مجنون سارة - الصفحة 3 - عيون العرب

**أشجان الأزهار** · #11 06-11-2006, 01:31 PM

نوره : مب زحمه لان اليوم السبت تعالي ايام الويك اند وشوفي الزحمه وبالذات الخميس.
وراحو طبعا يتشرون وبعد ما خلصو راحو تعشون في المركز نفسه .

ومحمد ربيع خالد كانوا في السياره .
خالد وهو يسوق: يا اخي ماعرف اليوم وين نطلع .
محمد : هي صدقق ملل .
محمد وهو يشوف خالد : ولا تعال شو اخبار الحلوه ريم
خالد وبنظره يشوف محمد : وشو اللي ذكرك فيها الحين .
محمد اونه مستحي : لا بس الصراحه من زمان ما شفتها ولا اقول من شفتها ذيج المره وانا والل كله افكر فيها .
خالد : يعني الحب من اول نظره يالاخ .
محمد : هي صدقت .بس ماشاء الله عليها تدخل الخاطر وحلوه بعد .اتصدق خاطري اشوفها .
خالد فكر بفكره وشاف محمد بخبث وابتسامه عريضه : تعرف شو بحقق حلمك .
محمد وهي مستغرب: شو قصدك؟ شو بتسوي ?
خالد وهو واثق من عمره : اقولك خلا المهمه لي واصبر .
وفجأه خذ الموبايل واتصل في اخته نوره :
خالد : الوو نوروه
نوره وهي تبتسم وتغمز ساره :هلا بالخطيب الغالي .
ساره وهي تقرص نوره وتقولها بصوت واطي : بس فضحتينا .
خالد : نوروه وينكم ؟
نوره : نحن في مركز البستان قاعدين نبى نطلب عشاء.
خالد : وين بالضبط حددي.
وقالتله نوره الموقع بالضبط .
نوره : ليش يا اخوي شو بتخاوينا .
خالد وهو مستانس : هي اذا ما عندج مانع .
نوره : لا طبعا يا اخوي ما عندي مانع اكيد .
خالد : اصلا لو عندج مانع بعد بيي.
ضحكت نوره .
نوره وهي تبتسم : اوكي اخوي يالله نترياك.
ساره : شو تتريين منو ؟
نوره وهي تبتسم : حبيبتي الخطيب يبى يتعشى ويانا .
ريم وهي فاتحه عيونها : ها ااااااا .. شو . شو يتعشى أي انا من الاهل . استحي .
نوره : سكتي سكتي شو تستحين عشره عمر ويا بعض .
ساره وهي مساكه ايد ريم :حبيبتي انتي من الاهل لا تنسين اني اعتبرج اختي .
ريم : بعد عمري والله يا ساره . بس ؟
نوره : لا بس ولا شي يالله خلا نطلب لنا .

