مجنون سارة - الصفحة 11 - عيون العرب

**أشجان الأزهار** · #51 06-13-2006, 07:04 PM

فهد وهو واقف عند البحر .. ومغمض عيونه ومبتسم .
ومروان وصل وشاف فهد وهو بعالم ثاني .
مروان مسك ظهره : فهد شو وين وصلت
فهد صد لمروان : باسم الله خوفتني
مروان : جي شايفني فلم رعب .
فهد: ههههههههههههه يمكن
مروان استغرب من فرحة فهد : فهد .
فهد وهو مبتسم : خير
مروان : شو اللي خلاك ترد فهد القبلاني ..فهد البشوش المحب والاجتماعي
فهد : مروان ساره ساره .
مروان : شو فيها
فهد : وافقت انها تزوجني وانفصلت عن خطيبها
مروان فاتح عيونه .: والله .. زين زين الحمد لله
فهد فاتح ايدينه : والله كاني ولدت من يديد
مروان : والله يا فهد مب بعد مارديت من السفر ونحن ما شفنى ابتسامتك ولا ضحتك ...والحين ساره خلت كل شي يرد مثل قبل .
فهد : انت ماتعرف غلاتها عندي
مروان نزل راسه : بس يا فهد
فهد : بس شو
مروان : كيف راح تعيش مع انسانه تفكيرها كله في خطيبها .. لاتنسى انهم كانو يحبون بعض من الصغر .
فهد تضايج : ما يهمني شي .. كل اللي يهمني انياحبها وانها صارت ملكي ..ثانيا مب هي الانسانه الوحيده اللي انفصلت عن خطيبها
مروان : بس اللي انفصلو اغلبيتهم صارت لهم ظروف وانفصلو وهم اثنينتهم مقتنعين بالانفصال ..بس ساره انفصلت رغما عنها .
فهد : شوف يا مروان .. اعرف اللي سويته غلط .. بس حاولت اني اعيش بدونها والله والله ما قدرت .. احس ان الحياه ظلمه بدونها .
مروان : ما اقول غير .. عسى الله يهنيك يا فهد .
فهد : تسلم يالغالي ..

وفي اليوم الثاني ..
ساره ماطلعت من غرفتها .. لان يومها قضته كله بالصياح والذكريات الحلوه اللي كانت تتخيلها انها راح تستمر ..

وخالد حالته اصعب ..لانه ما قدر ينام البارحه من كثر ما هو كان متضايج وزعلان .. وحس ان حياته انتهت من بعد حبيبته ساره ..

والصبح الكل قاعد يفطر الا خالد ..
هند : امايه ان شاء الله اليوم ابويه بيي من السفر صح ؟
الام وهي تشرب الحليب : ان شاء الله يا بنتي
نوره : والله اني مشتاقلته مووووت .
هند : وانا بعد .. احس كاني سنه ما شفته .
الام ساكته ومتضايجه.
نوره تصد لامها : امايه شو فيج .
الام بحزن : خالد ما يطيع ياكل شي ولا يفتح الباب .. والله اني خايفه عليه .
نوره : لا تنسين يا امي ان خالد ماكان يفكر الا بساره .. يعني لازم ما يتقبل الامر .
هند : يعني ابي افهم هاي ساره شو سوت فيهم عشان يتخبلون عليها جذي.
نوره : عندها جمال يخلي المينون يصحى .. وعندها اخلاق وطيبى تملى الدنيا وما فيها .. و(تشوف هند بطرف عينها ) وما عندها غيره ولا حقد مثل بعض الناس ...
هند : شو قصدج .
نوره : لا يا اختي ما قصدي شي ..
هند قامت من على الكرسي: عن اذنكم .
الام : وين ما كملتي ريوقج .
هند : لا بس شبعت الحمد لله .بروح غرفتي
نوره : اكيد عندج شي .. والله اني اول وحده اتين تاكلين .. وآخر وحده تخلصين .
هند : وي وي اعوذ بالله منج .. في كل شي تحسديني .
نوره : على شو يا حظي ..
الام : الحين انتو متفيجين تضاربون
هند : خلاص انا بروح فوق بغرفتي ..عشان ما اتضارب ويا حد ..

راحت هند غرفتها وعلى طول مسكت الموبايل واتصلت في سالم وطبعا كلمته بسرعه لانها تخاف نوره تشوفها ..
هند تتصل في سالم: السلام عليكم
سالم توه قايم من النوم : وعليكم السلام .
هند : اوووه اسمحلي .. قومتك من النوم
سالم : لا افا عليج عادي ..
هند : بغييت اقولك شي يا سالم .
سالم : يعني ما شي شخبارك .
هند تبتسم : اسمحلي ..بس لاني مستعيله اخاف نوره اتي وتشوفني .
سالم : لا عادي تفضلي ..
هند : انت يا سالم قلت انك بتي هالاسبوع يوم ابويه بيي من السفر صح .
سالم / : ان شاء الله
هند : بس ابي اقولك لا اتي هالاسبوع .. لان عندنا شوي مشاكل في البيت .. يعني من الاسبوع اللي بعده .
سالم : ممممممممممممم .. خلاص ..ولا يهمج اسبوع الياي ان شاء الله بكون عندكم يا احلى وحده شفتها بحياتي .
هند بخجل : تسلم يالغالي ..

