااااااااااام فضااايح من الخاطر ومن القفطه تمت تتطالعهم (يالخبله اربعي فوق ) وفجأة انتبهت وشردت ههههههههههههههههههههههههههههههههه وحارب شافها: بلاج بلاج؟ جان يطالعها بنص عين: لا تقولين ؟ جوري: محد خبرني انه راشد فالصاله؟ حارب: اشدراني بج كنتي راقده اعوذ بالله منج من بنيه ... ما تستحين مووووليه جوري وهي قافطه: اففففف وانا اشدراني انه تحت وبعدين الا هو راشد حارب: هيه تراه أصغر عيالج عادي جوري طنشته ودشت حجرتها وهي صدق مفتشله ... وهذي مب أول مرة يستويبها جذي ... بس هالمرة غير لأنه شكلها كان صدق يضحك وهي بتطيح ع ويهها الله ستر وتحت العم مايد: هههههههههههههههههه أسميها من بنيه هههههههههههههههه والله اتروعت عليها حارب سمعهم وهو نازل: هزبتها مايد: حرام عليك ياريال روحها كانت قافطه وما تدري وين اتشل بعمرها حارب: عمي هاي مب أول مرة وبعدين لو استوابها شي! مادري متى بتعقل راشد يسمعهم وهو اف عالم ثاني يتذكر ويه جوري الطفولي وشكلها المضحك وعلى ويهه ابتسامه (يالله فديييتها وفديت شطانتها) حارب: حوووووووه راشد: بسم الله بلاك نقزتني حارب: نحن وين وانته وين .. يلا اشتل عمي مايد فالسياره انا بسير آخذ تيلفوني نسيته فالحجرة وبييك راشد: اوكي لا تبطي . . . وركب حارب فوق وشاف جوري فالمطبخ التحضيري فوق ومندمجه اتسوي Hot chocolate حارب وهو ساير عندها: لا والله؟! مستانسه حضرتج واتسوين Hot chocolate ... انا لو منج ما بطلع حجرتي من عقب سواد الويه جوري وهي تطالعه بلا مبالاه: عادي الحين شو صار؟ خلاص نسوا وانا بعد نسيت ... Be cool ياخي .. بلاك جذه معقد ؟ حارب وهو رافع حياته مستغرب من برود هالانسانه واف نفس الوقت يحبها وما يتخيل انه يتم شهر بلياها: اوكي يا miss cool انا ساير جوري وهي تشرب من ال Hot chocolate : وين ساير بهالكشخه كلها .. الصراحه مارووووووووم حارب وهو متشقق .. موته ولا حد يمدحه خاصه جوري لأنها ما تمدحه الا اذا كان صدق عايبنها وتم يدور: ها شو رايج؟ جوري: صدقت ويهك بس الصراحه شي! (حارب كان لابس كندورة بيج وسفره حمرة وكان صدق طالع رهيب وجذاب خاصه مع بشرته الحنطيه ورقبته الطويله والعريضه وهو بعد طويل طالع على أبوه طوله 181 ووايد يهتم بجسمه وفعلا كان يمتلك جسم متناسق) حارب: شو رايج اف ريحتي؟ جوري وهي تتقرب منه: روووعه أصلا ريحتك شاله البقعه .... حارب: احم احم عشان اتعرفين ذوق أخوج جوري بكل ثقه : أصلا انته ما تشتري شي بدون لا تشاورني ... كلك من السفره لين نعالك ذوقي حارب ويطالعها بنص عين جوري وهي تتطالعه: صدق بعد شووو حارب واونه مب مهتم: أصلا القالب غالب ... وانا لو مب مزيون جان كشختج ما نفعتني وع العموم مشكووووورة جوري: العفو حارب: يلا اتأخرت باي جوري وهي اتطالع أخوها: باي بس ما قلتلي وين ساير؟ حارب: عرس واحد من ربعنا جوري: ic اممممم اوكي باي وافخاطرها اتقول: فديييتك والله ... الله يحفظك من العين ويخليك لي يا أخويه العزيز وفجاة اتذكرت اخوها حامد وفكرت اتدقله ودخلت حجرتها ودقتله توووووووووووت توووووووووووووت توووووووووووووت وجان اييها صوته: الو جوري: فدييييييييييييتك حمووووووووووووود حامد وهو مستانس يسمع صوت أخته: هلاااا بالشيوووخ هلااااا جوري: زعلانه منك حامد: افاااااا ليش الحلو زعلان؟؟ جوري: انته ادرى بعمرك ..؟ ليش ما تتصل ولا تسأل حامد: حقج علي ياعسل بس والله مب محصل وقت ... تدرين هاي دورة وطول الوقت تدريبات جوري: الله يعينك ... انزين اشتقتلك حامد: فديت اللي يشتاقونلي ... حتى انا اشتقتلكم والله جوري: تشتاقلك العافيه .. اتنه مرتاح؟ مب ناقصنك شي؟ حامد: مب ناقصني الا شوفكم .... انتوا شخباركم وشو مسويين؟ جوري تمت اتسولف وخبرته عن المعسكر وانها بتغيب عن البيت شهر وهو بعد تم يوصيها على عمرها جنه أبوها ... لأنه يعتبر نفسه مسؤول عنها بسبب فارق السن بينهم جوري: أوكي حمووودي بخليك الحين شكلك كنت راقد حامد وهو يسولف بشطانه: عقب ما حشرتيني افتكرتي فرقادي هههههههههههه جوري واونها زعلانه: مب منك! من اللي يسال عنك حامد: فديييتج انا يا كتكوتتي ... انا مب الا لو راقد بنش ... أنا لو بموت بعدني بييييج وعقب بموت جوري وقلبها انقبض من طاري الموت: بسم الله عليك فال الله ولا فالك حامد وهو مستانس من خوف اخته عليه: ويلوموني فيج؟! جوري وهي مستانسه: امممممممممم ... يلا بخليك ... خسرنا بابا وايد خخخخخخخخ حامد: ههههههههه انا ما يخصني كله منج جوري: عادي عادي مافي شي يغلى عليك ... لا تحاتي ... مسؤولة الشؤون لماليه اتطمنك حامد: هههههههههههه مال عمك ما يهمك ... محد بيفلس ابوي غيرج ... المهم ديري بالج على عمرج وسلميلي عليهم كلهم جوري: سلامن يبلغ حامد: فداعة الله جوري: الله يحفظك وسكرت عن أخوها وهي مستانسه انها سمعت صوته ومتضايجه انه مب وياهم فالبيت وتمت تدعي انه الله يوفقه ويرده لهم بالسلامه . . . ورن تيلفونها وكانت غلا وقالت افخاطرها: هههههه يوم المكالمات العالمي اليوم وردت بشغف: ألوووو غلا: لا والله؟ وينج انتي؟ جوري: توني بدقلج بس اتصلت لحامد من زمان مب مرمستنه غلا: امممممممممم اوكي سامحتج ... وشخباره؟ جوري: بخير بس مشتاقتله وااايد غلا: الله يرده بالسلامه ان شاء الله جوري: آآآآآآآآآآآمين غلا: عندي لج مفاجأة جوري: ياااااااااي ... يلا قولي غلا: كم تدفعين؟ جوري: يلا عاااااد عن المذله غلا: المشكله ما اتهونين ... تدرين انه هالصيف بنسافر رباعه؟ جوري وهي فاجه ثمها مب مستوعبه: هااااااااا؟ غلا: مثل ما سمعتي ... بيتنيا وبيتكم ويمكن قوم عمي مايد بعد جوري: يااااااااااااااااااااي ونااااااااااااااسه أحلى خبر شو هالصيف الحافل؟ بتخبل غلا: هيه والله مستاااانسه وتمت جوري اتخبر غلا عن التجهيزات وانه منى بتاخذ الملابس اللي بيحتايونها واتفقوا انهم يسيرون يتسوقون باجر الصبج عسب يتشرون الأشيا الباقيه وسكرت جوري عن غلا وسارت جناح أمها وأبوها ودقت الباب وياها صوت أمها: تعالي جوجو جوري وهي اتطل براسها: وكيف عرفتي انها جوجو؟ الأم: عيل شو خانتي أمج وما أحسج بج؟ جوري وهي تدخل الغرفه: فديييييتج .... انا يووووعانه ألأم: تراج ما كلتي شي من ييتي من الكليه ... يلا انزلي تحت خلي زينه اتحطلج العشا ... امسوينلج أكلتج المفضله لازانيا بالفطر (زينه هي الطباخه وهي هنديه ومعاهم عشرة عمر هي وريلها فرحان وهو الدريول) جوري: امممممم يمي يمي وانتي؟ الأم: انا بسير أزور حرمة فالمستشفى جوري وهي اتحيس حلجها ومب عايبنها انها بتيلس روحها فالبيت: اممممم اوكي هيه صح ماما الأم: لبيه غناتي جوري: باجر الصبج بسير ويا غلا بنت عمي أتشرى حق المعسكر الام وشكلها متضايج من طاري المعسكر: زين برايج ظهرت جوري من قسم أمها وابوها ونزلت تحت وطلبت من زينه اتحطلها العشا ويلست تتعشى وهي اتفكر فاللي يترياها وعقب ما خلصت عشاها سارت صوب المغاسل وشافت عمرها فالمنظره وتمت تتخيل عمرها وهي بشكاره ونقعت ضحك وجان اتيها اليسا من ورى واتشوف المكان جان فيه حد غير جوري وماشافت حد: انته شنو في؟ مجنونه؟ ليش يزحك؟ نقزت جوري: انا المينونه ولا انتي الينيه؟ من وين طلعتيلي عووذ بالله اليسا: يلا سير نوووم مافي جرجر واجد جوري وهي تطلع من غرفة الطعام: طاع هاي! والله مشاكل هالاليسا! ليكون تتحرى عمرها اليسا صدق هههههههههههههههههه وركبت الدري وهي اتغني أغنيه لاليسا (أحلى دنيا) لين ما وصلت حجرتها ... كانت الساعه 10 صدق كانت ملاااانه ... ففكرت تدخل النت وشبكت ودخلت المسنجر ولقت بنت عمها روبي اون لاين ورمستها شوي وعقب دخلت المنتدى اتشوف اذا نزلوا بارت يديد من القصة اللي اتابعها وفعلا ماخاب ظنها ... كانت الكاتبه منزلة بارت يديد وكان رااااااااااااائع وتمت جوري مندمجه وهي تقرى وعاشت عالم ثاني ... آآآآآآآآآآآآآه ونااااااسه وأخيرا بسير العين وبشوف كيف حياتهم ... ياااي يعني بكون بارت من أحداث قصه (ههههههههه الحمدلله والشكر .... تتحرى العين مدينه القصص والروايات) وسكرت لابتوبها والأحلام تاخذها لعالم ثاني واستسلمت للنوم (هههههههههههه ... اللي ما اتعرفونه ... ان جوري مدمنة قصص رومانسيه ... ودوم تقراهن وصدق اتعيش الأحداث وصادف انه معظم القصص اللي تقراهن تستوي أحداثها اف دار الزين ... فدايما كانت تتمنى انها اتعيش هناك ولو ليوم واحد واتشوف نمط حياتهم اللي راسمتنه بصورة ورديه اف مخيلتها ... واتحقق حلمها وكلها اسبوع وبتنتقل للعين وبتعيش فيها بدل اليوم شهر!) . . . بس هل يا ترى القصص اللي تقراها بتطابق الواقع؟ وهل بتتحمل اتعيش حياة مختلفه عن حياتها 180 درجه؟ وهل بتتحمل تبتعد عن أهلها هالفتره كلها؟ كل هالاحداث بنتعرف عليها فالأجزاء اليايه ترقبونا . . . (قراءه ممتعه ) . . .