خالد وهي مبتسم وفرحان وايد ويشوف محمد : ها يالغالي شوف حققت حلمك .
محمد وبنظره تعجب : شو السال فه أي حلم .
خالد : يالاهبل ما قلت انك تبى تشوف ريم خلاص بوديك عندها ونتعشى ويا بعض.
محمد وهو متوتر: هااا شو انا ايه عللا كيفك . شو اتعشى وياهم ما تعرف اني استحي .
خالد يضرب على كتف محمد : ايه شو تستحي انت حرمه .
محمد : حرمه في ويهك .ولا قول انت اصلا الربحان في هالسالفه ضربت عصفورين بحجر .
خالد وهو يستعبط : ها ليش شو سويت انا .
محمد : اونك تبى تحقق حلمي عشان اشوف الريم وانت اصلا بعد تبى تشووف خطيبتك ساره .
خالد وهي مبتسم : ياا خي مثل ما قلت عصفورين بحجر.
وبعد ما وصل عند قوم ساره وريم ونوره .
خالد ويا محمد يايين صوبهم .
الريم كانت تشرب عصيرويوم شافت محمد غصت .
ساره تضرب على ظهرها : ايه شو فيج اول مره تشربين عصير فضحتينا .
ريم وهي تشوف محمد ومعصبه : ساره الله لا يبارك فيج انتي ما قلتي ان محمد ربيع خالد بيي.
ساره فجأه شافت محمد ويا خالد : وي وي خالد ياه.
ريم وتضرب عل ايد ساره : ساره ويعه . انا بحاله وانتي بحاله ثانيه اقولج محمد شو يايبنه انا خالد ويالله يالله وايي محمد .
نوره وهي مستغربه وتشوف الريم : وانتي شو عرفج في محمد يالريم.
ساره وهي تبتسم وتستهزء: لازم تحفظ اسمه وشكله من هذاك اليوم نحن في المركز وهي كله تمدح فيه .
ريم : بس سكتي فضحتينا هم يايين صوبنا .
خالد وعيونه على ساره : السلام عليكم .
ساره منزله راسها ومستحيه : وعليكم السلام .
محمد وهو متوتر وخايف وعيونه على ريم : الس الس السلام عليكم .احالكم بنات
ساره وريم ونوره وعليكم السلام يا هلا .
نوره : تفضلو ليش واقفين؟
خالد وهو قعد علىالكرسي : دام فضلج يا اختي .
خالد وهو يمسك من دشداشه محمد : مجمد بلاك واقف تعال ايلس .
محمد وتوه يبى ييلس: ها ان شاء الله .
وطبعا طول القعده محمد عيونه علىالريم وخالد اكيد عيونه ما فارقت ساره .
خالد وهو يكلم ساره : ها ساره شو اخبار الدوام ؟
ساره وبصوت رقيق: تمام الله يعافيك وناسه .
خالد :وناسه من اول يوم بس بعدين كله شغل على راسكم .
خالد وهو يكلم الريم : ها ريم وانتي شو التقنيه وياج .
الريم وهي مستحيه : تمام الحمد لله .
نور ه وهي ترمس الريم في اذنها : بلاه العاشق محمد عيونه عليج .
الريم : سكتي سكتي مالج خص.
ساره : بلاكم عن شو تتكلمون .
خالد : اكيد يحشون فينا .
خالد وهو يشوف محمد : ولا انت شو رايك .
محمد : ها ااا .. عن شو ؟
ساره تضحك : محمد مب داري عن دنيانا .
محمد يبتسم ويشوف الريم .
وهم قاعدين يتكلمون ويسولفون
ولا فجأه??

تتوقعون منو اللي دخل عليهم ؟؟؟؟

**أشجان الأزهار** · #12 06-11-2006, 01:33 PM

الجزء الـــســــــــادس:

دخل فهد ويا ربيعه مروان وطبعا صدفه .
فهد : يالله يا مروان تعال نقعد تراني يوعان والله .
محمد : انزين ذبحتنا يوعان يوعان كأنا مب متعشي من سنه .
فهد وهو يدور على كرسي فاضي قعد ويا ربيعه محمد .
فهد وفجاه شاف ساره وتم يطالعها : ساره ساره هني .
مروان يدور : أي ساره شو السالفه .
فهد : ساره اللي جدامنا اللي لابسه اممممممممم شيله فيها فصوص ورديه .الاحلى وحده بينهم .
مروان وهو يدور على ساره : هي هاي اللي في وسط بنتين صح .
فهد : هي هي .
مروان وهي صد يشوف فهد : بس انت شو عرفك فيها ما دريت انك تكالم وتغازل .
فهد وهو يتنهد : اااااااااااه يا مغازله زهاي يا محمد سحرتني وقسم بالله سحرتني خلتني لااعرف الليل من نهاره .
مروان وهو مستغرب: من وين تعرفها .
فهد : هي ربيعة اختي .
مروان : مدانك تحبها ليش ما تخطبها .
فهد وهو منقهر : لانها مخطوبه مخطوبه من ولد خالتها .
مروان : هااااااا يعني راحت عليك يالحبيب.
فهد وبعصبيه : لا لا لا مستحيل تروح مني انا يا مروان اذا بغيبت شي احصل عليه سمعت ساره ما بتكون الا لي وبتشوف .
مروان خاف من عصبيه وكلام فهد : انزين انزين هدي شوي .
مروان وهو خايف على فهد من توتره : اقول فهود ليش ما نورح مكان ثاني نتعشى .

