|
|
#191
05-30-2009, 08:08 AM
| ||
| | ||
| رد: حب ريما لنواف قصه رومنسيه كشخة الساعة 11 الصبح .. البنات صحوا وراحوا يسبحون ماعدا رياما الي راحت مع السواق للرياض واتفقت مع شركة بالوني..يجون للمزرعة (هذي شركة خاصة تسوي بالونات اشكال والوان للحفلات..) واشترت التورت والعصيرات والشاكلت والجاتوهات..واكيد مانست الهدية..كانت ساعة رولكس داخل علبة من الخشب السويدي الراقي..غلفتهم بالأبيض والأحمر..وفيها وردة احمر.. رجعت للمزرعة ولاقالت لأحد عن موضوع الحفلة غير البنات وأمها.. دخلت للفيلا بدون محد يدري ودخلت الاغراض .. الحفلة بستويها برى في بيت شعر كله قزاز ويطل على المسبح..جوا العمال حقين البالونات وجلسوا يصلحون البالونات اشكالها روعة للحفلة..راحت ريما بعد ماطلعوا العمال ويا البنات لبيت الشعر الهنوف:واااااااو روعة نوف:ايه تهبل الصراحة صدق حفلة ندى:ريما جنان ياليت لو كل الحفلات كذا.. ريما:صدق؟ ايه الحمد لله انا اخترت البلونات الونها ازرق وابيض علشان الهلال ندى:ياربي حتى هنا هلال نوف:والله انك جبتيها فكرتي صح!! ريما:على طاري الهلال مين فاز اليوم في مباراة الشباب؟ الهنوف:صارت سالفة تخيلي رحنا هناك ويجي فيصل ويهاوشني وش تبين هنا جايه عيب كلهم شباب..تفشلنا وطلعنا!!رجعنا للحريم...صارت الطقة براسي ندى:هههههههه والله لو تسمعين هواش فيصل نوف:مسح في كرامتها الارض ريما:ياحبي لك يالهنوف ههههههههههههه الهنوف:ابشرك كلهم تعادل 2/2 ريما:زين التعادل حل سلمي.. جلسوا البنات يرتبون الطاولة.. جابت ريما مفرش ابيض كان تل وفيه لمعة ونازل من عندها دناديش..وفوقها مفرش دانتيل لونه ازرق..وجابت شمعدانات وشموع كلها ازرق وابيض.. بخرت بيت الشعر ورتبته..ريما راحت تلبس ..لبست تنورة برمودا لونها اسود وفضي ..وبلوزة شيفون لونها اسود وفوقها بدي لونه فضي (هاي نك) مشجر..رفعت شعرها بمشبك فضي..!! راحت ريما عند قسم الرجال..وقفت عند باب المجلس..نواف يوم شافها قمز من مكانه خاف مو من عوايدها تجي..راح عندها.. نواف:خير وش فيك؟ ريما:مافيني شيء..بس جاية اعزمك حبيبي انت وعمامي نواف:تعزميني؟انا وعمامك؟على ايش؟ ريما:كل عام وانت الحب!!ذكرى ميلادك اليوم ..عقبال 100 سنة نواف ابتسم:اهاااااااا..وانت بخير..ياحياتي ياريومة والله ماتذكرت.. ريما:كنت حابة نحتفل في ذكرى ميلادك سوى..بالله قول لعمامي.. نواف:طيب دخل نواف وقال لعمامه وابوه والشباب .. ابو نواف:والله ان مرتك ذوق الي فكرت فيك نواف:ايه يالبى قلبها العم طلال:احم احم نواف:هههههه العذر والسموحة فيصل:نسى نفسة العم!! تركي:ولايهمكم راح نجي للحفلة نواف:يالله قوموا ابو ريما:والله ان رجولي تعورني والمسافة بعيدة روحوا انتم. نواف:لا عمي تكفى ابو نواف:انا بجلس مع اخوي احنا كبرنا على الحفلات تاركينها لكم يالشباب العم طلال:انا تراني بعدني شاب بس ابي اجلس مع اخواني هههههههه نواف:هههههههه والله انك اشب منا ياعمي.. عبد الرحمن:ياعيني ياعيني على ريما والله انها شيء!! نواف:توك تدري!! ريما راحت وقالت للحريم..