|
| |||||||
| قصص قصيرة قصص قصيرة,قصه واقعيه قصيره,قصص رومانسية قصيرة. |
 |
| | LinkBack | أدوات الموضوع | انواع عرض الموضوع |
|
#1
10-22-2007, 09:42 PM
| ||
| | ||
 بلغ حبيبك وقوله ,,, باخذك منه ... قصة ولا أروع مساءكم جوري وكادي يا أحلى أعضاء هذي المره ..منزله لكم قصة ... صج والله رائئئئئعه بكل ماتحمله الكلمه من معنى وأنا متأكده بتقعدون تقرونها ... وأنت بقمة الاستمتاع... راح تضحكون ..وراح تشدون على أعصابكم....وكثير من المشاعر .... عموما أتركم مع القصه على لسان الكاتبه ( الحور)  علايه
__________________ كل عام وانتم بألف ألف خير |
|
#2
10-22-2007, 09:43 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع نبذه مبسطه عن القصه فالبدايه ,,, القصه خياليه بحته ,,, تسافر بنا عبر الخيال الى محطات عديده ,,, وسنمر مع أبطال قصتنا بمواقف عديده وسنعيش صراعاتهم ,,, ننفعل معهم ,,, نفرح لهم ,,, ونحزن من أجلهم ,,, أردتُ من هذه القصه أن أعبر عن جزء من مكنوناتي ,,, وأسافر بخيالي الى عوالم جديده ,,, أعيش الحب الحقيقي ,,, أستمتع بلذة العشق وخفقان القلب ,,, أعاصر مواقف حزينه تاره وسعيده تاره أخرى ,,, أحقق ما أعجز عن تحقيقه في واقعي ,,, من يعلم؟! قد يتحول الخيال يوما ما الى حقيقه؟! فلنسافر معا في خيال الكلمات ,,, ونعيش مع الأبطال ,,, ونتخيل أنفسنا معهم وفي أحضان مشاعرهم . . . اليكم الجزء الأول من قصتي الأولى ღ :::ღ بلغ حبيبك وقوله ,,, باخذك منه ღ ::: ღ . . .
__________________ كل عام وانتم بألف ألف خير |
|
#3
10-22-2007, 09:44 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع الجزء الأول) في صباح أحد أيام شهر مايو من سنة 2006 في أحلى مدن الامارات (الشارقة) ومثل ما اتغنى فيها حسين الجسمي وقال (اضغطوا على الرابط) وعلى أرض السحر والجمال ... كانوا يسكنون أبطال قصتنا . . نشت جوري على دقات الباب الأبو : جوري بابا يلا نشي الساعه 8 اتأخرتي عالكليه (ومن هناك بعدها 6 بس هو يحب يلعوزها لأنها كسوله وما بتنش الا بهاي الطريقه) جوري من تحت اللحاف: بابا بلييييييز بس 5 دقايق الله يخليييييك الأبو: ماشي 5 دقايق جوري: بلييييز بابا الله يخليك حراااام الأبو: الحين ابغي أعرف هالخمس دقايق شو بيسوون بج؟!! وسار عنها وكل صبح على هالحاله وعلى الرغم من انه ابو جوري رجل أعمال وعنده أشغاله الخاصه الا انه متعود يوعي كل عياله وخاصه جوري الدلوعه آخر العنقود ... وعقب ما يتطمن عليهم يسير يباشر شغله وهذا سر تعلق جوري فيه لأنه من صغرها وهو يخلصلها كل طلباتها مع انه عندها اخوان وعندهم دريول بس مع جوري الموضوع مختلف تماما من اول ما دخلت جوري الروضه الين ما اتخرجت من الثانويه وابوها هو اللي يوصلها واييبها! يمكن اتشوفونه شي غريب مع كثرة أشغاله لكن عشان عين تكرم الف عين وأول ما اتخرجت من الثانويه كانت هديتها سياره آخر موديل من أرقى معارض السيارات اختارتها بنفسها وكان لها اللي بغته ... وسووا طلبيه للموديل المطلوب بحكم انها سياره يديده وتوها نازله ومب موجوده فالبلاد واف هالاثناء دخلت جوري معهد لتعليم السواقه بس كانت فيه مشكله هو انه جوري باقيلها شهر ويصير عمرها 18 والاجراءات اتعطلت شوي ... بس مع واسطه أبوها انحل الاشكال وفعلا خلال شهر واحد خذت الليسن ومن أول تراي ... واستلمت سيارتها مع بداية سنتها الجامعيه الأولى . نرجع للقصه الأبو يالس يتريق فالصاله ويقرى الجريده شوي ويسمع صوت باب غرفة جوري يتبطل وهي طالعه ومظهره ثيابها للخدامه عسب تكويهم لها جوري بويه كسول وبرئ: صباح الخير باباتي الأبو: صباح الجوري يا أحلى جوري جوري: بابا؟ ليش اتقص عليه واتقول انها الساعه 8 الأبو: انا قلتلج 8 وانتي توج ظاهره عيل لو اقولج انها 6 بترقدين لين القايله جوري بويه قافط: وينها اليسا أباها تكويلي ثيابي (اتحب تتهرب هالبنيه ههههههههههه) الأبو: خلاص انتي سيري اسبحي وانا بقولها يلا بابا عن تتأخرين جوري: من عيوني الابو فالصاله: اليسا اليسا اليسا: نعم بابا الأبو: اكوي ثياب جوري بسرعه ووديهم الحجرة انا بسير الحين وايد اتأخرت ويوم بتظهر جوري من البيت اتصلي خبريني اليسا الأندونيسيه: جين بابا (هاي الحركه دايما يسويها ابو جوري عسب يتأكد انه جوري ظهرت وما ردت ترقد هههههههههه كسوله هالبنت) . . . اول ما خلصت جوري من السبوح سمعت دق خفيف عالباب جوري: منووو؟ اليسا: سياب (يعني ثياب) جوري وهي تربط الروب وشعرها المبلل يغطي جزء من ويههاا بكل عذوبه ورقه: هههههههههههه اول مرة ادري انه الثياب اتدق الباب خخخخخخ (أحلى شي في جوري ان تعاملها حلو ويا الخدم وتحب تمزح معاهم) فتحت الباب وخذت ملابسها وبدت تتزهب للكليه وكانت الساعه 7 وثلث لبست تنورة بيضا عمليه حق الصبح مع توب ابيض ووردي فاتح جففت شعرها الأسود الداكن ورفعته بشريطه ورديه وخطت عيونها العسليات بحكل اسود اللي خلاها اتصير روعه وخلا لون عيونها يبرز أكثر وحطت جلوس وردي ع شفايفها وكانت جوري اسم ع مسمى اتصلت الصاله: الو جوري: اليسا بسررررررعه سوي لي فحم اتأخرت يت اليسا الغرفه ودخنت جوري لبست جوري عبايتها وشيلتها وشلت شنطتها الورديه وطيرااان ع السيارة واليسا المسكينه تلحقها بشنطة اللابتوب والفايلات اللي نستهم كالعاده ولقت أخوها حارب اف دربها هو شكله بعد متأخر ع دوامه حارب: وعليكم السلام مافيج اخلاق موول جوري وهي تركض: مب وقته مب وقته بعدين بسلم حارب: الحمدلله والشكر مخبل هالبنيه ( حارب يشتغل رئيس اقليمي اف بنك معروف ... عمره 27 وشخصيته روعه ودوم هاي سالفته مع جوري دومهم يتحرشون اف بعض ) أما جوري فشخطت ويل بدون لا تحر السياره ولا شي ودقت عالريموت مال باب الكراج واول ما انفتح الباب ما بّين من السياره الا غبرتها وطيران عالكليه حارب وهو فاقد الامل من اخته الدلوعه: هالسياره مظلومه عادي ترى مال عمك ما يهمك الحمدلله والشكر كانت الساعه 8 الا ربع والكلاس يبدى 8 يعني تلحق ما تلحق (جوري عمرها 21 وهي اف سنه ثالثه اف كلية التقنيه تخصص اعلام Media Studies وهاي آواخر الأيام فالسمستر ... يعني صدق مزحومين اف تسليم ال projects وال assingments ) فالسياره جوري فتحت الاف ام وطلعتها أغنيه اتحدى العالم مال صابر الرباعي ... (هذا الرابط للي يبا يعيش الجو صح) اتفائلت بيومها من سمعت الاغنيه لأنها صدق روووعه وطولت شوي ع الصوت ودخلت عالم حالم وشوي ويرن تيلفونها كان المتصل كالعاده ربيعتها وطبجتها منى منى: جوجو وينج؟؟؟ جوجو: انا الحين فالمدينه الجامعيه منى: انزييين تعالي بسرررعه المس تسأل عنج جوجو: افف منها الغوله منى: شو نسوي بعد يلا حبيبتي سي يو لا تسرعين جوجو: اوكي حبيبتي بباي جوري تضحك على منى ههههههههههههههههه : والله هاي نكته اونه تعالي بسرعه ولا تسرعين .. كيف تركب مادري! خخخخخخ الساعه 8 وعشر دقايق كانت جوري اتصف سيارتها اف باركنات الكليه عند مبنى الاعلام ودخلت الكلاس والمس مب موجوده واتشققت من الخاطر جوري بصوت عالي وكالعاده: صباح الخير البنات: جوري الحمدلله انج ييتي صباح الجوري منى: جوري تعالي بتخبرج جوري بكل اهتمام: هااااا شو صاير؟ منى: خلصتي البروجكت؟ جوري: يعني almost خلصته منى: هيه الحمدلله عشان في أظن بروجكت ثاني جوري: لااااا ... لا تقووولين متى الله بيتوب علينا!! منى: مادري لأنه اف مادة Elaine ما سوينا أي بروجكت بس ال presentation جوري: هيه صح ... كيف غابت عن بالي!!! عجيييبه شو تتريا حضرتها!!! منى: ترى هاللي زايغه منه ... ماباقي شي عن السمستر جوري: اممم الله يستر جوري: عيل وين مهوو؟ منى: مهووو عندها Conference ويا المس جوري: امممممم اوكي منى: جوجو محلووووة اليوم ... حلو اللوك الوردي عليج جوري: عيونج الأحلى انتي لوكج اليوم عجييييييب احب الأسود والأبيض عليج (منى بعد كانت اتعادل جوري فالجمال ويتشابهون مع انهم ما يقربون لبعض ابدا لكن كل اللي يشوفهم يقولهم انتوا خوات سبحان الله ... يمكن لأنهم وااايد ويا بعض فاللي اف قلوبهم انعكس ع أشكالهم ... بس الفرق انه منى كانن عيونها سود وشوي أصغر عن عيون جوري فالمقابل عيون جوري كانن عسليات وواسعات ) منى بخجل: عيل وناااسه وردت مها الكلاس مها بتأفف: بذبحها بذبحها جوري ومنى: بلااااج؟؟ مها: غيرتلي البروجكت كامل بصييييح جوري: خلاص حبيبتي عادي أنا بعد يوم سويت وياها ال conference نفس الشي عادي منى: حتى انا ... صدقيني مهوو ما بياخذ منج وقت كلها نص ساعه وكل شي بيتعدل مها: ان شاء الله بس بعد ما دانيها كلهن ويا بعض: هههههههههههههههههههههههه وشوي وبدا الكلاس الثاني .................... وكان كلاس Elaine مها: اووف منها دخلت. منى: خلاص عفت الكليه ، مليت من شي اسمه كلاسات. جوري: خلاص هانت ماباجي شي. البنات بصوت واحد: وااااااااااااااااااااااااااااااااااااااااااااااااا ااااااااااااااااااااو،You are very kind miss !! الترجمه: انتي وايد طيبه مس مها وجوري ومنى: بلاهم هذيلا اتخبلوا؟!!! جوري اترمس وحدة في الكلاس اسمها علياء: بلاكم احتشرتوا مرة وحده؟! علياء: ما سمعتي المس شو اتقول؟ اونه اليوم عندها meeting وما شي كلاسات والحين بتظهر عنا! جوري بصوت عالي: واااااااااااااااااااااااااو!! Miss Elaine : Joory you are too noisy today الترجمه: جوري .. انتي وايد مزعجه اليوم جوري وهيه متشققه: I'm sorry miss. Miss Elaine: Ok girls I will come at 12:00 to take attendance and I have a small announcement for you. See ya . الترجمه: اوكي بنات .. انا بيي الساعه 12:00 عشان آخذ الحضور وعندي شي بخبركم به جوري: يا ربييي منها ما بغت تظهر حشا خذت الكلاس كله!! منى: انشالله يروغها بابا فريد من الاجتماع عسب انها متأخره. (بابا فريد هو مدير الكليه والبنات متعودات يزقرونه بهالاسم) مها: الله لا قال، بتي بتجابلنا عقب، ما بغينا نفتك من الكلاسات. جوري : هيه والله. (مها وجوري ومنى ربيعات الروح بالروح وسوالفهن ما ينمل منها ... بس يمكن علاقة جوري ومنى شوي أقوى عن علاقتهن بمها سبحان الله القلب وما يهوى بس فالنهايه كلهن ع قلب واحد ومغامراتهن كلها ويا بعض) مر الوقت بسرعه وكانت الشله الحلوة فالكافتريا وشوي والا جوري اتشوف الساعه وكانت 12 الا خمس دقايق والمفروض 12 يكونن فالكلاس عسب Elaine بتاخذ الحضور وبتخبرهن بشي جوري: أبييييييه الساعه 12 الا خمس منى: ال attendance !! مها: يلا عيل خل نلحق وردن الكلاس جوري: الساعه 12 وخمس وElainoooh مايت!! مها: يبتي سيرة الأط جا ينط منى: وووععععععععع جوري: اتطالعوا شكلها مستانسه مها: هيه والله منى: الظاهر رقوها Miss Elaine: who is here? الترجمه: منو موجود؟ البنات: all of us accept Moza الترجمه: كلنا الا موزة Miss Elaine : where is she? الترجمه: وينها؟ البنات: She has a hospital appointment الترجمه: عندها موعد فالمستشفى Miss Elaine: Ok girls, I have an announcement for you about your last project الترجمه: عندي شي أبا أخبركم به عن بروجكتكم الأخير البنات احتشروا، اللي مب عايبنها واللي اتقول ما شي وقت واللي شوي وبتصيح Miss Elaine: GIRLS!!! الترجمه: بنات؟ صخن البنات Miss Elaine : let me talk, then complain as you like الترجمه: خلوني ارمس عقب اعترضوا على كيفكم استسلمن البنات للأمر الواقع Miss Elaine: ok girls, relax This project is different than the others; this project will allow you to practice the program in the real life for the first time الترجمه: اوكي بنات ... اهدوا .. هالبروجكت غير عن باقي البروجكتات ... هالبروجكت بيعطيكم الفرصه انكم اتطبقون تخصصكم على أرض الواقع للمرة الأولى اف حياتكم وحدة من البنات: How miss? الترجمه: كيف؟ Miss Elaine: let me continue please الترجمه: خلوني اكمل لو سمحتوا البنات: اوكي Miss Elaine: You don’t have to handle the project now, it is a summer project You are required to create your own story about any interesting experience you will go through and record it as a diary and then bring it to me at the beginning of the next semester which will be the first of September الترجمه: مب لازم اتسلمون البروجكت الحين ... هالبروجكت صيفي ... المطلوب منكم انكم تكتبون قصه عن أي تجربه أو مغامرة اتعيشونها وسجلوها كمذكرات لكم وأباه يكون جاهز على بداية السمستر الياي يعني على بداية شهر سبتمبر البنات: Miss, we don’t want to work in our holiday الترجمه: مانبا نشتغل اف اجازتنا مس Miss Elaine: It’s different, you will enjoy it believe me, just imagine a story and apply it with a short descriptive script and that set! الترجمه: هالبروجكت مختلف ... بتستمتعون فيه صدقوني ... كل اللي عليكم انكم تتخيلون قصه واتطبقونها واتعيشونها وتكتبونلي عنها ريبورت I gave you the whole summer to work on it in order to have enough time to be creative but some of you can finish it within one week maximum الترجمه: أنا عطيتكم الاجازة بكبرها عسب تشتغلون على راحتكم واتكونون مبدعات ... لكن بعضكم يقدر حتى يخلصه في اسبوع واحد More over, you will be working in groups of three and you can choose your peers to make