فهد :لا مابروح مكان ثاني انا ما صدقت شفتها عشان اتامل فيها ولا تعرف قوم قوم .
مروان وهي مستغرب ويشوف فهد : وين اقوم وين بنروح :
فهد يأشر على طاولتهم : بروح اسلم عليها .
مروان : انت ينيت ولا شو .
فهد : عادي اختي وياهم اوني بكلم اختي ومره وحده بسلم عليها اذا ما بتي انا بروحي بروح .
مروان : روح روح برةحك ما يخصني اخاف تسوي فلم هندي وظرابه .
فهد : روح عند طاولتهم وقف وشاف بس ساره وشوي بياكلها بنظراته : السلام عليكم.

**أشجان الأزهار** · #13 06-11-2006, 01:35 PM

الريم وهي صدق فاتحه عيونها وفمها بعد : فهد شو يايبنك .
فهد بابتسمامه : ليش حرام اسلم يعني .
الريم : لا يا اخوي تفضل حياك .
ساره وهي تمت تشوف فهد وتشوف ان عيونه عليها شافته ونزلت راسها وخافت من ان خالد يلاحظ .
خالد : هلا فيك اخوي فهد تفضل.
فهد مستغرب منو هذيله : فهد تسلم اخوي دام فضلك .بس ما عرفنا من الاخ :
الريم وهي مبتسمه : هذا الله يسلمك اخوي ولد خالة ساره وخطيبها بنفس الوقت .
من سمع فهد ان هذا خطيبها وشوي يبى يذبحه ولا النار بقلبه ما قدر يستحمل .
فهد وهو منقهر : يالله من رخصتكم .
الريم استغربت من ملامح اخوها : بحفظ الله ياخوي .
نوره وهي تكلم الريم بصوت واطي : الريم هذا اخوج .
الريم : هي ليش يشبهني .
نوره : أي يشبهج والله احلى منج .ماشاء الله عليه صدق وسيم اسمراني وعليه طول ولا عيونه كم تسوى .
الريم : لا بعد بس ناقص تكتبين له بيت شعر .
نوره : والله لو اعرف اكتب جان كتبت .
خالد : انتو أيه شو تتكلمون حشى احشمونا نحن قاعدين وياكم .
نوره بتوتر: ها ماشي بس قلت ان اخوها ما.. ما.. ما يشبها.
وخالد لاحظ نظرات فهد وانقهر وايد بس سكت .

اما هند فكانت بروحها وتتريه مكالمه اخو ربيع منى بس صارت الساعه 9وما اتصل .
وفجأه رن موبايلها وشافت الرقم ولا هو رقمه .
هند بخوف كبير: الو
سالم اخو ربيع منى : الو مرحبا بناعم الصوت .
هند بتوتر وبرقه : م مم م م مراحب
سالم : هلا وغلا بهند شو اخبارج يالغاليه .
هند : تمام الله يعافيك
وتكت ساكته .
سالم : شو فيج ساكته .جنه هاي اول مره اتكلمين واحد صح .
هند : هي هي طبعا .
سالم وفي خاطره يقول (كل البنات يقولون نفس الكلام ) : اتصدقين انا بعد اول مره اكلم وحده
وطبعا جذب لان ما خلا وحده ما كلمها .
هند بخجل : صدق انا اول وحده
وسالم بمكر : طبعا انايوم قالتلي منى عنج وعن اخلاقج قلت خلاص هالبنت اللي اباها .
هند مستانسه حيل : وسكتت .
سالم : الصراحه يا هند انا حبيتج .
هند وهي مستغربه : كيف حبيبتني وانت ما شفتني ولا صارت دقايق الا مكلمين بعض.
سالم وبخبث: حبيبتي القلب اول ما سمع صوتج اختارج انتي وحبج .
هند : ساكته .
سالم : وانا راح اعيشج بعز ودلال وراح تكون علاقتنا اجمل علاقه .
هند وهي مستانسه ومصدقه : صدق
يسالم : طبعا يا حبيبتي .
هند :حبيبتك .
سالم : هي الواحد يوم يحب الوحده باخلاص يسميها حبيبه وانتي اخذتي هاللقب .
هند مستانسه ومصدقه عمرها .
ولا فجاه نوره اختها يت وفتحت الباب .
هند من شافت اختها توترت وصقت التلفون في ويه سالم .
نوره واقفه عند الباب واستغربت حركه هند .
نوره وتشوف موبايل اختها .
نوره : هند شو فيج ليش اتوترتي يوم شفتيني .
هند بتوتر شديد وهي تلعب بيدها : ها ..ممممما شي . بس ربيعتي منى اتصلت وفجاه قطع الخط .. ا ا أ أ أ اكيد ما شي بطاريه في موبايلها . انزين نوره من رخصتج بروح عند امايه .
وطلعت هند وهي متوتره بس نوره لاحظت توترها واستغربت من الحركه .