**أشجان الأزهار** · #52 06-13-2006, 07:07 PM

سالم : الله يسلمج حبيبتي
هند : اوكي الحين عن اذنك ..بروح قبل ما نوره اتي اوكي .
سالم : هاي نوره خاطري اشوفها ..اخاف هي رئيسة العصابه وانا ما ادري .
هند تضحك: هههههههههههههههه .. واكثر بعد..
سالم : اوكي خلاص عيل ..اخليج الحين .
هند : يالله باااااي يالغالي
سالم : مع الف سلامه ..

الريم كانت تفطر تحت في غرفة الطعام ودخل فهد وهو مستانس ..
فهد : صباح الخير يا احلى اخت.(وراح باسها فوق راسها)
الريم : شو تشوفني يدتك ..تحبني فوق راسي
فهد قعد على الكرسي عند الريم : هذا وقار واحترام يالخبله .
الريم : توك ما أحلاك .. والحين تسبني .
فهد ( يضحك ): ههههههههههههههه
الريم : عساني ما انحرم من هالضحكه .
فهد : تسلمين يالغاليه
الريم : الله يسلمك يا اخويه
فهد : اقول يالريم .. شو رايج بعد كم اسبوع انروح نخطب ساره
الريم كانت تشرب اللبن وأول ما سمعت كلام اخوها غصت وكحت ..
فهد يضرب على ظرها : باسم الله عليج شو فيج ياالريم . شو اول مره تشربين لبن.
الريم : ما ادري عنك .
فهد : ليش انا شو قلت .
الريم : توها البنت منصدمه من سالفتك .. وزعلانه لانها خسرت خالد.
فهد : والله خلاص كل شي انتهى .
الريم : لا يا فهد .. انتريه شوي كم يوم بعدين بنفاتحها بهالموضوع .
فهد : ما بنتظر اكثر عن اسبوعين .. ابي اضمن انها لي انا وبس ..
الريم : ان شاء الله بتكون لك ..

**أشجان الأزهار** · #53 06-13-2006, 07:08 PM

وفي بيت خالد

الساعه تقريبا 12 ونص الظهر رجع أبو خالد من السفر لانه رجل اعمال يعني حياته كلها سفر .. والاهل كلهم قاعدين يستقبلونه ..الا خالد في غرفته لانه نسى هاليوم .

ابو خالد : السلام عليكم يالغاليين
هند ونوره راحو على طول نقزو عليه وحضنوه ..
ام خالد اتي عنده وتبتسم .
ابو خالد : شوي شوي عليه .. بطيح .
هند وهي تحضن ابوها : فديتك ابويه والله اشتقتلك
نوره : والله انا بعد يا بويه اشتقلك موت
بو خالد يبتسم ويشوف ام خالد : ها ام خالد شو .. ما شي الحمد لله على السلامه.
ام خالد تبتسم : والله عيالك ما خلوني ارمس .
هند ونوره : ههههههههههههههه
ام خالد : الحمد لله على سلامتك يا ابو عيالي .
بو خالد : الله يسلمج .
بوخالد يدور في الصاله : ولا وينه خالد ..
نوره طالعت امها ونزلت راسها .
بو خالد : شو بلاكم ..وينه خالد
ام خالد : هو في غرفته يمكن نايم.
بو خالد فتح عيونه : نايم لهالوقت غريبه .
ام خالد : يمكن البارحه كان سهران وتعب .
هند : ابويه ها شو يبتلي من لندن .
نوره : عفان الله صبري .. توه ياي ..
هند : لا بس ابي اعرف فكر فيه هناك ويابلي شي.
بو خالد يبتسم : واذا انا ما افكر فيكم يا عيالي ..أفكر في منو .
هند تغمز لامها : يمكن حصلتلك وحده حلوه هناك نستك اهلك .
ام خالد تشوف هند بطرف عيونها .
بو خالد يضحك : ههههههههههههههههه .. حشى عليج يا هند تبين اليوم انام في الصاله .
نوره : افا ليش يا ابويه .
بو خالد : ما تشفوين امج كيف صار ويها ..أخاف تطردني من الغرفه .
ام خالد : لا فديتك انا واثقه فييك .. بس هاي هند لو شوي أقدر أقص لسانها .
هند : وي باسم الله عليه .
بو خالد : والله سوالفكم ما تنمل ..بس انا الصراحه تعبان وبروح غرفتي وان شاء الله بنجتمع ونسولف بعدين .
هند : لا تنسى الهدايا .
نوره تضرب هند : بس استحي على ويهج .. خلا يرتاح شويه.
بو خالد : ولا يهمج يا بنتي .. خلا ارتاح وبتشوفين شو يايبلكم ..
نوره : تسلم يا ابويه ...وانت روح ارتاح .
بو خالد : زين يوم خالد بيقوم من النوم .. خلا ايي غرفتي .. تراني مشتاقله.
ام خالد : ان شاء الله يا بوخالد.

