|
| |||||||
| قصص قصيرة قصص قصيرة,قصه واقعيه قصيره,قصص رومانسية قصيرة. |
 |
| | LinkBack | أدوات الموضوع | انواع عرض الموضوع |
|
#1
06-11-2006, 01:20 PM
| ||
| | ||
 مجنون سارة القصه اسمها ( مجنون ساره ) قصه حب بمنتهى الروعه وطبعا قصه خياليه وقصه حب جميله جدا انصح الكل يقراها ..والقصه للامانه منقوووووووووولة من احدى المنتديات الجــــــــــــــزء الاول: كانت ساره دلوعه اهلها والكل يحبها وكانت تتمتع باجمل الصفات من جمال واخلاق طيبه وذكاء واما جمالها فخلو على صوب لانها صدق كانت قمر ..كل اللي يشوفها يتخبل على جمالها .. وهي عمرها 19 سنه يعني في اول سنه جامعه وعندها صديقه الروح بالروح وياها وهي الريم لان ساره كانت وحيده فعشان جذي تعتبر الريم اختها وصديقتها وكل شي .. والقصه تبتدي :: ام ساره : حبيبتي سارونه وينج ساره : هلا امي انا بغرفتي طلعت ساره من غرفتها عشان تشوف امها شو تريدها ام ساره: وينج ساره من متى اناديج حبيبتي ساره : امي كنت اكلم الريم ربيعتي . ام ساره : وتضحك والله اني اغار من هالريم . كل وقتج وياها وضحكت ساره وحضنت امها وقالت : محد مثلج يااحلى واروع ام بالعالم .. ام ساره : يالله خلي عنج هالكلام : اقول حبيبتي سارونه لاتنسين عزيمه خالتج لنجاح بنتها نوره من الثانويه ساره : اكيد امي مب ناسيه افا وانا اقدر انسى نجاح نوره . وراحت ساره واتلبست ولبست احلى ما عندها واتمكيجت بمكياج خفيف وبسيط ام ساره : دخلت على ساره تشوفها خلصت ولا وشافت ام ساره ساره بجمالها وكشختها وقالت لها : ماشاء الله عليج يا بنتي طالعه مثل القمر اقري على عمرج يا بنتي اخاف يحسدونج ساره وهي مبتسمه : على شو يحسدوني امي ام ساره : سارونه بلا حركات تعرفين انج حلوه والكل يمدح فيج من صغرج ساره " اكيد لاني طالعه على امي حبيبة عمري صدقها الام لان ساره مب بس حلوه بل فاااااتنه.. شعرها البني على العسلي وعيونها العسليات الحلوات الوساع اللي كانها عيون الغزال وجسمها كان صدق متناسق كانها عارضه أزياء . ام ساره: يالله خلي عنج هالكلام ويالله نروح تاخرنا الدريول يتريانا في السياره وراحو كلهم العزيمه وكانت ساره احلاهم ويت ساره وسلمت على بنت خالتها نوره وباركتلها على نجاحها نوره : زين ييتي شو هالتاخير كله ؟ ساره : بعد تعرفيني يوم اختار بدله ولبس كيف اتاخر نوره : بس ماشاء عليج طالعه قمر .. غطيتي علي .. وضحكت ساره وقالتلها ساره: محد يغطي على رقه وحلاة بنت خالتي نوره ويت من وراهم هند اللي هي بعد بنت خالتها يعني اخت نوره وهند اكبر عن ساره بسنتين وهند تغار من ساره وايد لانها احلاهم ولان الكل يحبها ويحترمها يت هند وقالت لها مب من خاطرها " هلا ساره ساره: هلا ببنت خالتي هند شو اخبارج واخبار الدوام هند : اكيد تمام وراحت عنها هند ساره وهي مستغربه : بلاها هند ليش متضايقه؟ نوره : لا حبيبتي هند ما فيها شي بس تعرفين كيف تفكر وهي تعرفينها من صغرها تغار منج ساره : ليش تغار ..؟ هند حلوه وزينه نوره : بعد تعرفين البنات وغيرتهم المهم خلصت الحفله والاغلبيه راحو البيت الا ساره وامها وكانو يتكلمون ويضحكون وفجاه دخل ولد خالتها اللي هو اخوهم خالد خالد كان اكبر اخوانه وكان طيب وخلوق ووسيم وكل البنات متخبلين عليه ويتريون نظره منه بس هو قلبه مب ملك أحــد غير (ســــاره ). بعد ومن صغره كان متيم في ساره مب بس متيم بل يموت فيها : ودخل وفجاه شاف ساره .. وكان يشوفها بنظرات وحب ويقول في خاطره : ساره هني واخيرا وينج يا نبض قلبي وينج عني والكل لاحظ نظراته ونوره قالت : الناس يسلمون يا خالد ام خالد : وين وصلت يا خالد هند اختهم : هه هه هه اكيد عيونه على حبيبته ساره . وكانت هند تشوف ساره بنظرات كلها غيره وساره استحت واحمرت ونزلت راسها . خالد بعد استحى ودعى على هند في خاطره خالد " السلام عليكم اشحالج بنت خالتي ساره ساره : الله يعافيك خالد انت شو اخبارك . ام ساره : بس ساره ونحن وين رحنا ضحكو كلهم على خالد لان ما كان يشوف الا ساره وخالد أبد ما كان يتكلم لانه بس يريد يشوف حبيبته ساره . وقالها وهو يشوفها من فوقها لين تحتها . خالد : ماشاء الله عليج يا بنت خالتي طالعه اليوم ملاك . ساره صدق ويها محمر : عيونك الاحلى بس عاد لا تبالغ خالد : وربي ما ابالغ المينون اذا شاف جمالج راح يصحى نوره : عيل خلا نودي ساره مستشفى الميانين عشان كلهم يصحون ويستوون زينين . وهني الكل تم يضحك بس خالد كان تفكيره كله في ساره . ام ساره " يالله عن اذنكم بنروح البيت الوقت تاخر ام خالد : وين تو الناس بعدنا ما شبعنا منكم ام ساره : الود ودنا نتم لين الفير بس ما يصير ساره : اكيد القعده وياكم ما تنمل يا خالتي كلهم وقفو وراحو يسلمون علشان يطلعون وبعد ما وصلت ساره عند خالد . وهي منزله راسها : مع السلامه يا ولد خالتي خالد وعيونه على ساره : مع السلامه يا القمر اووووه قصدي يا بنت خالتي وعلى طول ساره طلعت لانها صدق استحت وما تعرف كيف ترد على كلمات خالد العذبه . وبعد ما وصلت ساره البيت كانت تفكر في ولد خالتها خالد ونظراته وكلماته الساحره . اما خالد فكان هاليوم احلى يوم عنده وفرحان لان شاف حبيبته ساره لان من هو صغير يحبها .. وراح عند امه باخرالليل وتم يدق الباب على غرفه امه خالد : امايه امايه افتحي الباب ام خالد: مستغربه : خالد شوفيك وين يعورك شو فيهم خواتك ..؟ خالد : باسم الله عليج امي ما فينا شي ام خالد : عيل ليش ياي هالوقت تعرف الساعه كم خالد :هي الساعه 2 ونص شو يعني .. المهم امي الله يخليج ابي اقولج شي ام خالد فتحت الباب وهي مستغربه من خالد وتشوفه بنظرات غريبه ام خالد : قول اللي عندك يا خالد شو فيك ؟ خالد :امي تعرفين اني احب ساره بنت خالتي من صغري ويا هالوقت اللي تخطبينها لي امي اخاف احد ياخذها مني واذا احد خذاها بموت يا امي تعرفين شو يعني بموووووووت . ام خالد وهي تضحك على خالد . باسم الله عليك من الموت يا خالد الله ياخذ بليسك يا خالد موعينا هالوقت علشان هالسالفه .. لا تخاف ساره ان شاء الله ما بتكون الا لك خالد: ابيج تكلمين امها باجر اوكي ام خالد : خلاص حبيبي تم بس انت روح نام الحين اشرايكم بالقصه ؟ |