الكل جلس يبارك لريما بذكرى ميلاد نواف وطبعاً ماسلمت من تعليقاتهم..الحريم رفضوا يروحون يقولون الحفلة شبابية..!! ريما وندى والهنوف ونوف كانوا ينتظرونهم داخل بيت الشعر طفوا الانوار... الشباب راحوا يمشون لبيت الشعر.. محمد:يوه نواف طالع بيت الشعر ظلام.. تركي:هماهم قالوا لك الحفلة فيها. نواف:ايه الريم قالت لي انه في بيت الشعر الي عند المسبح فيصل:يمكن بيت الشعر الكبير..؟ عبد الرحمن:ياذكي يقولك الي عند المسبح..وش فيك فيصل:اقول انطم بس نواف:تعالوا نفتح الباب.. اول مافتح الباب نواف شغلوا الانوار والأضواء الملونه الي تدور فوق ..وطاحت البلونات من فوق على نواف..والورق الملون نزل عليهم.. انبسطوا الشباب...على الحركة..كانت الحفلة رايقة..الوان والبلونات كانت فيه تورتة كبيرة فيها صورة نواف جنان شكلها...والتورتة الثانية مكتوب عليها كل عام وانت بخير عقبال 100 سنة.. البنات:كل سنة وانت طيب نواف نواف:تسلمون..وين ريما ريما:هذا انا نواف:تعالي عندي وقفت ريما جنب نواف وهم يقطعون التورتة محمد مانزل عينه على نوف يراقب تحركاتها..راحت تشيل صينية كبيرة كلها عصيرات ماقدرت لها ثقيلة بشكل.. محمد جاء وشالها من عندها محمد:ثقيلة اعطيني اياها!! نوف:لا معليش انا اشيلها محمد:لا انا قلت انا الي اشيلها مارضى على بنت عمي تتعب وانا موجود.. ابتسم لها..نوف ذابت معاه.. ريما راحت وشغلت اغنية غنوا لحبيبي.. غنوا لحبيبي وقدموا له التهاني.. في ذكرى ميلادة عساها مية عام.. افرح حبيبي واطلب اغلى الأماني.. الليلة ياعمري تناديك الأحلام.. الهنوف كانت تأكل عبودي ..تركي جاء وسحب الصحن من يد الهنوف تركي:ممكن انا أوكل عبودي؟ الهنوف:براحتك عبودي:ايه ايه انا احب تلكي (انا احب تركي) تركي:الهنوف شلون رجلك اللحين؟ الهنوف:لا الحمد لله..ماشاء الله عليك شكلك بتصير دكتور شاطر تركي:ههههه يسلموو شهادة اعتز بها.. فيصل وعبد الرحمن كانوا ياكلون ويعلقون على نواف الي اخذ ريما وطلعوا برى.. ريما اعطت نواف الهدية نواف:وبعد هدية؟ ريما:تستاهل اكثر يابعد عمري... نواف:عساني مانحرم منك..هديتي انك معاي..هذي اكبر هدية لي يالغلا ريما:ولا منك..يالله افتحها.. نواف فتحها وشاف الساعة..اعجبتة نواف:ياسلام والله ان ذوقك راقي..ممكن طلب؟ ريما:انت تآمر نواف:تسلمين ممكن تلبسيني اياها..؟ ريما:من عيوني.. ريما لبست نواف الي ماشال عيونه من عليها..يوم خلصت باسها من على خدها.... ريما انحرجت ودها لو الارض تنشق وتبلعها..مها شافتهم مها:عيب عليك يانواف انت ماتثتحي تبوثها(عيب عليك يانواف انت ماتستحي تبوسها) نواف:كيفي؟وانت ماتجين الا بالأوقات الزينه!! ريما:ههههههههه نواف:ايه اكيد اعجبك كلامها..!!ااكيد راح توقفين معها ريما:لا وش دعوى..قوم خيلنا ندخل لهم.. نواف:تونى ريما:لا فشلة احنا العازمين ونطلع ونتركهم؟ نواف:يالله علشانك.. دخلوا عندهم الكل كان مبسوط ويضحك والي يسولف والي ياكل والي يلعب في البالونات..يعني انواع الوناسة.... آخر لليلة لهم في المزرعة..لان بكرى السبت وراح يرجعون للرياض..!! البنات سهروا للفجر..ويوم صارت الساعة 4 العصر الكل مشى لبيته!!