**أشجان الأزهار** · #14 06-11-2006, 01:37 PM

الجـــزء الســــــابـــع:

الريم بعد ما وصلت البيت اخوها فهد كان يترياها .

الريم : السلام عليك اخوي .
فهد وهو معصب : وعليكم السلام هلا بالاخت شرفتي .
الريم مستغربه من عصبيه اخوها اول مره تشوفه بهالطريقه ...

الريم : هلا اخوي فهد خير ليش معصب؟
فهد وهو نازل من السلم : لا ليش اعصب وانتي طالعه ويا شباب ما اعرفهم .
الريم راحت عند اخوها : اخوي صدقني انا اصلا كنت رايحه ويا رباعتي بس فجأه خطيب ساره ياي وسلم علينا وقعدو ولا تنسى ان ربيع خالد يعتبرونه اخوهم لانه متربي وياهم .
فهد عصب يوم سمع خطيب ساره وبصريخ قال : لا تقولين خطيب ساره سمعتي لا تقولييييييييين.
الريم وهي مستغربه ورافعه حواجبها من التعجب: فهد شو فيك فهد انت مب طبيعي من كم يوم .
فهد وهو يرد على وراه : ليش مب طبيعي قولي مره وحده ميون.
الريم وهي تهدي اخوها : لا يا اخوي انا مب قصدي بس شو سالفتك ويا ساره .
والريم تمت تفكر وبصمت .
وفجاه الريم شافت اخوها وبتردد: لا ..لا يكون يا فهد تح ... تحب ساره ؟
فهد وهو ماسك يده وبنبره حزن : هيه هيه يا اختي احبها لا ما احبها اموت فيها انا مجنووووووونها سمعتي وساره اوعدج انها ماراح تكون الا لي سمعتي لي .
الريم وقفت ولا قدرت تنطق بكلمه .
معقوله اخوها اللي عمره ما فكر بالحب والحين يوم حب يحب منو يحب ساره ساره المخطوبه .
وفهد راح على طول غرفته .

وفي اليوم الثاني راحو ساره ونوره الشغل كالعاده وهم قاعدين يردون على المكالمات ويرتبون الملفات فجأه دخل عليهم ريال واسمه : عبد الله .

نوره وهي مندمجه بشغلها .
عبد الله ياي صوبها : السلام عليكم اختي .
نوره رفعت راسها عشان تشوف منو اللي يكلمها : وعليكم السلام نعم اخوي خير.
عبد الله اندهش من ملامح نوره ورقتها وتم ساااااااكت .
نوره استغربت من سكوته : نعم اخوي بغيبت شي.
عبد الله وهو يشوف نوره : ها ..لا اختي.. قصدي هيه بغيت اقول اني بغيت مبلغ معين بس ماعرف ما طلعلي شي .
نوره : مممممممممم اوكي يمكن تعطينا بطاقتك لو سمحت .
عبد الله : اكيد اختي افا عليج .تفضلي
نوره وهي ماسكه ورقه عبد الله : شوف اخوي الصراحه اعتقد في لخبطه في شي بس هذا مب تخصصي انا تقدر تروح على يمينك واسال الاخ جاسم هو يقدر يساعددك .
عبد الله بابتسامه ورقه : تسلمين اختي ما قصرتي .
نوره : الله يسلمك اخوي .

عبد الله راح بس في باله هالبنت صدق حلوه ورقيقه ماشاء الله عليها ومحترمه بعد .