|
#2
06-11-2006, 01:21 PM
| ||
| | ||
| مشاركة: مجنون سارة الجــــزء الــــــــــــثانـــي : وفي اليوم الثاني قامت ساره وراحت عند امها ساره : صباح الخير يا أحلى واغلى ام بالعالم ام ساره وهي مبتسمه : صباح النور يا احلى ساره او قمر على قولت خالد وتمت الام تضحك .. ساره وهي منحرجه : امايه عاد ليش تضحكين لا تعلقين على كلام خالد ولا هو جذب يوم قالي قمر الام : هههههه لا يا بنتي ما اضحك على كلامه بس اضحك على حبه صدق عيال هالايام حبهم غير. وتمت ساره تضحك على كلام امها . وفجأه رن موبايل ساره : ساره : الو ريم صديقتها : هلا سارونه هلا بصديقه عمري ساره : هلا وغلا بالغاليه ريم : شو اخبارج ؟؟ وينج البارحه ما عبرتينا ولا دقيتي علي تعرفيني ما اقدر على بعدج ساره: كنا معزومين على نجاح نوره بنت خالتي . ريم : هاااااااااا اشوف بعض الناس ما عبرونا لازم اكيد شافو الحبيب حبيب الألب. ساره : بسج عاد لا تذكريني .ترى اخاف اسرح فيه ريم : يا ويلي على الحب .. ساره وهي مستحيه اونها : احم احم ريم : سارونه حبيبتي تعالي اليوم بيتنا بنتغدى وبعدين بنروح سيتي سنتر علشان نتشرى اوكي ساره : اوكي بس غريبه شو تبين تشرين وليش؟ ريم : يعني محد يروح السوق الا اذا شي مناسبه ساره : لا بس مستغربه مب من عوايدج قولي ريم شو عندج ريم : امممممممممممممم الصراحه ابي اشتري اشياء حق اخوي اللي يسوى عندي كل شي اخوي فهـــــد ساره : فهد ؟(وعلامه تعجب في ويها) .. سراه : بس فهد مسافر حق الدراسه ريم : حبيبتي فهد خلص الدراسه يا صباح الخير لا انتي داريه لا فيه ولا في اخوي ساره : وانا شو عرفني في اخوج اصلا انا ما شفته ولا مره ريم : يالله بسج رمسه تعالي بيتنا الحين سمعتي ألحيـــــــــــــــن . ساره : زين باسم الله شو فيج محرجه خلاص الحين بقول حق امايه ريم : اترياج بسرعه لا تتأخرين ساره : اوكي يالله باااااي ريم : بااياااااات ساره : امايه الحين بروح عند ريم يمكن ولا ؟ ام ساره : الحين افا يعني محد بيتغدى وياي ساره : امي اسفه بس ريم تترياني الام ونبرت حزن : تعرفين يا ساره انا ما ابي اخرب على طلعاتج بس مثل ما تعرفين اني مالي غيرج بحياتي . ابوج الله يرحمه توفى من خمس سنين يوم يتله نوبه قلبيه لان كان فيه القلب وانا ما يبت غيرج وما عندي الا انتي واذا صار لج شي وتمت تصيح الام .. ساره والدمعه بعيونها : امايه انا بكون عندج لاخر حياتي لا تصيحين يا امي انا بكون وياج بس الله يخليج ما ابي اشوف دمعه بعيونج ترى دموعج غاليه الام( وهي تمسح دموعها) : اسمحيلي يا بنتي ما كنت ابي اضايقبج في هالوقت بس تذكرت ابوج .. ساره : في حد ما يتذكر ابوي .. اصلا ابوي كان دوم يوصيني عليج يا امايه .. وانا ما راح اخليج .