راح ابو خالد غرفته يرتاح من السفر ..
نوره قعدت على الكرسي: اقول امايه ..
الام : خير يا بنتي
نوره : مب فضيحه خالد ما ياي يسلم على ابويه.
الام : يحليله خالد ما يدري ان ابوج بيي اليوم أو نسى .
هند : هاي ساره ماعرف شو سوت فيه.. خلته ينسى كل شي.
نوره : الحب ..
هند : بدت تتفلسف ..انتي ااذا تزوجتي .مب تنسينا.

**أشجان الأزهار** · #54 06-13-2006, 07:12 PM

--------------------------------------------------------------------------------

هند : ليش قالولج انا هند ..
هند : شو قصدج .
نوره : مب قصدي شي .. الحين انا بروح غرفتي وبتصل في ساره .. بشوف اخبارها.
هند : روحي عند اخوج أول شي.
نوره قامت من مكانها : خالد لو أدق عليه الباب مليون مره ما بيفتحلي أعرفه .

راحت هند تتصل في ساره بس ما حصلتها لان ساره غالقه موبايلها .

والكل كان يالس في الصاله ولا فجأه سمعوا جرس الباب وراحت الخدامه تفتح الباب ودخلت عليهم ..

الخدامه : where is khalid: .
نوره تصد للخدامه: why?
الخدامه: His freiend Mohamed wants him
نوره تشوف هند: اقول هندوه .. الحين ربيعه يبى خالد شو نقوله
هند تلعب بأظافرها: روحي قولي لخالد بعد شو تسوين .
نوره : خالد حالته حاله وين له نفس يشوف حد.
هند رفعت راسها تشوف نوره : بس لا تنسين ان هذا محمد أغلى ربعه يعني الانسان الوحيد اللي يفهم خالد.
نوره : ماشاء الله من وين هالمعلومه.
هند : يعني ماتعرفين ان محمد من زمان ربيع خالد .. واخوج اربع وعشرين ساعه يمدح في هالريال ..
نوره : زين شو اسوي ؟
هند: روحي قولي لخالد يمكن محمد يقدر يغيرمن نفسيته .
نوره: اول مره تقولين شي منطقي.
هند رافعه حواجبها: ليش ان شاء الله كل مره شو اقول كلام ميانيين .
نوره : لا مب ميانين ..كلام ( تفكر )مممممممم كلام فاضي ماله أي لزوم.
هند : والله انا الغبيه اللي قاعده اسولف وياج.
نوره : ههههههههههههههههههه .. محلاج وانتي معصبه.
هند: نوروه يوزري عني ..ورحي قولي لخالد يستقبل ربيعه ..ترى يحليله نقع برع .
نوره: هي والله نسيته.
هند : طبعا تنسينه .. لان تفكيرج ماعرف وين.
نوره تدلع: طبعا في خطيبي ..فديت عمره .
هند : يالله .. هذا صار خطيبج وتفدينه .. لو تزوجتيه شو بتقوليله .ز
نوره : اممممممممممممممممممممم .. بكتب له ابيات غرام وشعر ..
هند : طبعا هاي اول سنه زواج .. بعد السنه الثانيه أنواع السب.
نوره : باسم الله عليه .. شو تشوفين دفشه مثلج.
هند : اقول نوره الريال نقع برع روحي فضحتينا .
نوره وقفت : هي والله بروح اشوف خالد.

راحت نوره تدق على باب خالد عشان تقوله ان ربيعه محمد يايله.
نوره : خالد افتح الباب شويه.
خالد بعصبيه : شو تبين ؟؟
نوره : ربيعك محمد يباك .
خالد : محمد؟
راح خالد فتح الباب ومستغرب.: محمد ياي بيتنا
نوره : هي يا اخويه شو اقوله.
خالد : طبعا خليه يدخل .
نوره : اوكي خلاص الحين بقول لميري ادخله.

راحت نروه قالت لخدامتهم عشان يدخلون محمد الميلس ..