هند في المدرسه وفي البريك أي الفسحه راحت ويا ربيعتها منى وهم قاعدين بالكافتيريا قاعدين ياكلون وقعدو على الكرسي .
منى وهي تشوف هند وتضحك :ها هند شو اخبار الحبيب العاشق .
هند خايفه : سكتي سكتي لا حد يسمعنا وتفضحينا .
منى : الله يخليج أي فضيحه المهم شو اخباره ان شاء الله فرحانه .
هند خلت الساندويش واندمجت في الرمسه وبرقه : تصدقين نحن علاقتنا من اسبوع بس احسه من سنه ما عرف تعلقت فيه وااايد ويمكن اقولج اني ما اقدر يمر يوم عندي وما اسمع صوته( وبتنهد) ولا كلامه ااااه يا منى كلامه يسحر .
منى وهي تبتسم /: هههههههههههههههههههه
ما قلت لج ما قلت لج طيعين يوما بتخسرين حبيبتي هذا يسمونه الحب الحب الحب.
هند وهي مستغربه : الحب معقوله حبيته باسبوع
منى : حبيبتي الحب ماله يوم ولا وقت .
هند وحاطه يدها على خدها : ايه يمكن الحب .

وطلعت هند صدق تحبه ولا تموت فيه اما طبعا حبيبها سالم ولا عمره حب احد هو اصلا هوايته يلعب على البنات ويقص عليهم .

اما فهد فهو صدق متعذب ويحب ساره اكثر من حياته ويقدر يضحي بعمره عشانها قاعد يفكر كيف يعترف لساره بحبه له كيف كيف وفجاه يتله فكره حلوه وهي انه يسجل صوته بخاطره من كلامه ويعبر عن حبه لساره ويعطيها الشريط وهي تسمعه وتعرف كل مشاعره
ونقز فهد من هالسرير وهو مستانس وااايد من هالفكره اللي طرت على باله

اما نوره وساره وهم رادين البيت ولا فجأه السياره وقفت ويا الفضيحه .
ساره وهي منقهره : شو هذا شو هالفضيحه في وسط الشارع السياره تخترب علينا .
نوره هي تحاول تعرف شو سالفه السياره : تصديقن ماعرف شو سالفتها .
ساره : قلت لج بروح بسيارتي بس انتي عاندتي .
نوره : الحين اللي صار صار خلاص . ثانيا نحن تونا طالعين من الشغل يعني نقدر نرد عادي .
وتمت ساره تتحرطم اما نوره طلعت عشان تشوف سالفة السياره .
وفي الطريج طبعا طلع عبد الله من البنك وخلص اوراقه وهو يبى يروح فجاه شاف سياره واقفه وشاف بنت ويوم حدد النظر ولا يقول : هالبنت انا اعرفها شفتها توني
ووقف سيارته عند سيارتهم ونزل وراح عند نوره .
عبد الله وهو يكلم نوره : خير اختي شو صار ؟
نوره وهي منحرجه : والله ماعرف شو سالفه هالسياره .
عبد الله رفه كم يده وقال : يمكن اساعدكم اختي
نوره منزله راسها: اذا تقدر اخوي .
عبد الله مستانس ان يت هالفرصه : افا عليج اختي .
وراح يشوف السياره شو فيها . اما ساره قاعده في السياره وتتحرطم .ونوره واقفه عند عبد الله بس شوي بعيده عنه .
نوره : ها اخوي عرفت شو سالفة السياره.
عبد الله وهو يبتسم : هي اختي السالفه وما فيها ان السياره ما فيها ماي ولا يمهج انتي ادخلي داخل السياره وانا راح اييب الماي لان شيشة البترول جريبه من هني .
نوره : والله كلفنا عليك وايد اخوي .
عبد الله بحنيه : لا افا عليج اختي .
وبعد ما عبد الله ياب الماي وكل شي راح عند نوره
عبد الله : خلاص الحين تقدرين تتحركين اختي
نوره منزله راسها وتلعب باصابعها : تسلم اخوي ما قصرت واسمحلنا تعبناك ويانا.
عبد الله وهو يعدل غترته : افا عليج اختي ما سويت شي يالله روحي بحفظ الله .
نوره وهي راكبه السياره : بحفظ الرحمن ومع السلامه.
عبد الله : مع السلامه.
وبعد ما تحركت السياره وراحو ساره ةهي تشوف نوره وتشوفها من طرف عينها .
ساره وهي تقلد رمسه وصوت نوره : تسلم اخوي ما قصرت .
نوره وهي مبتسمه ومستحيه : بسج عاد يا ساره من متى وانتي تعلقين شو فيج يعني حرام اشكر الريال .
ساره : لا ما اعلق بس اقول شو في ويهج محمر وانتي تكلمينه ولا اخاف الريال عايبنج.
ساره صدت صور ساره : سااااااروه يوزي عن هالرمسه لا تسويلنا مسلسل مكسيكي .
ساره : هههههههههههههههههه احلى مسلسل مكيسكي
نوره : هههههههههههههههههههههههههههههه حسبي الله على ابليسج.
هند بعد ماردت من المدرسه راحت وشافت موبايلها وفتحت موبايلها لانه كان مغلق وبعدين رن موبايلها واكيد المتصل سالم.رفعت هند الموبايل .
هند برقه الو
سالم :يا هلا والله باللي اشتقت لها مووووت .
هند وهي تلعب على شعرها : هلا فيك .
سالم : ليش كله غالقه موبايلج.
هند : لاني كنت في المدرسه واول ما فتحته على طول اتصلت انت .
سالم بضحكه خبث: ههههههههههههاي طبعا احساسي .
ودخلت نوره على غرفه هند وشافت هند وهي تتكلم تلفون .
نوره وهي تشوف اختها : السلام عليكم
هند توترت كالعاده : أي أي أي ... وعليكم السلام هلا نوره .
شفات نوره توتر اختها للمره الثانيه واستغربت من هالشي.
هند بتوتر ورعب : اقول منى منى راح اخليج الحين اوكي يالله باي .
نوره قعدت على الكرسي: توج يايه من المدرسه وكل الوقت تكونين ويا منى وبعد تكلمين منى الحين.
هند بتوتر : انزين شو فيها تراها ربيعتي واعز رباعتي بعد.
نوره : والله انا هالبنت ماعرف ليش ما ارتحالها .
هند : لا والله ليش شفتي عليها شي.
نوره وباسلوب جاد: لازم اتريه اشوف عليها شي بعديت اتكلم يعني .بس انا مب مرتاحتلها عندي احساس انها بنت حركات .