وراحت ساره وحضنت امها ام ساره : يالله يا بنتي روحي عند ريم تترياج البنت . ساره : لا خلاص بتم وياج ام ساره : لا يا بنتي انا بروح عند خالتج فاطمه وانتي روحي عند ريم ساره : اذا بتروحين بيت خالتي فاطمه خلاص يعني مطمنه عليج الحين اقدر اروح . وراحت ساره اتلبست بسرعه وراحت بيت ريم صديقتها اما ام ساره فراحت عند اختها فاطمه ام ساره وهي داخله بيت اختها ام ساره : السلام عليكم فاطمه اختها وبناتها نوره وهند وخالد: وعليكم السلام يا هلا والله (اما خالد عيونه على الباب وفي خاطره يقول وينها وينها حبيبة العمر) . |
|
#3
06-11-2006, 01:21 PM
| ||
| | ||
| مشاركة: مجنون سارة نوره : خالو وين ساره ؟ليش ما يت وياج ام ساره : ساره يا غناتي راحت عند ريم ربيعتها خالد وهو متضايق ويقول في خاطره ( هذا وقت تروحين هناك ) خالد : يعني خالو هي بتروح وما بتي بعدين هني ام ساره : ولا ما دري يا ولدي هي قالت بتروح ويا ريم وبعدين بيروحون يتشرون هند وهي رافعه خشمها : بعد تروح السوق ويا ربيعتها وبروحهم بعد ام ساره : ما فيها شي يا بنتي هي ما راحت مكان غلط ثانيا بنتي تروح ويا بنت محترمه وساره ما تطلع الا بشيلتها وعباتها. خالد : ثانيا يا هند لا تدخلين نوره : لازم يدافع عنها وخالد يشوفها من طرف عينه : نوووووروووه بتسكتين عني ولا ؟ خالد صدق كان معصب علشان كلام هند ولان ماشاف ساره نوره : لا لا الله يخليك ما فيه على حشرتك خلاص سكتنا. أما ساره فهي كانت بيت قوم ريم ريم وهي معصبه : سارونه ليش تأخرتي .. ساره : اسمحيلي يا ريماني بس امي كانت تصيح وما رمت اروح عنها لين ما اواسيها . ريم (وبويها علامه تعجب): ":ليش تصيح ؟ ساره ونبره صوتها كلها حزن : تصيح على الوالد اللي راح . ريم : الله يرحمه .اذا انتو جذي تقولون ومتضايقين هالكثر عيل انا شو اقول .. وراحت ريم ويلست على الكرسي وهي ميته صياح . ساره وهي خايفه على ربيعتها : ريم ريم شو فيج ليش كل هالدموع (ريم وعيونها كلها حزن ودموع ) ريم : اصيح اصيح يا ساره لان ييتيييييمه تعرفين شو يعني يتيييمه على الاقل انتي عندج امج الله يخليها بس انا انا انا ؟ وتمت تصيح ساره : انتي شو يا ريم عندج عمتج الله يخليها اللي ما تقصر وياكم عندج اخوج فهد . ريم: محد يا ساره يقدر يا خذ مكانه الوالدين انا فقدت امي يوم كان عمري ست سنين امي راااااحت بمرض السرطان وما حست بحنانها يا ساره وابوي من كثر ما هو متعلق بامي كان يسرع مثل الميانين وهو بعد مات بالحاددث وفقدتهم اثنينتهم بنفس اليوم .. ااااااااه يا ساره ما تعرفين كيف اتالم ما حسيت بحنانهم .. ساره وعيونها تدمع على ربيعتها : بس يا ريم عندج اخوج فهد الله يخليه لج. ريم وتشوف ساره وعيونها محمره من الصياح : فهد .. ههههههههههههه شو تنكتين فهد . فهد فهد؟؟ فهد يا ساره هو نص ميت .فهد يا ساره كان اكثر واحد متعلق في امايه الله يرحمها كان يموت فيها ويوم فقدته صارت له مرض نفسي لانه كان محتاج لحنانها وبعد ما خلص الثانويه سافر وكمل دراسته بالخارج عشان شوي ينسى .فهد يا ساره اكثر واحد متعذب بس شو اقول انا .. ما عندناا حد يا ساره ما عندنا حد ..