it easier for you so the amount of work will be smaller! الترجمه: وشي ثاني ... انتوا بتشتغلون اف مجموعات مكونه من 3 طالبات لكل مجموعه وهالشي بيسهل عليكم المهمه Ok girls, I know you are creative and you will give me some fabulous stories! الترجمه: اوكي بنات .. أنا ادري انكم مبدعات وبتعطوني قصص روعه I will give you the outline of the project so you can refer to it Read it carefully, you can start from this moment and if there is any question come to my desk am available, see you الترجمه: أنا بعطيكم الحين ورقه فيها شرح مفصل عن البروجكت ... ممكن ترجعونلها اف أي لحظه اقروها عدل ... واترومون تبدون من هاللحظه اذا حبيتوا ... واذا عندكم أي سؤال .. أنا موجوده اف مكتبي . . ( وطلعت عنهم) البنات: بروجكت غريب! وحده من البنات: لازم انفكر اف شي غير وحده ثانيه من البنات: هيه صح نحن بنات الاعلام مب أي شي (خقاقات لووووول) نرجع حق بطلات قصتنا وانشوف شو رايهن بالبروجكت جوري: يا الله كيف متحرقصه بسبة هالبروجكت منى: حتى انا أحس انه ربشششه .. مها: بس يلا فكروا بشي .. جوري: بس لقيتها ..! منى ومها بصوت واحد: شو ؟؟؟؟ جوري: مب هي تبا شي غريب وقصه يعني مب مألوفه منى ومها: هيه اكيد جوري: انزين اسمعوني منى: قولي يا أم العريف جوري: نحن لازم انعيش القصه عسب الاحداث اتكون حقيقيه واتمسنا واللي فهمته من ال outline مال البروجكت انها تبا قصة مغامرة اتناقش قضيه اف مجتمع الامارات بطريقه حلوة ومبتكره منى ومها: صح جوري: عيل لقيتها! اسمعووني عدل
__________________ كل عام وانتم بألف ألف خير |
|
#4
10-22-2007, 09:46 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع (وخبرتهم بفكرتها) منى ومها بصوت واحد: انتي اتخبلتي؟!!! منى: منو بيخلينا انسوي جيه؟ مها: مستحييل هليه يطيعون وبعدين تعالي نسيتي ابوج!! مستحييييل يطيييع جوري: بلاكم اشتطيتوا جذه!! كل شي بيتم حسب الأصول وبناخذ اذن من الكليه منى: جوري انتي وايد تحلمين جوري: والله اسمعوني اذا سوينا هالفكره اول شي بنضمن ال A لأنها فكره يديده وبنتعب فيها وثاني شي بنستانس يالخبايل مغامرة وفرصة انه نتلاقى فالصيف بليييز وافقوا وع فكره اذا استانسوا ع فكرتنا اشدراج يمكن تتنفذ ونستوي مشاهييير يااااي مها: صح انها فكرة مينوونه بس عيبتني منى: وااايد تحلمون! انتوا اتخبلوا مستحيييل انروم انطبقها وبعدين ما اتخيل عمري اعيش هالتجربه ايييي! جوري: يعني انا اللي أتخيل؟!! أنا بيض ماعرف أفوّر كيف بشل مسؤولية بيت كامل؟!!! بس التجربه محتاجه المغامرة ولا تنسون نحن بنكون تحت وصايه واذا فشلت الخطه ما بنخسر شي وبس! مها: هزرج بيعطونا تصريح من الكليه؟ جوري: ياماما ايلينووه خبله واتمووت فالمغامرات وكل شي بيستوي حسب الاصول انتوا بس وافقوا مها ومنى: خلاص عيل تم جوري وهي متشققه: كفكم! طراااااخ وساروا جوري ومها ومنى عند ايلين عسب يشرحولها الفكره وفعلا مثل ما اتوقعت جوري ايلين اتخبلت ع الفكره وقالت لهم ما يحاتون وهي بترتب السالفه مع اهاليهم جوري: ياااي فرحانه فرحااانه مها: انا بعد بس زايغه من ردت فعل اهليه منى: انا مب زايغه من حد كثر من ردت فعل عبود أخويه جوري: هذا عبود بعد مسوله رااااس مشاااكل جوري: فديييت باباتي كيف بتحمل بعده ولا حارب بيتنقرش في امنووه يوم انا محد ههههههههههههههه (وكل وحده منهن تمت اتفكر اف شي ((كلن يغني على ليلاه)) لووول) وخلص الدوام وكل وحده ردت بيتها وهي متحرقصه من الخاطر . . . . يتبع
__________________ كل عام وانتم بألف ألف خير |
|
#5
10-22-2007, 09:51 PM
| ||
| | ||
| رد: بلغ حبيبك وقوله ,,, باخذك منه ... قصة ولا أروع (تابع الجزء الأول) فالبيت عالساعه 7 المغرب جوري يالسه اف حجرتها واترمس بنت عمها غلا وهي أكبر عن جوري بسنتين وربيعتها الروح بالروح جوري: والله مثل ما أقولج غلا: انتي اتخبلتي؟ جوري: بلاكم كل ما قلت حق وحده الفكره اتقوللي اتخبلتي؟!!!!!! غلا: لأنها فكره مينونه جوري: بس بتتنفذ صدقيني بس اهم شي غلاي بليييييز مابا حد يعرف بالسالفه دخيييلج ولا كل شي بيخترب دخييييلج غلاي غلا: اوف منج ومن أفكارج المينونه متى بتعقلين انتي متى بس ابا أعرف؟! جوري: بعقل صدقيني بعقل عقب هالسالفه غلا: الله يعيني على خبالج جوري وهي تسمع دق ع الباب : غلا بعدين برمسج حد يدق عليه الباب غلا: اوكي بترياج وعقب ما سكرت جوري عن بنت عمها فتحت الباب وشافت حارب جوري: هلا والله حرووبي حارب: الحين هلا والله والصبح لابستني جوري: والله سوري بس كنت مستعيله حارب: انزيين انا مب ياي عسب سواد عيونج ... أبويه يباج ويمسكها من اذنها ويقول: انتي بتخبرج؟ شو مهببه فالكليه؟ جوري غصت: أي أي عورتني ... مب مسويه شي حارب: مب مسويه شي هااااا؟ سيري عند ابويه واصلنه فاكس من الكليه وال *****visor مالكم متصلبه جوري وهي ميته: هااااااا حارب: يلا انجلعي بسرررعه هو شكله مستعيل يبا يطلع جوري: اوكي بس انته لاتي وياي حارب: والله انا افخاطري ايي عسب اتشمت فيج بس المشكله طالبينج روحج جوري وهي طالعه من الحجره: يكون أحسن حارب: ترى ابويه فالمكتب مب فالحجره وشوي شوي عن اتخرطفين وتتكسريييين جوري: زيييييييييييين . . . وصلت جوري مكتب ابوها اف ثواني وهي مي قادره تتنصخ (تتنفس) من السرعه ومن الارتباك جوري وهي واقفه عن باب مكتب ابوها الخارجي اتقول افخاطرها ياترى انكشفت الخطه ولا لأ!! يارب لااااا دخيلك ياااارب ... أبا أعيش هالقصه وشوي ولا باب المكتب يتبطل وتطلع اليسا من داخل: انتي شو يسوي هني؟ روحي داخل بابا يريد انتي جوري: طاع هاي معصبه عليه بعد اليسا وهي محرجه : يلا سيري بسرأه (بسرعه) جوري: حشى جني اشتغل عندها...! (اليسا بشكارتهم من 10 سنين ومتعوده عليهم وايد واتحس عمرها ال Boss فالبيت هههههههههههههه) عادي بدخل شوفيها ... أبويه يحبني وأكيد ما بيعصب عليه وأنا بشرحله وجهة نظري هيه صح ومر حارب وهو كاااشخ من الخاطر وريحته شاله البقعه: انتي بعدج ما دخلتي؟ يبا يخرب عليها فقال بصوت عالي: أبووووويه جوري حطت ايديها ع حلجه عسب يسكت بس عقب مافات الفوت ابو جوري ظهر: انتوا شو تسوون هنه؟! جوري: هاااا أبوها: بلاج مصفره بابا ما تاكلين انتي؟ حارب: من سواد ويهها أكيد الأبو: انته ما يخصك وبعدين أظن طلبت جوري مب جوري وهديتها المجانيه جوري نقعت من الضحك: ههههههههههههههههههههههه ... دوااااك حارب وهو قافط: أصلا أنا كنت خاطف بظهر راشد ولد عمي بيمر عليه الأبو: زين تسوي وحط أبو جوري ايده على جتف بنته الدلوعه جوري ودخلها المكتب وسكر الباب الأبو: يلسي بنتي .. ها بابا شخبار الكليه وياج؟ جوري: تمام .. تدري الحين وايد مضغوطين ونهاية السمستر الأبو: الله يقويج فديتج ... يلا نتريا النتيجه الطيبه جوري افخاطرها: شكله راضي عني بس باله مشغول الأبو: ها بنتي بلاج؟ جوري: سلامتك بابا الأبو: انزييييين ... اليوم اتصلوا فيني من كليتكم جوري غصت الأبو: هاج يودي اشربي ماي هني هني ... انتي حالج مول مب عايبني شكلي خلاص بهون لازم اوديج المستشفى أسويج فحص شامل .. وايد ذويانه جوري: لالا أنا بخير .. بس ما قلتلي اتهون عن شووو بابا؟ الأبو: ترى اليوم اتصلوا فيني من الكليه ويبغون اذن عسب المعسكر الصيفي اللي بيسوونه للطلبه المتميزين وانا كنت متردد بس هم قالولي انه بيكون تقريبا من 3 اسابيع لشهر يعني بيبدا من اول شهر سته جوري وهي مستانسه: وانته شو رايك؟ أبو جوري وهو يدقق اف ملامحها الطفوليه وابتسامتها اللي لا تقاوم: انا كنت بسألج عن رايج واف نفس الوقت اذا وافقت هذا معناه انه سفرتنا لازم تتأجل لشهر 7 جوري: محد خبرني عن السفر؟ أبو جوري: ترى هاي كانت مفاجأتنا أنا وامج جوري: يااااااااااااااااااي فديتكم والله بالعكس باباتي شهر 7 أنسب حق السفر وفرصه بعد اتشرى حق الكليه من هناك أبو جوري: مزهبه عمرج انتي! ... صدقت يوم سميتج مصاريف! (ههههههههههه أبو جوري دايما يسمي جوري مصاريف واخوانها يسمونها مسؤولة الشؤون الماليه اف بيت بو حامد) للتوضيح: ( جوري عندها اخويين وهم بالترتيب حامد وهو العود وعمره 31 ويشتغل طيار ودومه مسافر والحينه عنده دورة في استراليا لمدة 6 شهور وباقيله 4 شهور وبيرد وعقبه حارب واللي سبق ورمسنا عنه وعمره 27 وعقبه جواهر وهي معرسه من سنه ماخذه ولد خالتها حميد وعمرها 25 وآخر العنقود جوري وعمرها 21 ) نرجع لأبطال قصتنا جوري بدلع: باباتي عاد ما عندك الا انا خل أتشرى على كيفي أبو جوري: واخوانج الباقيييين خلاص كنسلتيهم! جوري: هههههههههه بس هم خلاص راحت عليهم كبروا .. انزين باباتي هااا شو قلت؟ أبو جوري: الحين لازم سالفة المعسكر الصيفي هذا؟ جوري: باباتي هيه لازم وبعدين هم ما قالولك اني لازم اكتب عنه ريبورت وبيفيديني السنه اليايه أبو جوري: هيه ابويه قالولي بس وين انا اروم اصبر عنج شهر أهون عليج؟ جوري يت وحضنت ابوها: ابويه الا شهر واحد وانا بتم عندك عقبها شهرين وبنسافر ويا بعض وكل شي وحتى انته أباك اتخلص كل اشغالك اف هالشهر عشان تتفرغلي عقب ... ماباك تنشغل عني فالسفر! أبو جوري: خلاص عيل ... حكم القوي ... بس هناك كل شوي تتصليبي واتطمنيني عليج ولا ترى بكنسل كل شي جوري: افا عليك اكيييد بتصلبك وبلعوزك باتصالاتي أبو جوري: منكر بنات جوري وابوها: ههههههههههههههههههههههه أبو جوري: خلاص بابا أنا الحين بظهر اتاخرت عندي اجتماع وانتي مري على امج الحجره كانت اتقول جوري ماشوفها مووووول زين ابويه؟ جوري: من عيوني حتى انا اشتقتلها موووووت الأبو: بارك الله فيج بنتي يلا أنا ساير جوري: تيك كير بابا وبترياك ع العشا لا تتعشى برا الأبو: ان شاء الله ما طلبتي (خراااااطه .. دوم ات قول جي وترقد قبل لا يوصل ابوها ههههههههههههههه) . . . وطلعت جوري من عند ابوها وسيده ع غرفة أمها جوري اتدق الباب: تك تك أم حامد وهي يالسه ع التسريحه تتعدل: منو؟ جوري: أنا أم حامد: دشي ماما جوري: له له له شو هالزين شو هالحلاه؟ أم حامد: أي زين ... الزين كله عند جوري؟ وينج ماما ... ما اتبينين ... ما اتقولين عندي ام؟ جوري: ماماتي سوري والله بس الكليه ماخذه كل وقتي أم حامد: يلا ماباجي شي ع الاجازة وعقب بنشوف شو حجتج جوري افخاطرها: اكيد ماما ما تدري عن المعسكر الله يستر.. بس اكيد بابا بيقولها أم حامد: اف شو سرحانه جوجو؟ جوري: هاااا لا ماشي ... اممممم ليش كاشخه جي؟ وين بتسيرين؟ أم حامد: بسير ويا حرمة عمج عرس قوم ال......ي بنتهم عهود بتعرس جوري: الله وناسه عهود بتعرس أم حامد: الله يفرحني فيج بعد ياااارب جوري: اممم انزين ماماتي انا بسير عندي بروجكت وخبريني عقب شو العرس ام حامد: ان شاء الله .. وانا بعد شكله دريول قوم عمج وصل ... . . . طلعت جوري من جناح قوم أمها وهي طاااايره من الوناسه جوري وهي تغني: والله وتحقق منايا ... حلمي اتحقق معايا هههههههههه حارب وتوه راد من براا: بسم الله سكنهم في مساكنهم ... سيري سحي كشتج ... ولا ومحرفه الاغنيه على كيفها بتخبرج انتي شو حياتج؟ جوري: ياربييييه مشكله اللي يغارون وبعدين انته قلت بتطلع شو يابك مرة ثانيه؟ حارب: كيفي غيرت رايي ... وبعدين ييت أطمن .. هااا ان شاء الله أبويه هزبج؟ جوري: ويييي بسم الله عليه ... ليش يهزبني؟!!! ثرني شو مسويه؟ حارب: عيل ليش متصلين من الكليه؟ جوري: يبون اذن عسب المعسكر الصيفي حارب بكل ثقه: لا انا مب موافق جوري: طاع هذا! انته شفت ويهك فالمنظرة اول شي؟!!! وااايد مصدق ويهك! حارب: من حقي الصراحه جوري وهي اتدز اخوها ع صوب: وخر شوي مستعيله انا بسير أبشر منوووه ومهووووه! حارب وهو يبا يخرب: الحين كله منوووه ومهوووه ماشي غلا ... نسيتي غلا ... مصلحجيه جوري: طاع هذا؟!!! غلا بنت عمي وحبيبتي وتوأم روحي لا تيلس تتفلسف .. بس هالسالفه اتخص الكليه وغلا متخرجه افففف حامد: اهاااا ... انزين انا بسير اتأخرت على راشد ... صح تبين عشى من برا جوري وفجأة اتحولت الى حمل وديع: الله صدق؟؟؟؟ حبيبي انته عيل أباا وقبل ما اتكمل جملتها قالها: ماك سبايسي من ماكدونالد جوري: وحافظ بعد وناسه انته حارب: تراج ذليتينا كله هالوجبه وبس خخخخخخخخخخخخ حتى راشد بعد متعقد من غلا جوري: وانته بلاك على غلا هااا؟ قوللي لا تستحي عااادي حارب وهو ويهه اتلوّن مية لون: يلا انا اتأخرت باي جوري وهي ناقعه ضحك: باي يالعاشق اتطالعها حارب بنص عين وروح . . . كملت جوري دربها لين غرفتها ... الله خل اتصل اف مهوووه اول لأنها متفائله شراتي وعقب منووووه لأني اخاف اتعكر مزاجي . . توووت تووووت تووووت ومع ثالث رنه ردت مها : ألو جوري: مهووووووووه باركيلي مها: وانتي بعد جوري: لا تقولييين؟! صدق؟ مها : هيه والله ... مب مصدقه جوري: ولا انا .. انزين رمستي منووووه؟ مها: اممممم اتصلتبها مساعه اتقول ابوها عادي وامها زعلانه والحين باقي عبود أخوها جوري: يا عبود هذا اللي يالس النا مثل العظمة فالبلعوم مها: هههههههههههه توأمها لازم جوري: هيه والله وراها وراها ... حتى اف بطن امها ههههههههههه جوري: اوكي حبيبتي بسكر عنج الحين وبدق حق منى وبشوف علومها مها: اوكي حبيبتي وطمنيني جوري: اكيد يلا شاااو مها: شاااااو . . . جوري افخاطرها: الحين بدق حق منوووه وان شاء الله أهلها يكونون موافقين عسب تكمل فرحتي توت توت توت منى: ألو جوري: هلا منى ... ها خبريني؟ منى: الحين أختيه نوال تقنع عبود لحظه جوجو حد يدق الباب جوري: أوكي جوري ع الخط سمعت صوت منى وهي اتقول: واااااااااااااااااااااااااو شكرا نواااال ردت منى لجوري: جوجو باركييييلي .. ماصدق وافقوا جوري: مستحيييييل خطتنا نجحت لالا ماصدق منى: انزين متى بيبدا المعسكر اتقوله وهي تضحك جوري فهمت انه منى مب روحها فالحجره فقالت: بيبدى من اول شهر سته ... بخبرج التفاصيل باجر منى: عيل اوكي جوري: خلاص بخليج بباي منى: باي حبيبتي . . . جوري طرشت مسج حق مها اتخبرها انه كل شي اوكي وردت عليها مها: الحمدلله . . . جوري اف خاطرها: الحين اهل مها كلهم موافقين ومنى نفس الشي ... الا أنا أبويه الوحيد هو اللي يدري وحارب شكلها السالفه مب عايبتنه والله يستر من ردة فعل ماما . . . وتمت اتفكر شوي وعقب سارت تاخذ شور . . . اف هالأثناء كان حارب ويا راشد ولد عمه فالسياره بيمرون ع ماكدونالد راشد: ها شو تبا اختك؟ حارب: كالعاده راشد وهو يرمس الحرمه اللي تشتغل اف ماكدونالد: two mac spicy meal plz الحرمه اللي اف ماكدونالد: second window plz راشد: ثانكس حارب: ليش طالب وجبتين؟ راشد: حق طبجة اختك (يقصدون غلا) حارب: والله هالهنتين فناتك .... كل شي نفس الشي! لا والحبيبه مسجله تبا اتسير معسكر صيفي لمدة شهر ف بوظبي مادري العين راشد وهو متفاجىء: احلف؟ حارب: وانته بلاك مشتط؟ راشد: هاا لا ماشي! بس غريبه عمي موافق حارب: عمك صح ما يروم يصبر عن جوري بس بعد ما يردلها طلب وأظن هذا جزء من بروجكت يسوونه راشد: عاد فالصيف؟ حارب: عاد انته ما تدري منكر الكليه! راشد: هيه والله يلا خل انوصل الأكل حق الهوانم قبل لا يبرد (راشد من عمر حارب يعني 27 وغلا عمرها 23 وخليفه عمره 32 ومعرس ماخذ بنت خالته روضه وعندهم بنوته حلوة اسمها شوه وعمرها 3 سنين وآخر العنقود روبي وعمرها 13 مراهقه بالقو) ويرن تيلفون راشد وكانوا البيت متصلين به: هلا بالغلا جان يفز حارب من سمع طاريها وراشد حس فيه جان يحطها ع الاسبيكر غلا ع الطرف الثاني: تعال مر عليه وودني عند جوري ... نبا نتعشى ويا بعض راشد وهو يغلس ع اخته: لا ماروم غلا: بلييييييييز رشوووود راشد: دامج قلتي رشود ماشي .. أصغر عيالج اتقولينلي رشود حارب ويدخل عمره فالسالفه: ياخي ذليت البنيه ما يسوى عليها .... غلا: هيه حارب قوله بلييييز حارب وهو متشقق: ماعليج منه خلاص اتزهبي الحين يايين راشد: سيارة ابوك وانا مادري غلا: خلاص انا متلبسه راشد: طاع هاي مزهبه عمرها ... طرطور انا مستوي غلا: حراااااام جوري بتروح عني ابا اودعها راشد: هاي جوري مسويتلنا ازمه كلنا وانتبه على عمره يوم قال كلنا وبلعها يلا انزين يوم بوصل بدقلج غلا: يااااي ... اوكي باي طوط طوط طوط راشد: حشى ما صدقت وحارب اف عالم ثاني ... سرحان اف صوت غلا راشد بحركة نذاااااله حط شريط حسين الجسمي اليديد ع اغنيه خريش وطول ع الاخر وهو مرتبش انتبه حارب وفلع راشد بدبة الماي نقع راشد من الضحك: ههههههههههههههههه دواك محد قالك تسرح حارب: مب منك من اللي يعطيك ويه . . . واف هالأثناء كانت جوري توها طالعه من الحمام عزكم الله ولافه الفوده ع شعرها: اففف يوووعانه ... هذا حروبي قص عليه جففت شعرها ولبست برمودا جينز ازرق فاتح وبدي فوشي واتعطرت استعدادا لاستقبال بنت عمها وحبيبتها غلا وشوي واتصلت اف حارب واول ما رد: حروووووووووووووووبي حارب: بسم الله الناس اتسلم اول .. صدق ما شي اخلاق مووول ... اتعلمي من بنت عمج الذوق راشد اف خاطره: فديت شطانتها جوري: حروبي يوووعااااااانه حارب: اشكثر وايد ولا شوي؟ جوري: واااايد وااااايد واااايد فوق ما تتصور حارب: عيل ما بني خلاص جوري: اييييه حرام عليك حارب: انزبببببببببببن .... خلاص يايين... الحين واقفين عند بيت عمج بناخذ غلا ويايين مسافة الطريج جوري: خلاص أترياكم . . . راشد يدق حق غلا وقبل لا يرن ردت: بسم الله يالسه فالتيلفون انتي! غلا: ها ييتوا؟ راشد: يلا تعالي من الباب الوراني مافيه ابوج يشوفني ويشغلني غلا: اوكي (هههههههههه ... أبوهم من يشوفهم يشغلهم ... سيروا ... هاتوا ... جابلوا العرب ... ومن هالسوالف اللي ما تخلص لوووووول وهم ماشالله ما تعيبهم هالمسؤوليات) وخلال ثواني ظهرت وركبت السياره: السلام عليكم راشد : الله ع الادب غلا: الادب مب لك حق ولد عمي ههههههههههههههههه راشد: لا تخليني انزلج من السياره الحين حارب: بتذل البنيه انته غلا: هيه والله قوله ...! مذله راشد: انزين الحين انا مذله غلا: هيه ... انته ما اتشوف كيف حارب يرمس جوجو راشد: هههههههههههههههه لعلمج هذا اكبر مذله حارب قفط: لا تصدقينه وشوي ولا هم واصلين حارب لحظه بدق حق جوجو عسب تظهرلج غلا: ما يحتاي يالسه ادقلها حارب وراشد بصوت واحد: سحّار . . . غلا دخلت داخل وسلمت ع جوري جوري: عيل وينه؟ غلا: منوه هوه؟ جوري بصوت عالي: الماكدونالد؟ حارب : وراج جوري: بسم الله انته من وين طلعت ... يلا عطني اياه حارب: يودي ... بسم الله مستقطعه جوري: يوووعانه انزين افففف مذله مادانيييييك أبا أعرف ليش ماكدونالد ما يسووون توصيل بدل مذلتك! حارب: والله انتي مافيج أخلاق (دوم يقولها هالجمله هههههههه) يلا انجلعوا من هنيه راشد ياي جوري: انزيييين حارب: وبعدين مستانسه ع عمرج لابسه هاللبس اللي ما يندرى وين راسه من ريله جوري: هههههههههههه اتغار... عقب بتقول حق حرمتك تلبس نفسه حارب بصوت واطي: حرمتي الا نفسج .. كله مطقمين (قصده غلا) جوري: انته شو تخربط؟ حارب: يلا سيروا راشد ياي جوري وغلا: انزيييييييييييييين ودشوا داخل . . . فالصالة الداخليه لغرفة جوري .... كانوا جوري وغلا فاجين التيلفزيون على 2 ويطالعون فيلم اسمه 50 first dates وياكلون ماكدونالد امممم يمي يمي جوري: غلووووه ... باجر لازم انسير نتشرى غلا: حق الشو؟ جوري: لا تستهبلين غلووووووه ... حق المعسكر غلا: والله اتضحكيني يوم اتقولين معسكر جنه صدق الحين! جوري: ايييه اسكتي مب حد يسمعج ادريبج فضايح غلا: انتي متأكده اترومين تبعدين عنا شهر كامل ف مكان انتي ما اتعرفينه؟!!! وانتي تدرين لو اهلج دروا والله ما بيرحمونج جوري: ايييه لا تخوفيني روحي زايغه ... ما اتوقعت السالفه تستوي جد غلا: وانتي بس هذا هو ... اتسويين مغامراتج عقب اتقولين ماكنت ادري بيستوي جذه؟!! جوري: اييييييييه لا تلعوزيني وتاكل بطاط (هههههههههههه نكته هالبنيه) غلا: شوي شوي عن اتغصين بلاج مستقطعه الأكل ما بيطير! جوري اتهز راسها يعني اوكي غلا: انزيييين ما قلتيلي ... انتي ومنوه ومهوه بتكونون ويا بعض طول الوقت؟ جوري: لا طبعا كل وحده روحها وبنلتقي مثل السيلانيات كل جمعه هههههههههههه غلا: انا مول مب متخيله اللي بيستوي جوري: لا تخافين الكليه بتختارلنا الانسب ... الحين يسوون اتصالاتهم ... وبعدين انا بشل اللابتوب وياي والموبايل طول الوقت اف جيبي ... خذتلي موبايل كتكوت ما يبيّن وانشالله بنكون على اتصال طول الوقت غلا: انتي اتعرفين كم باقي عن المعسكر! جوري: امممم يعني تقريبا اسبوع غلا: ومستانسه حضرتج؟ جوري: خلاص لا مفر ... المهم متى بنسير انسوي Shopping ؟ غلا: اممممم باجر الأربعا ... خلاص عيل ورى باجر ... الخميس الصبح جوري: اوكي كوووول بس تعالي؟!!! شو نوعية اللبس اللي آخذه معايه؟ غلا: هههههههههههههههه ... بناخذلج لبس مال المهنده هههههههههههه جوري: اتصدقين؟ يبالي وتموا يضحكون وسالفه اتيب سالفه وشوي واتصل راشد اف غلا غلا: هلا راشد راشد: يلا أنا ساير بتين ويايه ولا بتباتين؟ غلا: لا شو أبات! جوري نطت: امبلا امبلا بليييز باتي بيتنا غلا: وكليتج يا حلوة ودوامي! (غلا تشتغل اف نفس البنك اللي يشتغل فيه حارب بس اف فرع الشارجه وهو اف فرع دبي شارع الشيخ زايد (الله يرحمه) .. يعني ما يتلاقون .. وعلى فكره ... هو اللي موصي عليها ومختارلها مكان يكون منخش عسب ما تتعامل ويا الرايح والياي... هههههه يغار عليها ... وهي ما تدري ... تتحرى مشغلينها عسب سواد عيونها خخخخ) جوري بوزت وقالت: افففففف راشد: يلا عيل أنا برع غلا: الحين يايه وسلموا غلا وجوري على بعض على أمل انهم يلتقون الخميس الصبح ويتشرون أشياء حق جوري عسب يتنفذ اللي افبالها والله يستر منه! . . . وردت جوري غرفتها وظهرتلها ثياب حق الكليه حق باجر واتغسلت ولبست بيجامتها وانخشت تحت اللحاف ورقدت على أمل انه ايي باجر بسرعه وتلتقي اف شلتها ويكملون باجي الخطط . . . (انتهى الجزء الأول)
__________________ كل عام وانتم بألف ألف خير |
|
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| أروع قصص الحب | قتيبة الهيتي | نور الإسلام - | 19 | 09-25-2007 10:05 PM |
| من أروع الرسائل في سيرة نبينا المصطفى محمد عليه أفضل الصلاة و أزكى السلام | ياسين | نور الإسلام - | 10 | 02-27-2007 03:35 PM |
| كلما أحزنكى زوجك أذهبى الى حبيبك | شمس مصر | نور الإسلام - | 6 | 07-13-2006 08:25 PM |
العرض العادي
