|
| |||||||
| قصص قصيرة قصص قصيرة,قصه واقعيه قصيره,قصص رومانسية قصيرة. |
 |
| | LinkBack | أدوات الموضوع | انواع عرض الموضوع |
|
#301
04-17-2008, 03:19 PM
| ||
| | ||
| رد: غلا وهم فالقهوه خليفه : شهالموضوع اللي سندرتني فيه ؟ تعال و ابيك ضروري خالد : سالفه و شاغله بالي خليف و مخوفتني بعد خليفه : قول وانا اخوك ششاغل بالك خالد : مادري خليفه ،، بس شتقول باللي ياخذ 2؟ خليفه : قليل اصل خالد : بل خليفه : شببالك خالد؟ خالد : مادري ياخليفه الشيطان راكب مخي خليفه : استغفر الله العلي العظيم ، ياخالد شناوي عليه؟ خالد : من رجعنا من الشاليه شفت وحده من بنات خالاتي مادري شلون شدتني ؟ خليفه : وشنو يعني خالد : افكر اخذها خليفه : لعب يهال حنا ، ملعب صابوني لان خالد : خلوف من صجي ترا خليفه : شنو اللي من صجك خالد : الشرع محلل اربع .. ! خليفه : خويلد تعوذ من ابليس ترا مرتك خوش مره ، وراسك ياان شكلها بالمستشفى كل ماذكره يقطع قلبي من الحزن عليها قلبها محترق وتجي تحرقها الحين؟ خالد يتنهد : مادري خلوف خليفه : لاتدري، هذي نزوة شيطان ، قوم واستغفر ربك وشيل هالبنيه من مخك لاانت ولا هي ناقصين ذنوب ، عيب ياخالد ماهي من سلومك هالاشيا ، وين اللي كان يقول من خذ 2 ماتوفق؟ بالعون انك انت واخوك حاله عليكم بلووه خالد : وانت الصاج والله .. خلاص انا ماشي اشوفك وقت ثاني خليفه : بهواك ،، بس تذكر كلامي ياخالد خالد : انسى انسى كل اللي قلناه طنازه مو جذي؟ خليفه : بعدي عليك والله خالد : يلا سلام وراح خالد وهو يتذكر شقال لخليفه اصلآ شقال؟شهالمصخره والكلام الوقح والتفكير اللي فكره؟ صج اني غبي ابيع غلا ؟ عساني اشب ولاالقى من يطفيني زين؟ مر خالد محل وشرى لغلا هديه وغلفوها خوش تغليف .. قعد يتذكر فلم شافه واحد طرش لخطيبته ورد وهي مع صديقاتها خالد : الحين عرفت قيمة الافلام ههههههههههههه لها فوايد والله وعلى طول يروح يشتري باقه ويوصلها للبيت ويروح دار دار دار الساعه 8 مطولين الستات اللي داخل قعد فالمجلس و زهق من قناه لقناه انترس قهوه و كافي الساعه 9 وربع خالد غفى المسكين من الملل و يقعده موبايله خالد : هاه؟ غلا : حد يرد ويقول ها؟ خالد : من غلا تخرعت : شنو من؟ خالد شفيك؟ خالد : نايم غلا : انا قلت ، انت فالمجلس؟ خالد : نايم غلاا وسكر طلعت غلا وراحت المجلس ماحصلته .. شكت لايكون دخل ومانتبهت له ركبت بسرعه لغرفتهم لكن حد خطفها على الدرج خالد : بونسوار ياحلوو غلا تخرعت : يمه ،، انت هني ! خالد : اكيييد غلا ابتسمت : ها شناوي عليه ؟؟ خالد : أأأ.... غلا : مشكور على الورد خالد : عاد شفتي عمرج بينهم صح! غلا : ههههههه أي نزل خالد معاها وهو ماسكها ..