|
| |||||||
| قصص قصيرة قصص قصيرة,قصه واقعيه قصيره,قصص رومانسية قصيرة. |
 |
| | LinkBack | أدوات الموضوع | انواع عرض الموضوع |
|
#21
10-22-2007, 10:31 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع لا تقول انك شبيه الورد لا قول ان الورد ماخذ من حلاك انت أحلى حتى من كلمة حلا انت حتى الورد يتمنى رضاك لك تفز الروح واتنادي: هلا سيّد احساسي عسى كلّي فداك هزّ زينك عرش قلبي واعتلا مستواك ومنهو يوصل مستواك؟! شوق قلبٍ يحترق لجلك غلا ما يهمّه لو يرمّد من غلاك شوف شخصٍ حبّ عينك وابتلا يمشي في دربك ولو دربك هلاك لي عيونٍ ما ترى غيرك ملا كنّ زين الناس سبحانه عطاك لو تغيب! النور عن وجهي سلا وانطفا .. لين أستمده من ضياك وقال: آآآه ,,, أسميك ييت ع العوق يا أنور ,,, صح لسانك ولا هنت هاي كانت نظرة راشد لبنت عمه جوري اللي أكيد حُبها اف قلبه خلاها اتصير ف عيونه أحلى وأحلى (الحب يخلينا انشوف اللي انحبهم بصورة ملاك) وتذكر راشد دموعها وهي اف وسطهم الليله الماضيه وحس بألم يعتصر قلبه: ليته فيني ولا فيج يالغلا ,,, الدموع ما انخلقت لج ,,, انتي انولدتي عشان تبتسمين وبس ,,, خلي الدموع لغيرج يا فرحة دنيأي راشد طول عمره ويا حارب ولكن شخصيته تختلف عن حارب 180 درجه ,,, ويمكن هالشي اللي جمعهم انهم غير عن بعض (الاختلاف يولد التجاذب) اللي ما يعرفهم يظن انهم نسخه طبق الأصل ,,, لكن اللي يتقرب منهم يشوف مدى الفرق بين الاثنين ويقدر يميز سمات كل شخصيه على حده ف راشد انسان رومانسي وايد واحساسه مرهف ,,, صح انه راعي سوالف بس مب مثل حارب ,,, حارب منطلق أكثر وفيه استعداد انه يعبر عن اللي افخاطره ويظهر مشاعره ويمكن لاحظتوا اف مواقفه مع غلا أو حتى يوم يرمس عنها أو تنذكر جدامه ,,, فهو ما يكبت نفسه وهاللي يخليه مفضوح بالنسبه لغيره ,,, على عكس راشد اللي متولع بجوري ومحد يدري عنه حتى أقرب الناس له بسبب طبيعته الكتومه ,,, بس اتظل هاي شخصيته وسمه من سماته راشد اللي ما تكلمنا عنه وايد ,,, وما اتسعت له سطور القصه فالبدايه ,,, يا اليوم عسب يعبر عن نفسه راشد شخصيه تستحق الوقوف عندها فهو يمتلك سمات نادر ما يمتلكها اللي اف مثل عمره ,,, فهو صبور جدا وهادي لدرجه اتخلي الناس ينعتونه بالبرود ,,, بس هالشي ما يهزه أبدا ,,, فهو عارف نفسه من البدايه ,,, وواثق بقدراته ومعتد بنفسه ,,, بروده هو ستار رجولي يميزه عن غيره ,,, فهو حليم لأبعد الحدود وحلمه هو مصدر احترام الناس له ولكن مثل ما يقولون دايما (احذر الحليم اذا غضب) فيتحول من جبل الجليد الى بركان ثائر (الله لا اييب هاليوم ان شاء الله) اللي يكلم راشد ويتعمق اف شخصيته يعطيه أكبر عن سنه ,,, فهو أبعد ما يكون عن التهور ,,, ولازم يكون عنده سبب للشي اللي بيسويه ,,, يعني مستحيل يدخل مغامرات ما يعرف عواقبها (على عكس جوري) سبحان الله راشد هو دايما الملجأ لحارب ,,, فحارب يوم يتضايج ما يلقى حد ممكن يفهمه كثر راشد ,,, فهو يسمعه ويعطيه الفرصه انه يفضفض عن اللي اف خاطره ومن عقبها يوفرله الحلول ,,, والأهم من كل هذا فهو صريح ,,, ما يتواني أبدا عن توبيخ ربيعه في حال شافه يغلط ومثل ما يقول المثل (صديقك من صدَقَك لا من صدّقك) وانت نعم الصديق يا راشد! راشد وحارب ثنائي رائع يكملون بعض ,,, ففي نقص الأول كمال للثاني ,,, وفي نقص الثاني كمال للأول ,,, ثنائي الماء والنار ,,, الهدوء والفوضى ,,, الحلم والغضب ,,, الرويّه والتهور نصفان كلاهما يكتمل بالآخر