**أشجان الأزهار** · #15 06-11-2006, 01:40 PM

هند بعصبيه : والله انا ما يهمني ارتحتي لها ولا لا ء المهم مرتاحه لها وانتي اصلا من متى تهتمين فيه كل وقتج ويا الحبيبه ساره .
نوره : اولا ساره خطيبه اخوي وبنت خالتي ثانيا ساره احسن من هالي تكلمينها .
هند بصراخ : ايه ايه ما اسمح لج تتكلمين عن منى .
نوره وقفت وراحت وقبل ما تصك الباب
نوره : كلامي وياج ضايع اصلا .

هند انقهرت من كلام اختها ولين الحين تشوف منى انها ملاك مع ان منى اصلا عدوتها لان الربيعه اللي تنصح ربيعتها على الخراب والمعصيه تكون عدوه مب صديقه .

عبد الله كل تفكيره ويا نوره اللي لين الحين ما يعرف حتى اسمها دخلت خاطره من اول نظره وبعدين طلع ويا ربعه الستي سنتر .\

وخالد طلع ويا هند ونوره سيتي سنتر عشان يتشرون .
وهناك شاف عبد الله خالد وراح يناديه :

عبد الله وهو ورى خالد: خالد خالد .
صد خالد وشاف عبد الله : هلااااااااااااااااااااا والله بعبد الله وينك يا ريال ما تنشاف .
واما هند ونوره راحو مكان ثاني عشان خالد يكلم ربيعه .
عبد الله : انت اللي وينك حشى من ايام الثانويه وانت ما تنشاف .
خالد : والله تعرف يا عبد الله مشاغل الدنيا
عبد الله : هي صدقت ولا انت شو اخبارك ها لا يكون تزوجت .
خالد وهي يبتسم : لا والله بعدني بس انا خاطب
عبد الله ماسك يدخالد : الف مبروك والله تستاهل بس عاد اعزمنا على عرسك خلنا نفرحلك .
خالد : افا عليك يا عبد الله فالك طيب.
عبد الله : يالله يا خالد نشوفك على خير .
خالد : ان شاء الله يالله مع السلامه .
راح خالد عند خواته وطبعا عبد الله وهو يشوف ربيعه فجأه شاف نوره .
عبد الله فاتح عيونه : هالبنت هالبنت هني بعد .اااااااه يا الدنيا شو سالفتي كله اشوفها .
نوره ما انتبهت ان خالد يكلم عبد الله .