حاس بتأنيب الضمير على اللي صار فالقهوه.. لف عليها وحس انها بتقول شي وفرطت من يده على الارض فرمشة عين و خالد قلبه طاح قبلها خالد : غلاا!! خالد يهزها يحاول يصحيها مافي فايده ، بكل الطرق اللي بقت فعقله جربها..سمع نبضها ،، خفيف كلش شالها للسياره بسرعه و طار للمستشفى ونقلوها على طول ،، وبعد ماطلع الدكتور صفع خالد بخبر ،، نهى حياته ،، شل جسمه ،، عمي عينه ، وقف قلبه كل الدنيا و ازعاج المستشفى فهالثانيه سكن ورك .. الدم جمد بعروقه وازرق لونه ، عيون خالد ذبلت و دمعت روحه ماتت ولابقى فيه شيٍ يحيى كل الحياة خلصت والوانها جفت وغمجت صارت سودا هالدنيا وتنكرت الدقايق اللي مرت قبل شوي لخالد لما كان ففرح مع غلا وصارت الدنيا ترح له يدور الانفاس حتى يسرقها و يوعى للي سمعه غلا دخلت ف غيبوبه !! خالد : آآه ياهلي وينكم ؟ فقدت غلاا يااناااااس عقب ساعه رجع له الدكتور الدكتور : كلم احد من اهلك انت ماتفيد جلستك هنا خالد : شتفيد الحياه اصلآ ؟؟ رفع الموبايل واتصل لابوه سعود : ياهلا بخالد خالد : الحق يايبا اشوف الموت وانتوا محد سعود : ياويلي عليك شفيك ياخالد؟؟ شصاير خالد : تعال لي يبا ياانك تلحق ياان عيالي بيتيتمون سعود : شتقول انت وينك ؟؟ خالد : بمستشفى ......... وسكر سعود و طار لولده و قال له خالد السالفه اللي حلت مثل الفاس على راس سعود وبسرعه انتشر الخبر وتوها تغريد داخله للمستشفى ويوقفها خالد خالد بعيونة المليانه دموع: ورحمة اللي راحوا ان شفت حد منكم هني لااذبحكم كلكم تغريد : بسم الله الرحمن الرحيم ، شفيك ياخالد؟ خالد : مابي ولا احد هني فهمتي سعود : خلاص تغريد ، الصبي معتفس لاتخلون حد يجي خلاص روحوا وانا اطمنكم تغريد : بس... سعود : خلاص ياتغريد خلاص لاتزيدين الوجع راحت تغريد و قالت للكل انهم مايبون يشوفون حد طلع الفجر على خالد وابوه وهم فالمستشفى سعود : يايبى ياخالد اذكر ربك وادع لها لاتذبح عمرك جذي خالد يهز راسه وهو سرحان : مابقى شي اعيش له يايبى،الروح وراحت، ام فيصل خلتني يايبا ، ياكبر مكانها و ياشين هالدنيا من بعدها سعود : لاتقول جذي ياخالد ، انشالله وبحيل ربك بتصحى خالد : قالوا لك هذي مسأله لاهي اكيده ولاشي ، حياة غلا على الاجهزه ، لو اعرف من شنو والله برتاح ، انا ماكنت متعبها وراسك سعود : ادري يايبى ادري قال لك الدكتور انشالله بيجينا الصبح وبيطمنا خالد : يبا خلك قوي تكفى ، ترا مالي احد يسندني غيرك،شدتي طاحت ومن كانت تسندني راحت و خلتني يبا ،، خلتني سعود : لا يا يبا خلك اقوى من جذي وامسح هالدموع خالد : لوتفيد هالدموع وترجعها والله لااصب الدم يايبا سكت سعود و خالد و راح سعود و كلم عمر و قال له انه لازم يرد ماقال له الخبر ولاشي واكد على هله انهم مايعلمون عمر عن شي الا لارجع لما سكر سعود راح يدور خالد .. لقاه رد مره ثانيه قاعد ومسند ظهره على باب غرفة غلا سعود : يايبا قوم لاتسوي فروحك جذي خالد : خلوني يبا خلووووني |