راشد خريج جامعة ملبورن ,,, درس قانون وأول ما رد كانت وظيفته جاهزة فالنيابه بمنصب يستحقه عن جداره من بعد سنوات الغربه ,,, على عكس حارب اللي فضل انه يكمل دراسته فالبلاد عسب يكون قريب من أهله يعوضهم غياب حامد المستمر كونه طيار ,,, فالتحق بالجامعه الامريكيه فالشارجه واتخصص فال Banking وهذا هو يشغل منصب كبير اف واحد من أرقى البنوك على الرغم من صغر سنه فكانت هالسنوات ال 5 اللي قضاهن راشد فالغربه هي الفتره الوحيده اللي ابتعد فيها عن البلاد وعن صديق عمره حارب ,,, وهالخمس سنوات هي اللي حولت جوري من طفله الى أنثى ,,, اتفاجأ فيها راشد وفز لها قلبه يوم رد البلاد هاي كانت مشاعر راشد ,,, ولكن فالمقابل شو هي مشاعر جوري تجاهك يا راشد؟ وهل هي حست بحبك ولا كتمانك حجب عنها مشاعرك الفياضه؟! وأذن الفير وراشد بعده مجافنه النوم كيف ينام وهاي آخر ليله اتضم فيها هالمدينه الانسانه اللي عشقها بكل احساسه! صح انها اف بيت وهو بيت ,,, لكن اتضمهم مدينه وحده ,,, يشمون نفس الهوا ,,, وهاللي كان يصبر راشد على بعد جوري ,,, فهو كل ما يتطالع القمر يحس بقرب محبوبته ,,, ف هالقمر اللي ينير ليله ,,, ينير ليلها بعد ,,, والأرض اللي تضمه تضمها ,,, والهوا اللي يشمه اتشمه ,,, لكن مب من بعد هالليله!! مسكين حالك يا راشد ,,, حتى ما عندك حد اتفضفضله ,,, الله يصبرك اف هالشهر ونش راشد عسب يتمسح ويسير المسيد يصلي وأول ما ظهر من حجرته شاف أبوه اف ويهه وقال: صبحك الله بالخير أبويه الأبو: بالنور والسرور ,,, بارك الله فيك ,,, يلا خل نلحق ع الصلاه وساروا المسيد بخطوات يحفها الرحمن وفي أجواء روحانيه رائعه ,,, قلوبهم خاشعه وألسنتهم لا تكف عن ذكر الخالق وصلوا المسيد وثواني ويقيم الامام ويبدون الصلاه ومن عقب الصلاه يلس راشد يدعي ربه انه يصبره ويحفظ بنت عمه واتكون من نصيبه وحس براحه من عقب الدعاء كيف ما يحس بالراحه وهو دعى خالق الكون (اني قريب اجيب دعوة الداعي اذا دعاني) سبحانك يارب كان بو راشد يقرى قرآن ومن عقب ما خلص التفت حق ولده راشد لأبوه: تقبل الله الأبو وابتسامة رضى ما اتفارق محياه: منا ومنكم صالح الأعمال يا ولدي ونشوا يردون البيت ودخل راشد غرفته وهو يحس باحساس حلو واستسلم للنوم ... أما بو راشد فسار يتريق ويقرى الجريده ومن عقبها بيطلع عسب يباشر أشغاله . . وهاي هي الليله تنقضي ,,, ويطل الصباح على شارقة الجمال ويضيف لها سحرا فوق سحرها وماهي الا ثوان ويرن المنبه على الساعه ال 8 وبحركه عفويه اتسويها جوري دايما ,,, مدت ايدها وسكرت المنبه وردت اتكمل أحلامها بعمق ونست انها لازم اتنش لأنه في حلم لازم يتحقق بس مب فالرقاد ,,, حلم انولد اف أرض الواقع
__________________ كل عام وانتم بألف ألف خير |
|
#22
10-22-2007, 10:36 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع فالصاله الفوقانيه كانت أم جوري واعيه على غير العاده ,,, من صلت الفير ماياها رقاد وهي اتفكر اف جوري وتمت تدعي ربها انه يحفظ لها بنتها الصغيره ويردها بالسلامه ,,, وعقب نشت اتشوف بنتها وتمت اتدق الباب وجوري خبر خير ,,, ماشي رد ,,, لأنها رقدت اف وقت متأخر وهي اتفكر اف مليون فكره وأصلا جوري رقادها ثجيل ,,, فما بالكم انها راقده اف وقت متأخر والبارحه كان صدق يوم حافل بالنسبه لها ,,, فكانت مب حاسه بالدنيا وعلى صوت أم جوري وهي اتوعي بنتها الكسوله ,,, ظهر حارب من قسمه وهو لابس وزار وفانيله: بسم الله بلاج أمايه؟! أم جوري: أختك