وساره وهي بحديقه الريم كانو قاعدين يسولفون ويضحون ودخل عليهم فهد وهو مار عندهم .
فهد وهو يشوف ساره : السلام عليكم
ساره والريم : وعليكم السلام
فهد : اشحالج يا ساره .
ساره : بخير الله يعافيك .
راح فهد شاف هالوقت احسن فرصه عشان يعطي ساره الشريط اللي معبر فيه عن حبه .
فهد وهو يايب الشريط: ساره يمكن تسمعين هالشريط .
ساره استغربت ومدت ايدها عشان تاخذ الشريط وشافت الشريط ماعليه اسم : شو هالشريط يا فهد .
فهد وهو يبتسم : هالشريط اهم شي بحياتي انتي اسمعي الشريط وبتعرفين .
ساره وهي مستغربه : خلا ص اوكي
ودخلت الشريط بشنطتها .اما ريم وهي تشوف اخوها وقلبها يدق وخايفه من اللي بيصير .

وبعد ماساره روحت راحت ريم بسرعه ادور على اخوها .
الريم : فهد فهاااااااااااااد وينك .
فهد : هني انا في الصاله .
الريم قعدت عند فهد : فهد شو هالشريط اللي عطيت حق ساره .
فهد صد صوب اخته : هالشريط يا الريم بيفهم ساره عن حبي لها واني اموت فيها واني ابيها تكون لي .
الريم قامت من مكانها شووووووووووووو فهد فهد انته شو سويت ااااااااااااااه يا خوفي اخسر ساره .
فهد راح يهدي اخته : شو بلاج يا الريم انا بس بعترف لها اني احبها .
الريم : وهي طبعا مستحيل ترضى بهالشي لانها مخطوبه مخطوبه يا فهد وتحب ولد خالتها خالد من زمااااااان .
فهد صد عن اخته وبعصبيه : قلت لج انا ما يخصني بهالكلام قلت لج واعيد لج ساره ما بتكون الا لي سمعتي .
وفهد راح ورفع راس اخته لانها كانت منزله راسها : الريم الريم انا موت في ساره والله احبها انتي لازم توقفين وياي يالريم .
الريم رفعت راسها وتمت تشوف فهد : بس بس
فهد : لا بس ولا شي خلاص انتهت السالفه .وساره راح تكون لي باي طريقه .

اما ساره وهي راده البيت راحت وبدلت وكانت تقرى كتاب ولا فجأه تذكرت الشريط وراحت وطلعت الشريط من شنطتها وشغلته .ولا الشريط بصووووووت فهد.
في الشريط كان فهد يعبر عن حبه وهو يقول :

..خذيت القلب من دون استئذان ..
وخليتني هايم بحبــك يا نبض قلبي
من أول نظره وانتي في بالي .
وما قدرت افكر الا فيج
الحين كيف اقدر اعيش من دونج
بعد ما خذتي قلبــــــي
كيف اعيش من دونج
وانتي الروح اللي فيه..
حبيبتي لا تخليني
بعدك يعذبني ويزيد جروحي ..
محتااااااااااااجلك يا نظر عيني
مقدر على بعدك يا عمري
تعال ريح قليبـــــي
انا مجنونك مجنونك
وصرت الحين مجنون ســــــــــاره