وراحت حضنت ساره وهي تصيح ساره وهي بعد تصيح : ريم انا وياج انا اختج وامي هي امج يا ريم .بس الله يخليج لا تصيحين اطلبيهم الرحمه هذا قضاء الله وقدره . مسحت ريم دموعها وقالت لساره : اسمحيلي يا ساره يبتج هني وزدت همومج. سساره : افا عليج يا ريمان .. اذا ما تشتكيلي انا بتشتكين لمنو ؟. انا يا ريم وربي اعتبرج اختي وحبيبتي وربيعة عمري مسكت ريم يد ساره وقالتلها : الله لا يحرمنا من بعض ويالله نروح نتغدى تراني ميته يوووع . واما في بنت فاطمه خالة ساره : ام ساره : يالله اسمحولي بروح البيت . فاطمه : تو الناس يا اختي ام ساره : أي تو الناس الحين الساعه 8 بروح اكيد غناتي ساره في البيت .يالله من رخصتكم . نوره : بحفظ الله يا خالتي وسلمي على ساره وااااااااايد هند : (وهي تشوف اخوها من فوق لتحت ): وانت يا اخوي ما تبي تسلم على حبيبة القلب خالد وهو منقهر : مالج خص . ودخل غرفته لان كان منقهر واااايد لان ساره ما يت اليوم . والساعه 11 مساء: ام ساره : ها ساره شو ان شاء الله استانستي ساره : اكيد امايه استانست واااايد ام ساره : هي تذكرت بنات خالتج يسلمون عليج . ساره :الله يسلمهم .. امممممممم اكيد الحين معصبين علي لاني ما رحتلهم ام ساره : اكثر واااحد منقهر هو فار س الاحلام خالد. وتمت الام تشوف ساره من طرف عينها وهي تبتسم وساره (وهي منزله راسها) .. ها شو أي أي أي أي خالد خالد ام ساره وهي تضحك " شو فيج قاعده تقولين حروف الهجاء وتمو يضحكون . ام خالد راحت عند ولدها تشوفه لان من راحت ام ساره وهو ما طلع منها : ام خالد : خالد خالد انت واعي ولا نايم خالد وهو منسدح على السرير: هلا امي لا واعي تفضلي ام خالد : بلاك يا ولدي شو فيك ليش متضايق ؟ خالد " ما تبيني اتضايق وانا قايلج تكلمين خالو سعاد . ام خالد وهي تستعبط : أي سعاد ؟ خالد : امايه الله يخليج لا تستعبطين يعني منو سعاد تراج ما عندج الا اخت وحده سعاد .. ام خالد :: هااااااااااااه قول ام حبيبة عمري ام القمر ام قلبي ساره خالد ويشوف امه وهو يضحك " هي ام حبيبتي ساره ام خالد : شوف خالد انا كنت بكلمها اليوم بس شفت الوقت غير مناسب لان الكل قاعد ويانا بس اوعدك عن جريب راح اكلمها ولا تزعل يا خلودي . خالد : اكيد امايه .. الله يخليج بسرعه كلميها ام خالد : يالله عليك شو كثر حناااااان قلت لك خلاص بكلمها يالله خلني اروح انام لاني تعبانه اليوم خالد وهو في نفسه يقول (:ااااااااااااااااه يا امايه انا اللي تعبان من الحب) |
|
#4
06-11-2006, 01:23 PM
| ||
| | ||
| مشاركة: مجنون سارة الجـــزء الثــــــالـــث: وبعد هاليوم اتصلت ريم من الصبح حق ساره وساره في سابع نومه ريم تتصل فيها ريم : الو سارونه سارونه ساره وهي معصبه لان مخربين نومها وبتعب تقول : الو منو ؟ ريم : منو يعني انا ريمان ساره : الله يهديج يا ريم تتصلين صباح الله خير في هالوقت ريم : أي صباح الله خير الحين الساعه 11 قومي بسج رقاد ساره : شو تبين خلصيني والله فيه نوم ريم :ساروه اليوم نحن معزومين على بيت قوم لطوف ربيعتنا وكل بنات للمدرسه بيروحون هناك يعني وناسه . ساره وفجأه نشت من المخده : والله صدق رووووعه يعني بنات المدرسه بيجتمعون صدق وناسه بنتذكر ايام المدرسه .