|
#302
04-17-2008, 03:21 PM
| ||
| | ||
| رد: غلا مرت نص ساعه و خالد قاعد عند الباب مابقت ثانيه ماعاشها مع غلا الا وطرت عليه مابقت دمعه ف عينه الا وخرت وصلخته (سامحيني ياغلا)... الساعه خمس جاهم الدكتور .. سعود : بشر دكتور ، انشالله خير؟ الدكتور : كل الخير باذن الله ياعمي .. سعود : يعني شنو ؟ غلا صحت؟ الدكتور يهز راسه ينفي سعود : لاحول الله الدكتور : في شي بعد خالد رفع راسه :شنو؟ الدكتور: نتيجة التحاليل تقول انها كانت حامل!! خالد: حامل!! الدكتور : أي حامل لكن نتيجة اللي صار فقدته اكيد خالد : هي ماقالت لي ولا كان يبين عليها .. الدكتور : ...............! خالد يكلم ابوه : ماجابت سيره انها حامل ! سعود : انزين يادكتور،، شالحل الحين ؟؟ الدكتور :الحل انكم ماتنسونها بالدعاء ليل ونهار واحنا بنسوي اللي علينا وزياده والباقي على ربنا انشالله خالد : شسوي يايبى شسووووووي ويرفس الجدار بكل حرقه فقلبه .. يبا تكفى تكلم وقول ، قول ان غلا بترجع سعود : انشاااالله بترجع انشالله يايبى ، بسك وتعال اقعد ارتاح على حيلك من امس خالد : لوهدة الحيل تنفع يايبى .. سعود يقاطعه : ياخالد ياخالد ، سمعت الدكتور شقال ؟ قوم وصل لك ركعتين واطلب من الله يقومها ،، والغيبوبه وانا ابوك مهي بالموت لاقدر الله ، ياما ناس دخلوا فغيبوبه و رجعوا صحوا,,قوم عشانها يلا وادع لها واطلب من الله يشافيها ويقومها بالسلامه ماتدري شيمكن يصير من تغط عنها ؟! خالد : خااايف يايبى سعود : لاتقول جذي يايبى افرح و اشرح خاطرك انت رايح للي عينه ماتنام ،، افرح لانك بتشكي لربك همك .. وربك بيفرجها ياخالد خالد سحب عمره للمصلى توضى وصلى .. الماي كان بارد على وجهه ريحه حييل تمنى لويتم طوول وقته تحت هالماي ويرجع يفتح عينه ويلقى كل شي متغير .. لكن!! دخل المصلى وصلى..سلم و تسند على جدار المسجد وهو مغمض عينه ودموعه حاره بعينه..ماحس الا بحد يحب ايده وفتح عينه خالد:عمر؟ عمر : ورووح غلا انك تسامحني خالد يسحب ايديه ويقرب عمر :على شنو شتقول ياعمر استغفر ربك احنا اخوان عمر : انا غلطت ف حقك وايد ، انا كنت جاهل بكل شي ، تكفى سامحني خالد ضم عمر له وهو مايعرف اخوه شفيه ؟ زعلان على غلا ولا شصاير؟ خالد : انا خلاص ماعاد يهمني شيٍ راح ولا شيٍ بيجي ولامن زعل ولا من رضى ولا من ناح ولا شي .. مايهمني غير الغاليه انها ترجع وتصحى(وهو صاد) عمر قلبه كان ينزف لمن يشكي ولا شيقول .. خالد : قوم معاي ياعمر عمر : وين رايح خالد مشى عنه و عمر تبعه ،، من له بارض يتكلم ولا يشرح حتى .! وصلوا للغرفه اللي فيها غلا .. وخالد خلاهم وراح للدكتور يطلب منه انه يشوف غلا .. دخله الدكتور و تمنى خالد انه مادخل النرسات كلهم طلعوا وخالد جسد يمشي لغلا .. قرب منها وهي مهي ب غلا .. اجهزه عليها بكل صوب مسك ايديها ووطى راسه .. لييش يااربي ، هذا عقاب لاني فكرت بغيرها ! ياريتني انا اللي مكانج ياغلا مب انتي .. ياريتني غرقت يدها بدموعه خالد وهو يمسح على راس غلا: غلا ،، غلا حبيبتي ، تكفين قومي .. انتي تسمعيني؟ غلا مسكي يدي...(ماقدر يمسك روحه خالد يدنع ويرجع يرفع راسه)..غلا سامحيني .. والله اني نذل ولااستاهلج..وربي راضي باللي بتسوينه فيني .. بس قومي .. عشان من له شان عندج .. مابي اطلع من هالدار بروحي..مابي ارجع البيت وانتي مب معاي..مابي حياتي وانتي بعيده..تكفيين طلبتج يابنت عمي..غلا؟ سكت خالد ووطى راسه يقرب من غلا ولايسمع حس منها حتى نصخها خفيييف شصار عليج ياغلا شصاار؟ عمر اللي كان مدنع حتى ابوه مايشوفه ويمسح على عينه حتى ماتدمع عمر:شاللي صار واستوى فيها جذي؟ سعود:علمنا واحد يبوك،،محد يدري،يقول خالد فجأه طاحت عمر:لاحول الله،،والحل؟ سعود يأشر له بيدينه انه مايدري ووطى راسه عمر دخلوا الممرضات وخالد حاط راسه على سرير غلا وشابص فيدها..بالزور رضى يطلع..طلع وشاف ابوه واخوه خالد بطوله وعرض كتوفه ماقدر يستحمل هالمصيبه وهدت كله.. |
|
#303
04-17-2008, 03:21 PM
| ||
| | ||
| رد: غلا عمر:امش معاي خالد خالد:شتبي عمر:انا ماني اخوك؟ترا يعز علي اشوفك جذي،تعال معاي ابي اكلمك مشى خالد وعمر وراحوا على الكراسي عمر:خالد قول لي اللي ف قلبك .. ارتاح ولاتخلي شي يهم قلبك خالد يبتسم:ليش هو بقى قلب فيني؟ عمر:اذكر ربك يارجال،،انت لوتلف المستشفى وتشوف وشفيه،،بتحمد ربك بكل رمشة عين على اللي احنا فيه..ترا انشالله مسألة غلا بتعدي وبترجع لنا بالسلامه خالد:الله يسمع منك..آخ ياعمير لوتدري قلبي شلون محترق.حاس اني ضعييف ميت .. كل قوتي كل عصبيتي طلعت ولاشي..ماني متحمل فكرة اني ارجع البيت وهي محد(يمسح عيونه)..مابي اسمع سعود ولااخوانه يسألون عنها..انا شبقول؟ عمر كان يبلع ريجه..طلعت انت ميت موته عذبه يخوي فيها ..مب انا بس خالد:غلا اللي من عرفتها وانا مادري شلون صاير؟عمري صار فيها وحياتي وكل شي..انا عرفت نفسي معاها..راحتي كانت وياها..مالومك يوم حبيتها..دخلت قلبي مادري شلون ولاحتى متى.."بتسم خالد"..يامحلى دخلتهاا..يامحلى دنياها عمر رجوله كانت ترقل مايدري ليش..خايف ولا زعلان محد كان فاهم شفيه اصلا مر اسبوعين والحال نفس الحال .. ماتغير شي ولازاد..غلا بنفس حطتها من اول ليله..وخالد نفس القعده..عمر ماكان يفارقهم ولا سعود اهلهم الجاي والرايح..خالد هدت اعصابه..لا يمكن ماتت اعصابه..