__________________ كل عام وانتم بألف ألف خير |
|
#12
10-22-2007, 10:07 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع (الجزء الثالث) من بعد سكون الليل ... بدت خيوط الشمس تتغلغل وتنثر أشعتها وتنور الأرض وبدى يوم يديد ويحمل في طياته أحداث ومواقف لأبطال قصتنا فتحت جوري عيونها على صوت المنبه وهو يرن ع الساعه 9 ... ونشت وهي متفائله بيومها واتحس ان الدنيا كلها مستانسه معاها دخلت الحمام وخذت شور وأول ما طلعت مسكت تيلفونها عسب تتصل اف بنت عمها غلا وتم يرن وايد ومحد رد جوري اف خاطرها: ياربيييييه أكيد بعدها راقده وشوي ويرن تيلفون جوري وكانت غلا فابتسمت جوري وردت غلا: صباح الجوري جوري: صباح الغلا ... وينج يوم أتصلبج؟ غلا: ما بغيت أخسرج لوووووووووووول جوري: لا والله ! العبي غيرها ... المهم متى بنظهر؟ غلا: الحلوين مستعيلين جوري: أكيييييييد .... الا ما قلتيلي ... روبي بتي ويانا؟ غلا: بعد يبالها سؤال أكيد بتي ... اونه مشتاقه حق جوجو جوري: هههههههههه ما عليج منها لوتيه ... المهم اتزهبوا الحين اوكي ... وما أوصيج مب يزل لسانج جدام روبي ... تراج اتعرفينها أكثر عني ... ثواني والا الخبر منتشر في كل نواحي الامارات ويمكن فالعالم بعد! خخخخخخخخ غلا: ههههههههههه لا توصين حريص ... يلا عيل سي يو جوري: سي يو جوري وهي واقفه جدام الكبت: ياربيييه شو ألبس؟! طلعتلها بدله صيفيه بيضه ووايد ناعمه وفيها شرايط بلون أزرق فاتح وظهرتلها عباه واسكارف أبيض وفيه خطوط زرقا ودقت حق اليسا من الانتر كول اليسا بصوت مزعج: ألووو جوري افخاطرها بسم الله من صوتها وجان اتقول: اليسا تعالي الحجره بسرعه اليسا: جين وكانت اليسا وعطتها الملابس عسب تكويهم وهي سارت اترتب عمرها واتجفف شعرها المبلول جوري وهي واقفه مجامله المنظرة ولأول مرة اتفكر بجديه: ياربييييه معقوله اللي سويته؟ الحين انا أسير مكان واهلي ما يدرونبي؟! والمشكله مادري شو يترياني؟! وشو بسوي اف هالشهر وانا ماعرف شي اف شغل البيت صدق اني مخبل مثل ما اتقول غلا وتمت اتفكر وايد وعقب قالت: خلاص بتوكل على الله ... والله ما بيخيب رجاي جففت شعرها ... وجحلت عيونها العسليات وامتزج سواد الكحل بعسل قرنيتها اللي خلى لعيونها سحر خاص ومسكت قلم عيون لونه أزرق ومدته على طرف جفونها وكانت آيه فالجمال ولمعت شفايفها بجلوس ولمسات خفيفه من البلاش وكانت جاهزة ... وخذت ملابسها من عند الباب واتلبست وسمعت دق ع الباب جوري: منوووه؟ حارب: الشيخ حارب جوري: ويت جان يطالعها بنظرات متفحصه: وين ماشالله من صباح الله خير؟!!! جوري وهي تلبس الصندل الابيض: بسير أتشرى حق المعسكر حارب: وكل هالكشخه عسب تتشرين؟! انا قلت يمكن غيروا نظام الاعراس وخلوهن الصبح جوري وهي تتطالعه ومب عايبنها: افففف يعني أطلع وانا مبهدله؟! حارب: مب مبهدله بس مب جي عاد! جوري: بالعكس انا وايد شكلي بسيط ... شوف البنات شو يسون بعمارهن؟! حارب: وانا أشلي فيهن؟! مب ملزوم بهن! أنا ملزوم بج انتي جوري: يا حروبي يا حبيبي ... عادي ... وبعدين انته يوم بتعرس أفكارك بتتغير وحرمتك بعد بتسوي شراتي وأكثر حارب: اتهبى الا هي! ماشي ... ما تتكشخ الا حق الشيخ حارب جوري: ياويلي عاللي يغارون من الحين (جوري مب وايد ملتزمه بحجابها ... وأهلها ما غصبوها بهالشي ... عطوها الحريه انها تقتنع بالشي ... وهي مع هالحريه الا انها عارفه حدودها وما تتجاوزها ... وحتى يوم تكشخ ما اتكون اوفر ... كشخه بسيطه واف نفس الوقت أنيقه ... بس لأنها كانت وايد جميله فحتى لو ما اتحط شي افويهها كانت تلفت وهالشي اللي يخلي حارب دوم يغار ولكنه يعرف انه أخته مالها ذنب) ولبست جوري عباتها ولفت الاسكارف وشلت شنطتها البيضه وتيلفونها وقالت لحارب: يلا ببأي يا حلو حارب: ويا منووو بتسيرين؟ (سؤال غبي وهو حس بعد بهالشي .. لأنه معروف انه جوري اكيد بتسير ويا غلا ... بس يمكن هو يحب يسمع اسمها .. لووووول) جوري: أكيد ويا غلا وروبي بعد حارب: أهااااا ... لا تتأخرون جوري وهي مستعيله: ان شاء الله ومشت لقسم امها وأبوها ولقتهم يالسين فالصاله: صباح الخير أبو جوري وامها بصوت واحد: صباح النور أبو جوري: ها وين من الصبح؟ جوري: بسير أتشرى حق المعسكر أم جوري: هيه .. هي البارحه مخبرتني أبو جوري: ويا منو بتسيرين؟ جوري: ويا غلا وروبي بعد أم جوري: بس ما وصيج جوري لا تطولن ... من اتخلصن حايتكن اممررره على طول اتردن البيت جوري وهي متعوده على هالنصايح: ان شاء الله من عيوني وعقب افترت على أبوها وتتطالعه أبوها وهو يدري انها تبا بيزات: ههههههههههههههههه .... يالمصاريف! جوري: فديتك يا أحلى بنك أبو جوري: يلا اتدلين دربج سيري وخذي اللي يسدج جوري: فدييييتك .. شكرررا وسارت طيران ع الغرفه وسحبت فلوس من التجوري وطلعت من الغرفه وهي تعطيهم flying kiss واتقولهم: يلا باي أبو وأم جوري: مع السلامه أم جوري: لا تسرعين ماما جوري وهي ع الدري وصوتها بدى يتلاشى: اوكي اوكي ومرت على غلا وروبي وساروا مول الامارات جوري: أحس بنشاط فظيع غلا: حتى أنا ... أحس يومنا بيكون حلو روبي: جوجو انتي اتفائليني وايد ... اليوم بتتشرن حق السفر؟ جوري: امممممم ... أحس بعده! أنا بتشرى حق المعسكر روبي: so coool .. يستوي تاخذيني معاج؟! غلا: طاع ويهج انتي! جوري مب سايره تلعب سايره ويا الكليه روبي: وانا بعد ما بلعب I'll support her ...! غلا: الله والsupport عاد! اسكتي اسكتي جوري: هههههههههههههه ... فديتج روبي ... ياليت لو أقدر آخذج بس ما يستوي روبي: هيه والله انتي كلامج عسل مب هاي! (تقصد غلا) غلا وهي معصبه: وهاي مالها اسم؟! جوري: أيهاااا بس لا تتناقرون! حشى غلا وهي تتحرطم: شو اللي خلاني أييب هالياهل وياي! روبي: مب ياهل انزين! خلاص كبرت غلا: صح واضح جوري وهي تبا اتغير جو السياره اللي بدى يتكهرب: يلا خل نفتح ال FM ع الخليجيه وانشوف شو حاطين وكانت أغنية عبدالكريم (من بين الناس) (كنت حاطه الرابط عسب اتعيشون الجو بس حذفته عقب ما دريت انه ممنوعه الأغاني فالمنتدى) كلماتها,,, من بين الناس حبيتك من بين الناس وبكل احساس اغليتك وبكل احساس حبك جرى بدمي نساني كل همي خلا حياتي غير من بين كل الناس . . . وارتبشن صدق ع الأغنيه ... لأنه غلا وجوري من زمان مب سامعينها ... فذكرتهن الأغنيه بمواقف وأيام حلوة بس روبي ما عيبتها الأغنيه ... أونه مب ستايلها روبي: أوف حطن سوا ماحب الخليجيه! غلا: اييييييي! انتي مول ما عندج ذوق وتمن على هالحال الين ما وصلن امارات مول ... ولأنه يوم الخميس ... فالباركنات كانت مزحومه نوعا ما ... بس لقولهن باركينج شيوخي على قولة جوري جوري وهي مستانسه: يااااي ... حصلنا باركينج شيوخي اممرره مجابل المدخل غلا: فديتنا والله ... شكله اليوم صدق بيكون حلو وبركنوا السياره وتمن شوي فالسيارة يضبطن الشيله والكحل وعقب نزلن واتوجهن للمول ولما دخلوا المول حسوا انه كل حد يطالعهن عرب واجانب ...! استغربوا جوري لغلا: لهالدرجه شكلنا ملفت كل حد يطالعنا؟! غلا باستغراب: انا روحي مستغربه أحس فيني شي غلط جوري: اميييي طالعي شقايل يطالعون . . . ولفن هنتيناتهن على روبي عسب يتأكدن اذا كانت وراهن ولا نسنها ف مكان وجان يشهقووووووون بصوت عالي: روووووبي؟!!!! . . . يا ترى شو شافن؟! والناس ليش كانوا يطالعونهم فالمول؟! ووين كانت روبي اف هالوقت؟! . . . يتبع (تابع الجزء الثالث) فالمول غلا وهي تسحب روبي واتوديها الحمام: امشي فضحتينا وجوري مب رايمه اتيود عمرها من الضحك: هههههههههههههههههههههه ... واي بطني ماروم أمشي اتريوووني ولين ما وصلوا صوت الحمامات عزكم الله هههههههههههههههههههههههه الحبيبه روبي قبل ما ينزلون من السياره وهم يالسات يضبطن عمارهن ... هي بعد اتقلد وتبا اتضبط عمرها ... والاضاءه فالسياه مب لين هناك ... خاصه فالباركنات حتى لو كان الصبح ... فشلت علبة البلاش (احمر الخدود) وحطت منه ... ولسوء الحظ حطت وايد واستوت شرات المهرج وهي ما تدري هههههههههههههههههههههههه ... ويوم نزلوا جوري وغلا ما انتبهولها لأنها كانت وراهم ... عسب جي كل حد يطالعهم باستغراب غلا لروبي: الله يبحصج ههههههههههههه شوفي شكلج ... شو مسويه بعمرج؟! حسبي الله عليج روبي وهي معصبه: أنا شدرااااااني كلتوووووني وشوي يوم اتشوف عمرها تنقع ضحك ونقعوا كلهم من الضحك: ههههههههههههههههههههههههههههههههه
__________________ كل عام وانتم بألف ألف خير |
|
#13
10-22-2007, 10:08 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع ويت غلا ومسكت روبي وسحبتها وغسلت ويهها وروبي اتقاوم: اتريي يا متوحشه أنا روحي بنظفه غلا: بعدني بترياااج اتنظفينه واتهببين شي ثاني؟!! وجوري صدق ميته ضحك وعيونها تدمع من الموقف جوري لغلا: هزرج بيتذكرونا؟! غلا: ماشي الا نحبس هالسلعوه فالحمام وعقب ما انخلص انمر ناخذها ... حسبي الله على ابليسها فشلتنا ... حتى عيال الحمرا اتضحكوا علينا وأنا أتحراهم منبهرين اف جمالنا الفتان جوري وهي خلاص مب رايمه اتيود عمرها: ههههههههههههههههههه حتى انا اتحريتهم وايد معجبين خخخخخخخخخخخخخ روبي وعقب ما نشفت ويهها تمت تتطالعهم وجنها مب مسويه شي ولا جنها ساس المشكله كلها: يلا ما تبون اتسوون shopping ؟ وخطفت تتجدمهن جوري وغلا يطالعن بعض وبصوت واحد وهم يلحقنها: طاع هاي؟!!! وعقب تموا يلفلفون فالمحلات روبي خذتلها كمن بدله حق السفر طبعا على استايلها الغريب وخذت حق ود وورد شراتها عسب يطقمن فالسفر غلا وهي تتطنز على روبي: الحين تتحرينهن بيلبسن نفس لبسج العنقاش؟ روبي بكل ثقه: أكيد ... هذا ستايلنا جوري وهي اتراوي غلا جاكيت طويل أحمر: شووووو رايج اف هذا؟ رهيب صح؟ غلا: وااااااااااااو عجييييييب وكانت تبا تاخذ نفسه عسب يطقمن ... بس للأسف كان باقي واحد بس وخذته جوري بس هم خذوا وايد أشياء روعه يرومون يطقمون ابها فالسفر جوري: آآآآخ تعبت غلا: حتى أنا روبي: بس أنا بعدني ما تعبت غلا: ينيه ما تنلامين! جوري: أنا اللي خذته كله حق السفر ونسيت المعسكر! غلا: شوفي انتي ما بتحتايين وايد لبس حق المعسكر لأنج مب سايره هناك تكشخين! وتعرضين أزياء واظن فاهمه قصدي روبي وهي ما تدري عن شي: لا بالعكس .. أصلا هاي فرصتها عسب تكشخ وتلبس لبس معسكرات وكشاااافه ... ياااي ... قومي جوري بنقيلج لبس على ذوقي غلا: اووف انتي اسكتي ما يخصج! من حلات ذوقج الحين جوري: هههههههههههههههههه .... شكرا روبي روبي: والله كيفكم كنت أبا أعرض عليكم مساعداتي ترى مب كل يوم انا available ! غلا: طاع هاي! مصدقه ويهها ... الله لاييب اليوم اللي نحتاجلج فيه جوري: اففف بسكم ...! يلا بنسير كمن محل باخذلي بيجامات وجينزات وكمن بدي وعقب خلاص بنرد روبي وغلا: أوكيك وتموا يفترووووون وما خلوا شي الا وخذوه كانت الساعه 1 الظهر جوري: ما صلينا؟! غلا: يلا بنسير المسيد بنصلي وساروا يصلون ومن عقبها طلعوا من المول وشوي والا يرن تيلفون روبي وكانت ود متصله ود: رووووووبي روبي: ودووووه ود: انتي وينج؟! روبي: انا فالدرب راده البيت من امارات مول ود قالت حق روبي انه ابوها اللي هو عمهم مايد عازمنهن ع الغدى وعقب ع السينما رووووبي: ياااااااااااااي .. بس ويت بخبرهن وخبرتهن روبي عن الطلعه ومع انه جوري وغلا كانن تعبانات الا انهن ما بيفوتن طلعه حلوة ويا عمهن مايد .... لأنهن يموتن فيه روبي: خلاص اوكي ودوووه ورد: أنا ورد ودووووه روحت ... المهم كونن جاهزات ع الساعه 2 ونص بنكون عندكن (نكته هالتوأم دومهمن يتبادلن الأدوار .. لأنهن يتشابهن اف كل شي حتى فالصوت ما عدا انه ورد شوي خجوله وود مشاغبه وجريئه .. بس يوم هن ساكتات ما ينعرفن مووووول) روبي: اوكي ... تعالولنا اف بيت عمي سالم بنكون هناك (يعني اف بيت جوري) ورد: اوكي سي يو روبي: سي يو (للتوضيح: أبو خليفه اسمه سعود وهو الأخو العود وعقبه ايي أبو جوري أو بو حامد مثل ما يسمونه واسمه سالم وعقبه اليازي وعمرها 40 ومتزوجه وعايشه برع مع ريلها لأنه سفير وعندها 4 عيال (ولدين وبنتين) وما يردون البلاد الا فالمناسبات والاعياد بس دومهم على اتصال باهلهم وآخر العنقود مايد ومثل ما ذكرنا عمره 37 وعنده التوأم الشقي ود وورد) ووصلوا البيت الباركنات كانت فاضيه الا من سيارة جوري وسيارة حامد اللي دوم موجوده بحكم سفره جوري وهي تطلع من السياره بتعب: أحس اني منهده مالي خلق لشي! غلا: اففف حتى أنا جوري: طالعي! البيت مهجور كل حد طالع مافي حد الا نحن وسيارة حامد فديته وجان اتسير صوب موتر اخوها وتمت تتأمله : فديييييتك حمووودي .. اتولهت عليك متى بترد؟! وتمت تتذكر يوم حامد قبل كمن شهر بغى ياخذله سيارة يديده وتم يشاورها وياخذ رايها وطبعا جوري على طول نطت وقالتله: خذلك رنج سبورت بلييييييز جان يضحك حامد: هههههههههههههه وانتي بلاج مشتطه؟! انا اللي بسوقها ولا انتي؟! جوري: احم احم ... انته بتسوقها بس أكيد بتحوطني فيها حامد: فااالج طيب ... وباخذها الرنج بس لعيونج ... جوري: فدييييتك .. بس خذها بيضا عسب تطلع رهيبه حامد: اممممم بيضا بيضا ليش لأ وطلع السياره من الوكاله وفعلا كانت رهيبه بس ما اتهنى فيها وايد ... طلعتله هالدوره وسافر وتمت جوري مغمضه عيونها وهي تتخيل هالموقف وغلا اترمسها وهي مب حاسه غلا وهي اتحرك ايديها جدام جوري: حوووووه ! جوري وتوها انتبهت: هاااااااا غلا: تو الناس! وينج ... قومي خل اندش ... بسج سرحاااان! حرقتنا الشمس جوري: اففففف يا هادمة اللذات يلا انزين ودشوا الفيلا وركبوا فوق صوب قسم جوري طبعا تتسائلون وينها روبي؟؟! ههههههههههههه الحبيبه اتجدمتهم وسارت وبدلت (ماخذه راحتها هههههههههههه) يوم وصلوا الصاله الفوقانيه شافوا روبي منسدحه ع بطنها وتاكل جبس (جيتوس الحار) يمي يمي ومجابله التيلفزيون غلا: طاع هاي! وين تتحرين عمرج! اف هاواي! يمكن حارب يطلع ويشوفج جي! ما تستحييين! روبي: اففففففف ترى سيارة حارب مب موجوده! من وين بيطلع يعني من الفانوس السحري؟! وبعدين عادي بيت عمي شو المشكله؟ جوري وهي تتطالع غلا: ههههههههههه صدقها بيت عمها وفعلا طلعت ذكيه حروووبي محد فالبيت يعني عادي .... وبعدين اللي يقول يعني روبي تتحجب جدام حارب خخخخخخخخخخ غلا: خخخخخخخخ أدريبها فاصخه الحيا ... بس عاد مب جي لابسه شورت ومستانسه على عمرها ودشوا جوري وغلا الحجره وطلعت غلا راسها من الباب وقالت لروبي: يلا نشي اتلبسي بنطلع ويا عمي مايد ولا يمكن هونتي .. ترى أحسن نطت روبي: اووبس! هيه صح وتمت تتحرطم: اف أحلامج أهون! وسارت اتبدل وبدلوا ملابسهم ونزلوا تحت يتريون عمهم مايد روبي: يااااي وناااسه بيتكم فاضي مافيه حد جوري: هيه أشوفهم! شكلهم ما صدقوا أطلع من هنيه وهم يشردون غلا وهي اتغايض جوري : بسهم ارحميهم! يبون يرتاحون منج جوري وهي فاجه عيونها وهاي أحلى حركه اتسويها اتبينها طفوليه: يرتاحون مني أنا؟!!! لا والله غلا: هيه انتي! خل يتنفسون ... جوري وهي مفوله على بنت عمها: ثرني يالسه ع جبودهم وانا مادري؟! غلا وهي مستانسه انها غايضت جوري لأنه دوم جوري اتغايضبها: يمكن اشدراج وصدق فولت جوري ع غلا وعرفت انها تبا تحرق أعصابها ونشت تربع وراها وغلا اتصررررخ: آآآآي الحقوووني والله أسولف والله سوري وجوري تلحقها وهي اتفر عليها المخدات الصغيره مال اليلسه: الحين سوري هااااا؟! من الصبح اتغايضيبي وتموا جي وجان اتي روبي وتلحقهم واتفرهم بالمخدات وهي ما تدري شو السالفه بس حشرن مع الناس عيد ههههههههههههههه واعتفس البيت فوق تحت ... المخدات اف صوب والعبي اف والكشه اف صوب ههههه وهم بعدهم ما تعبوا ونسوا السالفه الأصليه وتموا بس يتحاذفون بالمخدات وحشرتهم واصله آخر الدنيا واليسا اتيهم وعلى ويهها صدمه جنه الا حد ماكل حلالها: شنووووو هاااادااااا؟!!!! كلش كلش كرااااب أنا يسوي تنديييف (اونه خربتن كل شي وانا منظفتنه خخخخخ ... على فكره .. تراها خراطه ... البشاكير الثانيين مرتبين مب هي ... بس هي مشرفه عليهم خخخخخ) يوم شافنها مفوله