ريم : هي والساعه 8 نكون هناك وانا ابي اروح عشان اشتري بدله حلوه لهالمناسبه لان الكل بيكون موجود ابي اتكشخ . ساره : ليش يا حلوه ما عندج بدله يعني ريم : لا عندي طبعا بس ابي اشترلي بدله يديده .شو بتين وياي ولا ؟ ساره : اكيد بيي ومره وحده اشترلي بعد ريم : خلاص عيل تعالي بسرعه لا تنسين ساره : لا حبيبتي البارحه ما تغدين ويا امايه حرام ما تهون علي بيي العصر وبنتشرى اوكي . ريم: خلاص حبيبتي اشوفج على خير بس تعالي بسرعه عشان نلحق اوكي بااااي وسقرت ساره من ريم وراحت عند امها تستشريها وطبعا الام وافقت . (بيت فاطه خالة ساره ) نوره : والله احس من زمان وما شفت بنت خالتي الغاليه ساره . هند وباستهزاااء : يعني شو من زمان من اسبوع كانت هني . نوره : تعرفيني متعوده عليها ولازم اشوفها بروح اتصل فيها . هند .: روحي روحي وانا بروح اتصل في منى نوره : انا منى الصرراحه ما عرف ليش ما ارتاح لها احسها حركات وشايفه عمرها . هند وهي معصبه : والله حبيبتي من لازم ترتاحيلها اهم شي انا ارتاحلها انزين . نوره : انزين انزين عفان الله بلاج شبيتي علينا تقولين انتي الاكبر مب كاني اكبر منج هند وتأشر على صبعها : بسنه وحده اكبريعني ما شي فرق وايد نوره : بسنه بشهر باسبوع المهم اكبر منج .خلا اروح اكلم ساره احسن من مجابله ويهج . هند وهي منقهره : روحي روحي وانا خلا اكلم منى احسن . واتصلت هند في صديقتها منى . وصح كلام نوره لان منى من النوع المتكبر وايد وعليها سوالف وحركات . هند : الو مرحبااااااااا منى : مراحب يا هلا بهنود هند : هلا فيج .شو وينج منى : ويني بعد في البيت قاعده عالمسنجر هند : انتي ما تملين من المسنجر منى : لا والله وناسه بس انت يلو تجربين بتعرفين كيف . هند : وين اجرب ما عندي مسنجر واصلا ما احب الكمبيوتر. هند : لانج ما تعرفين شو داخل الانترنيت حبيبتي اذا تبين تحبين وتعيشين بالغرام يلسي عالانترنيت والمسنجر . هند وعلامه تعجب في ويها : والله كيف منى : انتي تعالي بيتنا وبعلمج كل شي . هند : والله زين خلاص الحين بقول حق امايه وبيي بيتكم اوكي منى : اوكي يالله اترياج وطبعا هند للاسف كانت ساذجه وما تعرف صديقتها منى شو تقصد بهالكلام . اما ريم وساره راحو يتشرون عشان عزيمه اليوم . وهم يتشرون فجأه شافت ولد خالتها خــــــالد ومعاه صديقه محمد . خالد وهو مستغرب ومبطل عيونه : محمد محمد مب هاي ساره . محمد : أي ساره .؟ خالد : حبيبة القلب روحي وعمري قوم قوم خلا نروح هناك محمد : الله يعينا على الفلم الهندي وراح خالد ويا ربيعه محمد وخالد عيونه على ساره : خالد بصوت ونبرات كلها حب : انا احلم ولا اتخيل ساره موجوده ؟ ساره وهي منحرجه : هلا يا خالد شفت عاد الصدفه شو اخبارك يا ولد خالتي . خالد وفي خاطره ( لا تقولين ولد خالتي قولي خطيبي او حبيبي: تمام يسرج الحال يا بنت خالتي .ها شو تسوون هني |