صار مانه فاضي لحد ولاله حيل يتكلم.. كانت تمر ساعات و خالد واقف ويشوف غلا من قزاز الغرفه تمر ليالي طويله وهو ماخذ من مسكة ايدها نومه يود انه مايصحى عمر"حاسه فينا يابنت عمي ولا؟ حرام اللي قاعد يصير كل منا جن بقعدته ، ياربي تشفيج" عمر مع كل ذكرى يتذكرها بايام حبه مع غلا تطيح دمعه من عينه.. قرب للقزاز وشاف خالد وشلون حالته وهو قاعد مع غلا مثل الياهل ماهو عارف شيسوي غلا اللي من غير ماتقصد ومن غير ماتدري بين يوم وليله اقتحمت حياتهم واعصفت بمشاعرهم وعلقتهم فهواها سنيييين وايام كثيره من اعمارهم،،توهت مشاعرهم و خلتهم يتبعون هواها من غير وعي،،ساموا عمرهم وباعوا كل شي،،غلا اللي كانت حبيبة خالد راس ما له ومله..صارت انفاسه ماتنادي الا رجوعها .. لكن هيهات تسمعها عمر اللي لعن الحياة من فارقته غلا وحرم على عمره كل درب غرام وكل شوفه حلوه حتى لايطيح بحب غيرها صارت كل كله صار يلحقها بلا وعي..يبيها تصير له لكنه مايقدر .. صارت غلا للكل مثل الي يبي يطاول نجوم السما ب يدينه.. صعبه صحوتها..ممتده على طول العمرر... ياهي شينه الحياة من بعد غلاهم..صعبه ولايقدرون عليها خالد صار نواح هم وحزن مثل اللي مشت فيه الحياه وصار عمره 100 سنه شكله يذوب الصخر .. دايمآ النهايه ماتجينا على مانشتهي.. التعاكس لازم يجينا لو حاولنا ان نشرد عنه..نبعد ونظن ان بعدنا عنه لكن نطلع نقرب منه ايام صارت تنذكر لما كانت غلا فيها .. صار خالد معتزل حتى بيته ومايحب يشوف عياله كثيير .. يخاف يسألونه..صارت ماايحب يشوف بيته من غير نووره.. صار دايمآ يتنظر صوتها تناديه ،، تصحيه،،تعاتبه،،تدلعه،،تشكي له..ولهاان عليها كانت هذي الجمله اللي مايمل لسان خالد من قولها ينهد حيله كل ماتذكر انها غابت عنه..مثل مايموت عمر ومايقوى انه يحيى.. محد كان متوقع هذي النهايه... ((عن ديرتي غاب القمر ما عاد أشوفه بالسما ! الكل منا ياقمر . فغيبتك يبكي عليك يتمنى والله شوفتك اتذكرلقاك لين شفت البقايا اتوجّدعليك واكتمه في خفايا اذرف دموع عيني لاذكرت الهدايا ولين شمّيت عطرك زاد فيني عمايا قدك ورمش عينك هي طعون الضمايا هي غناتي وروحي..اصحبت هي منايا!! اتذكرشفاك وكل ذيك الحكايا بالوسيعه محدٍ ملك قلبي وعيني الا غلايا..)) ..: النهايه :.. |
|
#305
04-18-2008, 03:28 PM
| ||
| | ||
| رد: غلا والله القصة روووووووعة ... بس خسارة تمنيت تكون النهاية أفضل من كذا ... << ههه المشكلة هي قصة و بس . يعطيك العاااااافية أختي و بجد أمتعتينا لا عدم و لا خلا ... قطرية كيوووووت
__________________ يآمآ جرحوني بس ما بكيت { أجرح !!.. صمتي على جرحي يسبب جرح أدخل و أسدح توبكك هنا ~.~ " قطرية كيووت " |
|
| مواقع النشر (المفضلة) |
| |
العرض العادي