مب طايعه اتنش واتأخر الوقت حارب: ما عليج انتي سيري ,,, أنا بوعيها وفعلا ,,, ثواني وجوري فاتحه الباب وشكلها يكسر الخاطر ,,, شعرها نصه عويهها وبيجامتها مجلوبه هههههههه (شكلها داشه مصارعه وهي راقده) وتتطالعه بنظرات بريئه حارب وهو متلوم فيها: صباح الخير يالورد جوري وتوها مستوعبه انه الصبح ووو تمت اتجلب اف مخها وفجأه اتذكرت المعسكر! وبحركه سريعه دشت الحجره وسكرت الباب بقو ع ويه حارب المسكين بدون حتى ما اتصبّح عليه! (هههههههههه ,, خيرن تفعل ,, شرّن تلقى) وحارب واقف مكانه مستغرب منها ,,, توها تتدلع وتتطالعه وفجأه نطت,,, سكنهم في مساكنهم! لا شكلها البنيه صدق استخفت وتوه بيلف الا ويشوفها ردت تفتح باب حجرتها بحركه سريعه وجان اتفر عليه ملابسها وبصوت كله ترجي: حرووبي ,,, بليييز بسرعه خل البشكاره تكويلي ملابسي! اتأخرت أنا بسير آخذ شور وانته بعد اتلبس ,,, يلا بلاك واقف؟! ودشت حجرتها مرة ثانيه (حارب هو اللي كان بيوصل جوري الكليه ,,, لأنها طبعا ما بتسير بسيارتها وهي بتغيب هالمده كلها) وتوه حارب يستوعب هالكم الهايل من الأوامر اللي أطلقتها جوري اف لمح البصر وسار يزقر البشكأره ومن عقبها دش ياخذ شور ويتلبس عسب يوصل ست الحسن والجمال عن تتأخر وتستوي سالفه وجوري كانت صدق مرتبشه ومب عارفه بشو تبدى ,,, وقررت اتدش تاخذ شور سريع وأثناء الشور بتفكر (صدق يوله هالبنت ,,, كله متحمسه وبس!) اف هالأثناء كانت غلا فالسيارة ويا راشد متوجهين صوب دار الخل ,,, أقصد صوب بيت عمهم على حسب أوامر الأخت غلا ,,, لأنها تبا اتودع جوري واتكون وياها لي آخر لحظه ,,, وطبعا راشد ماصدق خبر وعلى طول نفذ لها اللي تباه عسب يجحل عينه اف غناته قبل لا اتودرهم ونسى انه مب راقد الا من عقب صلاة الفير ,,, بس عشان عين تكرم ألف عين! فالطرف الثاني جوري مرتبشه من الخاطر كل شوي حد يدقلها مره منى ومرة مها واتسكر عن مها اترد منى اتدق وهي مب عارفه شو اتسوي ابعمرها ,,, بس آخر شي انفجرت فيهن وقالتلهن: بس خلاص محد يتصلبي! يوم بخلص روحي بدقلكن وسكرت عنهن! واتقول افخاطرها: حشرني! ماين الا بالعين الحمره وبدت اتنظم أفكارها ولبست بنطلون جينز مع توب أسود وحطت ميك أب وايد خفيف ورفعت شعرها بكليب أسود ناعم وبطبيعة شعرها الناعم نزلن كمن خصله من الكليب وانسدلن على ويهها وكانت قمه فالنعومه تمت اف نص الحجره اتفكر (الحين هذا وقته يا جوري ,,, يلا بسج اتأخرتي) وانتبهت على عمرها وقالت اف خاطرها: ياربيه شبلاني اليوم؟! احس اني مب صاحيه اتعطرت واتذكرت ان عباتها عند البشكاره ما يابتها فظهرت من الحجره ودقت ع الانتركول بس للأسف محد رد ,,, فاضطرت تنزل تحت واتيب عباتها وهي تتحرطم: ياربييييه يا اليسوه؟! ألاقيها من وين ولا من وين؟!! وهي نازله ما انتبهت لغلا وراشد اللي يالسين تحت وكملت دربها لغرفة الكوي وراشد فاج ثمه وغلا قالت: أبيه بنت عمي استخفت حتى ما شافتنا! وراشد سوى عمره مب مهتم بس دقات قلبه طبول ويقول اف خاطره: أسميج ناويه عليه يا بنت العم ,,, كم بعيش انا ,,, ليتني ما طاوعت غلا ,,, الحين عقب ما شفتها كيف بفارقها؟ وجان يرمس غلا وهو يتصنع البرود: الحين مزعزعتنا من صباح الله خير ,,, وداشين ع الناس جذه غلا تتطالعه وهي مستنكره: أي ناس؟! أيه رشود (واتحط ايدها على يبهته) انته صاحي؟! ها بيت عمي سالم اذا كنت ناسي! ومن شوي حرمة عمي كانت عندنا وشافتنا واستانست! بلاك استخفيت؟! راشد: خلاص انزين! ما تسوى عليه هالجمله كلتيني بقشوري وف هاللحظه جوري كانت طالعه من غرفة الكوي ولابسه عباتها وحاطه شيلتها على جتفها وتوها بتركب الدري والا اتلف واتشوف بنت عمها جان عيونها تدمع وهي اتسير صوب بنت عمها: غلوووووووووه (ويلوون ع بعض شرات السيلانيات هههههههههههه) ومن فرحتها بغلا حتى ما انتبهت لراشد اللي كان فيه حفوز مب طبيعي ومب عارف وين يشل بعمره ,,, يعرف انه وجوده غلط لأن جوري كاشفه عن شعرها واف نفس الوقت ريوله مب مطاوعتنه انه يودر المكان وجوري موجوده فيه ,,, وتم منزل راسه عسب يمنع نفسه يشوفها ويسترق النظرات غصبا عنه ,,, هو نفسه ما يرضى عليها بس يحبها ياناس ومب قادر يتحمل أكثر! وتوها جوري اتفيجت تسأل غلا اللي هي الثانيه مب داريه عن شي ونست أخوها المسكين: ما قلتيلي غلا ويا منوه يايه؟! وتوها غلا تتذكر: ويييييييي جوري لبسي شيلتج راشد وراج (ههههه لا والله تو الناس! ) وراشد كان يبا يصفعها لأنها خربت عليه هاللحظات الحلوة والنادره وهو يتأمل هالمخلوقه اللي سرقت روحه منه! جوري لفت بسرعه واتشوف راشد بنظرات ذعر وجان تشرد للصاله الثانيه وعدلت شيلتها وغلا وياها وعقب ردت للصاله اللي فيها راشد واتجدمت منه بكل هدوء ولا جنها توها كانت مثل المخبل جدامه: صباح الخير رشود راشد اف خاطره ياويلي حالي رشود بعد: صباح الجوري ,,, هاااا شو هباتج؟! (جوري متعوده اتسمي راشد رشود مثل ما اتقول حق حارب حروب ,,, بس اليوم راشد مب طبيعي ,,, يسمع منها كل حرف كأنه يسمعه لأول مرة) جوري بعد تفكير: اممممممم مادري والله ,,, مستانسه ومب مستانسه ,,, بس يلا شي يديد وعقب لفت ع الساعه وكانت 9 وربع وجان تشهق: أبيييييه ماشي وقت خل الحق وسحبت غلا وياها عسب تركب فوق وهي اتقول: عن اذنك راشد راشد: أفا عليج وتم يالس وهو سرحان شوي ويلعب اف تيلفونه وجان ينزل حارب اف هاللحظه: له له له ,,, شو هالصبح الحلو من أوله؟! بوسنيده اف بيتنا؟! راشد وهو مستانس من ترحيب ولد عمه كأنه يتريا حد يرفع من معنوياته شوي: هههههههه هلا وغلا بو فلاح ,,, هاي غلا الله يهداها موعتني من الصبح أونها تبا اتكون ويا جوري فاللحظات الأخيره لوووول وحارب يلتفت لا اراديا وكأنه يدور غلا: عيل وينها؟ راشد فوق عند أختك أظن فالحجره يرتبن الأغراض حارب: هاي بعدها؟! تراها اتأخرت وبيروحون عنها! وعلى هالرمسه كانت اليسا نازله من الدري وهي شاله شنطة جوري ووراها البشكاره الثانيه كوكي وشاله شنطه ثانيه ومن عقبهن نزلن غلا وجوري وأم جوري وأبوها ونش راشد يسلم على عمه: صبحك الله بالخير عمي بو حامد: صبحك الله بالنور والسرور ولدي ,,, شكلها غلا ما خلتك ترقد واليوم اجازتك راشد: لا أفا عليك عمي ,,, كم جوري عندنا (قالها بكل تلقائيه) ابتسمله بوحامد وحتى أم حامد وكانوا يشوفونه بفخر ,,, فعلا راشد ريال ولا كل الرياييل بوحامد: ما تقصر يا ولدي فيك الخير أم حامد: ترى راشد ولدنا وهذا بيته متى ما بغى ايينا حياه الله استحى راشد من حرمة عمه اللي يعزها شرات أمه وماقد شاف منها الا كل خير حارب وهو يدق راشد ع أيده: طبعا انته مستانس؟! منو قدك؟ الشواب راضييين عنك أم حامد: خل ولد عمك اف حاله لا تطفربه جوري وهي متملله: بتمون وايد على هالحال ,,, تراني اتأخرت! حروبي! مادريتبك هالكثر مذله؟! كل ها عسب طلبت منك اتوصلني؟ حارب: طاع هأي! أولا انتي ما طلبتي أوصلج! أنا اللي قلتلج ,,, وثانيا وهو الأهم ,,, أنا متزهب من زمان وانتي داقه سوالف ويا بنت عمج جوري وهي تتهرب كالعاده وما تبا تعترف انها الغلطانه: انزين عيل يلا سرينا جوري: هيه صح ,,, غلا بتي وياي لين الكليه حارب: فالكن طيب يلا جدامي! وشوي ويتذكر انه بينزل جوري وبيتم روحه فالسياره ويا غلا وحس انه شكلهم بيكون غلط واف نفس الوقت حسها فرصه نازلتنله من السما وجنه راشد قرى أفكاره وحب يتدارك الموضوع: خلاص عيل أنا بعد بيي واتطالعه حارب بنظرة ماعرفها راشد اذا كانت نظرة امتنان ولا امتعاض بس اف كل الأحوال طنش حارب وكل تفكيره منحصر اف شي واحد بس هو انه بيتم ويا جوري لآخر لحظه وخطف يتجدمهم لسيارته البورش كايين السودا وفتح الدبه عسب يحطون فيهن أغراض جوري بو حامد وأم حامد مشوا لين الكراجات عسب يوصلون جوري وهم يوصونها على عمرها وكل شوي يسئلونها اذا نست شي ولا لأ ,,, وحرّصوا عليها أول ما توصل اتدقلهم اتطمنهم ,,, وهي اتهز راسها اشاره على انها موافقه على كلامهم وسلموا عليها ودمعت عيون جوري لأنها اتأثرت يوم شافت امها اتصيح ولوت عليها وعقب لوت على أبوها حبيبها ,,, واليسا بعد كانت واقفه وياهم واتصيح ,,, (تراها عادّه عمرها من العايله الكريمه هههههه) ولوت على جوري وقالتها ما اتسوي مشاكل فالمعسكر هههههه وضحكت جوري على كلامها وحست لحظتها انها بتشتاق حتى لأليسا اللي دوم تتناقر وياها ,,, وعقب ركبت ورى أخوها حارب واتحركت السياره وابتعدت عن حدود البيت وهي شاله روح البيت معاها ,,, جو السياره كان يعمه الهدوء ,,, كانت جوري اتمش دموعها ,,, وكان راشد يراقبها من المنظره بدون ما اتحس (اتعمد راشد يوصلهم بسيارته ,,, عسب يشم ريحتها فيها ويتم يتذكرها وحلف ما يغسل السياره شهر كامل عسب اتم آثار حبيبته عالقه فيها ولا حتى بيخلي حد ييلس المكان اللي يلست فيه جوري) حتى حارب اللي دومه يستهبل كان هادي هالمرة على غير عوايده وسرحان يطالع الشارع ,,, وحس لحظتها راشد كيف حارب متعلق بخته واستانس من هالشي ,,, فهي تستاهل انه الكون كله يحبها ولكنه بعد يغار ,,, يباها حقه وبس! (هههههه هاي هي أنانية الحب) كانت الساعه 10 الا ثلث ,,, وتيلفون جوري ما سكت مول ,,, كل شوي حد يتصلبها ويسألها وينها وهاللي خلاها تتنرفز بزياده وكرهت عمرها فاللحظه اللي فكرت فيها اف هالخطه المينونه! راشد حس بهالتوتر فحب يغير مزاجها ويضيف جو ثاني ع السيأره وهاي فرصته يمكن اتحس فيه ,,, فدوّر فالدرج وظهر سي دي منوعات هو مسونه ومختار أكثر الأغاني اللي يحبها ,,, وشغل السي دي على أغنية ,,, (أوعدني) للفنان عادل محمود ,,, وبدى لحن الأغنيه يملى أجواء السياره ويكسر جدار الصمت ,,, وبعدها بدت كلمات الأغنيه تتغلغل لمسامعهم وتحرك أحاسيسهم ,,, وسرحوا كل اللي فالسياره بكلمات الأغنيه اللي اتشد أي شخص ,,, أوعدني عني ما تغيب تبقى هنا جنبي قريب محتاج أنا مثلك حبيب يفهم عيوني وضحكتي <<< (عند هالمقطع بالذات ,,, رفعت جوري راسها بحركه تلقائيه والتقت عيونها بعيون راشد من المرايه وحست بشي غريب ولكنها ابتسمت ممتنه لأنه يحاول قد ما يقدر يغير مودهم أما راشد فكان أشبه بشخص سكران ,,, يحس انه عاشق حتى الثماله ,,, يعشق كل شي فيها) ونزلت عيونها وهي اتعيش عالم ثاني من السرحان والأغنيه بعدها تصدح فالسياره بكل رومانسيه وحالميه فيك انته حلمي من زمان وانته الهوى وأدفى حنان تلقى معاك روحي الامان يا أحلى بشر في دنيتي وحدك أبيك والله أبيك أبيك بس تكفى طمني عليك مابي احد احد يشغل عينيك مابي احد يشغل عينيك وأموت أنا من غيرتي !!!!!!!! (عند هالمقطع اتنهد راشد وحس فيه حارب بس سكت ,,, فعلا راشد