بعد ما اريد فيزا ولا لجوء انساني ...عمت عين الاقامة الدنست صيتي ...واشكر كل صديق وكل خوي وكل جار ....قفل بابة ورفض يقبل عراقيتي ...خلف الله عليكم والوكت دولاب ..لابد يوم ينزل بيكم ارضيتي ..لان اول امس كل البشر خدام ...چانو للعراق واكلوا ابيتي ..چان الضيف عندي مكرم ومهيوب ..فوگ الراس اشيلة وهاي تربيتي..ما داعي اسولف وانة ابو النهرين ..ياهو الما سامع اخبار حنيتي ...بعد بصمات ايديهم والطبع موجود .. من چانو جياع بوسط صينيتي ...يا دنيا حرام ومنكر ومكروة ... اذا ابن العراق اليوم وطيتي ...معقولة نسيتي اسم العراق بساع ...لو مثل البشر همن تناسيتي ...ما يفيد الحچي ولا تنفع الچلمات ...راجع يا وطن لترابك الزيتي ...راجع يا حبيبة گلبي يا بغداد...وادري بچثر ما ونيت ونيتي ..وادري لوحدچ وعفناچ صار سنين .. وادري من الحزن تابوت سويتي ..جيب الاغتراب وحطة بل التابوت ...يا غربة عراقي شكثر اذيتي .. ما عيش بحر مالح طعمة ياها الناس ...انة بسجن الفرات فقط حريتي ..وترابي ذهب والگاع من ياقوت ...ومن ثوب الكرامة البسها بيريتي ...وان گالو لا ترجع الوضع مو زين ...اگول انة الوضع والزين تاليتي ...وما يهمني بعد ليصير خلي يصير ...طعم الموت اشرف من هجر بيتي ...اموت بوسط اخوتي ويا حلاة الموت ...من اجمع اهلنا واكتب وصيتي ...وصيتي لو متت لاتچفنوني چفان ...لفوني بعلمنا وهاي امنيتي ...اذا تردون الية بها الگبر ارتاح ....امانة الله دفنوا وياي جنسيتي ...امانة الله دفنو وياي جنسيتي ..

مع تحياتي :أوس العراقي