وساره بعد ما سمعت هالشريط ما قدرت تستوعب شي وقفت ووهي الف سؤال وسؤال في بالها وبعدين رن موبايلها وكان المتصل ..فـــــــــــهد.
ساره بتوتر : الو
ففهد : مساء الحب اللي ما اقدر اوصفه .
ساره بعصبيه : انت منو
فهد : هدي هدي انا فهد فهد يا ساره
ساره وهي ساكته .
فهد : سمعتي الشريط صح.
ساره بقهر : فهد من وين يبت رقمي .
فهد : الحين هاي من سالفتنا شو سمعتي الشريط
ساره : هي سمعته يمكن تفسر كلامك
فهد بحنيه : افا عليج ما طلبتي شي
انا باختصار يا ساره احبج وامووووت فيج والله ياساره انج سحرتيني ما اقدر اعيش من دونج ساره انا احتاجلج احتاجلج يا ساره .و .
ساره تقطع كلامه : اذا نسيت يا فهد ولا ماتعرف اني مخطووووبه يعني هالكلام ما ينفع .
فهد بعصبيه شديده : انا ما يهمني اللي يهمني بس انج تكونين لي .
ساره بصراخ : انت شو ما تفهم اقولك مخطوبه وانا مب لك اوكي انا لانسان غيرك وقلبي لخالد وبس . ويالله باي .
وصكرت الخط .
وفهد وهو معصب ومنقهر من كلام ساره وراح اتصل في ساره مره ثانيه .
ساره بعصبيه : فهد لا تتصل مره ثانيه بلييييييز خلني .
فهد والدمعه بعيونه وبعصبيه : ساره بقولج شي انتي راح تكونون لي سمعتي ولا والله العظيم انج راح تندمين وانا اقدر على كل شي
ساره : يعني شو تهدد تقدر على شو .؟؟
فهد : اقدر اقدر يا ساره عشانج اقتل اعز ناسج
ساره سكتت وانصدمت يوم سمعت هالكلام .
فهد : ليش سكتي هي انا اقدر وبتشوفين .وباجر ببين لج هالكلام ما بخليج لين ما توافقين على زواجنا .
ساره : تحلم انا ما بكون لك .
وصكرت مره ثانيه الخط وتمت ساره تصيح وخايفه من اللي بيصير لها .

فهد كان جاد بكلامه لان عشان ساره عادي يسوي أي شي

وراحت ساره ومسكت التلفون واتصلت في ريم :
الريم : الو
ساره وهي تصيح :انتي ليش عطيتيه رقمي .
الريم بتعجب: عطيبت منو ؟ والشو السالفه.
ساره : اخوج اتصل فيه وقعد يهدنني ويقولي انه يحبني
الريم مستغربه: اخوي اتصل .بس يا ساره لا تصيحين اخوي فهد ما قصد يجرحج بس هو يحبج .
ساره وهي تمسح دموعها : أي حب اللي بيخليه يقتل اعز ناسي هذا حب .
الريم استغربت من كلام فهد معقوله اخوها يذبح وتذكرت ان من بعد وفا امها فهد صار له مرض نفسي ويقدر يسو أي شي.
الريم : ساره طيعي اخوي لاني اخاف اخاف _(بتردد) ينفذ تهديداته .
ساره بخوف : شووووووووووو شو تقولين انتي
الريم : شوفي يا ساره اخوي انسان عادي مب مينون ولا شي بس هو يوم فقد امي صار له مرض نفسي لانه كان متعلق فيها وتعرفين المريض النفسي ما يحس فاللي يقوله احيانا ولا اللي يسويه.
ساره : يعني يعني معقوله ينفذ لا لا ل مستحيل مستحيل
تمت ساره تصيح وخايفه .
الريم : بس يا ساره بس .
ساره : الريم انا الحين بخليج يالله باي
وتمت ساره محتاره باللي يصير لها
فهد يهددها هل يا ترى بينفذ تهديداته.

شو تتوقعون فهد بيسوي؟؟
وهل بينفذ تهديداته ؟؟

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اربع اشياء تخليك تعرف انت مجنون ولا لا,,	عاشقة فلسطين	أرشيف المواضيع الغير مكتمله او المكرره او المنقوله و المخالفه	16	05-14-2007 01:15 PM
المهلة الأخيرة (روايه مترجمه)	ahmed decor	أرشيف المواضيع الغير مكتمله او المكرره او المنقوله و المخالفه	4	10-08-2006 12:57 AM
أصعب صدمة صارت معي أدخلو	عاشقة	أرشيف المواضيع الغير مكتمله او المكرره او المنقوله و المخالفه	2	08-29-2006 07:31 PM
مأساة سارة ..	MAMDOUH	الحياة الأسرية	8	07-25-2006 11:42 AM