__________________ أستبدل كلمة ( أف حر ) بـ : إلهي إني أعوذ بك من نار جهنم فهي أشد حراً  |
|
#192
05-30-2009, 08:09 AM
| ||
| | ||
| رد: حب ريما لنواف قصه رومنسيه كشخة الجزء الخامس والعشرون الفصل الثاني (الأخير) : : : محمد راح لأبوة في الشركة ودخل عليه..!! ابو نواف:ياحي الله محمد تو ما نورت الشركة محمد:منورة فيك يابو نواف..يبه انا جاي وحبيت اقولك ان خلاص موعد سفرتي نهاية الأسبوع هذا.. ابو نواف:طيب انا رتبت لك كل شيء من سكن وغيرة وصيت عليك واحد من اصدقائي عايش في كندا وانت كل يومين اتصل وطمنا عليك.. وكل شهر راح ارسل لك مبلغ تدبر فيه نفسك..وركز على دراستك وانا ابوك..!! محمد:الله يكثر خيرك يبه..وآسف اذا سببت لك تعب ابو نواف:لاتقول هالكلام يامحمد كل الشركات والمشاريع والمباني الي انت تشوفها راح تكون لك ولأخوك.. محمد:بعد عمر طويل..يبه الصراحة انا جاي وابي اكلمك في موضوع.. ابو نواف:تفضل تكلم انا اسمعك.. محمد:يبه انا راح اسافر وراح اطول بسفرتي يعني مو سنة ولا سنتين راح اتغرب عنكم مدة طويلة..وراح احتاج لأحد يراعيني يحرص علي يونسني بغربتي..وانا اللحين رجال وقادر على كل شيء بعون الله.. ابو نواف:وضح اكثر مافهمت المقصود.. محمد:بختصار ابي اتزوج ابو نواف:تتزوج؟ محمد:ايه اتزوج وش فيها؟ ابو نواف:بس انت بعدك صغير..!!والبنت بتسافر معك 8 سنين صعبة انها بتوافق؟ محمد:يبه انا صغير في نظرك انت تشوفني انا ونواف مهما كبرنا صغار..انا كبرت وفهمت وصرت عارف كل شيءوعارف مصلحتي وراح اسافر 8 سنين برى يعني راح تعلمني الغربة الكثير والكثير تكفى لاتحطم آمالي.. ابو نواف:لا ماراح احطم آمالك..انت في بالك وحدة معينة؟ محمد:بنت عمي طلال.."نوف"...اتمنى من كل قلبي تكون زوجة لي...وانت يايبة كنت تتمنى ان عيالك لبناتك..هذا نواف اخذ بنت عمي وانا اللحين حاب اخذ بنت عمي..ونوف اللحين في الثانوية العامة يعني بعمر ريما يوم تزوجت نواف مافيه خوف عليها وتربية عمي طلال..والبنت حابة تكمل تعليمها وتسافر برى دايماً عمي طلال يقول ان نوف تتمنى تسافر برى علشان تدرس..يعني انا لما اتزوجها راح اراعيها وتراعيني وراح نكمل تعليمنا برى..ومافيه خوف علي ان شاء الله ولا خوف عليها.. وش قلت يبه؟ ابو نواف:والله يامحمد انت فاجئتني بالموضوع ومدري كيف راح ارد عليك ..طيب قلت لأمي؟ محمد:لا انا حبيت افاتحك قبل..وامي اتركها علي.. ابو نواف:شوف ياولدي انا راح افكر بكلامك وارد لك بعدين.. محمد:خلاص..بس قبل لا أسافر ابي الرد..توصي شيء انا بروح ابو نواف:لا سلامتك.. ابو نواف كان يفكر بعمق(يالله كبر محمد وصار يفكر صح !!يبي يتزوج يارب تطول بعمري واشوف عياله..انا فرحت ان عيالي راح ياخذون بنات عمامهم..محمد ولدي من كان صغير وهو عقله سابق عمره كبير في عقلة واخلاقة..هذا نواف وفرحنا فيه وتحقق حلمي اني اشوفه هو وريما في بيت واحد..واللحين دور محمد..وماراح نلاقي مثل بنت طلال ويكفي ان الولد يبيها..!!لازم افاتح نواف بالموضوع واشوف وش رآيه...!!) اتصل ابو نواف على نواف الي كان في شغلة..