شوي صخن وعقب تمن يتطالعن بعض وفجأه نقعن من الضحك: هههههههههههههههههههههههههههههه وجان يكملونها وفرن اليسا بالمخدات وهي اتزاعج ومعصبه وهن مستانسات ع شكلها وجان تطلع من الصاله وهي طالعه وتتحرطم: والله أخبر ماما .. مجنون واااجد مشكل .. هادا جوجو سيم سيم باجا سقييير ( اونه جوجو مثل اليهال خخخخخخخخ) وجان ايشوفونها حارب وراشد وهم رادييين من برا وشكلها ينقع من الضحك راشد لحارب: بلاها ماما تريزا معصبه اليوم ههههههههههههههههههه حارب: خخخخخخخخخ علمي علمك قوم خل انسير انطفربها (راشد دوم يسمي اليسا ماما تريزا لأنها مسويه عمرها مسؤوله عن كل شي .. وفعلا هي مسؤوله عن كل شي ... وهي تتأمر ع البشاكير يعني رئيسة الخدم ... وهم فالبيت وايد متعودين عليها .. وصح انها وايد تتحرطم عليهم الا انها اتموت فيهم وما تبا اتودرهم ... وكل مرة اتسافر واترد عندهم مرة ثانيه ... وأم جوري وابوها وايد يحترمونها ... وعادي يهزبون جوري يوم اتطفربها هههههههههههههههه .. لأنها مهما كان كبيره فالسن وعشرة عمر وياهم) راشد: يلا غايته وساروا عندها وقبل لا يرمسون هي رمست: هروب (يعني حروب) سير جوف هزا جوجو وقلا وهزا سقييير روبي كلش كلش مافي respect أنا وكلش كربان ... وانا يسوي ترتيب راشد وحارب فيهم ضحكه بس ميودين عمارهم وقالولها انهم بيسيرون يهزبونهن وقربوا من الصاله ويسمعون حشره غريبه وصراخ زاااغوا اتحروا شي مستوي فالبنات وربعوا داخل الصاله بدون لا يهودون ولا يشوفون منظهر غريييييب كل وحده بكشتها والمخدات اف كل صوب وفجوا عيونهم مستغربين! جوري اتيبست! ونفس الشي غلا وحتى روبي! وتمن يتطالعن بعض ويوم انتبهن انهن بليا شيله ربعن فوق الدري وطاحن ع بعض ونشن وكملن دربهم ههههه ودشن الحجره وقفلن على عمارهن الباب وهن مب رايمات يتنصخن من السرعه وشافن بعض وكأنهن يشوفن بعض لأول مرة وضحكن ع أشكالهن ههههههههههههههههه جوري: ابييييه ياويلي من حروب غلا وروبي: ياويلنا نحن! تحت فالصاله حارب لراشد: هااااييل اتخبلن! راشد: طاع شو مسويات فالصاله! حسبي الله على ابليس! حارب: من جيه اليسووه معصبه! بس ان ما راويتهن وشوي ويندق الجرس الداخلي ويهوّد عمهم مايد وبناته ود وورد: هود حارب وراشد: هدا اقرررب عمي مرحبا الساع ويتخاشمون ويا عمهم وعمهم يتطالع الصاله ومستغرب: شو عندكم حرب؟!
__________________ كل عام وانتم بألف ألف خير |
|
#14
10-22-2007, 10:09 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع حارب وهو مفتشل ويتطالع راشد .. جان راشد يرمس: والله هالبنات مادري استخفن مادري شو ياهن مايد: ع طاري البنات وينهن ... أبا أظهرهن ... بنسير نتغدى برع وعقب بنسير السينما حارب وحس انها فرصته عسب يأدب أخته وبنات عمه ع هالتصرفات المينونه: عمي اسمحلي انا مب مرخص جوري .. لأني أبغي أددبها شوي عسب هاللي مسوتنه وراشد بعد قال: وأنا بعد مب مرخص غلا ورووبي! هاييل مب ويه حد يظهرهن! الحين بنزلهن يرتبن الصاله! مايد: أفاااا ... وانا ياي ومتعني! ... بس تدرون هههههههههههههه زين اتسوون فيهن بس شوي شوي ... تراهن مدلعات مب ويه كرااااف حارب: ههههههههههههه أفا عليك عمي ... لا تواخذنا .. واستانسوا فالطلعه ود وورد: اووووووووف راشد يطالع التوأم وهو رافع حياته: الحين منوه فيكن ورد ومنو ود؟ ورد وود يطالعن بعض: سر! لازم روحك تكتشف راشد وهو يتطالعهن: أسميني لو أبات أتطالعكن من اليوم لي باجر بعدني ما بفرق امبينكن حارب: ودوم ماشالله مطقمات فاللبس! حارب لعمه: وانته ياعمي الله يهداك امسمنهن بأسمامي متقاربه ود وورد ..! وايد عليك يوم حذفت (الراء) خخخخخخخخخخخخخخ عمه: ههههههههههههه ... فديت بناتي محد يغلط عليهن لو سمحتوا! ورد وورد: باباتي! خلاص ما نبا نطلع بدون بنات عمنا مب شي! مايد: أفاااااا وانا ماسد يعني؟! مايد يوجه كلامه لعيال أخوه: زين جيه؟! خربتوا علينا الطلعه؟! راشد: ماعليه خل يتأدبون ولكم مني وعد بطلعه أحلى عنها ... شو قلتن؟ ود الشيطانه: يااااااااااااااااااي أحلى شي بس مب اتقص علينا؟! راشد وهو يتطالعها بنص عين: هاللحيه مب سادتنج؟! ود: اشدراني بكم؟! عليكم حركاااات أحيانا راشد: أفا بس أفا وانا بوسنيده ... بس عيل! عرفتج انتي ودووه الشيطانه لأنه ورد هاديه وجان تحمر ورد أكثر وانخشت ورى أبوها مايد: يلا عيل نسير ... يلا بناتي ... وانتوا رشود! حروب! شوي شوي ع البنات ترى ما أرضى عليهن! مب معناته سكت عنكم يعني تستقوون عليهن؟! ياويلكم! حارب: هههههههههههههه ما نلومك بو البنات مايد وقو يطالعه بنص عين: لا والله! جني الا مب تارس عينك! حارب وهو يتقرب ويبوس عمه على راسه: أفا عليك عمي .. انته الخير والبركه ههههههه مايد: ههههههههه ما يون الا بالعين الحمرا ... يلا فداعة الله ود وورد: باي وسلموا ع البنات حارب وراشد: يبلغ وسكروا الباب وقفلوه وتموا يتطالعون بعض بنظرات شيطانيه حارب: واهاهاهاهاها راشد: نياهاهاهاهاهاها حارب: الحين بنراويهن العين الحمرا ملعونات الصير راشد: خخخخخخخخخخ جنك سبيتنا حارب: هههههههههههه بدون قصد وركبوا فوق متوجهين لغرفة جوري . . . ياترى على شو ناوين حارب وراشد؟ وشو بيكون موقف البنات يوم بيعرفن انه الطلعه ويا عمهن اتكنسلت؟ واحداث كثيره اترقبوها فالجزء الرابع فالى الملتقى . . .