|
#5
06-11-2006, 01:23 PM
| ||
| | ||
| مشاركة: مجنون سارة ريم ,وهي تشوفه بدلع وتقول: زين قلت شو تسوون زين جمعت قلت يمكن ما شفت غير ساره . وهني ساره ضحكت برقه : وخالد استحى وقال : لا افا عليج يا ريم كيف انسى ريم صديقه ساره المفضله اما محمد فماكان يتكلم ولا كلمه لانه عيونه على عيون ريم ومتخبل عليها وساكت .ريم حست بنظرات محمد واستحت وااايد اول مره احد يشوفها بهالنظرات . ساره : شو اخبارك محمد ؟ محمد في عالم ثاني عالم ريم . خالد : محمد محمد وين وصلت محمد : ها شو شو شو شو السالفه ؟ خالد : نحن اللي نسالك شو السالفه وين وصل تفكيرك محمد يرمس شوي شوي ويقول لخالد : معاها معاها ما تشوف كيف حلوه ورقيقه خالد : منو محمد : منو بعد صديقه حبيبة القلب خالد : ريم محمد : الله حتى اسمها حلو ريم شيخه الحريم خالد وهو يقرص محمد : بسك فضحتنا فضحتنا . ساره وهي مستغربه : بلاكم عن شو تتكلمون خالد : هاا لا لا ما شي ما شي محمد يقول انه يوعان بيروح ياكله شي. ساره :ها خلاص عيل نحن نترخص عشان ما نتاخر اوكي يا ولد خالتي مع السلامه . خالد : مع السلامه يا ساره واشوفج على خير محمد وعيونه على ريم : مع السلامه ساره وووووو وو مع السلامه يا يا ريم . ريم وهي منحرجه ومنزله راسها وبصوت رقيق : مع السلامه يا محمد . وراح محمد وخالد . وفرحت خالد غير لان شاف حبيبته واما محمد فكان سرحان في ريم ساره وهي ميته من الضحك ريم وهي مستغربه على ساره : شو فيج ليش تضحكين ؟ ساره وهي مبتسمه : لا حبيبتي سلامتج بس تذكرت نظرات الولهان على بعض الناس . وهني ريم فهمت شو تقصد وابتسمت : تصدقين سارونه . ما عرفت ان خالد عنده صديق بهالحلاه والجمال . ساره : طبعا لان خالد ما يمشي الا مع الحلوين مثله ريم : خلي عنج هالرمسه وقومي نتشرى يالله في بيت منى صديقه هــــــند: منى : زين والله ييتي تعالي قعدي عندي براويج اشياء تخبل. هند : والله شو هيه؟ منى : شوفي انا اكلم واحد عالمسنجر بس شو يموت فيه اتصدقين يحبني واي شي ابي ينفذلي. هند : وانتي تصدقين انه يحبج حبيبتي هذا اكيد يقص عليج منى : أي يقص علي اقولج يموت فيه بس انا مب بس اكلمه بالمسنجر اكلمه بعد بالتلفون . هند وهي مستغربه وتشوف منى بتعجب : بالتلفون ؟ منى كيف ترضين على عمرج تغازلين .يمكن يقص عليج . منى : والله انج فاضيه شو يقص علي اقولج يحبني وينفذلي كل شي وما انام الا بكلماته الحلوه والله حياتي صارت روعه وياه ..اااااااااه كيف احبه هند وهي بعدها مستغربه : يعني صدق تحبينه يعني ما يقص عليج . منى : اقولج احبه وبعد بيتزوجني تخيلي تاخذين واحد عن قصه حب والله روعه بس انتي لو تجربين هالشي بتشوفين هند : لا لا لا حبيبتي خليني بعيده عن هالسالفه شو تبين خالد اخوي يذبحني . منى : وهو اصلا شو عرفه .ما بيعرف عن شي انتي بس طيعيني وكلمي واحد وبتشوفين كيف حياتج بتتغير؟ هند: كيف ارمس واحد لا لا لا ما يستوي منى : يالغبيه هاي بس فتره خطوبه بعدين هو بيتزوج صدقيني . هند : ها مممممممممم يتزوجني مممممممم ماعرف خليني افكر منى : فكري يا عمري وانا بعطيج رقم صديق اللي اكلمه الحين وبتشوفين كيف حياتج بتتغيرللاحلى . هند وهي تفكر بالسالفه : ماعرف بس بفكر . ومنى فرحت لانها قدرت تتجذب على هند اللي بسهوله قصت عليها . وبعد ما ردت ساره وريم من السوق كانت الساعه تقريبا 6 مساء يعني ما تأخرو وايد وكان عندهم وقت عشان يتلبسون ويتمكيجون . وساره قررت انها تتلبس في بيت ريم عشان مره وحده يروحون ويا بعض لان كل اغراضها كانت وياها وراحت ساره والتلبست وكان لبسها اللون الاحمراللي ياي على شكل فستان بسيط ومكياجها بسيط وحلو وفتحت شعرها العسلي وكانت صدق كانها الورده بجمالها . أما فهد اخو ريم اللي ياي من السفر كان يبي يسوي مفاجأه لاخته ريم بقدمومه وكان يدور عليها وما لقاها وقال اكيد هي بغرفتها وهو ما يعرف ان ساره اللي بالغرفه وفجأه يوم دخل كانت ساره صاده لصوب المنظره يوم فهد دخل فهد تم يصارخ من الفرخه وقال : ريماااااااااااان مفاجأه وصدت ساره وشافت رجل غريب ما تعرفه وهي مستحيه ما تعرف شو تسوي لانها ما كانت متغطيه لا بالشيله ولا العبايه وفجأه سكتت ونزلت راسها وما تعرف شو تقول . اما فهد فكانت بيده هديه ومن المفاجاه او من جمال ساره الهديه طاحت من ايده تلقائيا من دون قصد وتم ساكت وهو يطالعها ويقول في خاطره ( انا أحلم ولا شو السالفه؟ من هذي هاي اكيد حووريه لا أي حوريه اكيد ملاك ما شفت احد بجمالها وهو يطالعها وساكت وهي منزله راسها . فهد بعد ما حفظ شكلها : ايييي مممممممممم اسمحيلي كنت ابي ابي ابي اختي ريم بس ما عرفت انج موجوده ؟ ساره على طول خذت الشيله وتغطت وهي مستحيه وويها صدق محمر وترد برقه : لا عادي انا الغلطانه لاني ما بندت الباب . ونزلت راسها فهد : اسمحيلي اختي وطلع من الغرفه وهو حاط راسه على غرفه اخته ويقول : واااااااااااااو شو هالجمال في حياتي ما شفت في جمالها . وبعدين يت اخته ريم اللي ما كانت تعرف ان اخوها فهد موجود وهي يوم شافته ريم فتحت عيونها وتمت تشوفه وتصااااارخ : فهههههههااااااااااااااااااد وتميت تصيح ويت وحضنت اخوها ريم وهي حاضنه اخوها بالحيل وتصيح وتقول : فهد وينك فهد ليش خليتني من 4 سنين بروحي تخليت عني يا اخوي .وتمت تصيح |
|
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| اربع اشياء تخليك تعرف انت مجنون ولا لا,, | عاشقة فلسطين | أرشيف المواضيع الغير مكتمله او المكرره او المنقوله و المخالفه | 16 | 05-14-2007 01:15 PM |
| المهلة الأخيرة (روايه مترجمه) | ahmed decor | أرشيف المواضيع الغير مكتمله او المكرره او المنقوله و المخالفه | 4 | 10-08-2006 12:57 AM |
| أصعب صدمة صارت معي أدخلو | عاشقة | أرشيف المواضيع الغير مكتمله او المكرره او المنقوله و المخالفه | 2 | 08-29-2006 07:31 PM |
| مأساة سارة .. | MAMDOUH | الحياة الأسرية | 8 | 07-25-2006 11:42 AM |
العرض العادي