وطلب منه يجي لشركتة اللحين..نواف على طول جاء لأبوة ودخل عليه..وقاله ابوه عن موضوع محمد..!!نواف كان متفاجئ في محمد وقرارة ماكان يتوقع بالسرعة هذي راح يتزوج.. ابو نواف:انا مادعيتك ياولدي وخليتك تترك شغلك الا ان الموضوع محيرني انا موافق على الفكرة بس لسى محمد ونوف صغار..وش رآيك انت؟ نواف:والله يايبه مادام محمد يبي الزواج ويبي نوف بالتحديد لاتحرمونه منها..لانه راح يتعذب كذا وترى هو صادق في كل كلمة قالها الغربة صعبة وتتعب الواحد انا يوم كنت في امريكا حسيت بلوعة فراقكم ماكان احد عندي يبسطني يهتم فيني اذا مرضت يحرص علي اذا ذاكرت بالامتحانات يراعيني.. ابو نواف:ايه انا معاك في كل كلمة قلتها..بس هم صغار وراح يتحملون مسؤولية كبيرة الزواج مو لعبة..وانا خايف طيشهم وصغر سنهم يضيعهم يعني مايقدرون يتحملون السؤون الزوجية هذي!! نواف:يبة محمد ماشاء الله عليه رجال بمعنى الكلمة كلنا عارفين ان محمد عند كلمتة يعني عارف تصرفاته ويعرف وش يبي ويفكر زين قبل لايقدم على خطوة ويدرسها بتمعن..والغربة يايبة راح تخليهم يتفاهمون مع بعض اكثر وراح يحسون ان كل واحد ماله غنى عن الثاني راح تقربهم من بعض وراح تفهمهم وتوعيهم.. ابو نواف:كلامك منطقي بس وش رآيك في بنت عمك؟ نواف:شوف انا ماعرف عنها اي شيء بس راح اسئل ريما عنها ابو نواف:انت قول لريما عن الموضوع وش رآيها في نوف وانا ابي اقول لأمك..!! نواف:خلاص اجل..يالله ان اسئذن تأخرت على الشغل ابو نواف:حياك الله... : : :
__________________ أستبدل كلمة ( أف حر ) بـ : إلهي إني أعوذ بك من نار جهنم فهي أشد حراً |
|
#193
05-30-2009, 08:10 AM
| ||
| | ||
| رد: حب ريما لنواف قصه رومنسيه كشخة نواف قال لريما عن الموضوع...!! نواف:هاه وش رايك بنوف؟ ريما:والله نوف اختي الصغيرة..ماشاء الله بنت عاقلة وثقيلة ورزينة وربي انها بعض الاحيان تعقلنا انا والهنوف وندى احنا الي اكبر منها..ويكفي بس انه يحبها وهي تحبة واذا سافروا راح يتعلقون بعض اكثر نواف:والله هذا كلامي..بس ماكأنهم صغار.؟ ريما:لا والله مهم بصغار محمد رجال ماشاء الله عليه يعني من يوم كنا صغار واحنا نعتبرة العاقل هو صحيح خفيف دم بس يعني مو رجة يكفي انهم راح يرحون للدراسة..بس وش توقع خالتي راح توافق.؟ نواف:هذا الي خايف منه..هي تحب محمد وآخر العنقود يعني ماتوقع تزوجة وهو صغير!! ريما:الله يستر والله ان نوف بنت ماتتفوت نواف:والله انتي الي ماتتوفتين!!والحمد لله والشكر انك من نصيبي!! : : : ابو نواف:وش قلتي يام نواف؟ ام نواف:هههههههه محمد يبي يتزوج؟ ابو نواف:لي ساعة اتكلم معاك وبالاخير تسئلين؟ ام نواف:مادري احس انه شايل فكرة الزواج من راسة..والله وطلع ولدي عاشق ومغرم ابو نواف:أي شكلة يحب بنت عمة ام نواف:خووش وطيب ليش ماقالي؟ ابو نواف:هو كان يبي يقولك بس انا فاتحتك بالموضوع قبلة ام نواف:انا ابيه هو خلاص راح أتكلم معاه.. اتصلت على محمد وقالت له يجي في للبيت جلسوا بالصالة..محمد على اعصابة خايف من ردة فعل أمة ام نواف:ماشاء الله ولدي يبي يتزوج محمد:هاه!! ام نواف:وش فيك مرتبك؟ محمد:لامانيب مرتبك..يمة وش رايك؟ ام نواف:اصلاً انا يوم السعد لما اشوفك انت واخوك كل واحد مع مرته وعيالة محمد:يعني موافقة؟ ام نواف:ايه ماعندي مانع..وبعدين انا فرحانة علشان ماتجلس بروحك يعني تلاقي الي يراعيك ويداريك محمد راح وباس راسه امه:ياحبي لك يايمة..عسى الله مايحرمني منكم محمد:متى نخطب؟ ابو نواف:هههههههه وش فيك مستعجل؟ محمد:ابي اسافر وانا مرتاح ابي ارتب كل شيء!! ابو نواف:خلاص اجل بكرى ان شاء الله.. محمد:تسلم يابو نواف نواف وريما جوا للصالة.. ام نواف:باركتوا لمحمد يبي يخطب.. نواف:لا لا الف مبروك يابو سعود محمد:الله يبارك فيك ريما:مبروك محمد محمد:الله يبارك فيك.. نواف:ومتى ناوين تروحون؟ ابو نواف:اخوك مستعجل يبي بكرى علشان نهاية الاسبوع راح يسافر كندا ام نواف:ياربي لاتجيبون طاري السفر!! ريما:ياخالتي هذا حال الدنيا تودعين من تحبين وتلتقين فيهم ان شاء الله ونفرح فيه وفي شهادته محمد:بس انتم ادعوا لي.. الجميع:الله يوفقك...!! : : : راح ابو نواف ونواف ومحمد وابو ريما لبيت العم طلال يخطبون نوف لمحمد..!! العم طلال كان مصدوم وحس انهم صغار على الزواج بس ابو نواف وابو ريما وقفوا مع محمد..!! العم طلال:الرآي رآي نوف..!!والله انا سعيد ان بنتي راح تروح لولدي ابو نواف:ايه حقك وخل البنت تفكر عدل.. ابو ريما:ومحمد رجل بمعنى الكلمة.!! نواف:الله يكتب الي فيه الخير.. عبد الرحمن:والله انا المصدوم مو قادر استوعب محمد يبي يتزوج ومين اختي؟ نواف:ههههههه ليش وش فيك علشان ماتستوعب عبد الرحمن:والله مدري مو قادرة الفكرة تدخل براسي محمد:لازم تدخل ياولد عمي العم طلال:خلاص بعد بكرى راح نرد لكم.. ابو نواف:على خير يالله احنا نستئذن العم طلال:وين تونى ماتعشيتوا؟ ابو ريما:والله انا معزوم عند الجيران ابو نواف:المرة الجاية ان شاء الله الجايات اكثر العم طلال:وانت نواف؟ نواف:لا انا مرتي بالبيت تنطرني العم طلال:ههههههه والله ان ريما لعبة فيك لعب نواف:يحق لها بنت عمي ابو ريما:الله يوفقكم..!! نواف:آمين ياعمي.. ام نواف كانت بالحديقة تنطرهم هي وريما..!! ام نواف:توقعين وش صار؟ ريما:ماصاير الا كل خير..نوف ماراح تلاقي مثل محمد ولد عمها راح يحفظها ويصونها ام نواف:الله يسمع منك يابنتي ريما:هذولا هم جو.. ابو نواف ومحمد ونواف لكهم جلسوا بالحديقة ويتكلمون عن الي صار في بيت ابو عبد الرحمن..وجلسوا تقريباً ساعتين نواف:يالله انا وريما نستئذن نبي نطلع شوي ابو نواف:براحتكم.. راحت ريما لبست عبايتها ونزلت تحت لعند نواف الي راكب في السيارة ينتظرها..!! ريما:حبيبي وين بنروح؟ نواف:ما عليك راح اوديك لمكان اتمنى يعجبك!! ريما:يعني ماراح تقول؟ نواف:ايه ماراح اقول ريما:طيب زعلت عليك نواف:مايهون علي زعل الغالية.. ريما:ايه واضح نواف:هههههههه حبيبتي سربرايز والله ريما:نصبر ونشوف وصلوا لعند بيت يبنى يعني لحد اللحين مو مكتمل كان كبير ورايقة الوانه وشكلة وتصميمة نواف:انزلي ريما:وين؟ نواف:للبيت.. ريما: اكيد احد البيوت الي صممتها صح!! نواف:ياعيني عليك ذكية مرتي..