يحب جوري حب جنوني ,,, وأكثر شي يتمناه انها اتكون له وله روحه بدون ماحد يشاركه فيها ,,, فهو يحس انه هو الأحق ابها ومحد غيره) وكلمات الأغنيه مازالت مستمره ,,, وجوري اف عالم ثاني محد يدريبه غير رب العالمين خذني معاك يا أحلى ملاك خلني أنا أحيا بغلاك حياتي من دونك هلاك وحدك حبيبي وجنتي فالكليه منى لمها: جوجو اتأخرت وايد ,,, باقي عشر دقايق وبيتحرك الباص مها: هيه والله ,,, خل نتصلبها منى: لا مافيّه ,,, اليوم شكلها معصبه مها: انزين بنتريا شوي وان ما يت أنا بدقلها منى: أوكي . . اف هالأثناء كانت جوري توها واصله المدينه الجامعيه وجان تلتفت على غلا ,,, وغلا بعد حست ابها والتفتت اف نفس اللحظه جوري: أحبج غلوه وبشتاقلج واااايد واتقربت جوري من غلا ولوت عليها واشتغل الونان عاد حارب الحين اشتغل التغليس عنده: ايهااااا! بسكن يالسيلانيات! اللي يقول بتهاجر الحين؟! الا هي العين فرة حصا (يقول هالكلام بس من ورى خاطره عسب يهون عليهن السالفه ,,, هو روحه مضايج أكثر عنهن) حارب لغلا: متى ما بغيتي اتشوفين هالسلعوة بناخذج أنا وراشد العين (طبعا كان يمزح ,,, لأنه حتى لو ساروا العين ما بيشوفونها فهي على حسب علمهم بتكون فالمعسكر) بس غلا بسذاجه وبدون ما اتحس من الفرحه قالت: فديتك حارب صدق؟ وحارب قفط وتم قلبه يدق من جملتها وتم يرددها اف باله (فديتك حارب فديتك حارب فديتك........ آآآآآه) راشد اتدارك الموضوع وحس باحراج من تصرف أخته: ان شاء الله ان شاء الله ,,, يلا الحين لا تأخرين بنت عمج (يقولها من ورى خاطره ,, ولو الود وده اتم وياهم على طول ,, بلا معسكر بلا كلام فاضي) وجوري لراشد: مشكور راشد تعبناك راشد وهو متشقق: أفا عليج ,,, تعبج راحه يالجوري جوري: تسلم ,,, ماوصيك على حروبي وغلوووه راشد افخاطره: آآآآه منج يا جوري ,,, وأنا ما بتوصين حد عليه؟! ولا مالي غلا اف قلبج؟! راشد لجوري: ولا يهمج ف عيوني ,,, وطمنينا عليج لا تنسين جوري: ان شاء الله واف هاللحظه دخلت سيأرة راشد من بوابة الكليه واتجهت صوب موقف الباصات وين ما كانن منى ومها واقفات منى لمها: مهووه الحقي طالعي هالبورش محلاها مها: هيه والله يسد رقمها وشوي بركنت السياره قريب منهن منى: يا ويل حاليه ,,, هزرج أعجب فينا وياي يخطب؟! مها: ههههههههههههه ,,, عاد انتي اشدراج منو داخل هالسياره يمكن هندي منى: خخخخخ هندي راهي فالسياره جوري لغلا وهي تتطاله مها ومنى من الجامه المخفيه: هاييل مها ومنى ربيعاتي غلا: ماشالله ,,, منى غاويه جوري: هيه فديتها راشد اف خاطره: في وجود جوري ,,, ماشي بنيه غاويه حارب: ماشالله شكلهن وايد يحبونج ,,, شوفي كيف يتطالعن السياره يبنلج تنزلين (المسكين ,,, ما يدري انهن مستقطعات ع السياره وما يعرفن انها سيارة جوري) ونزل راشد من السياره عسب ينزل أغراض جوري ونزل وياه حارب مها: منوووه الحقي شوفي محلاه منى: انتي شوفي هذاك الثاني وقصدها حارب صدق انه رحيم قلتلج يايين يخطبون ,,, واحد لج وواحد لي (طبعا سوالف بس ههههههه) وشوي وتنزل جوري من السياره ووياها غلا جوري وهي اتسلم على ربيعاتها: مرحبا ,,, سوري اتأخرت منى: هاااي انتي! هههههههههههههههههه ونحن من الصبح مستقطعات جوري: هيه أشوفكن ,,, حتى حارب يقوللي انزللي شكلهن يترينج من الصبح ,,, أنا أدري انكن ما اتعرفن اني أنا فالسياره بس سترت عليكن ههههههه مها: حرام انه نترياج من السأعه 9 جوري: ههههههه أدري فديتج منى: اف ذمتج؟ هذا حارب اخوج؟! جوري: ههههههههههه عيبج؟! خلاص حلال عليج منى وويهها محترق وخاصه انه غلا موجوده وهن مب متعودات عليها: عن الحركات جوجو ,,, تدرينبي اسولف جوري وهي تأشر على غلا: هاي بنت عمي غلا وتوأم روحي منى: وأخيييرا شفناج ,,, جوري ماعندها سالفه الا غلا وغلا ,,, غلا راحت وغلا يت ,,, حتى احيانا أغار منج ههههههههههه وضحكت غلا وقالت: والله حتى هي ترمس عنكن انتي ومها وايد وحتى أنا بعد أغار أحيانا جوري بشطانه: ألعب ع الحبلين ههههههههههه وضحكن كلهن وعقب هالتعارف السريع اللي ما استغرق الا دقايق ودعت جوري بنت عمها وعقب سارت صوب اخوها ولوعت عليه وهو بعد لوى عليها بكل رجوله وحنان ومنى تتطالعهم واتقول افخاطرها: ياويلي عليه كيف حنون ,,, الله يحفظه ان شاء الله وراشد عيونه ما فارقت جوري لحظه وحده واف خاطره لو كان مكان حارب اف هاللحظه ومحد لاحظ نظرات راشد لجوري الا مها ,,, لأنه من نزل من السياره وهي معجبه بهيبته وشخصيته وحسته جنتل ,,, وقالت افخاطرها: معقوله راشد يحب جوري؟! بس جوري ماتيب طاريه مول ,,, يلا مع الأيام كل شي بيتوضح ,,, واذا كان فعلا يحبها فالله يسعدهم ,,, لأنه جوري وايد فنانه وراشد امبين عليه ريال وينشرى بفلوس غلا لاحظت نظرات مها لأخوها راشد واتضايقت شوي ,,, لأنها ما اتعرف مها وما كانت اتعرف تفسير هالنظرات ,,, لكن اللي يعرف مها عدل بيعرف ان نيتها صافيه وهذا غير ان مها محيره لولد عمها يعني لو شو ما صار ,,, فهي ما بتفكر اف غيره مب حبا فيه! لكن تمسكا بهالعادات الغريبه اللي تجبر البنت ما اتكون الا لولد عمها لأنه بنظهرهم أحق ابها (معقوله في ناس جي ونحن وصلنا القرن 21؟ ,,, للأسف هيه ومها أكبر مثال) لكن غلا ما كانت تدري انه مها محيره لولد عمها وهالشي اللي خلاها تتضايق من نظرات مها لأخوها راشد (شيخ الرياييل) مثل ما اتسميه دايما مسكينه يا مها فهموج غلط ,,, بس الأيام بتوضح كل شي حارب كان يوصي جوري على عمرها ونظرات منى ما فارقتهم ومن عقبها ,,, راشد سلم عليها ووصاها على عمرها ,,, وركبوا السياره وعقب يت غلا ولوت على جوري (هالوداع اللي ما بيخلص ,,, فوق ال 100 مرة مسلمات ع بعض ,,, لا تلومونهن ,,, شهر مده مب قصيره أبدا ,,, خص انه غلا اتعرف شو بيواجه جوري اف هالفتره) ومن عقبها ركبت غلا السياره ونزلت الجامه عسب اتشوف جوري واتحركت السياره عقب زلزال المشاعر اللي صار واللي ما خلا حد اف حاله راشد اللي حس انه ودع روحه وصار جسد بليا روح ,,, وغلا اللي اتحس ان الحياه شاحبه بدون بنت عمها وأختها وربيعة عمرها ,,, ومنى اللي من شافت حارب حست بمشاعر غريبه هي نفسها مب قادره اتفسرها ,,, ومها اللي حست بالظلم لأنها حتى ما تملك قرار اختيار شريك حياتها وانجلبت عليها المواجع ,,, وأما حارب فيحس انه ما يبا يرد البيت مووول ,,, لأنه ماله طعم بدون جوري! (كلن يغني على ليلاه) ومن عقب ما ابتعدت شيارة راشد عن مدى نظرهن ,,, التفتت جوري لربيعاتها: آآآآآآه أحس باحساس غريب توني فالسيارة ما كان افخاطري انزل موليه وكنت أتمنى لو اني ما اقترحت هالفكرة ,,, بس تدرون؟! الحين وعقب ما شفتكن وأشوف قشارنا ,,, أحس اني استعدت نشاطي وحيويتي وردت فيه الحياه ,,, أحس بنستانس صدق! مها: هيه والله يا جوري أنا نفس الشي ,,, البارحه كنت مضايجه من الخاطر وتميت طول الليل أصيح ,,, بس يلا كلها 4 أسابيع وبنرد ,,, وان شاء الله نستانس وانيب A بعد جوري: آآآآه ,,, الله يسمع منج ,,, عيل وينها ايلين؟! مها: مادريبها شو كانت اتخربط ,,, هي رمست منى