__________________ كل عام وانتم بألف ألف خير |
|
#15
10-22-2007, 10:13 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع (الجزء الرابع) من بعد ماركبوا راشد وحارب القسم الفوقاني حارب لراشد: انته اترياني هنيه راشد : أوكي حارب وهو يدق الباب ع غرفة جوري: جوري؟! جوري؟ فالحجره روبي: جوري الحقي أخوج يدق الباب جوري: أبيييييه! اونه نحن راقدين حارب من ورى الباب: ترى أسمعكن افتحي بالزين أحسنلج جوري وهي تتسحب شوي شوي: هااااا شو تبا؟ حارب: عمي مأيد وصل يلا نزلن (وهو فيه ضحك) جوري وهيه مستانسه: يلااااااا نشوا عمي مايد وصل يااااااي ... غلا: عباتي تحت! جوري: حتى عباتي غلا: روبي انتي عادي تطلعين جيه! سيري ييبي عبيننا من تحت روبي: أوكيك وانفتح الباب وطلعت روبي وجان يزخها راشد وسكر حلجها عن اتصرخ لأنه روبي من اتصرخ خلااااااص مايتم حد فالفريج ما يسمعها روبي وهي اتقاوم: امممممم ايييه رشوووود (ويرد يسكر حلجها) فالحجره غلا: هاي بلاها اتأخرت! أكيد سوتها ونستنا ... نذااله فيها (مايدرون انها مخطوفه خخخخخخخخخخ) جوري: خلاص أنا بنزل وبقول حق حارب اييب عبيننا وطلعت من الحجره ونزلت من ع الدري شوي شوي عسب تتأكد اذا راشد موجود ولا لأ ... وماشافت حد فالصاله اللي تحت وكملت وشلت عباتها وعباة غلا وردت ركبت فوق ودخلت الحجره: يلا غلا اتلبسي بسرررعه .. اتأخرنا على عمي مايد وظهرن من الحجره وهن مستانسات وأول ما نزلن شافن روبي تحت يالسه اتنظف وراشد واقف اف آخر الدري .. أول ما شافوه فكروا يردون فوق .. وتوهم يلفون والا يشوفون حارب واقف اف أخر الدري من فوق ... وتمن محكورات فالنص ههههههههههه جوري: اييييه نبا نظهر! حارب: ماشي ظهره! جوري: والله عمي مايد بيظهرنا واتأخرنا وايد حارب: ههاي! خلاص اتكنسلت الطلعه! لأنكن ما تستاهلن حد يفتكر فيكن ويظهركن! يلاااا جدامي هنتيناتكن ... أبا الصاله اترد نفس ماكانت! غلا: افففف والله حرااااام شو هاااااا ما نرووووم تعبانات راشد: الحين تعبانات! يوم سويتن كل ها ماكنتن تعبانات روبي من تحت: يلااااااا انزلن! ما بشتغل روحي! افففف ليتني ماييت وياكن! راشد ويحمّر لها عيونه: بس يلا بلا كلام زايد ... مابا أسمع ولا نفس! يلا بسرعه كل وحده اتشوف شغلها جوري: انزين عندنا بدل البشكاره 3 غير اليسووووه!!! حارب: هيه صح ... وأساميهن جوري وغلا وروبي! واليسوه على قولتج شيختكن! جوري: حروووب! حأرب: يلا بلا دلع ماصخ وفعلا سارن غلا وجوري يبدلن ملابسهن ويلبسن شي يناسب الشغل وتمن ينظفن الصاله وهن يتحرطمن وحارب وراشد ناقعين ضحك عليهم وكل شوي ايأشرون على مكان انه وصخ ويحتاي تنظيف جوري: والله بخبر أمايه حارب: خبرج عتيج! أمج ولا تدري عنج ... سايره تتغدا ويا سالم ريلها جوري: براااويك انته ورشود راشد وهو حده مستانس: ما تفورين دله يا بنت العم! جوري بتحدي: بنشوف! جوري وهي اترمس غلا: غلوووه الحقي استويت بشكاره صدق! غلا: جنه الله يبا يدربج من الحين على هالشغل! تتحرين السالفه هينه انتي! هاي صاله وحده وعفستنا عفاس! وين بيت كامل! أنا من رايي تتراجعين عن قرارج! جوري: شو أتراجع ما أتراجع! خلاص الحين راحت علي! (اذا فات الفوت ما ينفع الصوت اهىء اهىء اهىء) غلا وهي منقهره: الحين انتي عقب اسبوع بتستوين بشكاره! بس انا ياربيييه شو يخصني! اففففففف جوري: لازم اتحسين ابمعاناتي! وبعدين لا تغلطين! شو بشكاره! ريلج بشكار انزين! غلا: هذا الصدق بعد شووووو حارب: روبي خلاص انتي افراج تعالي يلسي! غلا: يا سلاااااام واشمعنى روبي؟! حارب: والله روبي تنظف من قبلكن .. وبعدين هي أصغر عنكن ... وانتن ساس البلا ... ولا هالبراءه (وهو يأشر على ويهها) وين اتعرف اتسوي هالمصايب كلها؟! غلا وهي خلاص واصله حدها: أمحق براءه! روبي وهي مستانسه لأنهم عفوا عنها: اشتغلي اشتغلي! الله وأخيرا الله راواني فيج يوم راشد وهو يضرب روبي على راسها: جب انتي! نحن بس اللي نتأمر ! لا تخليني أضمج وياهن الحين! روبي: اففف انزييييييين غلا: تستاهلين وعقب ما خلصوا وتقريبا ردت الصاله نفس قبل كل وحده منهن فرّت عمرها ع القنفه .... جوري: آآآآآآآآآآه خلااااص انتهيت غلا: أبا أرقد جوري: أحس اني يوعانه غلا: حتى أنا حارب وهو مستانس على عمره واف نفس الوقت كاسرات خاطره بس يستاهلن: مع اني مب راضي عن مستوى الشغل وايد بس يلا مجهود تشكرن عليه غلا وجوري وهن معصبات وحسن انهن عطنه ويه وايد ... جان ينشن ويفرن عليه مخده وعلى طوووول ركبن فوق ودخلن قسم جوري وقفلن الباب حارب وهو منصدم: مقواهن! راشد: ههههههههههههه .... حرااااااام أحس اشتغلن شغل اليهد حارب: ههههههههههه ... خل يتسنعن شوي واتصل حارب اف بيتزا هت وسوالهن طلبيه مكافاة ع الشغل اللي اشتغلنه ويوم وصلت الطلبيه شلها وحطها عند باب قسم جوري ودق الباب ونزل تحت ... وعقب طلع ويا راشد المسيد عسب يصلون العصر ويخلصون أشغالهم اف حجرة جوري غلا يالسة اتنشف شعرها من عقب السبوح واترمس جوري اللي بعدها تسبح من ورى الباب: جوري؟ جوري وهي غرقانه بالماي والصابون: نعم غلا: نعامه ترفس اللي ما يحبوننا ... توني سمعت دق ع الباب جوري: لا تفجييييين لو شو ماصار! غلا: بس الدق كان محترم جوري: لا ما عليج ...! هالبيت خدعه .. لا يغرج! غلا: جوجو .. يالسه أشم ريحة مارجريتا امممممم يمي يمي جوري: من وين؟! الظاهر اليوع مأثر عليج! غلا: والله صدق! وجان اتسير واتفج الباب وتتفاجأ بالبيتزا مع السلطه والبيبسي! واتصرخ: يااااااااااااااي .. الحقي جوجو جوجو وهي لابسه الروب وتوها طالعه من الحمام: بلاج بسم ال... (وقبل لا تكمل شافت البيتزا) جوري: يا ويلي ويلاااااااه يوووووعااااااانه غلا وهي اتشل البيتزا للصاله الداخليه: هزرج منو اللي يابه؟ جوري: علمي علمج .. بس أظن هذيل حروب ورشود ... أكيد حسوا بالذنب وسارت جوري اتصلي العصر وجففت شعرها وانتقلت للصاله ... وتمن يتغدن ... ويتطالعن تيلفزيون ... وماحسن بعمارهن من التعب ورقدن على وضعياتهن وأشكالهن اتفطس من الضحك وصّل بوجوري أم جوري البيت وسار يكمل أشغاله ويوم دخلت الصاله حست البيت هادي ... كأنه مافيه حد أم جوري: ويديه! وينهم؟! ليكون خطفوا عيالي؟! وتوها بتركب الدري والا اتشوف اليسا جدامها ... وكالعاده عطتها تقرير مفصل عن كل شي صار أم جوري: هذا كله استوى وانا محد؟! اليسا: Yes ماما أم جوري: ويه يا فضيحتيه! امشغلين غلا وروبي! وجوجو ما تقهر الشغل يا ويلي عليكن! وهذا حارب حاط راسه براس هالبنيات !! (وتمت تتحرطم وهي تركب الدري لين ما وصلت الصاله الفوقانيه .. وجان اتشوف البلي اشتيشن شغال وروبي راقده حذاله وشكلها يضحك ويعور القلب اف نفس الوقت لأنه حجمها ضئيل شوي) أم جوري وهي تتقرب من روبي وتمسح ع شعرها واتقول افخاطرها: الحين هاي الصغيرونه ويه شغل! وعدلتها اف رقدتها ومشت صوب غرفة جوري وحصلت الباب مفتوح ودشت وهي تسمع التيلفزيون شغال ويوم سارت صوبه والا اتشوف غلا منسدحه ع القنفه ورايحه اف سابع ونومه وجوري نصها فوق ونصها تحت وبعد مب داريه بعمرها وسارت وسكرت التيلفزيون وعدلت جوري ولحفتهن وظهرت عنهن واتقول افخاطرها: ويه فديتهن ..الا أهزبهم رشود وحروب ... هاييل بنات ما يقهرن الشغل (ام جوري وايد حنونه ... وخاصه ع البنات ... لأنها اتعرف انهن مخلوقات رقيقه ... ومحتايات للدلع .. بينما الشباب يسدون عمارهم ... وهالشي غريب .. لأنه المتعارف عليه ان الأم اتميل للشباب أكثر والأبو للبنات ... بس اف هالعايله الوضع مختلف خاصه مع ام جوري) ومشت أم جوري لين حجرتها عسب اتريح شوي ... وأول ما دخلت شافت صورة جماعيه تجمعهم كلهم يوم كانوا اف سويسرا وبالتحديد في جنيف قبل 3 سنين ... وتمت تتأمل عيالها وريلها ... وتحمد ربها ان الله رزقها بزوج مثل سالم ... وعيال ينرفع بهم الراس ... وقالت افخاطرها: الحين اتطمنت على جواهر ... يالله اتبلغني اف حامد وجوري وحارب وأشوفهم مستانسين وتمت تتأمل صورة حامد بجرها وأول فرحتها: يالله فديتك شكثر اشتقتلك ... يلا هانت شهر وبنيك انشالله ... عقب ما اتخلص جوجو من المعسكر (جوري ما كانت اتعرف انهم بيسيرون أول شي أستراليا عسب يشوفون حامد اللي صدق اشتاقوله ... لو كانت تدري ... كانت بتطير من الوناسه ... حتى حامد روحه مايدري ... أحسن خلوها مفاجأة) وعلى هالأفكار حطت راسها شوي ورقدت يتبع
__________________ كل عام وانتم بألف ألف خير |
|
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| أروع قصص الحب | قتيبة الهيتي | نور الإسلام - | 19 | 09-25-2007 10:05 PM |
| من أروع الرسائل في سيرة نبينا المصطفى محمد عليه أفضل الصلاة و أزكى السلام | ياسين | نور الإسلام - | 10 | 02-27-2007 03:35 PM |
| كلما أحزنكى زوجك أذهبى الى حبيبك | شمس مصر | نور الإسلام - | 6 | 07-13-2006 08:25 PM |
العرض العادي