بس انزلي ريما:شلون انزل شوف البيت الإضاءة شغالة اكيد اهله فيه نواف:اهله جالسين بالسيارة مايبون ينزلون ريما:ليش مايبون......وش تقول؟ نواف:ياطويلة العمر هذا بيتنا.. ريما:لا اكيد تمزح..من متى؟وكيف؟ نواف:من اول ماخطبتك هذي ارض حقتي وابوي ساعدني في البناء وانا صممت الديزاين حقه..بس بقى الاثاث واكيد كل وحدة تحب تختار اثاث مملكتها لحالها..!! ريما:يابعد قلبي يانواف..كل هذا مسوية وانا مدري..عساني مانحرم منك ولامن حنانك علي..!! نواف:شكلنا مطولين بالسيارة ريما:هههههه يالله ورينا جوا البيت نواف راح وفتح باب السيارة لريما نواف:تفضلي يالغلا.. نواف:ادخلي برجلك اليمين.. ريما:تآمر آمر نواف:تسلمين... البيت كان حلو بشكل...كبير وفيه حديقة حلوة شكلها مرتبة والوان البيت كانت جنان والرخام مغطي على معظم التصميم ..والون الذهبي على البرونزي معطي للبيت منظر الفخامة كان التصميم يرجع للعصر الروماني ..!! ريما:يااااي نواف ماتوقعته كذا..عندك ذوق مسكت!! نواف:اكيد عندي ذوق دامك جنبي..ومعاي.. ريما:فديتك دايماً تاكلني بكلامك.. نواف:هههههه..تعالي شوفي المطبخ.. ريما:ياسلام عليك والله انك احلى وارقى مهندس بالدنيا كلها نواف:اثمن شهادة حصلت عليها من اثمن جوهرة امتلكها ريما استحت..!! نواف:حبيبتي تعالي شوفي الغرفة هذي اعطيني رآيك فيها.. ريما:تهبل بس حقت ايش؟ نواف:حق النونو الي راح يجي ان شاء الله ريما ارتبكت:ايه ان شاء الله نواف:يالله انا ولهان على البزارين ريما:لا تستعجل تونى بأول الطريق نواف:انا الي يقولي أنك حامل له البشارة!! ريما:اجل محد راح يبشرك غيري ههههههه نواف:هههههههه ريما:بالله ابي اشوف غرفة النوم نواف:يالله يالغلا ريما اعجبها التصميم كان غريب وناعم وفخم بنفس الوقت...تخبلت على الوان غرفة النوم كانت لونها عنابي ونحاسي..!! : : :
__________________ أستبدل كلمة ( أف حر ) بـ : إلهي إني أعوذ بك من نار جهنم فهي أشد حراً |
|
#194
05-30-2009, 08:10 AM
| ||
| | ||
| رد: حب ريما لنواف قصه رومنسيه كشخة بعد مرور أسبوع... نوف وافقت على محمدلكن ابوها اشترط انه مايصير أي شيء رسمي مجرد خطبة والملكة والزواج بعد الثانوية العامة..محمد انبسط كثير وده لو يطير من الفرحة..!! وافق على الشرط بدون أي تردد..!! : : : ريما:نواف وش رآيك بكرى نعزم اهلنا عمامي في بيت ابوك..وتكون العزيمة منا احنا..يعني وداعية لمحمد مو بكرى راح يسافر؟ نواف:والله فكرة..ماخطرت في بالي..!! ريما:بس اسمع مابي خالتي ولا عمي يتعبون انفسهم معانا يعني العزيمة احنا الي راح نقوم فيها!! نواف:فديت قلبك ماتبين تعبين امي وابوي معاك..بس الشغل كله يصير عليك وانا ماستحمل اشوفك تتعبين..؟ ريما:لا ياقلبي الخدامات راح يساعدوني..!!وش قلت..؟ نواف:اوكي على بركة الله..بكرى بكرى..!! : : : تركي:ياحليلة عبودي الصغير شيطاني ندى:هههههه ايه وش حليله تركي:وش اسم امه.. ندى:نورة تركي:تصير عمت ريما؟ ندى:وش رآيك..!! تركي:ايه بس زيادة تأكيد ندى: عساك انبسطت؟ تركي:أي والله الشباب فلّه ندى:ومين اكثر واحد ارتحت له؟ تركي:الكل والله طيبين ومحترمين..بس اكثر شيء فيصل ندى: فيصل ولد نورة؟ تركي:ايه ندى:ههههه هذا الي مخوف الهنوف..خارشها (مخوفها) تركي:ندى..الهنوف وش دخلت قسم في الجامعة؟ ندى:اها سئلتني عن الهنوف انا اقول وش فيه الولد يلف ويدور كان جايبها من الآخر تركي:سخيفة..انا قايم ندى:لحظة لحظة يالحبيب استنى وش فيك زعلت امززززح ياولد هياء تركي:ياكره مزحك ثقيل ماينبلع ندى:مقبولة منك يادكتور تركي:الا على طاري الدكتور ..ماجد اليوم لصق فيني ياكرهه ثقيل مثل بعض الناس..يعني الطيور على اشكالها تقع <يحب يرفع ضغطها ندى قمزت من مكانها وجت عندة:احلف..وش قالك؟وش تكلمتوا فيه؟قال شيء عني؟ تركي:ههههههههههههههههه ندى:يالله تكلم تركي:انا كل يوم اجلس معاه.. ندى:طيب ايش تكلمتوا فيه؟!! تركي:بكل شيء ندى:تكفى لاتقهرني حدد أي موضوع تركي:وحدة×وحدة ندى:يالله عاد والله لو اترجاك الجنة تركي:يسلم عليك!! ندى:الله يسلمك ويسلمة... الجدة هياء جت عندهم.. الجدة هياء:وش في صوتك واصل لآخر الدنياء تركي:هههههههههههه ندى:لا ابد سلامتك..يمة وش رآيك بشيخة الجدة هياء:أي شيخة؟ اخت ماجد؟ ندى:عليك نور!!ماتصلح حق تركي؟ تركي عصب من كلامها الجدة هياء:والله مافكرت فيها..وش حليلها..!! تركي:سخافة..!!انا ماقلت ابي أتزوج ولاشيء..وبعدين مهوب انتي الي تختارين لي امي الي تختار لي ..يالله انا طالع الجدة هياء:وقف تركي..وش فيك عصبت..توك وش حليلك تضحك وتسولف..!! ندى:خليه يروح!! ندى(وآخيراً عرفت ياتركي انك حاط الهنوف في بالك..بس طيب ان ماخليتك تجي لعندي وتقولي ياندى احبها واخطبوها لي ماكون انا ندى ال0000..!!) : : : الهنوف:هلا ريمو ريما:هلا بك الهنوف:شخبارك؟ ريما:تمام انتم شخباركم..عمتي وعبودي شلونهم؟ الهنوف:كلهم بخير..لحظة آآآآآي وجع يادب ريما:هههههه شوي شوي اذني راح تنفجر من صراخك الهنوف:وش اسوي هالحمار عبودي يجر شعري!! ريما:ههههههه يالبى قلبه.. الهنوف:محد خربه علينا غيرك انتي وزوجك الي مدلعينهم ريما:يستاهل الهنوف:مدري اذا جبتوا بزارين وش راح يصيرون شكلهم دلوعين ريما:ههههه اكيد عيالي وعيال نواف وبعدين كلنا نحب الاطفال الهنوف:المفروض تكتبون عليهم "ممنوع اللمس والاقتراب" ريما:هههههههه لا عاد وش دعوى؟؟ الهنوف:اقول ياحليلها نوف مانيب مصدقة انها بتتزوج والله خطيرة العيال كبرت!! ريما:ههههههه انتي منجنه شكلك الهنوف:بعذري لو انجن اجل وحدة كبري تتزوج والي اصغر مني مخطوبة..وانا جالسة لاشغل ولا مشغلة ريما:اهاااااا قولي كذا من أول..لا تخافين ولد الحلال راح يجيك الهنوف:متى ياحسرة..ابيه يجي بسيكلة ابو كفرتين ويخطفني من باب اهلي ريما:ههههههههههه يالمرجوجة اخبر فارس الاحلام يخطف البنات على فرس مو سيكل.؟ الهنوف:كيفي والله فارس احلامي مو احلامك.. ريما:اساساً فيه ناس حاطين عينهم عليك<تقصد خالها تركي الهنوف:منهم؟ ريما: "آي كانوت" مقدر اقولك الهنوف:تكفين ريموش ريما:ريموش بعد هذي احلمي ماراح اقولك..اسمعي تعالي بكرى بدري نبي ننبسط الهنوف:اوكي باي ريما:باي : : : نوف كانت جالسة على الكنبة في غرفتها...!!