منى اللي كانت اف عالم ثاني يديد عليها ما انتبهت على أي حرف انقال ,,, وجوري تسأل منى: شو قالتلج ايلين؟! ومنى خبر خير ,,, أصلا ما سمعت جوري مها وهي اتدق منى ع جتفها: حوووووه؟! وين سرحتي؟! نحن هنا ومنى وهي تنتبه: ها! مها: أي ها ؟! من الصبح البنيه اترمسج؟! جوري وهي تبتسم بكل عذوبه: اللي ماخذ عقلج يا عسل انحرجت منى: لا ماشي ,,, بس أفكرفي أمأيه ,,, حسيت ابها متضايجه وجوري وهي اترد تتذكر أهلها وخاصه دموع أمها: هيه والله ,,, فديت أهالينا وبحركه سريعه باست منى على خدها: فديتج منوووه لا تتضايجين ,,, خلاص الحين لازم نستانس ,,, نسيتي اشكثر اتحرقصنا على ما اتخلص السالفه؟! منى وردت لها ابتسامتها من عقب رمسة جوري الرقيقه: هيه والله ,,, لا تذكريني ,,, أحس بعدني عايشه الحلم جوري بحالميه: آآآه حتى أنا ,,, كششششخه وعلى هالرمسه يتهن ايلين وهي مستعيله: Good Morning girls, sorry 4 being late, yalla harry up, we will move now الترجمه: صباح الخير ,,, سوري ع التأخير ,,, يلا بسرعه الحين بنتحرك البنات كانن معلمين ايلين كمن كلمه عربيه مثل (يلا) اللي توه قالتها ,,, لوووول ومنى توها تتذكر انها ما خبرت ربيعاتها انه ايلين اتصلت ابها من فتره من قبل لا توصل جوري بدقايق عسب اتخبرها انها بتتأخر شوي (السرحان لاعب دور ويا هالبنيه ,,, نساها كل شي) جان اتقول وهي اتوجه رمستها لمها وجوري: سوري ما خبرتكن ,,, ايلين قالتلي انها بتتأخر مها وهي تقرص منى: انتي اليوم مول مب طبيعيه منى: آآآآآآآي يالدفشه ,,, شو استوابج الحين يعني؟! متّي وانتي تتريين؟! جوري: ههههههههههههههه واتحركن صوب الباص اللي بيشلهن لدار الزين ونزل راعي الباص عسب يشل الجناط ويحملهن فالدبه ,,, ماشالله ! ماخلن شي الا وشلنه وركبن الباص وهن مستانسات ع الآخر واتحرك الباص وهو يحمل بطلاتنا الثلاث ,,, وكل وحده منهن سرحت اف عالمها الخاص وهذا يوم الخميس ويا ,,, يا ترى شو بيكون مصير بطلاتنا الثلاثه؟ وشو اللي يترياهن اف هالشهر؟ وشو هالشعور اللي غزى قلب منى تجاه حارب وجلب كيانها؟ وهل هو شعور متبادل؟ ومها ليش اتحس بالظلم؟ وشو اللي شدها لراشد؟ ويا ترى راشد كيف بيتأقلم على غياب جوري؟ وهل جوري حست بأنها هي المعنايه بالأغنيه ولا لأ؟ وغلا كيف بيكون جدولها اليومي وجوري غايبه عنها؟ وكيف بيكون البيت من بعد غياب جوري؟ . . . وتساؤلات كثيره ,,, بتلاقون اجاباتها فالبارت الياي واللي بيكون نقله نوعيه للأحداث ارقبوا (الجزء السادس) . . .
__________________ كل عام وانتم بألف ألف خير |
|
#23
10-25-2007, 12:18 AM
| ||
| | ||
| رد: بلغ حبيبك وقوله ,,, باخذك منه ... قصة ولا أروع القصة رررروعة نتظر الجزء الثالث على احر من الجمر اتمنى ادخل والقى القصة مكملة .gif "thanks") وعلى فكرة انا من محبي القصص الطويلة يعني اذا بتحطين قصص ثانية بكون من اول المتابعين لها 
__________________ ::.. اعذروني على غيابي الطويل ..:: ( عضوة في شلة الفتيات الخارقات ) غروري ثقه <<كلمه بنت مغروه سابقا  |
|
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| أروع قصص الحب | قتيبة الهيتي | نور الإسلام - | 19 | 09-25-2007 10:05 PM |
| من أروع الرسائل في سيرة نبينا المصطفى محمد عليه أفضل الصلاة و أزكى السلام | ياسين | نور الإسلام - | 10 | 02-27-2007 03:35 PM |
| كلما أحزنكى زوجك أذهبى الى حبيبك | شمس مصر | نور الإسلام - | 6 | 07-13-2006 08:25 PM |
العرض العادي