**أشجان الأزهار** · #55 06-13-2006, 07:14 PM

خالد دخل الميلس وحالته حاله .. خالد دومه كاشخ وحلو ومرتب ..بس هالمره غير شكله متبهدل وحالته تكسر الخاطر وعيونه متورمه من قلة النوم .
شافه محمد واستغرب وفتح عيونه ووقف مكانه: خالد
خالد وصوته كلها حسره وحزن: هلا فيك يا محمد..تفضل استريح ليش واقف.
محمد فاتح عيونه وراح عند خالد : أي استريح الله يهديك ..شو بلاك ليش جذي حالتك شو صار لك ..
خالد منزل راسه : ما فيني شي .
محمد : أي ما فيك شي الله يهديك .. شكلك مبين ان صار لك كارثه .
خالد اقعد واستريح ..
يلس محمد عند خالد وهو زعلان على حالة خالد ..
محمد : قولي بلاك وليش غالق موبايلك .. انا من البارحه اتصل فيك وانت غالق موبايلك ..
خالد ماسك ايدينه ومنزل راسه ..
محمد : خوفتي يا خالد قولي شو فيك .
خالد رفع راسه وشاف محمد : ساره يا محمد ساره .
محمد : بلاها ساره .. شو صار فيها ..
خالد: ساره تخلت عني والسبه هالنذل فهد .. الله لا يبارك فيه .
محمد : أفا ليش شو صار قولي تراك قطعت قلبي ..

وطبعا خالد قاله كل السالفه وقاله ليش ساره تخلت عنه..
خالد : شفت يا محمد شو صار فيه .. احلامي كلها راحت وتبخرت خسرت الانسانه الوحيده اللي كنت احلم انها تكون لي ..
محمد منصدم من اللي صار : ماعرف شو اقولك يا خالد .. بس الزواج قسمه ونصيب..
خالد بعصبيه : أقولك نحن كنا لبعضنا من صغرنا وآخر شي ما تكون
ساره لي .. تكون لانسان ثاني مستحيل مستحيل (ونزل راسه ودمعت عيونه).
محمد يمسك يد خالد : لا يا خالد مب انت اللي تدمع ..انت يا خالد ريال والريال لازم يكون ما يدمع ولا ينهزم بهالسهوله.
خالد والدمعه بعيونه: يمكن لانك يا محمد ماعرفت الحب .. وماتعرف ان اصعب على الشخص ان يخسر الانسانه اللي حبها من الطفوله والي كان يحلم انها تكون له .. والاصعب ان الحب متبادل ..وكيف تتصور ان ساره اللي بنيت احلامي معاها .. ما تكون لي .. ماتكون زوجتي وشريكة حياتي ..
محمد : خلاص يا خالد لازم تتعود على اللي بيصير وتتحمل .. وخلاص انت مب لساره وانتهت السالفه حاول انك تسناها.
خالد صد لمحمد وبجديه وعصبيه : شو نتقول انت .. انت يا محمد ماتعرف كيف احب ساره والله اني اموووت فيها .. ساره هي الهوى اللي أتنفسه ..ساره هي الروح اللي سكنت بداخلي ..ساره مب بس الحبيه لا .. ساره هي كل شي بالنسبالي ..انت يوم تقول اني انساها كأنك اخترت موتي .. لان ساره هي الامل الوحيد بحياتي .
محمد : لهالدرجه تحبها .
خالد حاط ايدينه على ويهه: وأكثر يا محمد واكثر..بس الحب راح راح ..والحبيبه راحت راحت يا محمد ..
محمد : يا خالد .. بس خلاص والله قطعت قلبي.
خالد : هي اللي قررت هالشي ..وهاللي حاولت تنساني ..باعت الحب اللي بينا ..
محمد : ساره ما باعت شي ..ساره لانها تحبك قررت هالقرار افهمها يا خالد .
خالد : بس خلاص ما ابي اسمع اسمها .. هي اصلا ما تستاهل افكر فيها ..مثل ما باعت الذكريات الحلوه ..وباعت حبنا ..أنا بعد بحاول انسى كل شي ..كل شي..

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اربع اشياء تخليك تعرف انت مجنون ولا لا,,	عاشقة فلسطين	أرشيف المواضيع الغير مكتمله او المكرره او المنقوله و المخالفه	16	05-14-2007 01:15 PM
المهلة الأخيرة (روايه مترجمه)	ahmed decor	أرشيف المواضيع الغير مكتمله او المكرره او المنقوله و المخالفه	4	10-08-2006 12:57 AM
أصعب صدمة صارت معي أدخلو	عاشقة	أرشيف المواضيع الغير مكتمله او المكرره او المنقوله و المخالفه	2	08-29-2006 07:31 PM
مأساة سارة ..	MAMDOUH	الحياة الأسرية	8	07-25-2006 11:42 AM