تفكر في بكرى.. نوف(يالله يعني هذي وداعية لمحمد..وش اسوي انا بكرى اكيد الانظار راح توجه لي!! ..ماراح اروح للعزيمة بكرى..والي يصير يصير..!!) وداعيه يا آخر ليلة تجمعنا وداعية وداعيه اعز الناس يودعنا ليلة ويا عساك تعود..ليلة.. عسى الله يصبر الموعود.. أنا بعدك عمر مفقود دنيا بلا معنى..بلا معنى.. لحظة يا بقايا الليل..لحظة لحظة ما بقى بالحيل لحظة!! بالهدا يا ليل ..ما بقى بالحيل لحظة.. حسيت اني بنحرم شوفي.. ما أقدر أوادع قطعة من جوفي.. قال الوداع قال.. لحظة وداع قال وهلت الدمعة وسال الكحل فوق السواطر كل دمعة من عيونك اشتريها بألف خاطر انت غربة..وانا بدروبك محطة.. آه ياحظي ما وصل يمي وخطى قال الوداع قال : : : نوف قررت تلعب دور المريضة..علشان يعذرونها من الروحة لبيت عمها سعود..!!مالقت حل غير هذا يفكها ..!! ام نوف:يالله نوف قومي انزلي ابوك واخوك ينتظرونا برى.. نوف:يمة ما أقدر اروح معاكم.. ام نوف:ليش وش فيك؟ نوف:مادري احس بعوار في بطني.. ام نوف:من متى العوار؟ نوف:امس بالليل شكل الي فيني برد لاني اخذت شاور امس وعلى طول نمت!! ام نوف:دايماُ اقولك اقصري التكييف..طيب فشلة وش نقول لعمامك..؟وبعدين ريما هي الي عازمة!! نوف:وش فشلتة البنت مريضة خلاص وخلصنا!! ام نوف:بس الليلة ولد عمك محمد راح يسافر يعني لازم كلنا نودعة!! وخصوصاً انتي!! نوف (آه يمة لو تدرين ان هذا السبب الي ماخلاني اروح..!! ام نوف:خلاص اجل اللحين بروح اجيب لك حبوب يخفف العوار..اشربي شاي او أي شيء دافئ ونامي وانت متغطية زين.. واقصري التكييف للمرة المليون اقولك!! نوف:ابشري يمة..يالله روحي تأخرتي.. ام نوف:يالله خلي بالك على نفسك..مع السلامة نوف:الله يسلمك.. : : :
__________________ أستبدل كلمة ( أف حر ) بـ : إلهي إني أعوذ بك من نار جهنم فهي أشد حراً |
|
#195
05-31-2009, 01:30 PM
| ||
| | ||
| رد: حب ريما لنواف قصه رومنسيه كشخة
:00:  :00: :00:لالالالالالالالالالالالالالالالالالالالا ماعتقد انه الجزء الاخير سوري كمليها وش صار على نوف ومحمد وندى وماجد والهنوف وتركي وابطال القصه نواف وريما بصراحه انا دخلت جوء مع القصه من اول ماكتبتيهاكمليها بليز ولا بسوي زي هاذا |
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| صور أنمي رومنسيه روعة | مؤيد00 | أرشيف المواضيع الغير مكتمله او المكرره او المنقوله و المخالفه | 19 | 07-29-2012 08:14 PM |
| صور رومنسيه | تئلمت بس تعلمت | أرشيف المواضيع الغير مكتمله او المكرره او المنقوله و المخالفه | 14 | 03-24-2012 02:58 PM |
| هدايا بسيطه..لكنها رومنسيه قدمها لنصفك الآخر ..؟ | كايتو كايد | آدم ~ | 36 | 12-03-2009 12:21 PM |
| صور انمي رومنسيه | دمعة ساكورا | عيون التهاني و الترحيب بالأعضاء المستجدين | 12 | 04-27-2009 04:49 PM |
| صور رومنسيه ولا احلى | منتوهي مره اخرى | أرشيف المواضيع الغير مكتمله او المكرره او المنقوله و المخالفه | 10 | 10-12-2008 07:06 PM |
العرض العادي
