لما كنت صغيرة كنت دايما اسمع كلام اخوي الكبير واصدقه، عاد اهو كان 7 وانا 5،
كان اي شي يقوله اصدقه على طول واللي يخالفه يعني جذاب، لما دخلنا المدرسة انا وهو -كنا بمدرسة خاصة وكانت خلط بنات وصبيان-،
انا كنت بالروضة فيها واهو صف الثاني-، كان يقولي لا تكلمين شباب ، - الله اكبر عليه احين هالبزارين اللي طولهم شبرين صارو شباب وانا الهبلة اقوله ان شاءالله. كنت مسكينة ومطيعة
فلما كان يكلمني واحد من الصبيان، كنت ارد عليه "اخوي قالي ماكلم شباب"
واذا جاف اخوي واحد من الصبيان يبي يكلمني، يشمر عن ساعديه ويستعد للمعركة وطبعا لازم يقول "لا تكلم اختي!"
اللي كانو معاي بصفي في الروضة عبالهم انا مغرورة لانه ماكنت اصادق اولاد ، لما صار عندي شله
كانو اربع صبيان، طبعا ماكان يدري اخوي ولا قلتله

من أكبر صواريخ اخوي : العروج/العروق اللي بالعين لو وصلت للبؤبؤ بتنفجر عينج وتصيرين عمياء.
ياربي مادري من وين ياب هالصاروخ، وانا الهبلة ام 5 سنين صدقته ، وكنت دايما احاسب على عيني،
لدرجة غسلتها بصابون مرة ، في مرة من المرات خذتني امي للعيادة،
حق فحص النظر، والدكتور قالها"بنتج تحتاج نظارة". انا هنا تذكرت كلام اخوي عن العروج وانهبلت،
قعدت اصيييييييييح، والدكتور وامي متوهقين،مايدروني شلون يسكتوني.
الدنيا اسودت بعيني وخلاص مقتنعة اني بصير عمياء
ماقول غير الله يسامحه، اشوه كبر وقفت معاه صواريخه

اليوم؟ إ جـ ـا ز ة

ماقدر اوصفلكم فرحتي، بهالإجازة، صج صج يات بوقتها. الحمممدلله
هالفصل الدراسي برعاية :sos!!! I have no idea what i'm doing
ياخسارة الخمس السنين اللي درستهم بالجامعة .
محد قالي انه الابتدائي اصعب من الروضة، والاعدادي اصعب من الابتدائي، والثانوي اصعب من الاعدادي ،و الجامعة اصعب من الثانوي، وأنه التوظيييف معقد زيادة عن اللزوم!
اهو ادري في النهاية مابكتشف ذي الشي إلا لما اجرب واعيش الوضع
بس بعد شوية تحذيرات مابتضر

داومت يومين بس احسهم سنتين، تعععب موطبيعي.
والنفسية نخليها لله. الواحد يبيله دهر ع مايتعود ع بيئة يديدة. خصوصا اذا كان هالشي في مكان عمله.
يعني مجبور انك تتعود، تعرفون شعور الخوف على عدم الراحة. ذي احساسي كل يوم اقوم الصبح.
ابي اتعود بسرعة، ماحب اقوم الصبح، وكأني رايحة السجن ولا اعدام.

صفي؟ بناتي؟
مادري شقول عنهم. ظريفيين . ظرافة موطبيعية ماشاءالله.
يجننون، يمكن الشي الوحيد اللي مخفف علي ومهون الوضع.
صج ساعات يرفعون ضغطي، بس في النهاية اهمه يهال، وطبيعة اليهال يرفعون ضغطك .
الحمدلله على كل حال، غيري وضعهم اسوء مني، وفي النهاية نحمد الله ونشكره على كل حال.
إن شاءالله تعدي أول سنة على خير ومن دون مشاكل.

غيرو جدولي؟!! جدول الحصص :\
وتوهم مطرشين؟! الساعة ثمان ونص الليل!
يمكن الشي مايفرق وايد بالنسبة للبعض، بس معاي تفرق!
يعني لما صرت اتعود على روتين، فجأة بمزاجهم يغيرونه؟
انزين قبل اسبوع اعترضت على جدولي، وايد متعبني. كل الايام عندي السادسة.
يعني شبيضرهم لو عطوهم السادسة حصص فنون ولا رياضة؟ يستانسون بهالاشيه.
نرجع لسالفة الجدول اللي تغير فجأة. عافسيني عفاس.
المهم ماعلينا، ان شاءالله باجر يكون احسن من غيره
كنت اتكلم مع شينا عن هايكيو، وعلى طاري هالسالفة.
تذكرت شي صار، يوم الاثنين الطالبات كلهم كانو غايبين،
والمدرسة فاضية مافيها غير المعلمات، قلت شسوي احين؟
عندي السف فاضي وماعندي شي اسويه
دخلت زميلتي -معلمة معاي- الصف، وكنا نسولف ومادري شلون مرة وحدة صرنا نسولف عن الانمي،
عاد قلتلها بشغلج حلقة وعطيني رايج، المهم فتحت الابتوب وشبكته على بروحكتر الصف والسماعات شغالة.
شنو شغلتلها؟ هايكييو
تخيلو انه المشرفة الادارية دخلت علينا الصف، واحنا مشغلين انمي والسماعات صوتها عالي
اهي تخرعت من الصوت، ومستغربة منا، شنو نطالع؟
عاد من الصدمة ماسوينا شي بس قاعدين، وصوت هيناتا يصارخ .
عاد عطتنا اوراق نوقعهم، واحنا نوقعهم اهي بس تناظرنا وتناظر اللي ينعرض
الموقف سخيف بس تخيلوه صاير جدامكم ،

And that was how in the early age of 20s i became a mother of 31 children


بناتي صارو ينادوني "ماما إلهام"
ودي اصيح ، مو من الوناسة طبعا، بس احس ذي الشي مكبرني بزيادة .

المهم ماعلينا، يوم المعلم كان اليمعه؟ استقبل كل الهدايا:n:
مافي؟ اصلا احسن انا ماحتفل بهالخرابيط .

من أسخف الاشياء اللي كنت اسمعها لما كنت بالجامعة -وخصوصا باخر فصل- :
"لييييييييش دخلتي الكلية!" "تخصصج متعب" "وايد بتعبين"
"التدريس يكبر" "بعدج صغيرة ع التدريس"

وبالتدريب الميداني المعلمات الكبار بالسن :
"غيري تخصصج" "مب زين التدريس"

وهالشي للحين اسمعه حتى لماتخرجت وبديت اشتغل
لول الشي المضحك اني بيوم من الايام بدرس عيالهم ولا احد يصيرلهم ،
وبعدين شنو غيري تخصصج ، ع اساس بترجعون السنين اللي درست وتعبت فيها؟!
انزين واذا كان متعب؟ مافي شي بالحياة سهل! ماتقدر تحصل اللي تبيه اذا قعدت بغرفة مكيفة وتمنيت!
إلا اذا عندك مصباح علاءالدين
الزبدة بسكم تحبيط! انتو ماتدرون عن ظروف غيركم، ولا تعرفون عن كل التخصصات. فلاتقعدون تتفلسفون
التخصص اللي تقول انه يتعب ويهد الحيل، بيقدر اي احد يبدع فيه.
فاستريح مكانك

ياجماعة احين في فيس رقاصة الواتس هني ولا؟